Samɩyɛɛlɩ takayaɣ naalɛ ñɩŋga

18 Nɛ Daviid kalɩ ɛyaa mba paawɛ ɛ-cɔlɔ yɔ pa-ñʋʋ nɛ ɛsɩɩ pɔ-yɔɔ kudokiŋ ñʋndɩnaa nɛ mɩnɩŋ ñʋndɩnaa.+ 2 Nɛ Daviid tayɩ ɛyaa mba paawɛ ɛ-cɔlɔ yɔ tindima 3 taa nɛ eyebi-wɛ nɛ pɛɖɛɛ: Ɛɖʋzɩ tindimiye kajalaɣ ñɩnɖɛ Yowaabʋ nesi tɛɛ,+ tindimiye 2 ñɩnɖɛ Yowaabʋ ɖalʋ Abisayii,+ Zeruyaa+ pɩyalʋ nesi tɛɛ, nɛ tindimiye 3 ñɩnɖɛ Gaatɩ tʋ Itayii+ nesi tɛɛ. Nɛ wiyaʋ yɔɔdɩ se: «Ma ɖɔɖɔ mantɩŋɩɣ-mɩ nɛ ɖiwolo.» 3 Ɛlɛ peheyi-i se: «Pɩtɩpɔzɩ se ŋwolo,+ mbʋ pʋyɔɔ yɔ ye ɖisewa yɔ, paakaɣ cɔnʋʋ ɖe-ɖeɖe;* nɛ ye ɖa-taa hɔɔlʋʋ kʋɖʋmʋʋ ɛsɩba yɔ, pɩɩkaɣ-wɛ heyuu natʋyʋ, mbʋ pʋyɔɔ yɔ ŋmʋ ñɩm nɛ pɩkɩlɩ ɖa-taa ɛyaa 10 000.+ Pʋyɔɔ lɛ, pɩkɩlɩɣ ɖeu se ŋcaɣ tɛtʋ taa nɛ ŋtiyiɣni-ɖʋ mbʋ pɩpɩzɩɣ nɛ pɩsɩnɩ-ɖʋ yɔ.» 4 Wiyaʋ heyi-wɛ se: «Mbʋ pɩkɩlɩ ɖeu mɩ-ɛsɩndaa yɔ, mbʋ mankaɣ labʋ.» Peeɖe wiyaʋ sɩŋ tɛtʋ nɔnɔɔ cɔlɔ, nɛ ɛyaa tɩŋa lɩɩ tindima mɩnɩŋ mɩnɩŋ nɛ kudokiŋ kudokiŋ. 5 Nɛ wiyaʋ ɖʋ Yowaabʋ nɛ Abisayii nɛ Itayii paɣtʋ tʋnɛ: «Ɩlabɩ-m evebu Absalɔm hɛɛɛ.»+ Alɩwaatʋ ndʋ wiyaʋ ɖʋ ñʋndɩnaa tɩŋa paɣtʋ Absalɔm yɔɔ yɔ, ɛyaa tɩŋa nɩ tɔm ndʋ.

6 Nɛ ɛyaa mba, pɛɖɛɛ ñɩtʋ taa se pakatɩ Izrayɛɛlɩ, nɛ pala you Efrayim laʋ tɛɛ.+ 7 Daviid lɩmɖʋyaa wa+ Izrayɛɛlɩ samaɣ peeɖe,+ nɛ pakʋ ɛyaa sakɩyɛ evemiye nɖɩ—ɛyaa 20 000. 8 You yɛlɩ egeetiye nɖɩ ɖɩ-tɩŋa ɖɩ-taa. Pɩtasɩ lɛ, laʋ kʋ ɛyaa nɛ pɩkpaɖɩ ɛyaa mba laɣɖɛ kʋ evemiye nɖɩ yɔ.

