Ejipiti Lɩʋ
1 Nɛ alɩwaatʋ ndʋ Izrayɛɛlɩ, pʋ-tɔbʋʋ se Yakɔɔb, wobi Ejipiti yɔ, ɛ nɛ ɛ-pɩyalaa powobina, paa weyi lɛ ɛ nɛ ɛ-ɖɩɣa taa mba.+ Ɛ-pɩyalaa mba pa-hɩla yɔ: 2 Rubɛɛnɩ, Siimeyɔɔ, Leevi nɛ Yuuda;+ 3 Isakaarɩ, Zebulɔɔnɩ nɛ Bɛnjamɛɛ; 4 Daanɩ nɛ Naftalii; Gaadɩ nɛ Asɛɛrɩ.+ 5 Nɛ Yakɔɔb lʋlʋʋ taa mba tɩŋa* kaakpɛndɩ ɛyaa* 70, ɛlɛ Yosɛɛfʋ ñaatɛm wɛʋ Ejipiti.+ 6 Pʋwayɩ lɛ, Yosɛɛfʋ kɔɔ nɛ ɛsɩ,+ nɛ ɛ-ɖalaa nɛ e-newaa tɩŋa pasɩ nɛ kpaɖʋʋ ŋgʋ kɩ-tɩŋa kɩsɩ ɖɔɖɔ. 7 Nɛ Izrayɛɛlɩ mba* lʋlɩ nɛ papaɣzɩ ɖɔʋ siŋŋ, nɛ pɛwɛɛ pohukuu lɛɛ lɛɛ nɛ pakpaɣ ɖoŋ pɩdɩɩfɛyɩ; piyeba nɛ posu ɛjaɖɛ taa ɖo.+
8 Pʋwayɩ lɛ wiyaʋ kɩfalʋ nɔɔyʋ paɣzɩ kewiyitu tɔɔʋ Ejipiti, ɛlɛ taatɩlɩ Yosɛɛfʋ. 9 Nɛ eheyi ɛ-samaɣ se: «Ɩna! Izrayɛɛlɩ samaɣ kɩlɩ-ɖʋ ɖɔʋ nɛ kakɩlɩ-ɖʋ ɖoŋ.+ 10 Iyele nɛ ɖɩkpaɣ-wɛ nɛ lɛɣtʋ yɔɔ. Pɩtɩkɛ mbʋ yɔ, pakaɣ wɛʋ nɛ pohukuu, nɛ ye you nakʋyʋ etulaa yɔ, pakaɣ kpɛndʋʋ ɖo-koyindinaa yɔɔ nɛ poyooni-ɖʋ nɛ palɩɩ ɛjaɖɛ taa nɛ pɛɖɛɛ.»
11 Peeɖe palɩzɩ kɩjɛyʋʋ tʋma ñʋndɩnaa* se paba ɩwɩlɩ-wɛ ñaŋ nɛ tʋma ɖoŋ ñɩna labʋ,+ nɛ pama Farawɔɔ tɛtʋ ndʋ tɩ-taa pasɩɣ wondu yɔ: Pitoom nɛ Raamsɛɛsɩ.+ 12 Ɛlɛ pawɩlaɣ Izrayɛɛlɩ mba ñaŋ nɛ pɩkɩlɩɣ lɛ, paba ñɛwɛɛ nɛ pɛtɛzɩɣ huuu pɩdɩɩfɛyɩ nɛ pɛtɛzɩɣ tɛtʋ mʋʋ kɩmʋʋ; piyeba nɛ Izrayɛɛlɩ mba tɔm kpa-wɛ sɔɔndʋ siŋŋ.+ 13 Pʋyɔɔ lɛ, Ejipiti mba sʋzɩ Izrayɛɛlɩ mba yomiye sɔsɔɖɛ taa.+ 14 Patɩŋnɩ tʋma ɖoŋ ñɩna yɔɔ nɛ peyele nɛ wezuu caɣʋ wɛɛ-wɛ kaɖɛ: Pɛfɛyaɣ tɛtʋ nɛ palɩzɩɣ filikinaa nɛ palakɩ yomaa tʋma ndɩ ndɩ hayɩm taa. Ɛɛɛ, peyeba nɛ panɩɩ siziŋ siŋŋ yomaa tʋma ndɩ ndɩ labʋ taa.+
15 Pʋwayɩ lɛ Ejipiti wiyaʋ yɔɔdɩnɩ Ebree mba halaa lʋlʋsʋyaa mba payaɣ se Sifra nɛ Puwa yɔ, 16 nɛ eheyi-wɛ se: «Alɩwaatʋ ndʋ ɩsɩɣnɩ Ebree mba halaa se palʋlɩ yɔ,+ pɩwɛɛ se ɩcɔnɩ camɩyɛ alɩwaatʋ ndʋ peɖiɣni lʋlʋʋ yɔ,* ye pɩkɛ abalɩbɩɣa yɔ ɩkʋ-kɛ; ɛlɛ ye pɩkɛ halɩbɩɣa yɔ, iyele-kɛ nɛ kɛwɛɛ wezuu.» 17 Ɛlɛ, halaa lʋlʋsʋyaa mba peseɣaɣ Ɛsɔ toovenim tʋ sɔɔndʋ, nɛ patɩla mbʋ Ejipiti wiyaʋ heyi-wɛ se pala yɔ. Ɛlɛ peyekaɣ abalɩbiya nɛ sɩwɛɣ wezuu.+ 18 Pʋwayɩ lɛ Ejipiti wiyaʋ yaa halaa lʋlʋsʋyaa mba nɛ ɛpɔzɩ-wɛ se: «Ɛbɛ yɔɔ iyebi abalɩbiya nɛ sɩwɛɛ wezuu?» 19 Halaa lʋlʋsʋyaa cosi Farawɔɔ se: «Ebree mba halaa fɛyɩ ɛzɩ Ejipiti mba halaa yɔ. Pɛwɛ ɖoŋ, pʋcɔ nɛ halʋ lʋlʋsʋyʋ talɩ pɔ-cɔlɔ lɛ pɛtɛm lʋlʋʋ.»
20 Pʋyɔɔ lɛ Ɛsɔ la kɩbandʋ halaa lʋlʋsʋyaa mba, nɛ samaɣ wɛɛ nɛ kɔɖɔʋ nɛ kakpaɣ ɖoŋ siŋŋ. 21 Nɛ ɛzɩma halaa lʋlʋsʋyaa mba paase Ɛsɔ toovenim tʋ sɔɔndʋ yɔ, piyeba nɛ pʋwayɩ lɛ ɛha-wɛ hɔŋ. 22 Pɩkɔɔ pɩtɛmna se Farawɔɔ ɖʋ ɛ-samaɣ tɩŋa paɣtʋ se: «Pɩwɛɛ se ɩlɔ Ebree mba abalɩbiya nzɩ palʋlʋʋ yɔ sɩ-tɩŋa Niili Pɔɔ taa, ɛlɛ iyele halɩbiya tɩŋa nɛ sɩwɛɛ wezuu.»+