Tɔm Hʋyaa
8 Pʋwayɩ lɛ, Efrayim abalaa pɔzɩ Gideyɔɔ se: «Ɛbɛ ŋlabɩ-ɖʋ mbʋ yɔ? Ŋɖɛɣaɣ Madiyaŋ mba yonuu lɛ, ɛbɛ yɔɔ ŋtɩyaa-ɖʋ?»+ Nɛ pakalɩ-ɩ siŋŋ.+ 2 Ɛlɛ ekitini-wɛ se: «Mbʋ malaba yɔ, pɩtalɩ we mbʋ ɩlaba yɔ pɩ-ɛsɩndaa? Mbʋ Efrayim cazaa yɔ,+ pɩtɩkɩlɩ ɖeu viiñi pee wena Abi-Ezɛɛrɩ koyaa yɔ?+ 3 Mi-nesi taa Ɛsɔ ɖʋzɩ Madiyaŋ awumbiya Orɛɛbʋ nɛ Zeyɛɛbʋ;+ mbʋ malaba yɔ, pɩtalɩ we mbʋ ɩlaba yɔ pɩ-ɛsɩndaa?» Ɛyɔɔdɩ mbʋ* lɛ, pɔ-yɔɔ hɛɛ.*
4 Pʋwayɩ lɛ, Gideyɔɔ talɩ Yɔɔrdaŋ pɔɔ nɔɔ nɛ ɛtɛzɩ-kɛ. Pɩɩnɩ ɛ nɛ abalaa 300 mba paawɛ ɛ-cɔlɔ yɔ, ɛlɛ paawɛ koyindinaa ɖɔɔnʋʋ yɔɔ mbʋ. 5 Pʋyɔɔ eheyi Sukɔɔtɩ abalaa se: «Mentendi-mɩ, ɩha kpɔnɔnaa ɛyaa mba patɩŋɩɣ-m yɔ, mbʋ pʋyɔɔ yɔ pɩnɩ-wɛ; ɛlɛ menɖiɣni tam Madiyaŋ awiya Zeba nɛ Zalɩmuna.» 6 Ɛlɛ Sukɔɔtɩ awumbiya kitini-i se: «Ŋtɛm kpaʋ Zeba nɛ Zalɩmuna kɩkpaʋ ñe-nesi taa nɛ pɩwɛɛ se ɖɩha ñɔ-sɔɔjanaa kpɔnɔnaa na?» 7 Peeɖe Gideyɔɔ yɔɔdaa se: «Tɔm ndʋ ɩyɔɔdɩ mbʋ yɔ ti-ɖeke tɩ-yɔɔ lɛ, Yehowa ɖʋzʋʋ Zeba nɛ Zalɩmuna me-nesi taa nɛ pɩtɛ lɛ, mankaɣ-mɩ loduu nɛ lakʋ taa sɔɔ nɛ sɔɔ ñɩtʋ.»+ 8 Nɛ ɛkʋyɩnɩ peeɖe nɛ ɛɖɛɛ ɛkpa Penuwɛɛlɩ nɛ ɛsʋlʋmɩ paba ɖɔɖɔ kpɔnɔnaa, ɛlɛ Penuwɛɛlɩ abalaa cosi-i ɖeyi ɖeyi ɛzɩ Sukɔɔtɩ abalaa kaacosuu-i yɔ. 9 Pʋyɔɔ eheyi ɖɔɖɔ Penuwɛɛlɩ abalaa se: «Manpɩsɩɣ nɛ mɔnkɔmnɩ laŋhɛzɩyɛ lɛ, mɔyɔkʋʋ tilimiye ɖɩnɛ.»+
10 Zeba nɛ Zalɩmuna nɛ pɔ-sɔɔjanaa paawɛ Karkɔɔr, pɔ-sɔɔjanaa mba paakpɛndɩ abalaa 15 000 mbʋ yɔ. Pe-ɖeke paakazɩnɩ Wɩsɩ Ðɩlɩyɛ taa mba sɔɔjanaa kpeekpe taa,+ mbʋ pʋyɔɔ yɔ paatɛm kʋʋ pɔ-sɔɔjanaa 120 000. 11 Gideyɔɔ tɩŋ kizinzikiŋ tɛɛ caɣyaa nʋmɔʋ, Noba nɛ Yogbeha+ wɩsɩ ɖɩlɩyɛ taa nɛ ɛɖɛɛ ɛkpa nɛ eyooni sɔɔjanaa pɩlʋʋ, paba ñataañɔɔzɩ pa-tɩ se pala you. 12 Madiyaŋ mba awiya Zeba nɛ Zalɩmuna peseɣaɣ lɛ, ɛɖʋ pa-wayɩ nɛ ɛkpa awiya ana a-naalɛ, Zeba nɛ Zalɩmuna, piyeba nɛ sɔɔndʋ kpa sɔɔjanaa pɩlʋʋ kpeekpe siŋŋ.
