Apostoloowaa Tʋma Labʋ
1 Oo Tewofiili, kajalaɣ takayaɣ taa, mɛnkɛdɩ-ŋ mbʋ payɩ Yesu laba nɛ tɔm ndʋ ɛwɩlaa+ 2 pɩkɔɔ nɛ pɩtalɩ kɩyakʋ ŋgʋ pakpazɩ-ɩ ɛsɔdaa yɔ.+ Ɛtɩŋnɩ fezuu kiɖeɖeu yɔɔ nɛ ɛɖʋ paɣtʋ apostoloowaa mba ɛlɩzaa yɔ+ nɛ pɩtɛ lɛ, pakpazɩ-ɩ ɛsɔdaa. 3 Ɛtɔɔ kʋñɔŋ nɛ pɩtɛ lɛ, ɛtɩŋnɩ nʋmɔŋ sakɩyɛ yɔɔ nɛ ɛlɩzɩ ɛ-tɩ nɛ ɛwɩlɩ-wɛ se pana se toovenim lɛ ɛ nɛ ɛ-ɛsa.+ Pana-ɩ kɩyakɩŋ 40, nɛ ɛyɔɔdaɣ Ɛsɔ Kewiyaɣ yɔɔ tɔm.+ 4 Ɛ nɛ wɛ pekpeɣlaɣ lɛ, ɛpaɣ-wɛ se: «Ɩtaalɩɩ Yeruzalɛm nɛ ɩɖɛɛ,+ ɛlɛ ɩwɛɛ nɛ ɩɖaŋɩɣ mbʋ Caa kaaheyi-mɩ se ɛhaɣ-mɩ,+ nɛ ɩnɩɩ pɩ-tɔm mɔn-cɔlɔ yɔ; 5 mbʋ pʋyɔɔ yɔ toovenim taa lɛ, Yohanɛɛsɩ mɩyɩsɩ ɛyaa lɩm taa, ɛlɛ mɩ lɛ pakaɣ-mɩ mɩyɩsʋʋ fezuu kiɖeɖeu taa,+ kɩyakɩŋ pazɩ wayɩ.»
6 Pʋyɔɔ paakpeɣlaa lɛ, pɔpɔzɩ-ɩ se: «Kɩbaɣlʋ, lɛɛlɛɛyɔ ŋɖaɣnɩɣ Izrayɛɛlɩ kewiyaɣ sɩʋ na?»+ 7 Eheyi-wɛ se: «Pɩtɩcɛyɩ se ɩtɩlɩ alɩwaatʋ yaa wɛɛ wena Caa ɖʋ ɛ-maɣmaɣ e-ɖoŋ tɛɛ yɔ.+ 8 Ɛlɛ ɩkaɣ mʋʋ ɖoŋ alɩwaatʋ ndʋ fezuu kiɖeɖeu tiki mɩ-yɔɔ yɔ,+ nɛ ɩkaɣ kɛʋ ma-aseɣɖe tɩnaa+ Yeruzalɛm taa,+ Yuudee tɩŋa taa nɛ Samaarii taa,+ nɛ piwolo pɩtalɩ tɛtʋ hɔɔlʋʋ ŋgʋ kɩkɩlɩ posuu yɔ kɩ-taa.»*+ 9 Ɛtɛm tɔm ndʋ yɔɔdʋʋ nɛ pɛwɛɛ nɛ pɔcɔŋna lɛ, pɩkpazɩ-ɩ ɛsɔdaa nɛ ɛsɔmɩnʋʋ nakʋyʋ huuzi ɛ-yɔɔ nɛ paatasɩɣ-ɩ naʋ.+ 10 Nɛ pɛwɛɛ nɛ pɔcɔŋnɩ ɛsɔdaa alɩwaatʋ ndʋ ɛɖɛɣaɣ yɔ lɛ, ɛyaa 2 lɩɩ tuda nɛ pasɩŋ pɔ-cɔlɔ, posu tokonaa kʋhʋlʋmaa+ 11 nɛ pɔpɔzɩ-wɛ se: «Galilee abalaa mɩ, ɛbɛ yɔɔ ɩsɩŋaa nɛ ɩcɔŋnɩ ɛsɔdaa? Yesu ɛnɛ, weyi pɩkpaɣ-ɩ mɩ-cɔlɔ nɛ pɩkpazɩ-ɩ ɛsɔdaa yɔ, ɛzɩ ɩnaʋ-ɩ eɖiɣni kpaʋ ɛsɔdaa yɔ, mbʋ ɖɔɖɔ ɛkaɣ kɔm.»
