Hulda Nĩweanĩisye Mũvango Wake
KEKA nĩwaendaa kũtembea kathamanĩ ketawa Sangir Besar ke Indonesia myaka yĩana ũna mĩvĩtu, waĩ ũtonya kwona eĩtu-a-asa maitũ atatũ ũtee wa ũkanga. Ũmũnthĩ mesĩkĩe mũno kathamanĩ kau nũndũ wa wĩa wa kũtavanyʼa, vala matetheeasya andũ kũelewa Mbivilia. Ĩndĩ myakanĩ ĩsu, meekaa ũndũ wĩ kĩvathũkanyʼo vyũ.
Kathama ka Sangir Besar kala ke ngalĩko ya ĩũlũ ya Indonesia
Mbee, malikaa kĩwʼũnĩ makakolanyʼa mavia manene na maimatwaa ũtee wa ũkanga. Amwe meethĩawa me manene ta mũvĩla wa maaũ. Ĩtina wa ũu, nĩmekalĩlaa tũvĩla twa mbwaũ na mayatũanga mavia asu na nyũndo nginya maininĩva kwĩ matumbĩ ma ngũkũ. Na ĩndĩ nĩmeekĩaa tũvila tũu ndoonĩ na mayiikua mesĩle ngasinĩ nginya vala mekalaa. Mavika, meekĩaa mavia asu mĩvukonĩ mĩnene ĩtonya kũvakĩĩwa malolinĩ nĩ kana makatũmĩwe kũseũvya malelũ.
Hulda aikolanyʼa mavia ũtee wa ũkanga
Ũmwe wa eĩtu-a-asa asu etawa Hulda. Nĩwe watũmĩaa ĩvinda yingĩ wĩanĩ ũsu kwĩ ala angĩ nũndũ ndeethĩawa na maũndũ maingĩ meũmũvĩngĩĩsa. Atũmĩaa mbesa syonthe ila wakwata kwĩanĩsya mavata ma mũsyĩ wake. Ĩndĩ ĩvindanĩ yĩu, nĩwendaa kũmbanyʼa mbesa imwe kwondũ wa ũndũ ũngĩ. Endaa kũthooa tambuleti nĩ kana atũmĩae vulongulamu ya JW Library®. Hulda nĩweesĩ kana vitio na maũndũ angĩ ala me vulongulamunĩ ĩsu nĩmekwaĩlangya ũtavanyʼa wake na maituma aelewa Mbivilia nesanga.
Hulda athũkũmie masaa elĩ kĩla kwakya kwa ĩvinda ya mwei ũmwe na nũsu, na aatũangie mavia meanĩtye kusũsya kaloli. Ĩtina, nĩwakwatie mbesa ianĩtye kũthooa tambuleti.
Hulda akwete tambuleti yake
Aisye: “O na kau nĩnanoie mũno na nĩnaalawʼa nũndũ wa kwatũa mavia, kyalya kĩu kyoolile na mĩtũkĩ yĩla nambĩĩie kũtũmĩa tambuleti ĩsu kwaĩlangya ũtavanyʼa wakwa na kwĩyũmbanĩsya maũmbano ma kĩkundi ndeũthĩnĩka.” O na aĩtye kana tambuleti ĩsu nĩyamũtetheeisye yĩla ũwau wa COVID-19 wambĩĩie nũndũ maũndũ onthe ma kĩkundi meekĩawa syĩndũnĩ ta simũ. Twĩtana mũno kwona Hulda eanĩisye wendi wake.