13 Pʋwayɩ Yowaasɩ pɩyalʋ Gideyɔɔ lɩnɩ you nɛ ɛpɩsɩɣ lɛ, ɛtɩŋnɩ nʋmɔʋ ŋgʋ kɩkpaɣ Herɛsɩ yɔ. 14 Ɛlɩ nʋmɔʋ lɛ, ɛkpa Sukɔɔtɩ evebu nɔɔyʋ nɛ ɛpɔzɩ-ɩ tɔm. Nɛ evebu ɛnʋ ɛma-ɩ Sukɔɔtɩ awumbiya nɛ ɛzʋtʋyaa hɩla, paakpɛndɩ abalaa 77. 15 Nɛ ɛɖɛɛ ewolo Sukɔɔtɩ abalaa cɔlɔ nɛ eheyi-wɛ se: «Zeba nɛ Zalɩmuna yɔ, pɔ-yɔɔ iiwoŋi-m nɛ ɩpɔzɩ-m se: “Ŋtɛm kpaʋ Zeba nɛ Zalɩmuna kɩkpaʋ ñe-nesi taa nɛ pɩwɛɛ se ɖɩha ña-abalaa mba pɩnɩ-wɛ yɔ kpɔnɔnaa na?”»+ 16 Peeɖe ɛkpa tɛtʋ taa ɛzʋtʋyaa nɛ ɛkpaɣ lakʋ taa sɔɔ nɛ sɔɔ ñɩtʋ nɛ ɛkpɛlɩkɩnɩ Sukɔɔtɩ abalaa mba lɔŋ.+ 17 Nɛ ɛyɔkɩ Penuwɛɛlɩ tilimiye+ nɛ ɛkʋ tɛtʋ taa abalaa.
18 Ɛpɔzɩ Zeba nɛ Zalɩmuna se: «Abalaa mba ɩkʋ Taabɔɔrɩ yɔ, ɛzɩma wɛtʋ paawɛɛ?» Nɛ paba cosi-i se: «Paawɛ ɛzɩ ña yɔ, pa-taa paa weyi kaawɛ ɛzɩ wiyaʋ pɩyalʋ yɔ.» 19 Peeɖe ɛyɔɔdaa se: «Paakɛ mon-koobiya, mon-ɖoo pɩyalaa. Monɖukini Ɛsɔ ɛsadʋ Yehowa se ye ɩɩfɛ pe-weziŋ yɔ, mantaakʋ-mɩ.» 20 Nɛ eheyi ɛ-pɩyalʋ kajalaɣ tʋ Yetɛɛrɩ se: «Kʋyɩ nɛ ŋkʋ-wɛ.» Ɛlɛ evebu ñatɩkpɛɛ ɛ-laɣɖɛ; sɔɔndʋ kpaɣaɣ-ɩ, mbʋ pʋyɔɔ yɔ ɛɛkɛ evebu yem. 21 Peeɖe Zeba nɛ Zalɩmuna pɔyɔɔdaa se: «Kʋyɩ ña-maɣmaɣ nɛ ŋkʋ-ɖʋ, mbʋ pʋyɔɔ yɔ ɖoŋ patɩlɩɣnɩ abalʋ.»* Ðɩnɛ ɛlɛ, Gideyɔɔ kʋyɩ nɛ ɛkʋ Zeba nɛ Zalɩmuna+ nɛ ɛkpaɣ ajana wondu ndʋ tɩɩwɛ pa-aɖaaɖaanaa liŋ tɛɛ nɛ tɩwɛɛ kotaaa kotaaa ɛzɩ fenaɣ hɔɔlaɣ yɔ.
