Yereemii
40 Tɔm lɩnɩ Yehowa cɔlɔ nɛ tɩtalɩ Yereemii, alɩwaatʋ ndʋ wiyaʋ yɔɔ kandɩyaa ñʋʋdʋ Nebuzaradaanɩ+ tɛm Yereemii yebu Ramaa+ nɛ ɛlɛ ɖɛɛ yɔ. Ɛɛɖʋ e-nesi kpasɩ nɛ ewoni-i peeɖe, nɛ ɛɛwɛ Yeruzalɛm mba nɛ Yuuda ñɩma mba payɩ pɛɖɛɣaɣnɩ-wɛ yomiye taa Babilɔɔnɩ yɔ pa-taa. 2 Nɛ wiyaʋ yɔɔ kandɩyaa ñʋʋdʋ kpaɣ Yereemii nɛ eheyi-i se: «Ñɛ-Ɛsɔ Yehowa kaayɔɔdɩ asɛyʋʋ kʋnɛ kɩ-tɔm se kɩkaɣ kɔm lone ɖɩnɛ ɖɩ-yɔɔ, 3 nɛ Yehowa yele nɛ kɩkɔɔ ɛzɩ ɛɛyɔɔdʋʋ yɔ, mbʋ pʋyɔɔ yɔ ɩyʋsɩnɩ Yehowa nɛ ɩtɩña ɛ-nɔɔ taa tɔm. Pʋyɔɔ pɩtalɩ-mɩ mbʋ.+ 4 Lɛɛlɛɛyɔ lɛ mɛwɛɛ nɛ malɩzɩɣ kpasɩ nzɩ paaɖʋ ñe-nesi yɔ sɔnɔ. Ye pɩkɛdɩnɩ-ŋ se ma nɛ ŋ ɖiwolo Babilɔɔnɩ yɔ, kɔɔ nɛ ɖiwolo, nɛ mankaɣ cɔnʋʋ ñɔ-yɔɔ. Ɛlɛ ye ŋtɩsɔɔlɩ se ma nɛ ŋ ɖiwolo Babilɔɔnɩ yɔ, taawolo. Na! Ɛjaɖɛ kpeekpe wɛ ñɛ-ɛsɩndaa. Wolo ɖenɖe ŋsɔɔlaa yɔ.»+
5 Yereemii tɩtɩɩhatɩ siɣye se ɛɖɛɛ lɛ, Nebuzaradaanɩ yɔɔdɩ se: «Pɩsɩ Safaanɩ+ pɩyalʋ Ahikam+ pɩyalʋ Gedaliya+ cɔlɔ, weyi Babilɔɔnɩ wiyaʋ sɩ-ɩ wiyaʋ Yuuda tɛtʋ ndɩ ndɩ yɔɔ yɔ, nɛ ŋcaɣ ɛ-cɔlɔ samaɣ hɛkʋ taa; yaa ŋwolo ɖenɖe ŋsɔɔlaa yɔ.»
Nɛ wiyaʋ yɔɔ kandɩyaa ñʋʋdʋ cɛlɩ-ɩ tɔɔnaɣ nɛ ɛlabɩ-ɩ kʋjɔʋ nɛ eyebi-i nɛ ɛɖɛɛ. 6 Peeɖe Yereemii ɖɛwa nɛ ewolo Ahikam pɩyalʋ Gedaliya cɔlɔ Mizpaa+ nɛ ɛcaɣ ɛ-cɔlɔ samaɣ ŋga pɩɩkazɩ ɛjaɖɛ taa yɔ kɛ-hɛkʋ taa.
