Ejipiti Lɩʋ
22 «Ye abalʋ nɔɔyʋ ɛmɩlɩ nɔ abalɩñɩnʋ yaa heu nɛ ɛkʋ-ɩ yaa ɛpɛdɩ-ɩ yɔ, pɩwɛɛ se ɛhɛyɩ nɔ abalɩñɩnʋ lone taa naŋ abalɩñɩŋ 5, nɛ heu lone taa heŋ 4.+
2 («Ye pakpa mɩlʋ+ nɔɔyʋ eɖiɣni yɔkʋʋ se ɛsʋʋ ɖɩɣa nakɛyɛ taa nɛ pamabɩ-ɩ nɛ ɛsɩ yɔ, weyi ɛkʋ mɩlʋ ɛnʋ yɔ, ɛtɩtɔɔ calɩm kɩmɩyɛ. 3 Ɛlɛ ye wɩsɩ ɛtɛm lɩʋ nɛ pʋcɔ pɩla mbʋ yɔ, ɛtɔɔ calɩm kɩmɩyɛ.)
«Pɩwɛɛ se ɛhɛyɩ pi-lone taa. Ye ɛfɛyɩnɩ nabʋyʋ yɔ, pʋbʋ lɛ pɩwɛɛ se pɛpɛdɩ-ɩ mbʋ ɛmɩlaa yɔ pi-lone taa. 4 Mbʋ ɛmɩlaa yɔ, ye pana-pʋ ɛ-cɔlɔ nɛ pɩ-ɛsa, paa pɩtɩɩkɛ nɔ abalɩñɩnʋ yaa kpaŋaɣ yaa heu yɔ, pɩwɛɛ se ɛhɛyɩ pi-lone taa tam nabʋlɛ.
5 «Ye nɔɔyʋ ewoni ɛ-kpɩna se atɔɔ ñɩtʋ hayɩm nabʋyʋ taa yaa viiñi hayɩm nabʋyʋ taa nɛ eyele-yɛ nɛ awolo ɛyʋ lɛlʋ hayɩm taa nɛ atɔɔ yɔ, pɩwɛɛ se ɛkpaɣ ɛ-maɣmaɣ ɛ-hayɩm taa mbʋ pɩkpaɖɩ ɖeu yɔ yaa ɛ-maɣmaɣ e-viiñi hayɩm taa mbʋ pɩkpaɖɩ ɖeu yɔ nɛ ɛhɛyɩ pi-lone taa.
6 «Ye miŋ nɩɩyɩ ɩmʋwa nɛ iwolo nɛ ɩtalɩ sɔɔ cɔka nɛ ɩñaɣ hayɩm nabʋyʋ taa tɔɔnaɣ hɔɔ yaa tɔɔnaɣ ŋga patɩkʋmta yɔ, weyi ɛsɔbɩ miŋ ɛnɩ yɔ, pɩwɛɛ se ɛhɛyɩ mbʋ miŋ ñaɣaa yɔ pi-lone taa.
7 «Ye nɔɔyʋ ɛcɛlɩ lɛlʋ liidiye yaa wondu natʋyʋ se ɛsɩɩ nɛ pamɩlɩ wondu ndʋ weyi pɛcɛlɩ-ɩ yɔ ɛ-ɖɩɣa taa yɔ, ye pakpa mɩlʋ ɛnʋ yɔ, pɩwɛɛ se ɛhɛyɩ pi-lone taa tam nabʋlɛ.+ 8 Ye patɩkpa mɩlʋ ɛnʋ yɔ, pɩwɛɛ se powoni ɖɩɣdʋ Ɛsɔ toovenim tʋ ɛsɩndaa+ nɛ pɩsa nɛ pana se esezi e-nesi lɛlʋ wondu yɔɔ yaa etisezi. 