Aeveso 3:20—‘Ngai e na Ũtonyi wa Kwĩka Maũndũ Maingĩ Kũvĩtũka Onthe Ala Tũvoyete Kana Kũsũanĩa’

“Na kwa ũla, kwosana na vinya wake ũla ũtethasya wĩa nthĩnĩ witũ, ũtonya kwĩka maũndũ maingĩ mũno kũvĩtũka ala tũvoyete na kũsũanĩa, kwake nĩkwĩthĩwe nguma.”—Aeveso 3:20, 21, Ũalyũlo wa Nthĩ Nzaũ wa Maandĩko ma Kĩkiliki ma Kĩklĩsto.

“Kwa ũla wĩ na ũtonyi wa kwĩka maũndũ maingĩ kũvĩtũka onthe ala tũvoyete kana kũsũanĩa, kwosana na vinya ũla ũthũkũmaa nthĩnĩ waitũ, kwake nĩkwĩthĩwe nguma.”—Aeveso 3:20, 21, King James Version.

Kĩla Ĩandĩko ya Aeveso 3:20 Yonanasya

Mũtũmwa Vaulo aeleetye mũĩkĩĩo wake kana Ngai e na ũtonyi wa kũsũngĩa mboya na kwĩanĩsya mavata ma athũkũmi make kwa nzĩa o na matesa kũsũanĩa. O na nũtonya kũsũngĩa mboya syoo kwa nzĩa sya kwendeesya mũno kũvĩtũka ũndũ mekwĩkwatasya.

“Na kwa ũla, kwosana na vinya wake ũla ũtethasya wĩa nthĩnĩ witũ.” Mũsoa wa 21 wĩtũmanyĩsya kana Yeova Ngai nĩwe wĩtĩtwe “ũla.”a Vaulo aandĩkie atĩĩ: “Kwake nĩkwĩthĩwe nguma kwĩsĩla kĩkundi na kwĩsĩla Klĩsto Yesũ.” O vamwe na ũu, Ngai nũtũnengae vinya, kana ũtonyi, ũla tũkwenda nĩ kana twĩke kwenda kwake.—Avilivi 4:13.

Mũsoanĩ wa 20, mũtũmwa Vaulo awetete ũndũ wa mwanya ĩũlũ wa ũtonyi wa Yeova wa kũtetheesya athũkũmi make. Ĩvuku yĩmwe yĩyĩelesya ndeto “ũla,” yaĩtye: “Mũsoa ũũ ũyĩthĩawa ũyonanyʼa kana Ngai no eke ũndũ mũna kana no awĩanĩsye, ĩndĩ wĩthĩawa ũyonanyʼa kana e na ũtonyi wa kũwĩka.” Mũnyanyau no ethĩwe ayenda kũũtetheesya, ĩndĩ ũyĩthĩa ti mavinda onthe wĩthĩawa na ũtonyi wa kwĩka ũu. Kĩvathũkanyʼo na ũu, Yeova ethĩawa na ũtonyi wa kwĩanĩsya kyonthe kĩla athũkũmi make me na vata nakyo na aisũngĩa mboya syoo. No we e weka wĩthĩawa na vinya na ũkũmũ ũte mĩvaka.—Isaia 40:26.

Ngai “[nũtonya] kwĩka maũndũ maingĩ mũno kũvĩtũka ala tũvoyete na kũsũanĩa.” Yeova e na ũtonyi wa kwĩka maũndũ maingĩ, o na “maingĩ mũno” kwondũ wa athũkũmi make. No amatetheesye kwa nzĩa sya mwanya o na kũvĩtũka ũndũ meũsũanĩaa.

Ndeto “kũvĩtũka ala tũvoyete na kũsũanĩa” syĩtũmanyĩsya ũndũ ũngĩ ĩũlũ wa mũsoa ũũ. Yĩla mũtũmwa Vaulo waandĩkie “kũvĩtũka ala tũvoyete na kũsũanĩa,” endaa Aklĩsto onthe maelewe kana Ngai nũtonya kũmatetheesya kwa nzĩa sya mwanya o na kũthonoka ũndũ mekwĩkwatasya. Mbivilia ya New International Version yĩalyũlĩte kĩlungu kya mbee kya mũsoa wa  20 atĩĩ: “Na ũla kwake wĩ na ũtonyi wa kwĩka maũndũ manene mũno kũvĩtũka ũndũ tũtonya kũkũlya kana kũvindĩĩsya.” Mavindanĩ amwe, Aklĩsto nĩmatonya kwĩwʼa mathĩna moo me manene mũno kana me maito vyũ ũndũ matamathĩnĩkĩa. O na nĩmatonya kwĩthĩwa matesĩ mevoya ĩũlũ wa kyaũ. Ĩndĩ ũmanyi wa Yeova ĩũlũ wa maũndũ ala matũkwatĩte kana ũtonyi wake wa kũtũtetheesya ndwĩ mĩvaka. Nũtonya kũmaminĩa mathĩna asu ĩvindanĩ yĩla yaĩlĩte, na ayĩka ũu kwa nzĩa sya mwanya kũthonoka ũndũ meũsũanĩaa. (Yovu 42:2; Yelemia 32:17) Ĩndĩ ĩvindanĩ yĩĩ, nũmanengae vinya wa kũmĩĩsya me atanu!—Yakovo 1:2, 3.

Mĩsoa Ĩla Ĩthyũlũlũkĩte Aeveso 3:20

Ĩvuku ya Aeveso nĩ valũa mũtũmwa Vaulo waandĩkĩie Aklĩsto ala mekalaa ndũanĩ ya Eveso nthĩnĩ wa Asia Nini, kĩsio kĩla ũmũnthĩ kĩ Turkey. Valũanĩ ũsu, Vaulo nĩwaandĩkie maũndũ ala wawetie mboyanĩ ĩla waumisye kwondũ woo. (Aeveso 3:14-21) Avoyie kwondũ woo, na kwondũ wa Aklĩsto onthe, nĩ kana matate kũatĩĩa ngelekanyʼo ya Yesũ ya kũsũanĩa na kwonanyʼa wendo, na kwa kwĩka ũu maĩ mamanye wendo wa Klĩsto. Vaulo aminĩĩie mboya yake kwa kũmũtaĩa Ngai na kũweta ndeto ila syĩ nthĩnĩ wa Aeveso 3:20, 21.

Ĩloele vitio ĩĩ nguvĩ wone maelesyo makuvĩ ma ĩvuku ya Aeveso.