Keɣa

Ɩsɛɛ Yehowa se ɛlabaɣ lɛ, mbʋ pʋyɔɔ yɔ ɛwɛ ɖeu;+

Ɛ-sɔɔlɩm siɣsiɣ ñɩmbʋ wɛ tam.+

 2 Apɩzɩɣ nɛ esusi Yehowa ɖoŋ tʋma tɩŋa tɔm

Yaa esusi ɛ-lakasɩ nzɩ payɩ sɩmʋnɩ samtʋ yɔ sɩ-tɔm?+

 3 Koboyaɣ tɩnaa lɛ mba palakɩ siɣsiɣ lakasɩ yɔ,

Mba palakɩ mbʋ pɩtʋʋzaa yɔ tam yɔ.+

Cɔnɩ mɔ-yɔɔ nɛ ña-ñʋʋ yabʋ lakasɩ,

 5 Nɛ manpɩzɩ nɛ mehiɣ kɩbandʋ ndʋ ŋlakɩ mba ŋlɩzɩ-wɛ yɔ,+

Nɛ ma nɛ ña-samaɣ ɖɩmɛyɩ,

Nɛ ma nɛ mba pɛkɛ ña-ñɩm yɔ, ɖɩsamɩ-ŋ nɛ agʋnda.*

 6 Ðɩlabɩ kɩdɛkɛdɩm ɛzɩ ɖɔ-cɔzɔnaa yɔ;+

Ðɩlabɩ mbʋ pɩfɛyɩ ɖeu yɔ; ɖɩlabɩ kañatʋ lakasɩ.+

Pataatɔzɩ ñɔ-sɔɔlɩm siɣsiɣ ñɩmbʋ sɔsɔm yɔɔ,

Ɛlɛ palabɩ ñʋʋ taa ɖoŋ lakasɩ teŋgu nɔɔ, Teŋgu Kɩsɛɛmʋʋ nɔɔ.+

 8 Ɛlɛ ɛ-hɩɖɛ yɔɔ lɛ, ɛyabɩ pa-ñʋʋ,+

Se ɛwɩlɩ e-ɖoŋ.+

 9 Ɛkalɩ Teŋgu Kɩsɛɛmʋʋ nɛ kɩ-taa lɩm sɔɔ;

Ɛtɩŋnɩ-wɛ ki-cukaŋ taa ɛzɩ kañɩmbusuu taa yɔ;+

10 Ɛyabɩ pa-ñʋʋ mba pakaɖaɣnɩ-wɛ yɔ pe-nesi tɛɛ+

Nɛ ɛmʋ-wɛ po-koyindinaa nesi tɛɛ.+

11 Lɩm huuzi po-koyindinaa yɔɔ;

Pa-taa nɔɔyʋ tɩtʋlɩ.*+

12 Ðɩnɛ ɛlɛ petisi tamaɣ ŋga ɛlabɩ-wɛ yɔ kɔ-yɔɔ;+

Papaɣzɩ hendu teu nɛ pasaŋɩ-ɩ.+

13 Ɛlɛ pɔsɔ mbʋ ɛlaba yɔ pɩ-yɔɔ lɛɛ lɛɛ;+

Patɩɖaŋ ɛ-lɔŋ tasʋʋ.