7 Pʋwayɩ lɛ, sɔɔjanaa ñʋndɩnaa mba payɩ pa nɛ pɛ-ɛyaa paawɛ hayɩm taa yɔ panɩɩ se Babilɔɔnɩ wiyaʋ kaasɩ Ahikam pɩyalʋ Gedaliya wiyaʋ ɛjaɖɛ taa nɛ ɛɛsɩ-ɩ se ɛcɔnɩ abalaa, halaa nɛ piya yɔɔ, mba paawɛ ɛjaɖɛ taa kʋñɔndɩnaa mba patɩɖɛnɩ-wɛ Babilɔɔnɩ yɔ pa-taa yɔ.+ 8 Peeɖe pɔkɔm Gedaliya cɔlɔ Mizpaa.+ Mba yɔ: Netaniya pɩyalʋ Isimayɛɛlɩ,+ Kareya pɩyalaa Yohanaanɩ+ nɛ Yonataanɩ, Tanɩhumɛɛtɩ pɩyalʋ Seraya, Netofa tʋ Efaayɩ pɩyalaa, nɛ Maakat tʋ pɩyalʋ Yezaniya,+ pa nɛ pɛ-ɛyaa. 9 Safaanɩ pɩyalʋ Ahikam pɩyalʋ Gedaliya ɖuuni pa nɛ pɛ-ɛyaa nɛ ɛyɔɔdɩ se: «Sɔɔndʋ ɛtaakpa-mɩ se ɩɖʋʋ Kalɩdee mba lɩm. Ɩcaɣ ɛjaɖɛ taa nɛ ɩɖʋ Babilɔɔnɩ wiyaʋ lɩm, nɛ pɩkaɣ-mɩ ɖɔmnʋʋ camɩyɛ.+ 10 Piyele nɛ ma yɔ mankaɣ caɣʋ Mizpaa nɛ mɛnkɛ mi-lone taa caɣyʋ* Kalɩdee ñɩma mba pɔkɔŋ ɖɔ-cɔlɔ yɔ pɛ-ɛsɩndaa. Ɛlɛ pɩwɛɛ se ɩla vɛɛ nɛ num nɛ ikpeɣli soŋaɣ alɩwaatʋ taa tɩŋ pee nɛ ɩsɩɩ mɩ-pɛŋ taa nɛ ɩcaɣ tɛtʋ ndɩ ndɩ ndʋ ɩmʋwa yɔ tɩ-taa.»+
11 Nɛ Yuuda mba kpeekpe mba paawɛ Mowaabʋ, Amooni nɛ Edom, pɩkpɛndɩnɩ mba paawɛ ajɛɛ lɛɛna tɩŋa taa yɔ, panɩɩ ɖɔɖɔ se Babilɔɔnɩ wiyaʋ kaakazɩ nabɛyɛ nɛ pacaɣ Yuuda taa nɛ ɛɛlɩzɩ Safaanɩ pɩyalʋ Ahikam pɩyalʋ Gedaliya se ɛkɛ pe-wiyaʋ. 12 Peeɖe Yuuda ñɩma kpeekpe paɣzɩ lɩnʋʋ lona wena a-taa payɩ paamɩzɩ-wɛ yɔ nɛ papɩsɩɣ, nɛ pɔkɔɔ Yuuda ɛjaɖɛ taa, Gedaliya cɔlɔ Mizpaa. Nɛ pala vɛɛ nɛ pekpeɣli soŋaɣ alɩwaatʋ taa tɩŋ pee nɛ pɩɖɔɔ pɩdɩɩfɛyɩ.
13 Kareya pɩyalʋ Yohanaanɩ nɛ sɔɔjanaa ñʋndɩnaa mba payɩ paawɛ hayɩm taa yɔ, pɔkɔɔ Gedaliya cɔlɔ Mizpaa. 14 Peheyi-i se: «Ŋŋsɩŋ se Amooni mba+ wiyaʋ Baalisi tiyi Netaniya pɩyalʋ Isimayɛɛlɩ se ɛkʋ-ŋ yaa we?»+ Ɛlɛ Ahikam pɩyalʋ Gedaliya titisi pɔ-tɔm yɔɔ.
15 Nɛ Kareya pɩyalʋ Yohanaanɩ heyi Gedaliya mɛsaɣ tɛɛ Mizpaa taa se: «Mɔnsɔɔlaa se mowolo nɛ mankʋ Netaniya pɩyalʋ Isimayɛɛlɩ, nɛ nɔɔyʋ ɛɛkaɣ tɩlʋʋ. Ɛbɛ yɔɔ pɩwɛɛ se ɛkʋ-ŋ, nɛ ɛbɛ yɔɔ pɩwɛɛ se Yuuda samaɣ kpeekpe ŋga kekpeɣli ñɔ-cɔlɔ yɔ kamɩzɩ nɛ Yuuda ñɩma mba pɩkazaa yɔ paɖɩ?» 16 Ɛlɛ Ahikam pɩyalʋ Gedaliya+ heyi Kareya pɩyalʋ Yohanaanɩ se: «Taala mbʋ, mbʋ pʋyɔɔ yɔ tɔm ndʋ ŋwɛɛ nɛ ŋyɔɔdʋʋ Isimayɛɛlɩ yɔɔ yɔ tɩkɛ cɛtɩm.»