Ɛsɩtɛɛrɩ
5 Kɩyakʋ tozo ñɩŋgʋ wiye lɛ,+ Ɛsɩtɛɛrɩ suu abitu tokonaa kɩɖaɣlaa nɛ ɛsɩŋ wiyaʋ ɖɩɣa tɛ pɩ-taa kadaɣ taa, wiyaʋ ɖɩɣa ɛsɩndaa. Alɩwaatʋ ndʋ lɛ, wiyaʋ kaacaɣ e-kewiyaɣ kpelaɣ yɔɔ kewiyitu ɖɩɣa taa, nɔnɔɔ ɛsɩndaa. 2 Wiyaʋ tɩɩna Abiɖe Ɛsɩtɛɛrɩ sɩŋ kadaɣ taa lɛ, Ɛsɩtɛɛrɩ tɔm kɛdɩnɩ-ɩ, nɛ wiyaʋ kpazɩ kewiyaɣ sika ɖaʋ ŋgʋ kɩɩwɛ e-nesi taa yɔ nɛ ɛwɩlɩ-ɩ.+ Nɛ Ɛsɩtɛɛrɩ ñɔtɩnɩ-ɩ nɛ etukuni kewiyaɣ sika ɖaʋ ŋgʋ kɩ-nɔɔ taa.
3 Wiyaʋ pɔzɩ Ɛsɩtɛɛrɩ se: «Ɛbɛ laba, Abiɖe Ɛsɩtɛɛrɩ? Ɛbɛ ŋsɔɔlaa? Paa men-kewiyaɣ hɔɔlʋʋ kʋɖʋmʋʋ yɔ, mankaɣ-ŋ kʋ cɛlʋʋ!» 4 Ɛsɩtɛɛrɩ cosi se: «Ye pɩkɛdɩnɩ wiyaʋ yɔ, wiyaʋ nɛ Hamaanɩ+ pɔkɔɔ sɔnɔ kazandʋ ndʋ mɔñɔɔzɩ wiyaʋ yɔ tɩ-taa.» 5 Peeɖe wiyaʋ heyi ɛ-ɛyaa se: «Eheyi Hamaanɩ se ɛkɔɔ lɛɛ lɛɛ, ɛzɩ Ɛsɩtɛɛrɩ pɔzʋʋ yɔ.» Nɛ wiyaʋ nɛ Hamaanɩ powolo kazandʋ ndʋ Ɛsɩtɛɛrɩ kaañɔɔzaa yɔ tɩ-taa.
6 Alɩwaatʋ ndʋ pɔñɔwaɣ vɛɛ lɛ, wiyaʋ pɔzɩ Ɛsɩtɛɛrɩ se: «Ɛbɛ ŋñɩnɩɣ pɔzʋʋ? Mankaɣ-ŋ pʋ cɛlʋʋ! Nɛ ɛbɛ ŋsɔɔlaa? Paa men-kewiyaɣ hɔɔlʋʋ kʋɖʋmʋʋ yɔ, mankaɣ-ŋ kʋ cɛlʋʋ!»+ 7 Ɛsɩtɛɛrɩ cosi se: «Mbʋ mɔnpɔzʋʋ nɛ mbʋ mɔnsɔɔlaa yɔ mbʋ yɔ: 8 Ye mɔn-tɔm ɛkɛdɩnɩ wiyaʋ nɛ ye pɩkɛdɩnɩ wiyaʋ se ɛha-m mbʋ mɔnpɔzʋʋ yɔ nɛ ɛlabɩ-m mbʋ mɔnsɔɔlaa yɔ, wiyaʋ nɛ Hamaanɩ pɔkɔɔ kazandʋ ndʋ mankaɣ-wɛ labʋ cee yɔ tɩ-taa; nɛ cee lɛ mankaɣ labʋ ɛzɩ wiyaʋ yɔɔdʋʋ yɔ.»
9 Kɩyakʋ ŋgʋ ki-wiye Hamaanɩ lɩɩ, ɛ-taa nɛ leleŋ nɛ ɛ-laŋɩyɛ hʋlʋmɩ yem. Ɛlɛ alɩwaatʋ ndʋ Hamaanɩ na Mɔrɩdekayɩ wiyaʋ nɔnɔɔ taa nɛ eɖiɣzina se ɛlɛ tɩkʋyɩ ɛsɩŋ nɛ etiseli ɛ-ɛsɩndaa lɛ, Hamaanɩ taa wɩɩnɩ Mɔrɩdekayɩ siŋŋ.+ 10 Ɛlɛ Hamaanɩ ɖɔkɩ ɛ-tɩ nɛ ekpe ɛ-tɛ. Nɛ etiyi nɛ payaa ɛ-taabalaa nɛ ɛ-halʋ Zerɛɛsɩ.+ 11 Hamaanɩ wɛɛ ɛkʋndʋʋ ɛzɩma ɛwɛnɩ ñɩm sɔsɔm, pɩyalaa sakɩyɛ,+ nɛ ɛzɩma wiyaʋ ha-ɩ ɖoŋ sɔsɔŋ nɛ ɛha-ɩ lone sɔsɔɖɛ nɛ ɛkpazɩ-ɩ ɛ-awumbiya nɛ ɛ-lɩmɖʋyaa ñʋŋ yɔɔ yɔ pɩ-yɔɔ.+
12 Hamaanɩ sɔzɩ se: «Pɩtɩsɩɩnɩ pi-ɖeke, Abiɖe Ɛsɩtɛɛrɩ tɩyaa nɔɔyʋ nɛ pɩtasɩnɩ-m se ɛsɩɩ wiyaʋ nɛ powolo kazandʋ ndʋ ɛñɔɔzaa yɔ tɩ-taa.+ Ɛtasɩ ma nɛ wiyaʋ yaʋ cee.+ 13 Ɛlɛ pɩtɩŋa payɩ mbʋ yɔ pɩɩhɛzɩɣ ma-laŋɩyɛ ye menɖiɣni naʋ Yuuda tʋ Mɔrɩdekayɩ caɣ wiyaʋ nɔnɔɔ taa yɔ.» 14 Peeɖe ɛ-halʋ Zerɛɛsɩ nɛ ɛ-taabalaa tɩŋa peheyi-i se: «Yele nɛ pesiɣ sizika nakɛyɛ, nɛ ka-kʋkʋyɩŋ ɛkɛ nuŋgolonzi 50.* Nɛ tanaŋ tɛɛ lɛ, ŋheyi wiyaʋ se pɩwɛɛ se popuzi Mɔrɩdekayɩ kɔ-yɔɔ.+ Pʋwayɩ lɛ, ŋwolo nɛ ŋnɩɩ leleŋ kazandʋ taa, ña nɛ wiyaʋ.» Lɩmaɣzɩyɛ nɖɩ ɖɩkɛdɩnɩ Hamaanɩ, nɛ eyele nɛ pesiɣ sizika.