Yereemii
35 Tɔm ndʋ tɩlɩnɩ Yehowa cɔlɔ Yuuda wiyaʋ, Yoziyaasɩ pɩyalʋ Yehoyakim+ alɩwaatʋ taa nɛ tɩtalɩ Yereemii yɔ, ndʋ yɔ: 2 «Wolo Rekaab mba+ ɖɩɣa taa nɛ ŋyɔɔdɩnɩ-wɛ nɛ ŋkpaɣ-wɛ nɛ ŋsʋnɩ Yehowa ɖɩɣa taa, ɖamɩŋ weyi ɩ-tɛɛ pɔtɔkɩ tɔɔnaɣ yɔ ɩ-taa nakʋyʋ tɛɛ;* nɛ ŋha-wɛ vɛɛ nɛ pɔñɔɔ.»
3 Peeɖe mankpaɣ Habaziniya pɩyalʋ Yereemii pɩyalʋ Yaazaniya, e-koobiya, ɛ-pɩyalaa kpeekpe, nɛ Rekaab mba ɖɩɣa kpeekpe 4 nɛ mansʋnɩ-wɛ Yehowa ɖɩɣa taa. Mowoni-wɛ Ɛsɔ toovenim tʋ tɛ ɛyʋ, Igidaaliya pɩyalʋ Hanaanɩ pɩyalaa ɖaŋ ŋgʋ kɩ-tɛɛ pɔtɔkɩ tɔɔnaɣ yɔ kɩ-tɛɛ. Kɩɩwɛ ɖaŋ ŋgʋ kɩ-tɛɛ awumbiya tɔkɩ tɔɔnaɣ yɔ kɩ-cɔlɔ, nɛ kʋkʋ ñaawɛ nɔnɔɔ yɔɔ ɖaŋɩyʋ Saalum pɩyalʋ Maaseyiya ɖaŋ ŋgʋ kɩ-tɛɛ pɔtɔkɩ tɔɔnaɣ yɔ kɩ-ñʋʋ yɔɔ. 5 Pʋwayɩ lɛ, mansɩɩ kɔpʋnaa mba pɛwɛnɩ kanɖɛɛ nɛ mba pɛfɛyɩna yɔ, pa-taa nɛ vɛɛ ɖo Rekaab mba ɖɩɣa taa ñɩma ɛsɩndaa nɛ meheyi-wɛ se: «Ɩñɔɔ vɛɛ.»
6 Ɛlɛ pɔyɔɔdɩ se: «Ðɩɩkaɣ ñɔʋ vɛɛ, mbʋ pʋyɔɔ yɔ ɖɔ-cɔzɔ, Rekaab pɩyalʋ Yehonadaabɩ*+ ɖʋ-ɖʋ paɣtʋ tʋnɛ: “Pɩtɩpɔzɩ kpa se mɩ-maɣmaɣ yaa mɩ-pɩyalaa ɩñɔɔ vɛɛ wiɖiyi. 7 Nɛ pɩtɩpɔzɩ se ɩma ɖɩɣa, iɖuu ɖomaɣ, yaa ɩɖʋ yaa ɩwɛɛnɩ viiñi hayɩm. Ɛlɛ pɩwɛɛ se paa ɛzɩmtaa lɛ ɩsʋʋ kizinzikiŋ tɛɛ, se pɩsa nɛ ɩcaɣ ɛjaɖɛ nɖɩ ɖɩ-taa ɩkɛ agɔma yɔ ɖɩ-taa nɛ pileɖi.” 8 Pʋyɔɔ ɖiwoki pɩ-yɔɔ nɛ ɖɩñaŋ ɖɔ-cɔzɔ Rekaab pɩyalʋ Yehonadaabɩ nɔɔ taa tɔm; ɖɩñaŋ paɣtʋ ndʋ payɩ ɛɖʋ-ɖʋ yɔ nɛ ɖɩɩñɔʋ vɛɛ kpa—ɖa-maɣmaɣ, ɖa-halaa, ɖa-pɩyalaa, nɛ ɖɛ-pɛlaa. 9 Nɛ ɖɩɩmaɣ ɖɩsɩ se ɖɩsʋʋ sɩ-taa, nɛ ɖɩfɛyɩnɩ ɖɔɖɔ viiñi* yaa hayɩm yaa ɖomaɣ. 10 Ðiwoki pɩ-yɔɔ nɛ ɖɩsʋʋ kizinzikiŋ tɛɛ nɛ ɖɩñaŋ paɣtʋ ndʋ payɩ ɖɔ-cɔzɔ Yehonadaabɩ* ɖʋ-ɖʋ yɔ. 11 Ɛlɛ Babilɔɔnɩ wiyaʋ Nabukodonozɔɔrɩ* kpawa se eyooni ɛjaɖɛ lɛ,+ ɖɩyɔɔdɩ se: “Ɩkɔɔ nɛ ɖɩsʋʋ Yeruzalɛm taa, se pɩsa nɛ ɖɩtaatɔlɩ Kalɩdee mba nɛ Siirii mba sɔɔjanaa nesi tɛɛ,” nɛ pʋyɔɔ ɖɩwɛ Yeruzalɛm taa.»