9 Ye tɔm ɛkɔm ñɩm nabʋyʋ yɔɔ nɛ paasɩŋ weyi ɛtɩnɩ-pʋ yɔ, paa pɩtɩɩkɛ nɔ abalɩñɩnʋ, kpaŋaɣ, heu, toko, yaa mbʋ payɩ pileba nɛ nɔɔyʋ tɔŋ se: “Matɩnɩ-pʋ!” yɔ, mba poyou pɩ-yɔɔ yɔ, pɩwɛɛ se powoni pɔ-tɔm ndʋ Ɛsɔ toovenim tʋ ɛsɩndaa.+ Weyi Ɛsɔ kaɣ wɩlʋʋ se ɛɖɔ wɛɛ yɔ, pɩwɛɛ se ɛhɛyɩ lɛlʋ pi-lone taa tam nabʋlɛ.+
10 «Ye nɔɔyʋ ɛcɛlɩ lɛlʋ kpaŋaɣ yaa nɔ abalɩñɩnʋ yaa heu yaa ɖɩɣa kpɩnɛ naɖɩyɛ se ɖɩwɛɛ ɛlɛ cɔlɔ nɛ ɖɩsɩ yaa pɩcamɩ-ɖɩ yaa ɖile nɛ nɔɔyʋ tɩna ɖenɖe ɖɩɖɛnaa yɔ, 11 pɩwɛɛ se weyi pɛcɛlɩ-ɩ yɔ eɖuu ɖuutu Yehowa ɛsɩndaa se etisezi nesi lɛlʋ ñɩm yɔɔ; nɛ pɩwɛɛ se pʋyʋ tʋ etisi pɩ-yɔɔ. Weyi pɛcɛlɩ-ɩ yɔ, ɛɛhɛyɩɣ kpɩnɛ nɖɩ ɖi-lone taa nabʋyʋ.+ 12 Ɛlɛ ye pamɩlɩ kpɩnɛ nɖɩ ɛ-cɔlɔ kɩmɩlʋ yɔ, pɩwɛɛ se ɛhɛyɩ kpɩnɛ tʋ ɖi-lone taa. 13 Ye ñɩtʋ taa kpɩnɛ naɖɩyɛ ɛcɩyɩnɩ-ɖɩ yɔ, pɩwɛɛ se ewoni kpɩnɛ nɖɩ pɩcɩyaa yɔ nɛ ɛwɩlɩ. Pɩtɩpɔzɩ se ɛhɛyɩ mbʋ ñɩtʋ taa kpɩnɛ naɖɩyɛ cɩyaa yɔ pi-lone taa.
14 «Ɛlɛ ye nɔɔyʋ ɛsʋlʋmɩ kpɩnɛ lɛlʋ cɔlɔ nɛ pɩcamɩ-ɖɩ yaa ɖɩsɩ alɩwaatʋ ndʋ ɖɩ-tʋ fɛyɩ ɖɩ-cɔlɔ yɔ, pʋbʋ lɛ weyi ɛsʋlʋmaa yɔ pɩwɛɛ se ɛhɛyɩ pi-lone taa. 15 Ye ɖɩ-tʋ ɛwɛ ɖɩ-cɔlɔ yɔ, ɛɛhɛyɩɣ nabʋyʋ pi-lone taa. Ye ɛɛkɩndɩ-ɖɩ yɔ, pʋbʋ lɛ liidiye nɖɩ ɛkɩndɩnaa yɔ, nɖɩ kɛnɩ mbʋ ɛhɛyɩnɩ pi-lone taa yɔ.
16 «Nɛ ye abalʋ nɔɔyʋ epeɣzi pɛlɛ weyi ɛtɩtɩlɩ abalʋ nɛ ɛfɛyɩnɩ ɖaŋ yɔ nɛ ɛ nɛ ɩ pasʋʋ yɔ, pɩwɛɛ se ɛhɛyɩ ɛ-yɔɔ mbʋ pɔpɔzʋʋnɩ pɛlɛ yɔɔ yɔ nɛ ɛpɩsɩ-ɩ ɛ-halʋ.+ 17 Ye ɛlɛ caa ekizi kpem se ɛɛcɛlɩɣ-ɩ ɛ-pɛlɛ yɔ, pɩwɛɛ se ɛhɛyɩ liidiye nɛ pɩmʋnɩ mbʋ pɔpɔzʋʋnɩ pɛlɛ yɔɔ yɔ.
