Ejipiti Lɩʋ
13 Yehowa tasɩ yɔɔdɩnʋʋ Moyizi nɛ eheyi-i se: 2 «Paa Izrayɛɛlɩ mba taa kajalaɣ pɩɣa abalɩñɩŋga ŋga lɛ,* ɩpɩsɩ-m kɛ pʋyʋ kiɖeɖeu.* Matɩnɩ ɛyaa nɛ kpɩna pa-kajalaɣ piya abalɩñɩnzɩ nzɩ palʋlʋʋ yɔ.»+
3 Nɛ Moyizi heyi samaɣ se: «Ɩtɔzɩ kɩyakʋ ŋgʋ ki-wiye ɩlɩ Ejipiti,+ ɩlɩ yomiye ɖɩɣa taa yɔ kɩ-yɔɔ, mbʋ pʋyɔɔ yɔ Yehowa tɩŋnɩ e-nesi ɖoŋ ñɩnzɩ yɔɔ nɛ ɛlɩzɩ-mɩ cɩnɛ.+ Pʋyɔɔ lɛ, pɩtɩpɔzɩ se ɩtɔɔ mbʋ pɩ-taa paɖʋ lɔlɔm yɔ. 4 Iɖiɣni lɩʋ kɩyakʋ kʋnɛ ki-wiye, Abiib* fenaɣ taa.+ 5 Alɩwaatʋ ndʋ Yehowa wokini-ŋ Kanaŋ mba, Hɛɛtɩ mba, Amoori mba, Hivi mba nɛ Yebuusi mba ɛjaɖɛ taa yɔ,+ nɖɩ eɖuuni ñɔ-cɔzɔnaa se ɛcɛlɩɣ-ŋ yɔ,+ ɛjaɖɛ nɖɩ ɖɩ-taa naalɩm nɛ tʋŋ num pikpeŋ yem yɔ,+ pɩwɛɛ se ŋwɛɛ nɛ ŋlakɩ sɔnzɩ sɩnɛ fenaɣ kanɛ ka-taa. 6 Pɩwɛɛ se ŋtɔɔ kpɔnɔ ŋgʋ kɩ-taa patɩɖʋ lɔlɔm yɔ kɩyakɩŋ 7,+ nɛ kɩyakʋ 7 ñɩŋgʋ wiye lɛ, pakaɣ tɔɔʋ kazandʋ Yehowa. 7 Pɩwɛɛ se pɔtɔɔ kpɔnɔ ŋgʋ kɩ-taa patɩɖʋ lɔlɔm yɔ kɩyakɩŋ 7;+ nɛ pɩtɩpɔzɩ se pana ñɔ-cɔlɔ mbʋ pɩ-taa paɖʋ lɔlɔm yɔ,+ nɛ pɩtɩpɔzɩ se pana ñɔ-cɔlɔ kpɔnɔ mʋtʋ ndʋ tɩñɩŋaa yɔ ñɛ-tɛtʋ* kpeekpe taa. 8 Nɛ pɩwɛɛ se ŋheyi ña-pɩyalʋ kɩyakʋ ŋgʋ ki-wiye se: “Mbʋ Yehowa labɩ-m alɩwaatʋ ndʋ malɩ Ejipiti yɔ pʋyɔɔ malakɩ mbʋ.”+ 9 Nɛ pɩkaɣ-ŋ kɛʋ yʋsaɣ ñe-nesi yɔɔ nɛ mbʋ pɩ-yɔɔ ŋtɔzʋʋ yɔ ñe-kiɖe taa,*+ se pɩsa nɛ Yehowa paɣtʋ wɛɛ ñɔ-nɔɔ taa, mbʋ pʋyɔɔ yɔ Yehowa tɩŋnɩ e-nesi ɖoŋ ñɩnzɩ yɔɔ nɛ ɛlɩzɩ-ŋ Ejipiti. 10 Pɩwɛɛ se ŋɖɔ paɣtʋ tʋnɛ tɩ-yɔɔ tɩ-alɩwaatʋ yɔɔ paa pɩnaɣ ŋga.+
11 «Alɩwaatʋ ndʋ Yehowa wokini-ŋ Kanaŋ mba ɛjaɖɛ nɖɩ eɖuuni ña nɛ ñɔ-cɔzɔnaa se ɛcɛlɩɣ-ŋ yɔ ɖɩ-taa yɔ,+ 12 pɩwɛɛ se ŋha Yehowa abalɩbiya kajalaɣ ñɩnzɩ* nɛ kpɩna wena ŋwɛna yɔ a-taa kajalaɣ piya abalɩñɩnzɩ tɩŋa. Yehowa tɩnɩ-sɩ.+ 13 Pɩwɛɛ se ŋkpaɣ heu nɛ ŋlɛɣzɩnɩ paa kpaŋaɣ kajalaɣ pɩɣa ŋga lɛ ko-lone taa. Nɛ ye ŋŋlɛɣzɩɣ ko-lone taa yɔ, pʋbʋ lɛ, pɩwɛɛ se ŋyɔkɩ ke-nimaɣ. Nɛ pɩwɛɛ se paa ña-pɩyalaa taa kajalaɣ abalɩbɩɣa ŋga lɛ ŋhɛyɩ kɔ-yɔɔ.+
