Kroniiki takayaɣ naalɛ ñɩŋga
36 Nɛ ɛjaɖɛ taa ɛyaa kpaɣ Yoziyaasɩ pɩyalʋ Yehowahazɩ+ nɛ papɩsɩ-ɩ wiyaʋ Yeruzalɛm ɛ-caa lone taa.+ 2 Yehowahazɩ kaawɛnɩ pɩnzɩ 23 alɩwaatʋ ndʋ ɛpɩsɩ wiyaʋ yɔ, nɛ ɛtɔɔ kewiyitu fenasɩ 3 Yeruzalɛm. 3 Ɛlɛ Ejipiti wiyaʋ kʋsɩ-ɩ kewiyitu kpelaɣ yɔɔ Yeruzalɛm nɛ ɛpɛlɩ ɛjaɖɛ kɩmɩyɛ se ɖɩhɛyɩ liidiye talaŋwaa* 100 nɛ sika talaŋ kʋɖʋmʋʋ.+ 4 Pɩtasɩ lɛ, Ejipiti wiyaʋ pɩsɩ Yehowahazɩ ɖalʋ Eliyaakim wiyaʋ Yuuda nɛ Yeruzalɛm yɔɔ nɛ ɛlɛɣzɩ ɛ-hɩɖɛ se Yehoyakim; ɛlɛ Neko+ kpaɣ Eliyaakim neu Yehowahazɩ nɛ ewoni-i Ejipiti.+
5 Yehoyakim+ kaawɛnɩ pɩnzɩ 25 alɩwaatʋ ndʋ ɛpɩsɩ wiyaʋ yɔ, nɛ ɛtɔɔ kewiyitu pɩnzɩ 11 Yeruzalɛm. Ewobi pɩ-yɔɔ nɛ ɛla mbʋ pɩfɛyɩ ɖeu ɛ-Ɛsɔ Yehowa ɛsɩndaa yɔ.+ 6 Babilɔɔnɩ wiyaʋ Nabukodonozɔɔrɩ+ wolo ɛ-wayɩ se ɛhɔkɩ-ɩ nɛ ñɩɣyʋʋ kɩsɛɛmʋʋ kpasɩ 2 nɛ ewoni-i Babilɔɔnɩ.+ 7 Nɛ Nabukodonozɔɔrɩ kpaɣ Yehowa ɖɩɣa taa wondu natʋyʋ nɛ ɛɖɛnɩ Babilɔɔnɩ nɛ ɛsɩɩ-tʋ ɛ-ɖɩɣa taa* Babilɔɔnɩ.+ 8 Piyele nɛ Yehoyakim yɔɔ tɔm ndʋ pɩkazaa yɔ, lakasɩ kɩdɛkɛdɩsɩ nzɩ ɛlaba nɛ ɛ-yɔɔ tɔm kɩdɛkɛdɩtʋ lɛ, pama-tʋ Izrayɛɛlɩ nɛ Yuuda Awiya Takayaɣ taa; nɛ ɛ-pɩyalʋ Yehoyakin pɩsɩ wiyaʋ e-lone taa.+
9 Yehoyakin+ kaawɛnɩ pɩnzɩ 18 alɩwaatʋ ndʋ ɛpɩsɩ wiyaʋ yɔ, nɛ ɛtɔɔ kewiyitu fenasɩ 3 nɛ kɩyakɩŋ 10 Yeruzalɛm; nɛ ewolo pɩ-yɔɔ nɛ ɛla mbʋ pɩfɛyɩ ɖeu Yehowa ɛsɩndaa yɔ.+ 10 Pɩnaɣ ɖɩbazɩyɛ taa* lɛ, Wiyaʋ Nabukodonozɔɔrɩ tiyi se pɔkɔnɩ-ɩ Babilɔɔnɩ,+ pɩkpɛndɩnɩ Yehowa ɖɩɣa taa wondu ndʋ tɩmʋ ñɩm yɔ.+ Nɛ ɛkpaɣ Yehoyakin caa koobu Zedekiya nɛ ɛsɩɩ-ɩ wiyaʋ Yuuda nɛ Yeruzalɛm yɔɔ.+
11 Zedekiya+ kaawɛnɩ pɩnzɩ 21 alɩwaatʋ ndʋ ɛpɩsɩ wiyaʋ yɔ, nɛ ɛtɔɔ kewiyitu pɩnzɩ 11 Yeruzalɛm.+ 12 Ewobi pɩ-yɔɔ nɛ ɛla mbʋ pɩfɛyɩ ɖeu ɛ-Ɛsɔ Yehowa ɛsɩndaa yɔ. Etiluzi ɛ-tɩ nayʋ Yereemii+ weyi ɛyɔɔdaɣnɩ Yehowa nɔɔ yɔ ɛ-ɛsɩndaa. 13 Ɛkaɖɩnɩ ɖɔɖɔ Wiyaʋ Nabukodonozɔɔrɩ,+ weyi eeyeba nɛ eɖuuni Ɛsɔ yɔ, nɛ ɛwɛɛ nɛ ɛlakɩ ñʋʋ taa ɖoŋ mbʋ* nɛ eyele nɛ ɛ-laŋɩyɛ sʋʋ kpɩzɩŋ nɛ ekizi se ɛɛpɩsɩɣ Izrayɛɛlɩ tɛ Ɛsɔ Yehowa cɔlɔ. 14 Cɔjɔnaa ñʋndɩnaa tɩŋa nɛ samaɣ palakaɣ mbʋ pɩfɛyɩ siɣsiɣ yɔ nɛ pɛɖɛlɛsɩɣ niye, nɛ palakɩ ajɛɛ lakasɩ kɩdɛkɛdɩsɩ kpeekpe, nɛ pepisi Yehowa ɖɩɣa+ ŋga ɛɛpɩsɩ-kɛ kiɖeɖeɣa Yeruzalɛm yɔ.