18 «Pɩtɩpɔzɩ se ŋyele halʋ weyi ɛtɩyɩɣ yɔ nɛ ɛwɛɛ wezuu.+
19 «Weyi ɛsʋʋnɩ kpɩnɛ yɔ, paa pɩɩkpawa nɛ pitii yɔ pɩwɛɛ se pakʋ-ɩ.+
20 «Weyi ɛlaɣ kɩlaʋ ɛsɔnaa lalaa nɛ pɩtɩkɛ Yehowa ɖeke yɔ, pɩwɛɛ se paɖɩzɩ-ɩ.+
21 «Pɩtɩpɔzɩ se ŋla ɛgɔm ñaŋ yaa ŋnazɩ-ɩ,+ mbʋ pʋyɔɔ yɔ ɩɩkɛ agɔma Ejipiti ɛjaɖɛ taa.+
22 «Pɩtɩpɔzɩ se ŋwɩlɩ ñaŋ lelu nɔɔyʋ yaa pɩɣa ŋga kɛfɛyɩ caa yɔ.*+ 23 Ye ŋwɩlɩɣ-ɩ ñaŋ, paa pɩtɩɩkɛ hɔɔlʋʋ ŋgʋ kɩ-taa, nɛ ɛma kubusi nɛ mɔ-yɔɔ kɔyɔ, paa pɩɩkpawa nɛ pitii yɔ mankaɣ nɩʋ e-kubusi;+ 24 nɛ man-pana kaɣ mʋʋ miŋ, nɛ mankaɣ-mɩ kʋʋ nɛ laɣɖɛ, nɛ mɩ-halaa kaɣ pɩsʋʋ lelaa, nɛ mi-piya kaɣ pɩsʋʋ piya nzɩ sɩfɛyɩnɩ caanaa yɔ.*
25 «Ye ŋkɩndɩ liidiye man-samaɣ taa kʋñɔndʋ nɔɔyʋ,* weyi ɛwɛ ñɔ-cɔlɔ yɔ, pɩtɩpɔzɩ se ŋwɛɛ ɛzɩ liidiye kɩndɩyʋ weyi ɛpɔzʋʋ kɛzɛɣa yɔ. Pɩtɩpɔzɩ se ɩpɔzɩ-ɩ kɛzɛɣa pɩ-yɔɔ.+
26 «Ye ŋmʋ lɛlʋ toko kɩtɩnʋʋ kɩmɩyɛ nɖɩ ɛtɔwaa yɔ ɖɩ-yɔɔ* kɔyɔ,+ pɩwɛɛ se ŋpɩsɩnɩ-ɩ kʋ pʋcɔ nɛ wɩsɩ ɖʋ. 27 Mbʋ pʋyɔɔ yɔ ki-ɖeke ehuuzuuni ɛ-yɔɔ, e-toko ŋgʋ ehuuzuuni e-tomnaɣ* yɔɔ; ɛbɛ ɛkaɣ suu nɛ ɛhɩnɩ?+ Alɩwaatʋ ndʋ ɛmakɩ kubusi nɛ mɔ-yɔɔ yɔ, paa pɩɩkpawa nɛ pitii yɔ mankaɣ nɩʋ, mbʋ pʋyɔɔ yɔ mɛnkɛ pʋtɔdɩyɛ nayʋ.*+
28 «Pɩtɩpɔzɩ se ŋlɔ nɔɔ kɩdɛkɛdaɣ Ɛsɔ yɔɔ*+ yaa ña-samaɣ taa ñʋʋdʋ* nɔɔyʋ yɔɔ.+
29 «Pɩwɛɛ se ŋkpaɣ ñɔ-tɔɔnaɣ ŋga kalabɩ camɩyɛ yɔ yaa mbʋ ŋhiɣ ñɛ-vɛɛ yaa ño-num ɖɩlaɖɛ taa yɔ pɩ-taa nabʋyʋ nɛ ŋlabɩnɩ haɖɛ. Taapɩsɩnɩ wayɩ nɛ pɩ-labʋ.+ Pɩwɛɛ se ŋha-m ña-pɩyalaa taa abalɩbɩɣa kajalaɣ ñɩŋga.+ 30 Pʋnɛ pɩwɛɛ se ŋla ñɔ-nɔ abalɩñɩnʋ nɛ ñe-heu:+ Ɛkaɣ wɛʋ e-ɖoo cɔlɔ kɩyakɩŋ 7. Kɩyakʋ 8 ñɩŋgʋ wiye lɛ, pɩwɛɛ se ŋkpaɣ-ɩ nɛ ŋha-m.+
31 «Pɩwɛɛ se ɩwɩlɩ se ɩkɛ-m samaɣ kiɖeɖeɣa,+ nɛ pɩtɩpɔzɩ se ɩtɔɔ kpɩnɛ nɖɩ ñɩtʋ taa kpɩnɛ naɖɩyɛ cɩyɩ-ɖɩ ñɩtʋ taa yɔ ɖɩ-nandʋ.+ Pɩwɛɛ se ɩpɛɖɩ-tʋ hasɩ.