Awiya takayaɣ kajalaɣ ñɩŋga
13 Yehowa ɖʋ paɣtʋ ɛ-ɛyʋ*+ nɔɔyʋ nɛ ɛlɛ lɩɩnɩ Yuuda nɛ ewolo Betɛɛlɩ alɩwaatʋ ndʋ Yerobowam sɩŋ altaaru cɔlɔ+ se ɛla nɛ kɩlaŋ ñɔsɩ kpa yɔ. 2 Nɛ ɛma kubuka nɛ ɛyɔɔdɩ tɔm tʋnɛ pɩlɩɩnɩ altaaru yɔɔ ɛzɩ Yehowa ɖʋʋ-ɩ paɣtʋ yɔ se: «Oo altaaru, altaaru! Tɔm tʋnɛ Yehowa yɔɔdʋʋ: “Na! Pakaɣ lʋlʋʋ Daviid ɖɩɣa taa abalɩbɩɣa ŋga payaɣ se Yoziyaasɩ+ yɔ! Kakaɣ laʋ lona kʋkʋya taa cɔjɔnaa ñɔ-yɔɔ, mba pakpazɩɣ kɩlaŋ ñɔsɩ ñɔ-yɔɔ yɔ, nɛ kakaɣ ñaɣzʋʋ ɛyaa mɔɔ miŋ ñɔ-yɔɔ.”»+ 3 Ɛha yʋsaɣ* evemiye nɖɩ ɖi-wiye nɛ ɛyɔɔdɩ se: «Yʋsaɣ* kanɛ Yehowa hawa: Na! Altaaru kaɣ faɣʋ, nɛ tɔlɩma* wena awɛ kɩ-yɔɔ yɔ, akaɣ mɩzʋʋ.»
4 Wiyaʋ Yerobowam tɩɩnɩ tɔm ndʋ Ɛsɔ toovenim tʋ tɛ ɛyʋ mabɩ kubuka nɛ ɛyɔɔdɩ pɩlɩɩnɩ altaaru ŋgʋ kɩwɛ Betɛɛlɩ yɔ kɩ-yɔɔ lɛ, ɛkʋsɩ e-nesi altaaru yɔɔ nɛ esezi-sɩ nɛ Ɛsɔ toovenim tʋ tɛ ɛyʋ yɔɔ kiŋ nɛ ɛyɔɔdɩ se: «Ɩkpa-ɩ!»+ Kpaagbaa mbʋ lɛ, nesi nzɩ esezini ɛlɛ yