Roma mba
10 Koobiya, toovenim taa lɛ, me-liu sɔɔlɩm lɛ se pehiɣ ñʋʋ yabʋ nɛ pʋyɔɔ ɖɔɖɔ mentendiɣ Ɛsɔ pɔ-yɔɔ.+ 2 Mbʋ pʋyɔɔ yɔ malɩzɩɣ pɔ-yɔɔ aseɣɖe se pɛwɛnɩ kpekpeka Ɛsɔ yɔɔ,+ ɛlɛ katɩla nɔɔ kʋɖʋmaɣ nɛ toovenim sɩmtʋ. 3 Mbʋ pʋyɔɔ yɔ, patɩtɩlɩ Ɛsɔ siɣsiɣ wɛtʋ+ ɛlɛ pañɩnɩɣ se paɖʋ pa-maɣmaɣ pa-ñɩndʋ; pʋyɔɔ lɛ,+ patiluzi pa-tɩ Ɛsɔ siɣsiɣ wɛtʋ tɛɛ.+ 4 Mbʋ pʋyɔɔ yɔ Krɩstʋ kɛnɩ Paɣtʋ tɩnaɣ,+ se pɩsa nɛ weyi ɛwɛnɩ tisuu ɛ-yɔɔ yɔ, ɛpɩzɩ nɛ ɛwɛɛnɩ siɣsiɣ wɛtʋ.+
5 Mbʋ pʋyɔɔ yɔ Moyizi ma siɣsiɣ wɛtʋ ndʋ tɩlɩnɩ Paɣtʋ taa yɔ tɩ-yɔɔ se: «Ɛyʋ weyi ɛɖɔŋ tɔm tʋnɛ tɩ-yɔɔ yɔ, tɩkaɣ yebu nɛ ɛwɛɛ wezuu.»+ 6 Ɛlɛ siɣsiɣ wɛtʋ ndʋ tɩlɩnɩ tisuu taa yɔ tɩtɔŋ se: «Taayɔɔdɩ ña-laŋɩyɛ taa se:+ “Akaɣ kpaʋ ɛsɔdaa?”+ pʋ-tɔbʋʋ se, ɛkpaɣ se etisi Krɩstʋ, 7 yaa: “Akaɣ tibu pɔʋ sɔsɔʋ taa?”+ pʋ-tɔbʋʋ se, etiki se ɛkpazɩ Krɩstʋ nɛ sɩɖaa taa.» 8 Ɛlɛ suwe tɩyɔɔdʋʋ? «Tɔm ndʋ tɩwɛ ñɔ-cɔlɔ, tɩwɛ ñɔ-nɔɔ taa nɛ ña-laŋɩyɛ taa»;+ pʋ-tɔbʋʋ lɛ se, tisuu «tɔm» ndʋ ɖiɖiɣni susuu yɔ. 9 Mbʋ pʋyɔɔ yɔ, ye ŋyɔɔdʋʋnɩ ñɔ-nɔɔ ɛyaa ɛsɩndaa se Yesu kɛnɩ Kɩbaɣlʋ,+ nɛ ŋwɛɛnɩ tisuu ña-laŋɩyɛ taa se Ɛsɔ fezi-i nɛ sɩɖaa taa yɔ, ŋkaɣ hiɣu ñʋʋ yabʋ. 10 Mbʋ pʋyɔɔ yɔ laŋɩyɛ ɛyʋ tisiɣna se pɩsa nɛ ɛpɩsɩ siɣsiɣ tʋ, ɛlɛ nɔɔ ɛyʋ yɔɔdʋʋnɩ ɛyaa ɛsɩndaa+ se pɩsa nɛ ehiɣ ñʋʋ yabʋ.
11 Mbʋ pʋyɔɔ yɔ mayaɣ yɔɔdʋʋ se: «Weyi ɛwɛɣnɩ tisuu ɛ-yɔɔ yɔ,* fɛyɛ ɛɛkaɣ-ɩ kpaʋ.»*+ 12 Mbʋ pʋyɔɔ yɔ tʋkaɣ nakɛyɛ fɛyɩ Yuuda tʋ nɛ Grɛɛkɩ tʋ pɛ-hɛkʋ taa.+ Kɩbaɣlʋ kʋɖʋm pa-tɩŋa pɛwɛna, ɛnʋ weyi ɛlakɩ kʋjɔŋ sakɩyɛ mba payɩ payaɣ-ɩ yɔ. 13 Mbʋ pʋyɔɔ yɔ «weyi ɛyaɣ Yehowa* hɩɖɛ yɔ, pakaɣ ɛ-ñʋʋ yabʋ.»+ 14 Ɛlɛ, ɛzɩma pakaɣ yaʋ ɛ-hɩɖɛ ye pɛfɛyɩnɩ tisuu ɛ-yɔɔ? Nɛ ɛzɩma pakaɣ wɛnʋʋ tisuu weyi patɩnɩɩ ɛ-tɔm yɔ ɛ-yɔɔ? Nɛ ɛzɩma papɩzɩɣ nɛ panɩɩ ye nɔɔyʋ ɛfɛyɩ se esusuu tɔm? 15 Nɛ ɛzɩma pakaɣ tɔm susuu ye patitiyi-wɛ yɔ?+ Ɛzɩ pamaʋ yɔ: «Mba posusuu mbʋ pɩwɛ ɖeu yɔ pɩ-tɔm kɩbandʋ yɔ, pa-nɩŋgbanzɩ ɖewa pɩdɩɩfɛyɩ!»+
16 Paa mbʋ yɔ, pa-tɩŋa patɩña tɔm kɩbandʋ. Mbʋ pʋyɔɔ yɔ Izaayii yɔɔdaa se: «Yehowa,* awɛnɩ tisuu tɔm ndʋ ɛnɩ ɖɔ-cɔlɔ yɔ* tɩ-yɔɔ?»+ 17 Ye mbʋ, tisuu lɩɣnɩ tɔm ndʋ ɛyʋ nɩwa yɔ tɩ-cɔlɔ.+ Nɛ tɔm ndʋ ɛyʋ nɩwa yɔ, tɩlɩnɩ tɔm ndʋ pɔyɔɔdɩ Krɩstʋ yɔɔ yɔ tɩ-cɔlɔ. 18 Ɛlɛ mɔnpɔzʋʋ se: Ɛzɩ patɩnɩɩ? Toovenim taa lɛ, «panɩ pa-taŋ tɛtʋ kpeekpe yɔɔ, nɛ pɔ-tɔm talɩ tɛtʋ kamasɩ kpeekpe yɔɔ.»+ 19 Ɛlɛ mɔnpɔzʋʋ se: Ɛzɩ Izrayɛɛlɩ tɩtɩlɩ?+ Kajalaɣ lɛ, Moyizi yɔɔdaa se: «Mankaɣ yebu nɛ mbʋ pɩtɩkɛ ɛjaɖɛ yɔ pikulusi mɩ-sʋsɩ; ɛjaɖɛ nɖɩ ɖɩfɛyɩ lɔŋ yɔ nɖɩ mankaɣ kpaɣʋ nɛ monkulusini mɩ-pana sɔsɔna.»+ 20 Ɛlɛ Izaayii yɔɔdɩnɩ abalɩtʋ siŋŋ se: «Mba pataañɩnɩɣ-m yɔ, pana-m;+ mba pataapɔzʋʋ mɔ-yɔɔ yɔ, pasɩmɩ-m.»+ 21 Ɛlɛ ɛyɔɔdɩ Izrayɛɛlɩ yɔɔ se: «Evemiye kpeekpe, monposi me-nesi nɛ samaɣ ŋga kaañaŋ nɛ kɛwɛɛ ñʋʋ taa ɖoŋ yɔ kɔ-yɔɔ kiŋ.»+