Apostoloowaa Tʋma Labʋ

22 «Mon-koobiya nɛ man-caanaa, iwelisi tɔm ndʋ mɔyɔɔdʋʋ lɛɛlɛɛyɔ se malʋbɩnɩ man-tɩ yɔɔ mɩ-ɛsɩndaa yɔ.»+ 2 Patɩɩnɩ ɛwɛɛ nɛ ɛyɔɔdʋʋnɩ-wɛ Ebree kʋnʋŋ taa lɛ, pɛtɛzɩ sum ɖiɣ ɖiɣ, nɛ ɛyɔɔdɩ se: 3 «Mɛnkɛ Yuuda tʋ,+ nɛ palʋlɩ-m Taarɩsɩ, Siliisii taa;+ ɛlɛ malabɩ sukuli tɛtʋ tʋnɛ tɩ-taa Gamaalɩyɛɛlɩ+ maɣmaɣ cɔlɔ,* pawɩlɩ-m se mɔnɖɔ ɖɔ-cɔzɔnaa Paɣtʋ yɔɔ ɖeyi ɖeyi,+ nɛ maawɛ kpekpeka Ɛsɔ yɔɔ ɛzɩ mɩ-tɩŋa ɩwɛʋ sɔnɔ yɔ.+ 4 Maanazɩ Kɩbaɣlʋ Nʋmɔʋ kʋnɛ halɩ pɩtalɩ sɩm taa, nɛ mɔhɔkʋʋ abalaa nɛ halaa nɛ manɖʋʋ-wɛ salaka,+ 5 nɛ cɔjɔ kɩlɩm nɛ ɛzʋtʋyaa ɛgbɛyɛ kpeekpe papɩzɩɣ nɛ palɩzɩ aseɣɖe pɩ-yɔɔ. Mamʋ ɖɔɖɔ takayɩsɩ pɔ-cɔlɔ se mowoni Damaasɩ koobiya, nɛ maawɛ nʋmɔʋ taa nɛ mowoki se mɔhɔkɩ mba pɛwɛ peeɖe yɔ nɛ mɔnkɔnɩ-wɛ Yeruzalɛm se pɔhɔ pa-nɩŋgbaaŋ.

6 «Ɛlɛ maawɛ nʋmɔʋ taa nɛ mɔñɔtʋʋnɩ Damaasɩ, wɩsɩ siɣu mbʋ yɔ lɛ, ñalɩmɩyɛ sɔsɔɖɛ naɖɩyɛ lɩɩnɩ ɛsɔdaa tuda nɛ ɖɩñɩlɩsɩ mɔn-cɔlɔ kpɛɛɛ,+ 7 nɛ mɔntɔlɩ tataa nɛ manɩɩ nɔɔ nakɛyɛ pɔzʋʋ-m se: “Sɔɔlɩ, Sɔɔlɩ, ɛbɛ yɔɔ ŋwɛɛ nɛ ŋnazɩɣ-m?” 8 Moncosi se: “Ña yɔ anɩ, Kɩbaɣlʋ?” Nɛ eheyi-m se: “Ma yɔ Yesu Nazarɛɛtɩ tʋ, weyi ŋwɛɛ nɛ ŋnazɩɣ yɔ.” 9 Nɛ ɛyaa mba paawɛ mɔn-cɔlɔ yɔ pana ñalɩmɩyɛ, ɛlɛ patɩnɩɩ weyi ɛwɛɛ nɛ ɛyɔɔdʋʋnɩ-m yɔ ɛ-nɔɔ. 10 Ðɩnɛ ɛlɛ mɔnpɔzɩ se: “Kɩbaɣlʋ, ɛbɛ pɩwɛɛ se mala?” Kɩbaɣlʋ heyi-m se: “Kʋyɩ nɛ ŋsʋʋ Damaasɩ tɛtʋ taa, nɛ pakaɣ-ŋ heyuu peeɖe mbʋ payɩ paɖʋ-ŋ se ŋla yɔ.”+ 11 Ɛlɛ ñalɩmɩyɛ nɖɩ ɖi-ɖoŋ yɔɔ lɛ, mantaapɩzɩɣ se mana nabʋyʋ; nɛ pʋyɔɔ lɛ ɛyaa mba paawɛ mɔn-cɔlɔ yɔ, pɔɖɔkɩ me-nesi tɛɛ nɛ pɔhɔmɩ-m nɛ mantalɩ Damaasɩ.

