Ezekɩyɛɛlɩ
11 Nɛ fezuu nakʋyʋ kʋsɩ-m nɛ kiwoni-m Yehowa ɖɩɣa tɛ wɩsɩ ɖɩlɩyɛ nɔnɔɔ taa; nɔnɔɔ ŋga kaha ɛsa nɛ wɩsɩ ɖɩlɩyɛ taa.+ Nɛ mana abalaa 25 nɔnɔɔ taa peeɖe, Azuurɩ pɩyalʋ Yaazaniya nɛ Benayaa pɩyalʋ Pelatiya mba pɛkɛ samaɣ taa awumbiya yɔ paawɛ pa-taa.+ 2 Ðɩnɛ ɛlɛ Ɛsɔ heyi-m se: «Ɛyʋ pɩyalʋ, abalaa panɛ, mba wɛna nɛ palakɩ lɩmaɣza kɩdɛkɛda nɛ patasɩɣ lɔŋ kɩdɛkɛdɩŋ tɛtʋ tʋnɛ tɩ-taa.* 3 Pɛwɛɛ nɛ pɔyɔɔdʋʋ se: “Ɛzɩ pɩtɩkɛ ɖɩsɩ maʋ alɩwaatʋ yɔ yaa we?+ Tɛtʋ* kɛnɩ ɖeɣa*+ nɛ ɖɛkɛnɩ nandʋ.”
4 «Pʋyɔɔ lɛ, yɔɔdɩ mbʋ pɩkaɣ-wɛ talʋʋ yɔ pɩ-natʋ tɔm. Ɛyʋ pɩyalʋ, yɔɔdɩ natʋ tɔm.»+
5 Nɛ Yehowa fezuu tii mɔ-yɔɔ,+ nɛ eheyi-m se: «Yɔɔdɩ se: “Tɔm tʋnɛ Yehowa yɔɔdʋʋ: ‘Oo Izrayɛɛlɩ ɖɩɣa, tɔm ndʋ ɩyɔɔdaa yɔ tɩwɛ ɖeu, nɛ mansɩm ndʋ ɩwɛɛ nɛ ɩmaɣzɩɣ yɔ.* 6 Iyeba nɛ ɛyaa sakɩyɛ sɩ tɛtʋ tʋnɛ tɩ-taa, nɛ iyele nɛ sɩɖaa pɛɛtɩ tɩ-habɛɛ yɔɔ.’”»+ 7 «Pʋyɔɔ lɛ, tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Sɩɖaa mba ɩmɩzɩ tɛtʋ taa yɔ mba kɛnɩ nandʋ, nɛ tɛtʋ kɛnɩ ɖeɣa.+ Ɛlɛ mɩ lɛ, pakaɣ-mɩ lɩzʋʋ tɩ-taa.”»
8 «“Ise laɣɖɛ sɔɔndʋ,+ ɛlɛ laɣɖɛ mankaɣ kɔnʋʋ mɩ-wayɩ,” Kɩbaɣlʋ Kɩlɩm Yehowa yɔɔdʋʋna. 9 “Mankaɣ-mɩ lɩzʋʋ tɛtʋ ndʋ tɩ-taa nɛ manɖʋzɩ-mɩ agbaaɣdaa mba nesi tɛɛ nɛ mahʋʋnɩ-mɩ tɔm.+ 10 Laɣɖɛ kaɣnɩ-mɩ kʋʋ.+ Mankaɣ-mɩ tɔm hʋnʋʋ Izrayɛɛlɩ kamaɣ yɔɔ,+ nɛ toovenim taa lɛ ɩkaɣ tɩlʋʋ se ma lɛ Yehowa.+ 11 Tɛtʋ ɛɛkaɣ-mɩ kɛʋ ɖeɣa, nɛ ɩɩkaɣ kɛʋ nandʋ ka-taa; mankaɣ-mɩ tɔm hʋnʋʋ Izrayɛɛlɩ kamaɣ yɔɔ, 12 nɛ toovenim taa lɛ ɩkaɣ tɩlʋʋ se ma lɛ Yehowa. Mbʋ pʋyɔɔ yɔ ɩtɩɖɔ man-paɣtʋ yɔɔ nɛ mɔn-tɔm hʋʋ yɔɔ,+ ɛlɛ ɩlaba ɛzɩ ajɛɛ wena acɔ-mɩ nɛ ata yɔ a-tɔm hʋʋ pɔzʋʋ yɔ.”»+
13 Mantɩɩyɔɔdɩ natʋ tɔm ndʋ lɛ, Benayaa pɩyalʋ Pelatiya sɩ, nɛ mɔntɔlɩ manpa mɛ-ɛsa nɛ tɛtʋ nɛ mama kubuka ɖoŋ se: «Hayɩ Kɩbaɣlʋ Kɩlɩm Yehowa! Ŋcaɣ se ŋɖɩzɩ mba pɩkazɩ Izrayɛɛlɩ taa yɔ?»+
14 Yehowa tɔm tasɩ-m talʋʋ se: 15 «Ɛyʋ pɩyalʋ, Yeruzalɛm taa mba heyi ño-koobiya, ño-koobiya mba pɛwɛnɩ waɖɛ se paɖaɣnɩ yabʋ ñɛ-ɛjaɖɛ yɔ, pɩkpɛndɩnɩ Izrayɛɛlɩ ɖɩɣa tɩŋa se: “Iposi mɩ-tɩ nɛ Yehowa siŋŋ. Ðatɩnɩ ɛjaɖɛ; ɖa pɛcɛlɩ-ɖɩ se ɖɩkɛ ɖa-pʋyʋ.” 16 Pʋyɔɔ lɛ yɔɔdɩ se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Paa mowoni-wɛ ɖooo poliŋ se pacaɣ ajɛɛ taa nɛ mamɩzɩ-wɛ ajɛɛ taa yɔ,+ piileɖiɣ lɛ, mankaɣ-wɛ kɛʋ kooka kiɖeɖeɣa ajɛɛ wena a-taa powoba yɔ.’”+
17 «Pʋyɔɔ lɛ yɔɔdɩ se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Mankaɣ-mɩ tɔzʋʋ ɖɔɖɔ nɛ ɛyaa samasɩ taa nɛ mankpaɣ-mɩ nɛ ajɛɛ wena a-taa maamɩzɩ-mɩ yɔ nɛ menkpeɣli, nɛ mankaɣ-mɩ haʋ Izrayɛɛlɩ ɛjaɖɛ.+ 18 Nɛ pakaɣ pɩsʋʋ peeɖe nɛ paɖɩzɩ ɖɩ-taa wondu ndʋ tɩwɛ kiniŋ yɔ nɛ lakasɩ kɩdɛkɛdɩsɩ kpeekpe.+ 19 Nɛ mankaɣ-wɛ haʋ laŋɩyɛ kʋɖʋmɖɩyɛ,*+ nɛ mankaɣ ɖʋʋ pa-taa fezuu kɩfalʋʋ;+ nɛ mankaɣ lɩzʋʋ pɩyɛ laŋɩyɛ po-tomnasɩ taa+ nɛ maha-wɛ tomnaɣ nandʋ laŋɩyɛ,*+ 20 se pɩsa nɛ pɔɖɔ man-kpalɩtʋ yɔɔ nɛ pɔɖɔkɩ mɔn-tɔm hʋʋ nɛ pañam-tʋ. Ðɩnɛ ɛlɛ pakaɣ kɛʋ man-samaɣ, nɛ mankaɣ kɛʋ pɛ-Ɛsɔ.’”
21 «“‘Ɛlɛ mba pa-laŋa ñɔnɩ pa-lakasɩ nzɩ sɩwɛ kiniŋ yɔ nɛ pa-lakasɩ kɩdɛkɛdɩsɩ yɔ, mankaɣ kɔnʋʋ mbʋ pa-lakasɩ* lʋlaa yɔ pa-ñʋŋ taa,’ Kɩbaɣlʋ Kɩlɩm Yehowa yɔɔdʋʋna.”»
22 Nɛ kerebimwaa kʋsɩ pe-keŋ, nɛ pɔbɔla kaañɔtɩnɩ-wɛ,+ nɛ Izrayɛɛlɩ tɛ Ɛsɔ samtʋ kaawɛ pa-ñʋʋ yɔɔ.+ 23 Ðɩnɛ ɛlɛ Yehowa samtʋ+ lɩɩnɩ tɛtʋ taa nɛ tɩkpa nɛ tɩsɩŋ pʋʋ ŋgʋ kɩwɛ tɛtʋ wɩsɩ ɖɩlɩyɛ hɔɔlʋʋ taa yɔ kɩ-ñʋʋ yɔɔ.+ 24 Nɛ fezuu nakʋyʋ tɩŋnɩ natʋ ndʋ tɩlɩnɩ Ɛsɔ fezuu cɔlɔ yɔ tɩ-yɔɔ nɛ kɩkʋsɩ-m nɛ kiwoni-m mba pɛkɛzɩ-wɛ tɛtʋ nɛ pɛwɛɛ Kalɩdee yɔ pɔ-cɔlɔ. Ðɩnɛ ɛlɛ, natʋ ndʋ maanawa yɔ tɩmʋʋ. 25 Nɛ manpaɣzɩ kɛdʋʋ mba pɛkɛzɩ-wɛ tɛtʋ yɔ mbʋ payɩ Yehowa kaawɩlɩ-m yɔ.