14 Pɛɖɛzɩ pe-liu sɔɔlɩm nɔɔ kañɩmbusuu taa;+

Patakɩ Ɛsɔ kañɩmbusuu taa.+

15 Ɛha-wɛ mbʋ paapɔzaa yɔ,

Ɛlɛ pʋwayɩ lɛ, ɛkɔnɩ pɔ-yɔɔ kʋdɔŋ kɩdɛkɛdʋʋ ŋgʋ kɩcam-wɛ nɛ pasɩ yɔ.*+

16 Paasʋsɩ Moyizi ɖigbeɣliye* taa,

Paasʋsɩ ɖɔɖɔ Aarɔɔnɩ,+ Yehowa tɛ ɛyʋ kiɖeɖeu.+

17 Peeɖe tɛtʋ ha nɔɔ nɛ tili Dataanɩ,

Nɛ tihuuzi mba pa nɛ Abiram paakpeɣlaa yɔ pɔ-yɔɔ.+

18 Miŋ ñaɣ pa-samaɣ;

Miŋ nzʋlʋmɩyɛ ñaɣ kañatʋ tɩnaa.+

19 Palabɩ neɣye Orɛɛbʋ egeetiye taa

Nɛ poluŋ ñɩɣtʋ sɩʋ kpeliɣa tɛɛ;*+

20 Pakpaɣ man-samtʋ

Nɛ pɛlɛɣzɩnɩ nɔ weyi poluba yɔ, kpɩnɛ nɖɩ ɖɩtɔkɩ ñɩtʋ yɔ.+

21 Pɔsɔ Ɛsɔ yɔɔ,+ ɛnʋ weyi ɛkɛ pa-Ñʋʋ Yaɖʋ yɔ,

Ɛnʋ weyi ɛlabɩ lakasɩ sɔsɔsɩ Ejipiti yɔ,+

22 Weyi ɛlabɩ piti tʋma Kam+ ɛjaɖɛ taa yɔ,

Weyi ɛlabɩ lakasɩ nzɩ sɩcaɣ sɔɔndʋ yɔ Teŋgu Kɩsɛɛmʋʋ nɔɔ yɔ.+

23 Pɩkazɩ pazɩ ɛɖʋwaɣ paɣtʋ se paɖɩzɩ-wɛ,

Ɛlɛ Moyizi, ɛyʋ weyi ɛlɩzaa yɔ, ɛlʋ pɔ-yɔɔ

Se pana wena ɛɛkɔwa se ɛɖɩzɩɣ-wɛ yɔ ahɛɛ.+

24 Pʋwayɩ lɛ, peni ɛjaɖɛ kɩbanɖɛ nɖɩ;+

Pataawɛɛnɩ tisuu tamaɣ ŋga ɛlabɩ-wɛ yɔ kɔ-yɔɔ.+

25 Patiyele miduu pe-kizinzikiŋ tɛɛ;+

Patiwelisi Yehowa nɔɔ.+

26 Pʋyɔɔ ɛkpazɩ e-nesi nɛ eɖuu

Se ɛlakɩ nɛ pɔtɔlɩ kañɩmbusuu taa;+

27 Se ɛlakɩ nɛ pa-lʋlʋʋ taa mba tɔlɩ ajɛɛ nesi taa,

Se ɛmɩzɩɣ-wɛ ajɛɛ taa.+

28 Pʋwayɩ lɛ, papaɣzɩ sɛʋ* Peyɔɔrɩ tɛ Baalɩ,+

Nɛ pɔtɔɔ kɩlaŋ weyi pala sɩɖaa yɔ.*

29 Patɩŋnɩ pa-lakasɩ yɔɔ nɛ paɖʋ Ɛsɔ ɖɩwɩzɩyɛ,+

Nɛ asɛyʋʋ nakʋyʋ lɩɩ pɛ-hɛkʋ taa.+

30 Ɛlɛ Fineyaasɩ kʋyaa nɛ ɛla mbʋ pɩɩpɔzaa yɔ lɛ,

Asɛyʋʋ sɩɩ tɩnaɣ.+

31 Nɛ pʋyɔɔ lɛ, pakpaɣ-ɩ se ɛkɛ ɛyʋ siɣsiɣ tʋ

Kpaɖɩŋ kpeekpe taa tam.+

32 Paɖʋ Ɛsɔ ɖɩwɩzɩyɛ Meriba* lɩm cɔlɔ,

Nɛ pɔ-yɔɔ lɛ, pɩkɔnɩ Moyizi kaɖɛ.+

33 Paɖʋ-ɩ ɖɩwɩzɩyɛ,

Nɛ ɛyɔɔdɩ ɛtɩmaɣzɩ ɛ-ñʋʋ taa.+

34 Patɩɖɩzɩ samasɩ+

Ɛzɩ Yehowa kaaɖʋʋ-wɛ paɣtʋ yɔ.+

35 Ɛlɛ pesidi pa-tɩ ajɛɛ taa+

Nɛ pakpaɣ* a-lakasɩ.+

36 Pɛsɛɣaɣ a-sɩʋ kpelisi,+

Nɛ sɩsɩ pɩsɩ-wɛ kpaca.+

37 Pakpakaɣ pa-pɩyalaa

Nɛ pɛ-pɛlaa nɛ palaɣ aleewaa.+

38 Pɛkpɛdaɣ calɩm ɖulum,+

Pa-maɣmaɣ pa-pɩyalaa nɛ pɛ-pɛlaa mba pakpaɣaa

Nɛ palaa Kanaŋ sɩʋ kpelisi yɔ pa-calɩm;+

Nɛ calɩm mbʋ pɛkpɛdaa yɔ pipisi ɛjaɖɛ.

39 Pepisi pa-tɩ nɛ pa-lakasɩ;

Patɩŋnɩ pa-lakasɩ yɔɔ nɛ pala fezuu taa hayitu.+

40 Pʋyɔɔ Yehowa kɔ pana nɛ ɛ-samaɣ pɩdɩɩfɛyɩ,

Nɛ pɩtɛmna se ɛpaɖɩ ɛ-ñɩm.

41 Ɛɖʋzaɣ-wɛ ajɛɛ nesi tɛɛ ɖoŋ ɖoŋ,+

Se mba papaɖaɣ-wɛ yɔ, pɔtɔɔ kewiyitu pɔ-yɔɔ.+

42 Po-koyindinaa nazɩ-wɛ

Nɛ poluzi-wɛ po-ɖoŋ* tɛɛ.

43 Eholi-wɛ tam sakɩyɛ,+

Ɛlɛ palakaɣ ñʋʋ taa ɖoŋ nɛ kaañamtʋ lakasɩ,+

Nɛ pa-kɩdɛkɛdɩm yɔɔ lɛ, eluzaɣ-wɛ.+

44 Ɛlɛ ɛnaɣaɣ pa-kʋñɔŋ+

Nɛ ɛnɩɣaɣ kubusi nzɩ pamakaɣ se ɛsɩnɩ-wɛ yɔ.+

45 Pɔ-yɔɔ lɛ, ɛtɔzaɣ ɛ-ɛgbɛyɛ yɔɔ,

Ɛ-sɔɔlɩm siɣsiɣ ñɩmbʋ sɔsɔm* seɣtaɣ-ɩ nɛ ɛnaɣ pa-pʋtɔdɩyɛ.*+

46 Eyekaɣ nɛ pɔ-tɔm lakɩ pʋtɔdɩyɛ

Mba payɩ pakpaɣaɣ-wɛ yomiye yɔ.+

47 Hayɩ ɖɛ-Ɛsɔ Yehowa, ya ɖa-ñʋʋ+

Nɛ ŋkpeɣli-ɖʋ nɛ ajɛɛ taa+

Nɛ ɖɩpɩzɩ nɛ ɖɩsa ña-hɩɖɛ kiɖeɖeye

Nɛ ɖɩsamɩ-ŋ nɛ amɛya.*+

48 Pasa Izrayɛɛlɩ tɛ Ɛsɔ Yehowa

Nɛ pɩkpaɣ nɛ pɩɖɛɛ tam tam.*+