Ũsumbĩ wa Ngai Nĩ Kyaũ?

Ũndũ Mbivilia yaasya

Ũsumbĩ wa Ngai nĩ silikalĩ yĩ vo yambĩĩiwʼe nĩ Yeova Ngai. “Ũsumbĩ wa Ngai” nowʼo Mbivilia ĩwĩtaa “ũsumbĩ wa ĩtunĩ,” nũndũ ũkasumbĩka kuma ĩtunĩ. (Maliko 1:14, 15; Mathayo 4:17) O na kau ũsumbĩ ũsu nũvwʼanene na mosumbĩ ma andũ kwa nzĩa mbingĩ, nĩwʼo mũnene vyũ.

• Ala mesumbĩka. Ngai nũmũnyuvĩte Yesũ Klĩsto ethĩwe Mũsumbĩ wa Ũsumbĩ wa Ngai na nũmũnengete ũkũmũ ũvĩtũkĩte wa mũsumbĩ o na wĩva. (Mathayo 28:18) Yesũ atũmĩaa vinya wake kwĩka maũndũ maseo, na nĩwoonanisye kana we nĩ Mũsumbĩ ũtonya kwĩkwatwʼa na wĩ tei. (Mathayo 4:23; Maliko 1:40, 41; 6:31-34; Luka 7:11-17) Atongoewʼe nĩ Ngai, Yesũ nĩwanyuvie andũ kuma kĩla mbaĩ ala ‘makasumbĩka nthĩ’ vamwe nake me ĩtunĩ.—Ũvuanʼyo 5:9, 10.

• Ĩvinda ya kũsumbĩka. Kĩvathũkanyʼo na mosumbĩ ma nthĩ ala mokaa mavĩtĩte, Ũsumbĩ wa Ngai ‘ndũkanangĩka tene na tene.’—Ndanieli 2:44.

• Ala mesumbĩkwa. Onthe ala mekaa kwenda kwa Ngai nĩmatonya kwĩthĩwa me ungu wa Ũsumbĩ wa Ngai, o na ethĩwa nĩ ma mbaĩ yĩva kana kuma nthĩ yĩva.—Meko ma Atũmwa 10:34, 35.

• Mĩao. Mĩao ya Ũsumbĩ wa Ngai ndĩvataa andũ o kwĩka ũthũku. Mĩao ĩsu ĩtetheeasya andũ kwĩthĩwa na mwĩkalĩle mũseo vyũ. Kwa ngelekanyʼo, Mbivilia yaasya: “Mwende Mwĩaĩi Ngai waku na ngoo yaku yonthe, na thayũ waku wʼonthe, na kĩlĩko kyaku kyonthe. Ũu nĩwʼo mwĩao ũla mũnene na wa mbee. Na wa kelĩ ũvwʼanene nawʼo, nĩwʼo ũũ, Mwende mũtũi waku o tondũ wĩyendete.” (Mathayo 22:37-39) Nũndũ wa kũmwenda Ngai na mũtũi ala me ungu wa Ũsumbĩ wa Ngai mekaa maũndũ masũanĩĩte ala angĩ.

• Momanyĩsyo. O na kau Ũsumbĩ wa Ngai nĩwendaa ala me ungu wawʼo maatĩĩe myolooto yĩ ĩũlũ mũno, nũmamanyĩasya ũndũ matonya kũmĩatĩĩa.—Isaia 48:17, 18.

• Kĩeleelo kya kũsumbĩka. Kĩeleelo kya Ũsumbĩ wa Ngai ti kũthusya asumbĩki na kũtia ala masumbĩkĩtwe me ngya. Vandũ va ũu, ũkeanĩsya kĩeleelo kya Ngai na ũiete valatiso kũũ nthĩ kwondũ wa ala mamwendete.—Isaia 35:1, 5, 6; Mathayo 6:10; Ũvuanʼyo 21:1-4.