22 Pʋwayɩ lɛ, Izrayɛɛlɩ abalaa heyi Gideyɔɔ se: «Tɔɔ kewiyitu ɖɔ-yɔɔ, ña nɛ ña-pɩyalʋ nɛ ña-sayɩ, mbʋ pʋyɔɔ yɔ ŋyabɩ ɖa-ñʋʋ Madiyaŋ mba nesi taa.»+ 23 Ɛlɛ Gideyɔɔ heyi-wɛ se: «Maakaɣ kewiyitu tɔɔʋ mɩ-yɔɔ, nɛ man-pɩyalʋ ɖɔɖɔ ɛɛkaɣ kewiyitu tɔɔʋ mɩ-yɔɔ. Yehowa kaɣnɩ kewiyitu tɔɔʋ mɩ-yɔɔ.»+ 24 Nɛ Gideyɔɔ tasɩ yɔɔdʋʋ se: «Mɔnpɔzʋʋ-mɩ nabʋyʋ: mɩ-taa paa weyi ɛlɩzɩ wondu ndʋ ehiɣ you taa yɔ tɩ-taa mɔɔʋ kokooye naɖɩyɛ nɛ ɛcɛlɩ-m.» (Toovenim taa lɛ, koyindinaa mba Izrayɛɛlɩ mba kaawaba yɔ paawɛnɩ mɔɔŋ kokoo wena paalubini sika yɔ, mbʋ pʋyɔɔ yɔ Isimayɛɛlɩ mba paakɛnaa.)+ 25 Nɛ pocosi-i se: «Ðɩcɛlɩɣ-ŋ yɛ kɛlɛʋ yem.» Ðɩnɛ ɛlɛ, pɔpɔ toko kɩɖaɣlʋʋ nakʋyʋ tataa nɛ paa abalʋ weyi lɛ, ɛlɩzɩ wondu ndʋ ehiɣ you taa yɔ, tɩ-taa mɔɔʋ kokooye nɛ ɛpɛɖɩ kɩ-yɔɔ. 26 Mɔɔŋ kokoo wena polubini sika yɔ, wena ɛɛpɔzaa yɔ, a-yuŋ kaatalɩ sika siklinaa* 1 700; pɩtasɩnɩ ajana wondu ndʋ tɩɩwɛ kotaaa kotaaa ɛzɩ fenaɣ hɔɔlaɣ yɔ, naŋgbacaɣlanaa, heŋ hʋndʋ tokonaa kɩsɛɛmaa yuulee mba Madiyaŋ awiya suwaɣ yɔ nɛ aɖaaɖaanaa liŋ tɛɛ lɩyɩŋ.+
27 Gideyɔɔ kpaɣ sika ŋga nɛ ɛlabɩnɩ efoodɩ*+ nɛ ɛsɩɩ-kʋ ɛ-tɛtʋ taa Ofɩra+ se ɛyaa ɩnaɣ; nɛ Izrayɛɛlɩ kpeekpe paɣzɩ-kʋ sɛʋ peeɖe ɛzɩ sɩʋ kpeliɣa yɔ,*+ kɩɩkɛ kpaca Gideyɔɔ nɛ ɛ-ɖɩɣa taa mba.+
28 Mbʋ poluzi Madiyaŋ+ mba Izrayɛɛlɩ tɛɛ, nɛ Madiyaŋ mba tɩtasɩ-wɛ kaɖɩnʋʋ;* nɛ ɛjaɖɛ hɛzɩ* pɩnzɩ 40 Gideyɔɔ alɩwaatʋ taa.+
29 Nɛ Yowaasɩ pɩyalʋ Yerubaalɩ+ pɩsɩ nɛ ɛcaɣ ɛ-tɛ.
30 Gideyɔɔ kaawɛnɩ pɩyalaa 70,* mbʋ pʋyɔɔ yɔ ɛɛkpaɣ halaa sakɩyɛ. 31 Gideyɔɔ ɖaŋ* weyi ɛɛwɛ Sekɛɛm yɔ, ɛlɛ ɖɔɖɔ lʋlɩ-ɩ abalɩbɩɣa, nɛ Gideyɔɔ yaa-kɛ se Abimelɛɛkɩ.+ 32 Nɛ Yowaasɩ pɩyalʋ Gideyɔɔ sɩ akpadɩyɩtʋ kɩbandʋ taa, nɛ pepimi-i ɛ-caa Yowaasɩ pɩlaʋ taa Abi-Ezɛɛrɩ mba tɛtʋ Ofɩra taa.+
33 Gideyɔɔ tɩɩsɩba lɛ, Izrayɛɛlɩ mba nɛ Baalɩwaa paɖaɣnɩ labʋ fezuu taa acɛyɛ,+ nɛ pakpaɣ Baalɩ-Beriiti se ɛkɛ pɛ-ɛsɔ.+ 34 Izrayɛɛlɩ mba tɩtɔzɩ pɛ-Ɛsɔ Yehowa yɔɔ,+ ɛnʋ weyi eholi-wɛ po-koyindinaa mba payɩ paawɛ pɔ-cɔlɔ kpɛɛɛ yɔ pe-nesi taa yɔ;+ 35 nɛ kɩbandʋ ndʋ payɩ Yerubaalɩ, pʋ-tɔbʋʋ se Gideyɔɔ, labɩ Izrayɛɛlɩ yɔ, patɩwɩlɩ ɖɔɖɔ sɔɔlɩm siɣsiɣ ñɩmbʋ ɛ-ɖɩɣa taa mba tɩ-yɔɔ.+