Kroniiki takayaɣ naalɛ ñɩŋga
4 Nɛ ɛla ñɩɣyʋʋ kɩsɛɛmʋʋ altaaru,+ kɩ-ɖaɣlɩkɩŋ kɛ nuŋgolonzi 20, kɩ-walanzɩ kɛ nuŋgolonzi 20, nɛ kɩ-kʋkʋyɩŋ kɛ nuŋgolonzi 10.
2 Eyolisi ñɩɣtʋ nɛ ɛlabɩnɩ Teŋgu.*+ Kɩɩwɛ kulukulu; kpaɣ nɔɔ hɔɔlʋʋ nɛ ŋwolo nɔɔ hɔɔlʋʋ lɛɛkʋ lɛ, pɩkɛ nuŋgolonzi 10, nɛ kʋkʋyɩŋ kɛ nuŋgolonzi 5, nɛ pɩɩpɔzɩ nimiye nɖɩ ɖɩ-ɖaɣlɩkɩŋ kɛ nuŋgolonzi 30 yɔ pʋcɔ nɛ pamaɣzɩ nɔɔ ŋga nɛ pɩcɔɔ pɩta.+ 3 Paalabɩ ɖɔɖɔ ajana kɩlɛmɩŋ kɩ-tɛɛ nɛ ɩwɛɛ ɛzɩ kama yɔ+ nɛ pɩcɔɔ kɩ-tɩŋa nɛ pɩta, kama 10 nuŋgoloŋa kʋɖʋmaɣ taa nɛ pɩcɔɔ Teŋgu nɛ pɩta. Paaɖʋ kama ana canzɩ 2 nɛ pɛkpɛndɩ a nɛ Teŋgu nɛ pala tam kʋɖʋm. 4 Teŋgu kaacaɣ naŋ abalɩñɩŋ 12 yɔɔ,+ 3 ha ɛsa nɛ hayo kiŋ, 3 ha ɛsa nɛ wɩsɩ ɖɩɖʋyɛ, 3 ha ɛsa nɛ hadɛ kiŋ, nɛ 3 ha ɛsa nɛ wɩsɩ ɖɩlɩyɛ; nɛ Teŋgu caɣ ɩ-yɔɔ, nɛ ɩ-tɔbɩŋ wɛɛnɩ hɛkʋ taa kiŋ. 5 Nɛ ɛzɩma kɩkpɩndaa yɔ pɩɩkɛ niwee 4 walanzɩ;* nɛ paalabɩ kɩ-nɔɔ nɛ kɛwɛɛ ɛzɩ kɔpʋ nɔɔ yɔ, ɛzɩ hɛɖʋʋ ŋgʋ payaɣ se lii yɔ. Papɩzɩɣ nɛ papɩyɩ kɩ-taa lɩm batwaa* 3 000.
6 Pɩtasɩ lɛ, ɛlabɩ ñanzɩ sɔsɔsɩ 10, nɛ ɛsɩɩ 5 nɩwaŋ yɔɔ nɛ 5 nɩmɩyɛ yɔɔ.+ Sɩ-taa pañalaɣ nɛ pekelisiɣ kɩlaŋ kɩñaɣzɩŋ wondu.+ Ɛlɛ Teŋgu lɛ, kɩ-taa cɔjɔnaa cozaɣ lɩm nɛ pasaŋɩɣ pe-nesi nɛ pɔkɔʋ pa-nɩŋgbanzɩ.+
7 Pʋwayɩ lɛ, ɛla sika kanɖʋnaa ɖɩzɩyɛ 10,+ ɛzɩ pawɩlʋʋ-ɩ se ɛla yɔ,+ nɛ ɛsɩɩ-wɛ templo taa, 5 nɩwaŋ yɔɔ nɛ 5 nɩmɩyɛ yɔɔ.+
8 Ɛlabɩ ɖɔɖɔ taabɩlɩnaa 10 nɛ ɛsɩɩ-wɛ templo taa, 5 nɩwaŋ yɔɔ nɛ 5 nɩmɩyɛ yɔɔ;+ nɛ ɛla sika ñanzɩ kulam ñɩnzɩ 100.