12 Nɛ pakʋyɩ pʋʋ ŋgʋ payaɣ se Oliivi Pʋʋ yɔ kɩ-yɔɔ nɛ papɩsɩ Yeruzalɛm,+ pʋʋ ŋgʋ kɩñɔtɩnɩ Yeruzalɛm; nʋmɔʋ ɖaɣlɩkɩŋ maɣnɩ kilomɛta kʋɖʋmʋʋ mbʋ yɔ.* 13 Patalaa lɛ, pakpa ɛsɔdaa kuduyuu tɛɛ ɖenɖe patɩɩcakɩ yɔ. Mba yɔ: Pɩyɛɛrɩ, Yohanɛɛsɩ, Yakubu nɛ Andree, Filiipu nɛ Tomaa, Bartelemii nɛ Maatiyee, Alfee pɩyalʋ Yakubu, nɛ Siimɔɔ kpekpeka tʋ, nɛ Yakubu pɩyalʋ Yudaasɩ.+ 14 Pɛkpɛndɩ nɔɔ nɛ pɛwɛɛ adɩma yɔɔ, pa nɛ halaa nabɛyɛ+ nɛ Yesu ɖoo Maarɩɩ nɛ Yesu newaa.*+
15 Kɩyakɩŋ ɛnɩ ɩ-taa lɛ, Pɩyɛɛrɩ kʋyɩ nɛ ɛsɩŋ koobiya hɛkʋ taa (ɛyaa kaakpɛndɩ ɛzɩ 120 mbʋ yɔ) nɛ ɛtɔ se: 16 «Koobiya, pɩɩcɛyaa se mayaɣ taa tɔm ndʋ fezuu kiɖeɖeu kaatɩŋnɩ Daviid yɔɔ nɛ kɩyɔɔdɩ yɔ tɩla;+ kɩyɔɔdɩ Yudaasɩ weyi eɖiyi mba pɔkɔm nɛ pakpa Yesu yɔ ɛ-tɔm.+ 17 Mbʋ pʋyɔɔ yɔ ɛɛwɛ ɖɛ-hɛkʋ taa+ nɛ palɩzɩ-ɩ se ɖa nɛ ɩ ɖɩla lɩm ɖʋʋ tʋmɩyɛ ɖɩnɛ. 18 (Nɛ abalʋ ɛnʋ, ɛkpaɣ mbʋ pɩfɛyɩ siɣsiɣ yɔ pɩ-kɩhɛyʋʋ nɛ ɛyabɩnɩ hayɩm,+ nɛ ɛtɔlɩ nɛ esiɣ ɛ-ñʋʋ yɔɔ, nɛ ɛya* sʋ nɛ ɛ-taa lotu kpeekpe mɩzɩ.+ 19 Yeruzalɛm mba kpeekpe sɩm tɔm ndʋ, mbʋ yebina nɛ payaɣ hayɩm mbʋ pa-kʋnʋŋ taa se Akɛlɩdamaa, pʋ-tɔbʋʋ se: “Calɩm Hayɩm.”) 20 Mbʋ pʋyɔɔ yɔ pama Keɣsi takayaɣ taa se: “Ɛ-ɖɩjaɣyɛ ɛpɩsɩ njɛyɛ, nɛ nɔɔyʋ ɛtaacaɣ peeɖe”+ nɛ “Nɔɔyʋ ɛmʋ waɖɛ nɖɩ ɛwɛna se eɖiyi samaɣ yɔ.”+ 21 Ye mbʋ, pɩcɛyaa se abalaa mba paatɩŋ-ɖʋ alɩwaatʋ tɩŋa, ndʋ tɩ-taa Kɩbaɣlʋ Yesu labɩ ɛ-tʋmɩyɛ* ɖɛ-hɛkʋ taa, 22 kpaɣnɩ alɩwaatʋ ndʋ Yohanɛɛsɩ mɩyɩsɩ-ɩ lɩm+ nɛ pɩkɔɔ pɩtalɩ kɩyakʋ ŋgʋ pakpaɣ-ɩ ɖɔ-cɔlɔ nɛ pakpazɩ-ɩ ɛsɔdaa yɔ,+ pa-taa kʋɖʋm ɛkpɛndɩ ɖɔ-yɔɔ nɛ ɛpɩsɩ e-femtu aseɣɖe tʋ.»+
23 Nɛ palɩzɩ ɛyaa 2, Yosɛɛfʋ weyi payaɣ se Barsaabaasɩ nɛ payaɣ-ɩ ɖɔɖɔ se Yustuusi yɔ, nɛ Maatɩyaasɩ. 24 Nɛ patɩmɩ nɛ pɔtɔ se: «Hayɩ Yehowa,* ña weyi ŋsɩm ɛyaa tɩŋa laŋa yɔ,+ wɩlɩ ɛyaa panɛ pa-naalɛ pa-taa weyi ŋlɩzaa 25 se ɛla lɩm ɖʋʋ tʋmɩyɛ nɛ apostoloo tʋmɩyɛ, nɖɩ Yudaasɩ yeba nɛ ɛkpaɣ ɛ-maɣmaɣ ɛ-nʋmɔʋ yɔ.»+ 26 Nɛ pɔtɔ piye,*+ nɛ piye tɔlɩ Maatɩyaasɩ yɔɔ; nɛ pɔsɔzɩ-ɩ apostoloowaa 11 yɔɔ.