9 Absalɔm kɔɔ nɛ ɛna se ɛ nɛ Daviid lɩmɖʋyaa pakataa nɛ paha ɖama nɛ ɛsa. Absalɔm kaacaɣ kpaŋaɣ* nakɛyɛ yɔɔ nɛ kpaŋaɣ sʋʋ tɩʋ sɔsɔʋ nakʋyʋ pilinzi nzɩ siihu kpimm yɔ sɩ-tɛɛ, nɛ tɩʋ sɔsɔʋ ŋgʋ ki-pilinzi kpa ɛ-ñʋʋ, nɛ esusi helim taa* nɛ kpaŋaɣ ŋga kɔ-yɔɔ ɛɛcaɣaa yɔ kaka wɛɛ nɛ kɛɖɛɣ. 10 Nɛ nɔɔyʋ na nɛ ewolo eheyi Yowaabʋ se:+ «Na! Mana Absalɔm, esusi tɩʋ sɔsɔʋ nakʋyʋ yɔɔ.» 11 Yowaabʋ cosi abalʋ weyi ewoba nɛ eheyi-i yɔ se: «Ye ŋna-ɩ, ɛbɛ yɔɔ ŋtɩkʋ-ɩ kpaagbaa nɛ ŋpɛɖɩ-ɩ tataa? Ye ŋŋlabɩ mbʋ yɔ maaha-ŋ nɛ taa leleŋ liidiye pɔɔyɩsɩ 10 nɛ tambaɖɛ.» 12 Ɛlɛ abalʋ ɛnʋ ecosi Yowaabʋ se: «Paa paacɛlɩ-m* liidiye pɔɔyɩsɩ 1 000 yɔ, mantaapɩzɩɣ se mankpazɩ me-nesi wiyaʋ pɩyalʋ yɔɔ, mbʋ pʋyɔɔ yɔ ɖɩnɩ wiyaʋ ɖʋ ña nɛ Abisayii nɛ Itayii paɣtʋ se: “Paa ɩtɩɩkɛ mba yɔ, ɩcɔnɩ camɩyɛ evebu Absalɔm yɔɔ.”+ 13 Ye maamanɩ paɣtʋ yɔɔ nɛ malɩzɩ e-wezuu yɔ,* pɩtaapɩzɩɣ se pɩwɛɛ mɛsaɣ tɛɛ nɛ wiyaʋ tɩtɩlɩ, nɛ ŋtaakandɩyɩ mɔ-yɔɔ.» 14 Peeɖe Yowaabʋ yɔɔdaa se: «Maatasɩɣ lesuu alɩwaatʋ ñɔ-cɔlɔ!» Nɛ ɛkpaɣ ñɩma* 3 nɛ ewolo ɛsɔbɩ-yɛ Absalɔm laŋɩyɛ taa. Alɩwaatʋ ndʋ lɛ, Absalɔm nɛ ɛ-ɛsa mbʋ, eesusi tɩʋ sɔsɔʋ yɔɔ. 15 Nɛ Yowaabʋ lɩmɖʋyaa 10 mba pɔɖɔkaɣ e-you wondu yɔ, powolo nɛ pɛtɛzɩ kʋʋ Absalɔm.+ 16 Nɛ Yowaabʋ hʋlɩ nɔndɔʋ, nɛ ɛyaa yele Izrayɛɛlɩ wayɩ ɖʋʋ nɛ papɩsɩ; Yowaabʋ heyi-wɛ se peyele you labʋ. 17 Pakpaɣ Absalɔm nɛ pɛpɛɖɩ pɔʋ sɔsɔʋ nakʋyʋ taa laʋ tɛɛ nɛ pakaa ɛ-yɔɔ pɛɛ huuye sɔsɔyɛ naɖɩyɛ.+ Nɛ Izrayɛɛlɩ kpeekpe se nɛ papɩsɩ pa-ɖɩsɩ taa.