9 Nɛ ɛla cɔjɔnaa+ kadaɣ+ nɛ kadaɣ sɔsɔɔ+ nɛ kadaɣ pɔɔyɩŋ, nɛ ɛpɔ ñɩɣyʋʋ kɩsɛɛmʋʋ sɩ-pɔɔyɩŋ yɔɔ. 10 Nɛ ɛsɩɩ Teŋgu nɩwaŋ hɔɔlʋʋ yɔɔ, hadɛ kiŋ wɩsɩ ɖɩlɩyɛ hɔɔlʋʋ taa.+
11 Hiram labɩ ɖɔɖɔ tɔkasɩ, pɛɛlɩnaa, nɛ ñanzɩ kulam ñɩnzɩ.+
Nɛ Hiram tɛ tʋma wena Wiyaʋ Salomɔɔ ɖʋ-ɩ se ɛla Ɛsɔ toovenim tʋ ɖɩɣa taa yɔ:+ 12 Ɛlabɩ tilima 2+ nɛ hokiŋ weyi palabɩ-ɩ ɛzɩ ñanzɩ kulam ñɩnzɩ nɛ ɩwɛɛ tilima ana a-naalɛ a-ñʋŋ taa yɔ; ɛlabɩ giriyaazɩwaa 2+ se pohuuzi hokiŋ 2 weyi palabɩ-ɩ ɛzɩ ñanzɩ kulam ñɩnzɩ nɛ ɩwɛɛ tilima ana a-ñʋŋ taa yɔ ɩ-yɔɔ; 13 ɛlabɩ girenaadɩ pee+ 400 wena palaba se awɛɛ giriyaazɩwaa mba pa-naalɛ pɔ-yɔɔ yɔ, girenaadɩ pee canzɩ 2 nzɩ palaba se sɩwɛɛ paa giriyaazɩ ŋgʋ lɛ kɩ-yɔɔ yɔ, se pohuuzi hokiŋ 2 weyi palabɩ-ɩ ɛzɩ ñanzɩ kulam ñɩnzɩ nɛ ɩwɛɛ tilima ana a-ñʋŋ taa yɔ ɩ-yɔɔ;+ 14 ɛlabɩ kɛɛkɛɛnaa* 10 nɛ ñanzɩ sɔsɔsɩ 10 nzɩ patɩnɩɣ kɛɛkɛɛnaa yɔɔ yɔ;+ 15 ɛlabɩ Teŋgu nɛ naŋ abalɩñɩŋ 12 weyi ɩwɛ kɩ-tɛɛ yɔ;+ 16 nɛ tɔkasɩ, pɛɛlɩnaa, kela lɔɔyɩsɩ,+ nɛ wondu tɩŋa, ndʋ Hiram-Abiv+ kpaɣ ñɩɣyʋʋ kɩsɛɛmʋʋ ŋgʋ kɩñɩlɩsɩɣ yɔ nɛ ɛlabɩnɩ Yehowa ɖɩɣa tʋma Wiyaʋ Salomɔɔ yɔ. 17 Wiyaʋ yolisi ñɩɣtʋ cʋʋ muulinaa taa Yɔɔrdaŋ egeetiye taa, Sukɔɔtɩ+ nɛ Zereda pɛ-hɛkʋ taa nɛ elubini wondu ndʋ. 18 Salomɔɔ labɩ wondu ndʋ ti-kpeekpe nɛ tɩɖɔɔ pɩdɩɩfɛyɩ; patɩtɩlɩ ñɩɣyʋʋ kɩsɛɛmʋʋ yuŋ.+
19 Salomɔɔ labɩ Ɛsɔ toovenim tʋ ɖɩɣa taa wondu kpeekpe:+ sika altaaru;+ taabɩlɩnaa+ mba pɔ-yɔɔ nɛ Ɛsɔ ɛsɩndaa kpɔnɔnaa yɔ;+ 20 kanɖʋnaa ɖɩzɩyɛ ndɩ ndɩ nɛ pa-kanɖʋnaa mba palabɩnɩ sika kele kele ñɩŋga yɔ,+ se pɔsɔbɩ-wɛ nɛ pɛwɛɛ ɖooo pɩ-taa kuduyuu ɛsɩndaa ɛzɩ paɣtʋ pɔzʋʋ yɔ; 21 nɛ ɛkpaɣ sika, sika ŋga kɛwɛ kele kele nɛ pɩkpaɖɩ yɔ, nɛ ɛlabɩnɩ hɛtʋ, kanɖʋnaa, nɛ kpɩɖɩŋ;* 22 ɛkpaɣ sika kele kele ñɩŋga nɛ ɛlabɩnɩ wondu ndʋ paɖɩzɩɣnɩ miŋ yɔ, ñanzɩ kulam ñɩnzɩ, kɔpʋnaa, nɛ miŋ ñanzɩ; nɛ ɛkpaɣ sika+ nɛ ɛlabɩnɩ ɖɩɣa nɔnɔɔ, kɛ-tɛ ɖooo pɩ-taa pɔɔyɩŋ weyi ɩwɛ Lone Kiɖeɖeye nɖɩ ɖɩkpaɖaa yɔ ɖɩ-yɔɔ yɔ,+ nɛ templo ɖɩɣa pɔɔyɩŋ.