Ezekɩyɛɛlɩ
12 Yehowa tɔm tasɩ-m talʋʋ se: 2 «Ɛyʋ pɩyalʋ, ɖɩɣa ŋga kaañaŋ yɔ ka-taa ŋwɛɛ. Pɛwɛnɩ ɛsa se pana ɛlɛ paanaɣ, nɛ pɛwɛnɩ nɩŋgbaaŋ se panɩɩ ɛlɛ paanɩɣ,+ mbʋ pʋyɔɔ yɔ pɛkɛ ɖɩɣa ŋga kaañaŋ yɔ.+ 3 Piyele nɛ ña yɔ, ɛyʋ pɩyalʋ, ñɔɔzɩ ña-tɩ wondu ndʋ ŋkaɣ kpaɣʋ nɛ ŋkɛɛ tɛtʋ yɔ. Nɛ evemiye taa lɛ, ŋkpaɣ nʋmɔʋ nɛ ŋɖɛɛ ɛzɩ weyi pɛkɛzɩɣ-ɩ tɛtʋ yɔ, alɩwaatʋ ndʋ pɛwɛɛ nɛ pɔcɔŋnɩ-ŋ yɔ. Kʋyɩnɩ ña-ɖɩɣa taa nɛ ŋkɛɛ tɛtʋ lone lɛɛɖɛ taa, alɩwaatʋ ndʋ pɛwɛɛ nɛ pɔcɔŋnɩ-ŋ yɔ. Pɩtɩla yɔ pakaɣ nɩʋ pʋ-tɔbʋʋ paa pɛkɛ ɖɩɣa ŋga kaañaŋ yɔ. 4 Lɩnɩ wondu ndʋ ŋñɔɔzaa se ŋkpaɣ nɛ ŋkɛɛ tɛtʋ yɔ; la mbʋ evemiye taa, alɩwaatʋ ndʋ pɛwɛɛ nɛ pɔcɔŋnɩ-ŋ yɔ. Nɛ ɖanaɣ yɔɔ, alɩwaatʋ ndʋ pɛwɛɛ nɛ pɔcɔŋnɩ-ŋ lɛ, ŋkpaɣ nʋmɔʋ nɛ ŋɖɛɛ ɛzɩ weyi pɛkɛzɩɣ-ɩ tɛtʋ yɔ.+
5 «Alɩwaatʋ ndʋ pɛwɛɛ nɛ pɔcɔŋnɩ-ŋ yɔ, hʋyɩ koloŋa pɔʋ, nɛ ŋkpaɣ mbʋ ŋwɛna yɔ nɛ ŋtɩŋnɩ kɩ-taa nɛ ŋlɩɩ.+ 6 Alɩwaatʋ ndʋ pɛwɛɛ nɛ pɔcɔŋnɩ-ŋ yɔ, kpaɣ mbʋ ŋwɛna yɔ nɛ ŋsɩɩ ña-hazaɣ yɔɔ nɛ ŋlɩnɩ-pʋ alɩwaatʋ ndʋ piyu cɩkpɛndʋʋ yɔ. Huuzi ñɛ-ɛsɩndaa nɛ pɩsa nɛ ŋtaana tataa, mbʋ pʋyɔɔ yɔ meyeki nɛ ŋkɛ yʋsaɣ Izrayɛɛlɩ ɖɩɣa.»+
7 Malabɩ ɖeyi ɖeyi ɛzɩ paɖʋʋ-m paɣtʋ yɔ. Evemiye taa lɛ, malɩnɩ mo-wondu, ɛzɩ weyi pɛkɛzɩɣ-ɩ tɛtʋ yɔ e-wondu yɔ; nɛ ɖanaɣ yɔɔ lɛ, mahʋyɩ koloŋa pɔʋ nɛ me-nesi. Nɛ piyu cɩkpɛndʋʋ lɛ, mankpaɣ mbʋ mɛwɛna yɔ nɛ mansɩɩ ma-hazaɣ yɔɔ nɛ mɛnɖɛɣnɩ-pʋ pɛ-ɛsɩndaa kaɣlaa.
