Yowɛɛlɩ
3 «Iwelisi! Kɩyakɩŋ ɛnɩ ɩ-taa nɛ alɩwaatʋ ndʋ tɩ-taa,
Manpɩsɩɣnɩ Yuuda mba nɛ Yeruzalɛm ñɩma mba paawoni yomiye taa yɔ lɛ,+
2 Mankaɣ kpeɣluu ɖɔɖɔ ajɛɛ tɩŋa
Nɛ mentini-yɛ Yozafaatɩ* Fɛɛʋ taa.
Mankaɣ-yɛ tɔm hʋnʋʋ peeɖe+
Man-samaɣ nɛ ma-ñɩm Izrayɛɛlɩ yɔɔ,
Mbʋ pʋyɔɔ yɔ amɩzɩ-wɛ ajɛɛ taa,
Nɛ atayɩ ɖama mɛ-ɛjaɖɛ.+
3 Pɔtɔ piye mɛ-ɛyaa yɔɔ;+
Pɛpɛdaɣ abalɩbɩɣa se pɛhɛyɩnɩ halʋ hayitu laɖʋ
Nɛ pɛpɛdaɣ halɩbɩɣa se pɛcɛbɩnɩ vɛɛ nɛ pɔñɔɔ.
4 Piyele mɩ Tiirɩ, Siidɔɔ nɛ Filistii ageeta kpeekpe,
Ma nɛ mɩ suwe?
Nabʋyʋ kɩmɩyɛ iɖiɣni-m kpaʋ na?
Ye kɩmɩyɛ naɖɩyɛ ɩkpaɣ-m yɔ,
Mankaɣ labʋ lɔŋ nɛ manpɩsɩnɩ mɩ-kɩmɩyɛ kpaʋ mbʋ lɛɛ lɛɛ mɩ-ñʋŋ taa.+
5 Mbʋ pʋyɔɔ yɔ ɩkpaɣ me-liidiye nɛ men-sika,+
Nɛ ɩsʋnɩ ma-ñɩm mbʋ pɩkɩlɩ ɖeu yɔ mi-templonaa taa;
6 Nɛ ɩkpaɣ Yuuda mba nɛ Yeruzalɛm mba nɛ ɩpɛdɩnɩ Grɛɛkɩ mba,+
Se pɩsa nɛ iposi-wɛ ɖooo poliŋ nɛ pe-egeetiye;
7 Mankʋsʋʋ-wɛ nɛ pakʋyɩnɩ ɖenɖe ɩpɛdɩ-wɛ yɔ nɛ pɔkɔɔ,+
Nɛ mankaɣ kɔnʋʋ mɩ-kɩmɩyɛ kpaʋ mɩ-ñʋŋ taa.
8 Mankaɣ kpaɣʋ mɩ-pɩyalaa nɛ mɩ-pɛlaa nɛ mɛnpɛdɩnɩ Yuuda mba,+
Nɛ paba kaɣ-wɛ kpaɣʋ nɛ pɛpɛdɩnɩ Seeba ɛjaɖɛ taa mba, ɛjaɖɛ nɖɩ ɖɩwɛ poliŋ taa yɔ;
Mbʋ pʋyɔɔ yɔ Yehowa maɣmaɣ yɔɔdɩnɩ-tʋ.
9 Isusi tɔm tʋnɛ ajɛɛ taa:+
“Ɩñɔɔzɩ mɩ-tɩ nɛ ɩla you! Iseɣti sɔdɩŋ!
Sɔɔjanaa tɩŋa ɩñɔtɩ, pakʋyɩ nɛ pɔkɔɔ!+
10 Ɩkpaɣ mi-hakiŋ nɛ ilubini laɣla nɛ ɩkpaɣ mi-loozonaa nɛ ilubini kɩgbɛzɛmɩŋ.
Ɛjam ɛyɔɔdɩ se: ‘Mɛwɛ ɖoŋ.’
11 Pɩ-cɔlɔ ajɛɛ mɩ, mi-kpeekpe ɩkɔɔ nɛ ɩsɩna, ikpeɣli ɖama!”»+
Hayɩ Yehowa, tini ño-ɖoŋ tɩnaa* lone nɖɩ ɖɩ-taa.
12 «Ajɛɛ ɩkʋyɩ nɛ awolo Yozafaatɩ Fɛɛʋ taa;
Mbʋ pʋyɔɔ yɔ, peeɖe mankaɣ caɣʋ nɛ mahʋʋnɩ tɔm pɩ-cɔlɔ ajɛɛ tɩŋa.+
13 Ɩkpaɣ loozo nɛ iwolo ɩkʋ, mbʋ pʋyɔɔ yɔ tɔɔnaɣ kʋkʋmaɣ pɩwa.
Itii nɛ ɩfɛyɩ, mbʋ pʋyɔɔ yɔ viiñi ɖɩfɛyɩyɛ suwa.+
Vɛɛ su wondu taa nɛ pɩwadɩɣ, mbʋ pʋyɔɔ yɔ pa-kɩwɛɛkɩm fɛyɩ kalʋʋ.
14 Ɛyaa samasɩ, ɛyaa samasɩ wɛ lɩmaɣza kpaɣʋ fɛɛʋ taa,
Mbʋ pʋyɔɔ yɔ Yehowa kɩyakʋ ñɔtaa, lɩmaɣza kpaɣʋ fɛɛʋ taa.+
15 Wɩsɩ nɛ fenaɣ pakaɣ pɩsʋʋ cɩkpɛndʋʋ,
Nɛ tɩɩnzɩ kaɣ lesuu sɩ-ñalɩmɩyɛ.
16 Nɛ Yehowa nɔɔ kaɣ tiluu nɛ Siyɔŋ kiŋ,
Pakaɣ ɛ-nɔɔ nɩʋ nɛ Yeruzalɛm kiŋ.
17 Nɛ ɩkaɣ naʋ se mɛkɛnɩ mɩ-Ɛsɔ Yehowa, mɛwɛ Siyɔŋ, man-pʋʋ kiɖeɖeu yɔɔ.+
18 Kɩyakʋ ŋgʋ lɛ, vɛɛ leleŋ ñɩŋgʋ kaɣ catʋʋ pʋŋ yɔɔ,+
Naalɩm kaɣ kpem piyisi yɔɔ,
Nɛ lɩm kaɣ kpem Yuuda lemisi kpeekpe taa.
Lɩm nabʋyʋ kaɣ lɩnʋʋ Yehowa ɖɩɣa taa nɛ pikpeŋ,+
Nɛ pɩkaɣ niɣduu Akasɩya Tɩŋ Fɛɛʋ.
19 Ɛlɛ Ejipiti kaɣ pɩsʋʋ njɛyɛ,+
Nɛ Edom kaɣ pɩsʋʋ kañɩmbusuu ŋgʋ kɩ-taa nɔɔyʋ fɛyɩ yɔ,+
Mbʋ pʋyɔɔ yɔ palabɩ Yuuda samaɣ kañatʋ lakasɩ,+
Pɛkpɛdɩ calɩm ɖulum Yuuda ɛjaɖɛ taa.+
20 Ɛlɛ ɛyaa kaɣ wɛʋ Yuuda taa tam,
Nɛ Yeruzalɛm taa pɩnzɩ nɛ pɩnzɩ.+