18 Alɩwaatʋ ndʋ Absalɔm kaawɛnɩ ɛ-ɛsa yɔ, eesiɣ ɛ-tɩ tilimiye naɖɩyɛ Wiyaʋ Fɛɛʋ* taa,+ mbʋ pʋyɔɔ yɔ ɛyɔɔdaa se: «Mɛnfɛyɩnɩ abalɩbɩɣa se pɩsa nɛ ɛyaa tɔzɩ ma-hɩɖɛ yɔɔ.»+ Pʋyɔɔ ɛya tilimiye nɖɩ nɛ ɛ-hɩɖɛ, nɛ payaɣ-ɖɩ se Absalɔm yɔɔ tɔzʋʋ tilimiye halɩ nɛ sɔnɔ.

19 Sadɔɔkɩ pɩyalʋ Ahimaazɩ+ yɔɔdɩ se: «Mentendi-ŋ, yele nɛ mense nɛ mowolo meheyi wiyaʋ mbʋ pɩlaba yɔ, mbʋ pʋyɔɔ yɔ Yehowa ɖezi ɛ-tɔm nɛ ɛlɩzɩ-ɩ e-koyindinaa nesi tɛɛ.»+ 20 Ɛlɛ Yowaabʋ cosi-i se: «Sɔnɔ ŋŋkaɣ kɛʋ weyi esusuu mbʋ pɩlaba yɔ. Kɩyakʋ lɛɛkʋ wiye lɛ ŋŋsusi tɔm, ɛlɛ sɔnɔ lɛ ŋŋkaɣ susuu tɔm ndʋ tɩlaba yɔ, mbʋ pʋyɔɔ yɔ wiyaʋ maɣmaɣ pɩyalʋ sɩba.»+ 21 Peeɖe Yowaabʋ heyi Kuusi tʋ+ nɔɔyʋ se: «Wolo nɛ ŋheyi wiyaʋ mbʋ ŋnawa yɔ.» Nɛ Kuusi tʋ luŋ Yowaabʋ tɛɛ nɛ ese nɛ ɛɖɛɛ. 22 Sadɔɔkɩ pɩyalʋ Ahimaazɩ tasɩ heyuu Yowaabʋ se: «Paa ɛbɛ ɛlakɩ yɔ, yele nɛ ma ɖɔɖɔ mense mantɩŋ Kuusi tʋ wayɩ.» Ɛlɛ Yowaabʋ heyi-i se: «Man-pɩyalʋ, ɛbɛ yɔɔ pɩwɛɛ se ŋse ŋgʋ tɔm natʋyʋ fɛyɩ se ŋwoki heyuu?» 23 Ɛlɛ ɛɖaɣnɩ yɔɔdʋʋ se: «Paa ɛbɛ ɛlakɩ yɔ, yele nɛ mense.» Nɛ Yowaabʋ heyi-i se: «Se ŋwolo!» Nɛ Ahimaazɩ kpaɣ Yɔɔrdaŋ egeetiye taa nʋmɔʋ* nɛ ese nɛ ɛkɔɔ nɛ ɛɖɛɛ Kuusi tʋ yɔɔ.