8 Tɛʋ fem tanaŋ tɛɛ lɛ, Yehowa tɔm tasɩ-m talʋʋ se: 9 «Ɛyʋ pɩyalʋ, Izrayɛɛlɩ ɖɩɣa ŋga kɛkɛ kaañamtʋ ɖɩɣa yɔ, katɩpɔzɩ-ŋ se: “Ɛbɛ ŋlakɩ mbʋ yɔ?” 10 Heyi-wɛ se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Tɔm tʋnɛ titukuuni Yeruzalɛm ñʋʋdʋ+ nɛ Izrayɛɛlɩ ɖɩɣa kpeekpe ŋga kɛwɛ tɛtʋ taa yɔ.’”
11 «Yɔɔdɩ se: “Mɛnkɛ-mɩ yʋsaɣ.+ Ɛzɩ malabʋ yɔ, mbʋ pakaɣ-wɛ labʋ. Pakaɣ-wɛ kɛzʋʋ tɛtʋ, pakaɣ wobu yomiye taa.+ 12 Ñʋʋdʋ weyi ɛwɛ pɛ-hɛkʋ taa yɔ, ɛkaɣ kpaɣʋ mbʋ ɛwɛna yɔ nɛ ɛsɩɩ ɛ-hazaɣ yɔɔ nɛ ɛɖɛɛ alɩwaatʋ ndʋ piyuu cɩkpɛndʋʋ yɔ. Ɛkaɣ hʋyʋʋ koloŋa pɔʋ nɛ ɛkpaɣ mbʋ ɛwɛna yɔ nɛ ɛtɩŋnɩ kɩ-taa nɛ ɛlɩɩ.+ Ɛkaɣ huuzuu ɛ-ɛsɩndaa se pɩsa nɛ ɛtaana tataa.” 13 Mankaɣ-ɩ lɔʋ piyuu, nɛ mankaɣ-ɩ kpaʋ men-piyuu taa.+ Nɛ mankaɣ-ɩ wonuu Babilɔɔnɩ, Kalɩdee mba ɛjaɖɛ taa, ɛlɛ ɛɛkaɣ-ɖɩ naʋ; nɛ ɛkaɣ sɩbʋ peeɖe.+ 14 Nɛ mba payɩ pɛwɛ ɛ-cɔlɔ yɔ, ɛ-sɩnɩyaa nɛ ɛ-sɔɔjanaa, mankaɣ-wɛ mɩzʋʋ hɔɔlɩŋ tɩŋa taa;+ nɛ mankaɣ kpɛʋ laɣɖɛ nɛ manɖʋ pa-wayɩ.+ 15 Nɛ toovenim taa lɛ pakaɣ tɩlʋʋ se ma lɛ Yehowa, alɩwaatʋ ndʋ mamɩzɩɣ-wɛ samasɩ taa nɛ mɛyɛkɛlɩ-wɛ ajɛɛ taa yɔ. 16 Ɛlɛ mankaɣ kazʋʋ pa-taa nabɛyɛ pazɩ, nɛ laɣɖɛ, ñɔɔsɩ nɛ kɩzɩkʋ ɩɩkʋʋ-wɛ, se pɩsa nɛ pɛkɛdɩ pa-lakasɩ kɩdɛkɛdɩsɩ tɔm ajɛɛ wena a-taa pakaɣ wobu yɔ; nɛ toovenim taa lɛ pakaɣ tɩlʋʋ se ma lɛ Yehowa.»