12 «Nɛ payaɣaɣ abalʋ nɔɔyʋ se Anaanɩyaasɩ, ɛɛñɔnɩ Ɛsɔ ɛzɩ Paɣtʋ pɔzʋʋ yɔ; nɛ Yuuda ñɩma mba payɩ paawɛ peeɖe yɔ pɔyɔɔdaɣ ɛ-yɔɔ tɔm kɩbandʋ, 13 abalʋ ɛnʋ ɛkɔɔ mɔn-cɔlɔ. Ɛsɩŋ mɔn-cɔlɔ nɛ eheyi-m se: “Koobu Sɔɔlɩ, paɣzɩ naʋ!” Nɛ alɩwaatʋ ndʋ tɩ-taa ɖeyi ɖeyi lɛ, mankpazɩ ɛsa nɛ mana-ɩ.+ 14 Nɛ ɛtɔ se: “Ðɔ-cɔzɔnaa tɛ Ɛsɔ lɩzɩ-ŋ se ŋtɩlɩ ɛ-sɔɔlɩm nɛ ŋna ɛyʋ siɣsiɣ tʋ+ nɛ ŋnɩɩ ɛ-nɔɔ; 15 mbʋ pʋyɔɔ yɔ pɩwɛɛ se ŋkɛ ɛ-aseɣɖe tʋ ɛyaa kpeekpe ɛsɩndaa nɛ ŋlɩzɩ aseɣɖe mbʋ ŋnawa nɛ ŋnɩɩ yɔ pɩ-yɔɔ.+ 16 Nɛ lɛɛlɛɛyɔ, ɛbɛ ŋɖaŋaa? Kʋyɩ, yele nɛ pamɩyɩsɩ-ŋ lɩm, nɛ ŋyaa ɛ-hɩɖɛ+ nɛ pañalɩ ña-kɩwɛɛkɩm.”+

17 «Ɛlɛ manpɩsɩ Yeruzalɛm+ nɛ mɛwɛɛ mantɩmɩɣ templo taa lɛ, mana natʋ natʋyʋ; 18 mana Kɩbaɣlʋ nɛ eheyi-m se: “Kʋyɩ kpaka nɛ ŋlɩɩ Yeruzalɛm taa lɛɛ lɛɛ, mbʋ pʋyɔɔ yɔ paakaɣ tisuu aseɣɖe nɖɩ ŋlɩzɩɣ mɔ-yɔɔ yɔ.”+ 19 Nɛ mɔntɔ se: “Kɩbaɣlʋ, pa-maɣmaɣ pasɩm camɩyɛ se mansʋwaɣ sinaagɔɔgɩwaa taa kʋɖʋm kʋɖʋm, nɛ manɖʋʋ salaka nɛ mamakɩ mba petisaɣ ñɔ-yɔɔ yɔ;+ 20 nɛ pɛkpɛdaɣ ña-aseɣɖe tʋ Etiyɛɛnɩ calɩm lɛ, maasɩŋ peeɖe nɛ pɩɩkɛdɩnɩ-m nɛ manɖaŋɩɣ mba pakʋwaɣ-ɩ yɔ po-tokonaa kɩtɩnaa yɔɔ.”+ 21 Paa mbʋ yɔ eheyi-m se: “Wolo, mbʋ pʋyɔɔ yɔ mankaɣ-ŋ tiyuu ɖooo poliŋ taa ajɛɛ taa.”»+