24 Daviid kaacaɣ tɛtʋ nɔnɔsɩ 2 hɛkʋ taa,+ nɛ feŋiyu+ kpa tɛtʋ nɔnɔɔ ŋga kamalɩnɩ koloŋa yɔ ka-ñʋʋ taa. Ɛkʋsɩ ɛ-ɛsa nɛ ɛna abalʋ nɔɔyʋ ɖiɣni seu e-ɖeke. 25 Nɛ feŋiyu koo nɛ eheyi wiyaʋ. Nɛ wiyaʋ yɔɔdɩ se: «Ye ɛwɛ e-ɖeke yɔ, pɩwɩlɩɣ se ɛkɔŋnɩ tɔm natʋyʋ.» Ɛkɔm nɛ ɛñɔtɩnɩ kpam lɛ, 26 feŋiyu na abalʋ lɛlʋ eɖiɣni seu. Nɛ feŋiyu ɛnʋ ɛyaa tɛtʋ nɔnɔɔ yɔɔ ɖaŋɩyʋ nɛ ɛyɔɔdɩ se: «Na! Abalʋ lɛlʋ ɖiɣni seu e-ɖeke!» Wiyaʋ yɔɔdɩ se: «Ɛnʋ ɖɔɖɔ ɛkɔŋnɩ tɔm natʋyʋ.» 27 Feŋiyu yɔɔdɩ se: «Kajalaɣ tʋ seɣ seu mbʋ yɔ, pɩlakɩ-m ɛzɩ Sadɔɔkɩ pɩyalʋ Ahimaazɩ+ yɔ,» nɛ wiyaʋ yɔɔdɩ se: «Ɛkɛ ɛyʋ kɩbanʋ nɛ ɛkɔŋnɩ tɔm kɩbandʋ.» 28 Nɛ Ahimaazɩ koo nɛ ɛyaa wiyaʋ nɛ ɛyɔɔdɩ se: «Pɩtɩŋa pɩɖɔŋ camɩyɛ!» Nɛ eluŋ wiyaʋ tɛɛ nɛ ɛpa ɛ-ɛsa nɛ tɛtʋ. Nɛ ɛyɔɔdɩ se: «Pasa ñɛ-Ɛsɔ Yehowa, weyi ɛɖʋzɩ ñe-nesi tɛɛ ɛyaa mba pakaɖɩnɩ man-kɩbaɣlʋ wiyaʋ yɔ!»*+

29 Ɛlɛ wiyaʋ pɔzɩ-ɩ se: «Pɩtɩŋa pɩɖɔŋnɩ evebu Absalɔm camɩyɛ na?» Peeɖe Ahimaazɩ cosaa se: «Mana ɛyaa yakaɣ kɔkɔɖɛ sɔsɔɖɛ alɩwaatʋ ndʋ Yowaabʋ tiyi wiyaʋ lɩmɖʋyʋ nɛ ña-lɩmɖʋyʋ yɔ, ɛlɛ mantaatɩlɩ mbʋ pɩkɛnaa yɔ.»+ 30 Nɛ wiyaʋ heyi-i se: «Kɛzɩ ña-tɩ hɔɔlʋʋ, sɩŋ cɩnɛ.» Nɛ ɛkɛzɩ ɛ-tɩ hɔɔlʋʋ nɛ ɛsɩŋ peeɖe.

31 Ðɩnɛ ɛlɛ Kuusi tʋ talɩ,+ nɛ Kuusi tʋ ɛnʋ ɛyɔɔdɩ se: «Man-kɩbaɣlʋ wiyaʋ etisi tɔm tʋnɛ: Sɔnɔ Yehowa ɖezi ñɔ-tɔm nɛ ɛlɩzɩ-ŋ mba payɩ pakaɖɩnɩ-ŋ yɔ pe-nesi tɛɛ.»+ 32 Ɛlɛ wiyaʋ pɔzɩ Kuusi tʋ se: «Pɩtɩŋa pɩɖɔŋnɩ evebu Absalɔm camɩyɛ na?» Nɛ Kuusi tʋ cosi se: «Man-kɩbaɣlʋ wiyaʋ koyindinaa tɩŋa nɛ mba payɩ pakaɖɩnɩ-ŋ se palabɩ-ŋ kɩdɛkɛdɩm yɔ, papɩsɩ ɛzɩ evebu ɛnʋ yɔ!»+

33 Tɔm tʋnɛ tiyeba nɛ wiyaʋ sʋʋ laŋwɛɛkɩyɛ taa, nɛ ɛkpa ɛsɔdaa kuduyuu ŋgʋ kɩwɛ tɛtʋ nɔnɔɔ ñʋʋ yɔɔ yɔ kɩ-taa nɛ ewii, nɛ ɛɖɔŋ nɛ ɛyɔɔdʋʋ se: «Man-pɩyalʋ Absalɔm, man-pɩyalʋ, man-pɩyalʋ Absalɔm! Ye maasɩbɩ ño-lone taa, man-pɩyalʋ Absalɔm, man-pɩyalʋ!»+