Ezekɩyɛɛlɩ
9 Nɛ ɛma kubuka sɔsɔɔ ma-nɩŋgbaaŋ taa se: «Yaa mba pakaɣ tɛtʋ tʋnɛ tɩ-nɩŋgbaŋʋʋ hɔm yɔ, paa weyi lɛ, ɛɖɔkɩ e-you wonuu ŋgʋ ɛɖɩzɩɣna yɔ e-nesi tɛɛ!»
2 Mana abalaa 6, palɩnɩ nɔnɔɔ hayo ñɩŋga ŋga kaha ɛsa nɛ hayo kiŋ yɔ kɔ-hɔɔlʋʋ taa nɛ pɔkɔŋ;+ paa weyi lɛ, ɛɖɔkɩ you wonuu ŋgʋ ɛpʋʋtʋʋna yɔ e-nesi tɛɛ; nɛ abalʋ nɔɔyʋ kaawɛ pa-taa esu wondu ndʋ palabɩnɩ pɩsatʋ yɔ,* takayaɣ taa mayʋ tɔlɩm fiɣa kaawɛ ɛ-tɩnaɣ taa, nɛ pasʋʋ nɛ pasɩŋ ñɩɣyʋʋ kɩsɛɛmʋʋ altaaru cɔlɔ.+
3 Nɛ Izrayɛɛlɩ tɛ Ɛsɔ samtʋ+ kʋyɩ kerebimwaa ñʋʋ yɔɔ ɖenɖe tɩɩcaɣaa yɔ nɛ tɩɖɛɛ tiwolo ɖɩɣa nɔnɔɔ taa,+ nɛ ɛpaɣzɩ* kou nɛ ɛyaɣ abalʋ weyi esu wondu ndʋ palabɩnɩ pɩsatʋ* nɛ takayaɣ taa mayʋ tɔlɩm fiɣa wɛɛ ɛ-tɩnaɣ taa yɔ. 4 Yehowa heyi-i se: «Cɔɔ tɛtʋ taa, Yeruzalɛm taa, nɛ ɛyaa mba pɛwɛɛ nɛ pomuzuu nɛ pɔmɔlʋʋ+ kʋzɔɔtʋ lakasɩ nzɩ payɩ ɛyaa wɛɛ nɛ palakɩ tɛtʋ taa yɔ sɩ-yɔɔ yɔ,+ ŋla yʋsaɣ pe-kila taa.»
5 Nɛ lalaa lɛ, manɩ eheyi-wɛ se: «Ɩtɩŋ ɛ-wayɩ nɛ ɩcɔɔ tɛtʋ taa nɛ ɩkʋ. Pɩtaalabɩ-mɩ pʋtɔdɩyɛ,* nɛ ɩtaanɩɩ nɔɔyʋ siziŋ.+ 6 Pɩwɛɛ se ɩkʋ akpadɩyaa, evebiya, pɛlaa mba patɩtɩlɩ abalaa yɔ, piya cikpesi, nɛ halaa caɣ caɣ.+ Ɛlɛ ɩtaañɔtɩnɩ mba pɔ-yɔɔ wɛ yʋsaɣ yɔ pa-taa nɔɔyʋ.+ Pɩwɛɛ se ɩpaɣzɩnɩ mon-kooka kiɖeɖeɣa taa.»+ Peeɖe papaɣzɩnɩ ɛzʋtʋyaa mba paawɛ ɖɩɣa ɛsɩndaa yɔ.+ 7 Nɛ eheyi-wɛ se: «Ipisi ɖɩɣa nɛ iyele nɛ mba pakʋwa yɔ posu kadasɩ taa.+ Iwolo!» Peeɖe palɩwa nɛ powolo nɛ pakʋ ɛyaa tɛtʋ taa.
8 Pakʋwaɣ-wɛ lɛ, pɩkazɩ men-ɖeke, nɛ mɔntɔlɩ manpa mɛ-ɛsa nɛ tɛtʋ nɛ mama kubuka se: «Hayɩ Kɩbaɣlʋ Kɩlɩm Yehowa! Ɛzɩma ŋwɛɛ nɛ ŋpɩyɩɣ ña-pana Yeruzalɛm yɔɔ yɔ, ŋcaɣ se ŋɖɩzɩ mba payɩ pɩkazɩ Izrayɛɛlɩ taa yɔ?»+
9 Nɛ eheyi-m se: «Izrayɛɛlɩ nɛ Yuuda ɖɩɣa kɩwɛɛkɩm paɣlaa pɩdɩɩfɛyɩ.+ Calɩm kpɛdʋʋ su ɛjaɖɛ taa,+ nɛ mulum lakasɩ su tɛtʋ taa.+ Mbʋ pʋyɔɔ yɔ pɔyɔɔdʋʋ se: “Yehowa yebi ɖɛ-ɛjaɖɛ nɛ ɛɖɛɛ, nɛ Yehowa ɛɛnaɣ.”+ 10 Ɛlɛ ma lɛ, pɩɩkaɣ-m labʋ pʋtɔdɩyɛ;* nɛ maakaɣ pe-siziŋ nɩʋ.+ Mankaɣ kɔnʋʋ mbʋ pa-lakasɩ* lʋlaa yɔ pa-maɣmaɣ pa-ñʋŋ taa.»
11 Nɛ mana abalʋ weyi esu wondu ndʋ palabɩnɩ pɩsatʋ* nɛ tɔlɩm fiɣa wɛɛ ɛ-tɩnaɣ taa yɔ ɛpɩsaa nɛ ɛyɔɔdɩ se: «Malabɩ ɖeyi ɖeyi ɛzɩ ŋɖʋʋ-m paɣtʋ yɔ.»