12 Nɛ Yehowa tɔm talɩ Yereemii se: 13 «Tɔm tʋnɛ yoyaa tɛ Yehowa, Izrayɛɛlɩ tɛ Ɛsɔ yɔɔdʋʋ: “Wolo nɛ ŋheyi Yuuda mba nɛ Yeruzalɛm taa mba se: ‘Pataawɛɛ nɛ peseɣtiɣ-mɩ se ɩña mɔn-tɔm na?’+ Yehowa yɔɔdʋʋna. 14 ‘Rekaab pɩyalʋ Yehonadaabɩ kaaɖʋ paɣtʋ ɛ-lʋlʋʋ taa mba se pataañɔɔ vɛɛ, nɛ pɔɖɔ ɛ-tɔm yɔɔ nɛ paañɔʋ vɛɛ halɩ nɛ sɔnɔ; mbʋ pɛwɛɛ nɛ pañaŋ pɔ-cɔzɔ paɣtʋ.+ Ɛlɛ ma lɛ, mɔyɔɔdɩnɩ-mɩ nɛ mɛlɛlɩ tam sakɩyɛ,* ɛlɛ ɩtɩñamɩ-m.+ 15 Nɛ maawɛɛ nɛ mentiyiɣ ma-lɩmɖʋyaa mba payɩ pɛkɛ nayaa yɔ mɩ-cɔlɔ, mentiyaɣ-wɛ nɛ mɛlɛlɩɣ tam sakɩyɛ*+ se peheyi-mɩ se: “Ðitendi-mɩ, mɩ-taa paa weyi lɛ eyele ɛ-nʋmɔŋ kɩdɛkɛdɩŋ nɛ ɛpɩsɩ,+ nɛ ɛla mbʋ pɩtʋʋzaa yɔ! Ɩtaatɩŋ ɛsɔnaa lalaa wayɩ nɛ ɩsɛɛ-wɛ. Ðɩnɛ ɛlɛ ɩkaɣ wobu pɩ-yɔɔ nɛ ɩcaɣ ɛjaɖɛ nɖɩ maha mɩ nɛ mɩ-cɔzɔnaa yɔ ɖɩ-taa.”+ Ɛlɛ ɩtɩkʋ nɩŋgbaŋʋʋ nɛ itiwelisini-m. 16 Rekaab pɩyalʋ Yehonadaabɩ lʋlʋʋ taa mba ɖɔm paɣtʋ ndʋ pɔ-cɔzɔ ɖʋ-wɛ yɔ tɩ-yɔɔ,+ ɛlɛ ɛyaa panɛ paba ñatiwelisini-m.’”»
17 «Pʋyɔɔ lɛ, tɔm tʋnɛ Yehowa, yoyaa tɛ Ɛsɔ, Izrayɛɛlɩ tɛ Ɛsɔ yɔɔdʋʋ: “Ɩna, menɖiɣni kɔnʋʋ Yuuda yɔɔ nɛ Yeruzalɛm taa mba kpeekpe yɔɔ asɛyʋʋ ŋgʋ kɩ-tɔm maapaɣ-wɛ yɔ kɩ-tɩŋa,+ mbʋ pʋyɔɔ yɔ mɔyɔɔdɩnɩ-wɛ, ɛlɛ patiwelisi, nɛ mɛwɛɛ nɛ mayaɣ-wɛ, ɛlɛ paacosuu.”»+
18 Nɛ Yereemii heyi Rekaab mba ɖɩɣa taa mba se: «Tɔm tʋnɛ yoyaa tɛ Yehowa, Izrayɛɛlɩ tɛ Ɛsɔ yɔɔdʋʋ: “Ɩñam mɩ-cɔzɔ Yehonadaabɩ paɣtʋ nɛ ɩwɛɛ nɛ ɩɖɔŋ ɛ-paɣtʋ kpeekpe yɔɔ, nɛ ɩlakɩ ɖeyi ɖeyi ɛzɩ ɛɖʋʋ-mɩ paɣtʋ yɔ; pʋyɔɔ lɛ, 19 tɔm tʋnɛ yoyaa tɛ Yehowa, Izrayɛɛlɩ tɛ Ɛsɔ yɔɔdʋʋ: ‘Paa pɩɩla ɛzɩma yɔ Rekaab pɩyalʋ Yehonadaabɩ* lʋlʋʋ taa tʋ nɔɔyʋ kaɣ wɛʋ mɛ-ɛsɩndaa nɛ ɛɖʋʋ-m lɩm.’”»