Ngai e Ĩsyĩtwa?

Ũndũ Mbivilia yaasya

Kĩla mũndũ e ĩsyĩtwa. Tyo ũndũ waĩle o nake Ngai akethĩwa na ĩsyĩtwa? Kwĩthĩwa na masyĩtwa na kũmatũmĩa nĩ maũndũ ma vata nĩ kana andũ methĩwe anyanya. Vaĩle kwĩthĩwa vailyĩ oou nĩ kana twĩthĩwe anyanya na Ngai.

Ngai aĩtye ũũ: “Ninyie Yeova, nĩyo syĩtwa yakwa.” (Isaia 42:8) O na kau e masyĩtwa maingĩ ma ũnene, ta “Ngai Mwene Vinya Wʼonthe,” “Mwĩaĩi Ngai,” na “Mũmbi,” nũthoketye ala onthe mamũthaithaa matũmĩe syĩtwa yake mwene, kwonanyʼa kana nĩwonaa me ma vata.—Mwambĩlĩlyo 17:1; Meko ma Atũmwa 4:24; 1 Vetelo 4:19.

Nthĩnĩ wa Mbivilia mbingĩ, ĩsyĩtwa ya Ngai nĩyonekaa ĩandĩkonĩ ya Kuma 6:3. Mũsoa ũsu waĩtye: “Nakwa namũmĩlĩle Avalaamu, na Isaka, na Yakovo, nĩ Ngai Mwene Vinya Wʼonthe; ĩndĩ na syĩtwa yakwa Yeova ndyaamanyĩka kwoo.”

Yeova nĩyo ĩsyĩtwa ya Ngai yĩla yĩthĩĩtwe yĩitũmĩka kwa myaka mingĩ kwa kĩthyomo kya Kikamba. O na kau asomi aingĩ mendete kũtũmĩa ĩsyĩtwa “Yahweh,” Yeova nĩyo ĩsyĩtwa yĩla yĩsĩkĩe mũno. Kĩlungu kya mbee kya Mbivilia kĩyaandĩkwa na Kĩsũngũ ĩndĩ kyaandĩkiwe na kĩthyomo kya Kĩevelania, kĩla kĩsomawa kuma kwʼoko kwa aũme. Kĩthyomonĩ kĩu, ĩsyĩtwa ya Ngai yaĩ na nthoo inya, יהוה. Nthoo isu inya sya Kĩevelania, ila iungamĩe YHWH, syĩtawa Tetragrammaton.