22 Nɛ paawɛɛ pewelisiɣni-i nɛ pɩkɔɔ pɩsɩɩnɩ tɔm ndʋ. Ðɩnɛ ɛlɛ pama kubusi nɛ pɔtɔŋ se: «Ɩkʋsɩ abalʋ ɛnɛ tɛtʋ yɔɔ, mbʋ pʋyɔɔ yɔ ɛtɩmʋna se ɛcaɣ wezuu!» 23 Paawɛɛ nɛ pamakɩ kubusi, pɔlɔʋ po-tokonaa kɩtɩnaa, nɛ pakʋsʋʋ mʋzʋʋ ɛsɔdaa; pʋyɔɔ lɛ,+ 24 sɔɔjanaa ñʋʋdʋ ɖʋ paɣtʋ se powoni Pɔɔlɩ sɔɔjanaa pɩlʋʋ taa nɛ ɛtɔ se polu-i agbazɛɛ nɛ pɔpɔzɩ-ɩ tɔm, nɛ ɛpɩzɩ ɛtɩlɩ mbʋ pʋyɔɔ ɖeyi ɖeyi ɛyaa wɛɛ nɛ pamakɩ kubusi Pɔɔlɩ yɔɔ mbʋ yɔ. 25 Ɛlɛ pahɩzɩ Pɔɔlɩ se pamakɩ-ɩ lɛ, ɛpɔzɩ sɔɔja sɔsɔ weyi ɛɛsɩŋ peeɖe yɔ se: «Paɣtʋ ha-mɩ nʋmɔʋ se ɩma Roma tʋ* weyi patɩhʋʋnɩ-ɩ nɛ pakʋ ɛ-tɔm yɔ?»+ 26 Sɔɔja sɔsɔ nɩ tɔm ndʋ lɛ, ewolo sɔɔjanaa ñʋʋdʋ cɔlɔ nɛ ɛkɛdɩ-ɩ tʋ, nɛ ɛtɔ se: «Ɛbɛ ŋɖʋwa se ŋlakɩ? Mbʋ pʋyɔɔ yɔ abalʋ ɛnʋ ɛkɛ Roma tʋ.» 27 Pʋyɔɔ sɔɔjanaa ñʋʋdʋ ñɔtɩnɩ-ɩ nɛ ɛpɔzɩ-ɩ se: «Heyi-m nɛ manɩɩ, ŋkɛ Roma tʋ yaa?» Ecosi se: «Ɛɛɛ.» 28 Sɔɔjanaa ñʋʋdʋ kitina se: «Liidiye sɔsɔɖɛ mayabɩnɩ waɖɛ nɖɩ nɛ manpɩsɩ tɛtʋ taa pɩɣa.» Pɔɔlɩ tɔ se: «Ɛlɛ ma lɛ, palʋlɩ-m nɛ waɖɛ nɖɩ.»+

29 Piyeba nɛ ɛyaa mba pacaɣaɣ-ɩ nazʋʋ se panɩɩ ɛ-nɔɔ taa tɔm yɔ, pɛɖɛɛ ɛ-yɔɔ kpaagbaa; nɛ sɔɔjanaa ñʋʋdʋ ɖiɣzinaa se Pɔɔlɩ kɛ Roma tʋ lɛ, sɔɔndʋ kpa-ɩ mbʋ pʋyɔɔ yɔ ɛhɔkɩ-ɩ kpasɩ.+

30 Nɛ tɛʋ fema lɛ, ɛñɩnaɣ se ɛtɩlɩ mbʋ pʋyɔɔ ɖeyi ɖeyi Yuuda mba kaɖaɣnɩ Pɔɔlɩ yɔ, pʋyɔɔ eyebi-i nɛ ɛpɔzɩ cɔjɔnaa sɔsaa nɛ Sahedrɛɛ tɩŋa se pekpeɣli. Nɛ ɛkɔnɩ Pɔɔlɩ nɛ ɛsɩnzɩ-ɩ pɛ-hɛkʋ taa.+