Nĩkĩ Ngũsĩ sya Yeova Itatũmĩaa Ngelanyʼo Ĩla Iũthaitha?

Andũ aingĩ mũno ĩũlũ wa nthĩ maĩkĩĩaa kana ngelanyʼo nĩyo ĩmanyĩthanasya Mũklĩsto. Ĩndĩ o na kau ithyĩ Ngũsĩ sya Yeova twĩ Aklĩsto, tũitũmĩaa ngelanyʼo. Nĩkĩ?

Kĩtumi kĩmwe nũndũ Mbivilia nĩyonanĩtye kana Yesũ ndaambwa ngelanyʼonĩ ĩndĩ ambiwe mũtĩnĩ. Na ũndũ ũngĩ nĩ kana Mbivilia nĩkanĩtye Aklĩsto vyũ ĩkamea ‘nĩmakĩe ũthaithi wa mĩvwʼanano.’ Nzĩa ĩmwe ya kwĩka ũu nĩ kũlea vyũ kũtũmĩa ngelanyʼo ĩla tũũthaitha.​—1 Akolintho 10:14; 1 Yoana 5:​21.

Kĩla kya vata nĩ kana Yesũ aisye: “Kwondũ wa ũu andũ onthe makamanya kana mwĩ amanyĩwʼa makwa, ethĩwa mwĩthĩwa na wendo ĩnywʼĩ kwa inywʼĩ.” (Yoana 13:34, 35) Kwa ndeto isu, Yesũ oonanisye nesa kana wendo wa wʼo na wa kuma ngoonĩ nĩwʼo ũkatuma andũ mamanya naaũ aatĩĩi make ma wʼo, ĩndĩ ti ngelanyʼo kana mũvwʼanano ũngĩ o na wĩva.