14 «Ye ña-pɩyalʋ ɛpɔzɩ-ŋ pʋwayɩ se: “Pʋ-tɔbʋʋ lɛ suwe” yɔ, pɩwɛɛ se ŋheyi-i se: “Yehowa tɩŋnɩ e-nesi ɖoŋ ñɩnzɩ yɔɔ nɛ ɛlɩzɩ-ɖʋ Ejipiti, ɛlɩzɩ-ɖʋ yomiye ɖɩɣa taa.+ 15 Farawɔɔ labɩ ñʋʋ taa ɖoŋ nɛ ekizi se eeyeki-ɖʋ nɛ ɖɩɖɛɛ lɛ,+ Yehowa kʋ paa kajalaɣ pɩɣa ŋga lɛ Ejipiti ɛjaɖɛ taa, kpaɣnɩ ɛyaa kajalaɣ piya nɛ piwolo kpɩna kajalaɣ piya.+ Pʋyɔɔ mɛwɛɛ nɛ malaɣ Yehowa kpɩna kajalaɣ piya abalɩñɩnzɩ tɩŋa,* nɛ mɛhɛyɩɣ man-pɩyalaa taa paa kajalaɣ pɩɣa ŋga lɛ kɔ-yɔɔ.” 16 Pɩwɛɛ se pɩkɛ yʋsaɣ ñe-nesi yɔɔ nɛ kɩtamʋʋ* ñe-kiɖe taa,*+ mbʋ pʋyɔɔ yɔ Yehowa tɩŋnɩ e-nesi ɖoŋ ñɩnzɩ yɔɔ nɛ ɛlɩzɩ-ɖʋ Ejipiti.»
17 Nɛ alɩwaatʋ ndʋ Farawɔɔ yebi samaɣ se kɛɖɛɛ yɔ, Ɛsɔ tɩtɩŋnɩ-kɛ Filistii mba ɛjaɖɛ taa nʋmɔʋ, paa kɩɩwɛ tobi yɔ. Mbʋ pʋyɔɔ yɔ Ɛsɔ yɔɔdaa se: «Samaɣ pɩzɩɣ nɛ kɛlɛɣzɩ ka-lɩmaɣza alɩwaatʋ ndʋ kakatɩɣ you yɔ, nɛ kakaɣ pɩsʋʋ Ejipiti.» 18 Pʋyɔɔ Ɛsɔ yeba nɛ samaɣ tɩŋnɩ Teŋgu Kɩsɛɛmʋʋ kañɩmbusuu taa nʋmɔʋ ŋgʋ kɩɖaɣlaa nɛ kɩwɛɛ kotaaa yɔ.+ Ɛlɛ Izrayɛɛlɩ mba lɩɣaɣ Ejipiti ɛjaɖɛ taa lɛ, paañɔɔzɩ pa-tɩ camɩyɛ ɛzɩ sɔɔjanaa yɔ. 19 Moyizi kpɛndɩnɩ ɖɔɖɔ Yosɛɛfʋ mɔɔ, mbʋ pʋyɔɔ yɔ Yosɛɛfʋ kaayeba nɛ Izrayɛɛlɩ piya ɖuu; eheyi-sɩ se: «Paa pɩɩlabɩ ɛzɩma yɔ Ɛsɔ kaɣ ɛ-lɩmaɣza kɛzʋʋ nɛ mɩ-yɔɔ, nɛ ɩɩlɩɣ cɩnɛ lɛ, pɩwɛɛ se ɩkpɛndɩnɩ mɔ-mɔɔ.»+ 20 Pakʋyɩ Sukɔɔtɩ nɛ patalɩ pacaɣ Etaam, kañɩmbusuu kpɛŋa yɔɔ.
21 Wɩsɩ taa lɛ, Yehowa ɖɛɣaɣ pɔ-nɔɔ mɩndʋ tilimiye naɖɩyɛ taa se ɛwɩlɩ-wɛ nʋmɔʋ,+ nɛ ɖoo taa lɛ, ɛɖɛɣaɣ pɔ-nɔɔ miŋ tilimiye naɖɩyɛ taa se pɩha-wɛ ñalɩmɩyɛ, se pɩsa nɛ papɩzɩ pɔɖɔ nʋmɔʋ wɩsɩ taa nɛ ɖoo taa.+ 22 Mɩndʋ tilimiye taaposuuni samaɣ wɩsɩ taa, nɛ miŋ tilimiye taaposuuni-kɛ ɖɔɖɔ ɖoo taa.+