17 Nɛ Yehowa tɔm tasɩ-m talʋʋ se: 18 «Ɛyʋ pɩyalʋ, pɩwɛɛ se ŋtɔɔ ñɔ-tɔɔnaɣ* nɛ seluu nɛ ŋñɔɔ ña-lɩm nɛ sɔɔndʋ nɛ nɩɣzɛ.+ 19 Heyi ɛjaɖɛ taa mba se: “Tɔm tʋnɛ Kɩbaɣlʋ Kɩlɩm Yehowa heyiɣ Yeruzalɛm taa ñɩma mba pɛwɛ Izrayɛɛlɩ ɛjaɖɛ taa yɔ: ‘Pakaɣ tɔɔʋ pɔ-tɔɔnaɣ* nɛ nɩɣzɛ nɛ pɔñɔɔ pa-lɩm nɛ sɔɔndʋ siŋŋ, mbʋ pʋyɔɔ yɔ pɛ-ɛjaɖɛ tɩŋa kaɣ caɣʋ kpɛɖɛ,+ mba payɩ pɛwɛ ɛjaɖɛ nɖɩ ɖɩ-taa yɔ, po-puuyaɣ lakasɩ yɔɔ.+ 20 Pakaɣ yɔkʋʋ tɛtʋ ndɩ ndɩ ndʋ tɩ-taa ɛyaa wɛɛ yɔ, nɛ ɛjaɖɛ kaɣ pɩsʋʋ ɛjaɖɛ nɖɩ peyebi-ɖɩ yɔ;+ nɛ toovenim taa lɛ ɩkaɣ tɩlʋʋ se ma lɛ Yehowa.’”»+
21 Nɛ Yehowa tɔm tasɩ-m talʋʋ se: 22 «Ɛyʋ pɩyalʋ, eduuye nɖɩ potuki Izrayɛɛlɩ taa mbʋ yɔ se: “Kɩyakɩŋ ɖɛɣ, ɛlɛ natʋ natʋyʋ ɛɛlakɩ”?+ 23 Pʋyɔɔ lɛ heyi-wɛ se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Mankaɣ yebu nɛ tɔm ndʋ tɩsɩɩ tɩnaɣ, nɛ paakaɣ-tʋ tasʋʋ yɔɔdʋʋ nɛ pɩkɛ eduuye Izrayɛɛlɩ taa.’” Ɛlɛ heyi-wɛ se: “Kɩyakɩŋ ñɔtaa,+ nɛ paa natʋ ndʋ lɛ tɩkaɣ labʋ.” 24 Mbʋ pʋyɔɔ yɔ cɛtɩm natʋ yaa tɩyɩtʋ lakasɩ nzɩ sipeɣziɣ yɔ sɩɩkaɣ tasʋʋ wɛʋ Izrayɛɛlɩ ɖɩɣa taa kpa.+ 25 “‘Mbʋ pʋyɔɔ yɔ, ma Yehowa mankaɣ yɔɔdʋʋ. Tɔm ndʋ payɩ mɔyɔɔdʋʋ yɔ tɩkaɣ labʋ nɛ tɩɩtasɩɣ wayɩ caɣʋ.+ Oo ɖɩɣa ŋga kaañaŋ yɔ, mɩ-alɩwaatʋ taa*+ mankaɣ yɔɔdʋʋ tɔm nɛ meyele nɛ tɩla,’ Kɩbaɣlʋ Kɩlɩm Yehowa yɔɔdʋʋna.”»
26 Yehowa tɔm tasɩ-m talʋʋ se: 27 «Ɛyʋ pɩyalʋ, tɔm tʋnɛ Izrayɛɛlɩ mba* wɛɛ nɛ pɔyɔɔdʋʋ: “Natʋ ndʋ ɛnaɣ yɔ alɩwaatʋ sakɩyɛ wayɩ tɩkaɣ labʋ, nɛ ɖooo cee wayɩ natʋ tɔm ɛwɛɛ nɛ ɛyɔɔdʋʋ.”+ 28 Pʋyɔɔ lɛ, heyi-wɛ se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Mɔn-tɔm natʋyʋ ɛɛkaɣ caɣʋ wayɩ; tɔm ndʋ payɩ mɔyɔɔdʋʋ yɔ, tɩkaɣ labʋ,’ Kɩbaɣlʋ Kɩlɩm Yehowa yɔɔdʋʋna.”»