15 Pɔ-cɔzɔnaa tɛ Ɛsɔ Yehowa tɩŋnɩ mba etiyi-wɛ yɔ pɔ-yɔɔ nɛ ɛwɛɛ ɛpakɩ-wɛ, ɛpakɩ-wɛ nɛ ɛlɛlɩɣ tam sakɩyɛ, mbʋ pʋyɔɔ yɔ ɛ-samaɣ nɛ ɛ-ɖɩjaɣyɛ pɔ-tɔm labɩ-ɩ pʋtɔdɩyɛ. 16 Ɛlɛ pɛwɛɛ nɛ powoŋuu mba Ɛsɔ toovenim tʋ tiyaɣ yɔ,+ nɛ peniŋ ɛ-tɔm+ nɛ powoŋuu ɛ-nayaa,+ pɩkɔɔ nɛ pɩtalɩ alɩwaatʋ ndʋ Yehowa mʋ pana nɛ ɛ-samaɣ,+ pɩkɔɔ nɛ pɩtalɩ alɩwaatʋ ndʋ pɩɩsaŋ se pawaa-kɛ yɔ.
17 Nɛ eyele nɛ Kalɩdee wiyaʋ wolo pa-wayɩ,+ nɛ ɛlɛ kʋ pe-evebiya nɛ laɣɖɛ+ kooka kiɖeɖeɣa ɖɩɣa taa;+ ɛtɩna evebu yaa pɛlɛ weyi ɛtɩtɩlɩ abalʋ yɔ, akpadɩyʋ yaa ɛjam pʋtɔdɩyɛ.+ Ɛsɔ ɖʋzɩ pɩtɩŋa payɩ e-nesi tɛɛ.+ 18 Ɛsɔ toovenim tʋ ɖɩɣa taa wondu tɩŋa, sɔsɔtʋ nɛ cikpetu, pɩkpɛndɩnɩ Yehowa ɖɩɣa taa ñɩm nɛ wiyaʋ nɛ ɛ-awumbiya pa-ñɩm, ɛɖɛnɩ pɩtɩŋa payɩ Babilɔɔnɩ.+ 19 Ɛñaɣzɩ miŋ Ɛsɔ toovenim tʋ ɖɩɣa,+ ɛyɔkɩ Yeruzalɛm koloŋa,+ ɛñaɣzɩ miŋ ke-tilima ɖoŋ ñɩna tɩŋa, nɛ ɛɖɩzɩ mbʋ payɩ pɩmʋ ñɩm yɔ.+ 20 Ɛkpaɣ mba patɩkʋ-wɛ nɛ laɣɖɛ yɔ nɛ ɛɖɛnɩ yomiye taa Babilɔɔnɩ,+ nɛ papɩsɩ ɛ nɛ ɛ-pɩyalaa pa-lɩmɖʋyaa+ nɛ pɩkɔɔ pɩtalɩ alɩwaatʋ ndʋ Pɛrɩsɩ kewiyaɣ paɣzɩ kewiyitu tɔɔʋ yɔ,+ 21 se pɩsa nɛ tɔm ndʋ Yehowa tɩŋnɩ Yereemii yɔɔ nɛ ɛyɔɔdɩ yɔ tɩla,+ pɩkɔɔ nɛ pɩtalɩ alɩwaatʋ ndʋ ɛjaɖɛ hɛyɩ ɖɩ-sabaatɩwaa yɔ.+ Kɩyakɩŋ weyi ɩ-taa payɩ ɛjaɖɛ nɖɩ ɖɩpɩsɩ njɛyɛ yɔ, pɩkɛnɩ-ɖɩ sabaatɩ, nɛ pɩnzɩ 70 kɔɔ nɛ sɩtɛ.+
22 Pɛrɩsɩ wiyaʋ Siiruusi+ pɩnaɣ kajalaɣ ñɩŋga taa, pɩsa nɛ tɔm ndʋ Yehowa kaatɩŋnɩ Yereemii yɔɔ nɛ ɛyɔɔdɩ yɔ+ tɩla lɛ, Yehowa seɣti Pɛrɩsɩ wiyaʋ Siiruusi* se ɛlɛ esusi tɔm natʋyʋ e-kewiyaɣ kpeekpe taa, nɛ ɛma tɔm ndʋ ɖɔɖɔ;+ tɩtɔŋaɣ se: 23 «Tɔm tʋnɛ Pɛrɩsɩ wiyaʋ Siiruusi yɔɔdʋʋ: “Ɛsɔdaa Ɛsɔ Yehowa cɛlɩ-m tɛtʋ yɔɔ kewiyisi kpeekpe,+ nɛ ɛɖʋ-m tʋmɩyɛ se mama-ɩ ɖɩɣa Yeruzalɛm, ŋgʋ kɩwɛ Yuuda yɔ.+ Mɩ-taa mba pɛkɛ ɛ-samaɣ kpeekpe taa mba yɔ, tɛtɛ nɛ mɩ-Ɛsɔ Yehowa wɛɛ mɩ-cɔlɔ, nɛ ɩɖɛɛ nɛ ɩkpa peeɖe.”»+