Kroniiki takayaɣ kajalaɣ ñɩŋga

10 Filistii mba kaawɛɛ nɛ poyouni Izrayɛɛlɩ. Nɛ Izrayɛɛlɩ mba se Filistii mba ɛsɩndaa, nɛ pakʋ pa-taa sakɩyɛ Gilibowa Pʋʋ yɔɔ.+ 2 Filistii mba kɔɔ nɛ pɔñɔtɩnɩ Sɔɔlɩ nɛ ɛ-pɩyalaa, nɛ Filistii mba kʋ Sɔɔlɩ pɩyalaa: Yonataanɩ, Abinadaabɩ nɛ Malɩkii-Suwa.+ 3 You wizini Sɔɔlɩ yɔɔ, nɛ tɔŋ tɔyaa lɩɩ ɛ-yɔɔ, nɛ tɔŋ tɔyaa mba paɖʋ-ɩ heŋ.+ 4 Nɛ Sɔɔlɩ heyi e-you wondu ɖɔkɩyʋ se: «Kpɛɛ ña-laɣɖɛ nɛ ŋsɔbɩ-m, se pɩtaala nɛ kɩdɩbɛlɩŋ ɛnɛ yɔ ɩkɔɔ nɛ ɩlabɩ-m kañatʋ lakasɩ.»+ Ɛlɛ e-you wondu ɖɔkɩyʋ taasɔɔlɩ se ɛla mbʋ, mbʋ pʋyɔɔ yɔ sɔɔndʋ kpaɣaɣ-ɩ siŋŋ. Peeɖe Sɔɔlɩ kpaɣ laɣɖɛ nɛ ɛtɔlɩ ɖɩ-yɔɔ.+ 5 Sɔɔlɩ you wondu ɖɔkɩyʋ nawa se Sɔɔlɩ sɩba lɛ, ɛnʋ ɖɔɖɔ ɛtɔlɩ ɛ-maɣmaɣ ɛ-laɣɖɛ yɔɔ nɛ ɛsɩ. 6 Mbʋ Sɔɔlɩ nɛ ɛ-pɩyalaa 3 pasɩba, nɛ ɛ-ɖɩɣa taa mba kpeekpe kpɛndɩ nɛ pasɩ.+ 7 Izrayɛɛlɩ mba kpeekpe mba paawɛ fɛɛʋ* taa yɔ panawa se ɛyaa tɩŋa sewa, nɛ Sɔɔlɩ nɛ ɛ-pɩyalaa pasɩba lɛ, papaɣzɩ lɩʋ pɛ-tɛtʋ ndɩ ndɩ taa nɛ peseɣ; nɛ Filistii mba kɔɔ nɛ pacaɣ tɩ-taa.

8 Filistii mba kɔm tɛʋ kifemuu se palɩzɩ wondu sɩɖaa yɔɔ lɛ, pamaɣnɩ Sɔɔlɩ nɛ ɛ-pɩyalaa pasɩbɩ Gilibowa Pʋʋ yɔɔ.+ 9 Nɛ palɩzɩ Sɔɔlɩ yɔɔ wondu nɛ pɛsɛtɩ ɛ-ñʋʋ nɛ pakpaɣ e-you wondu, nɛ petiyi ɛyaa Filistii mba ɛjaɖɛ kpeekpe taa se posusi tɔm ndʋ pa-sɩʋ kpelisi+ nɛ samaɣ. 10 Nɛ pasɩɩ e-you wondu pɛ-ɛsɔ ɖɩɣa* taa nɛ popuzi ɛ-ñʋmbɔɔyaɣ Daagɔɔnɩ ɖɩɣa taa.+

11 Yabɛɛsɩ+ ñɩma mba pɛwɛ Galaadɩ yɔ pa-tɩŋa panɩ mbʋ payɩ Filistii mba labɩ Sɔɔlɩ yɔ pɩ-tɔm lɛ,+ 12 sɔɔjanaa kpeekpe kʋyɩ nɛ powolo pakpaɣ Sɔɔlɩ nɛ ɛ-pɩyalaa po-tomnasɩ. Powoni-sɩ Yabɛɛsɩ nɛ pepi pɔ-mɔɔ Yabɛɛsɩ, tɩʋ sɔsɔʋ tɛɛ,+ nɛ pɔhɔkɩ nɔɔ kɩyakɩŋ 7.

13 Mbʋ Sɔɔlɩ sɩba, mbʋ pʋyɔɔ yɔ ɛtaawɛɛ siɣsiɣ Yehowa ɛsɩndaa: ɛtɩña Yehowa tɔm,+ nɛ ewoba nɛ ɛpɔzɩ weyi ɛsʋzʋʋ nɛ ɛyɔɔdʋʋnɩ sɩɖaa yɔ+ 14 nɛ etiwolo se ɛpɔzɩ Yehowa ɛlɛ lɩmaɣza. Pʋyɔɔ ɛlɛ kʋ-ɩ nɛ ɛpɩsɩnɩ kewiyitu nɛ ɛcɛlɩ Yesee pɩyalʋ Daviid.+