Yesũ “Nĩweemanyĩisye Kwĩthĩwa e Mwĩwi”

Yesũ ethĩĩtwe aimwĩwʼa Yeova kuma tene. (Yoa. 8:29) Kwoou yo nĩkĩ Mbivilia yaĩtye: “Nĩweemanyĩisye kwĩthĩwa e mwĩwi kumana na maũndũ ala mamũkwatie”?—Evl. 5:8.

Yĩla Yesũ waĩ vaa ĩũlũ wa nthĩ, nĩwakwatiwe nĩ maũndũ mataĩ maamũkwata e ĩtunĩ. Kwa ngelekanyʼo, aeiwe nĩ asyai mamwendete Yeova ĩndĩ maĩ na naĩ. (Lũka 2:51) O na ĩngĩ, nĩwathĩniwʼe mũno nĩ atongoi ma ndĩni ala maĩ alũsani na anene ma silikalĩ mataatĩĩaa ũsili wa katĩ. (Mt. 26:59; Mlko. 15:15) Eka ũu, “nĩweenyivisye na eethĩwa e mwĩwi kũvikĩa kĩkwʼũ,” Ĩĩ, kĩkwʼũ kĩ woo mũno.—Avi. 2:8.

Maũndũ asu mamanyĩisye Yesũ kwĩthĩwa e mwĩwi kwa nzĩa ũtaĩ aaĩmanyisya e ĩtunĩ. Nũndũ wa ũu, aĩ atonya kũtwʼĩka Mũsumbĩ na Mũthembi Mũnene, ũla ũtonya kũtwĩwʼĩa tei. (Evl. 4:15; 5:9) Yesũ nĩweethĩiwe e wa vata mũnango kwa Yeova ĩtina wa kũeka maũndũ ala mamũkwatie mamũmanyĩsye kwĩthĩwa e mwĩwi. O naitũ no twĩthĩwe twĩ ma vata mũnango kwa Yeova na tũyĩthĩwa tũtonya kũtũmĩwa kĩandanĩ o na kĩva kĩla ũtonya kũtũnenga twaendeea kwĩthĩwa twĩ ewi o na yĩla twakwatwa nĩ mathĩna.—Yak. 1:4.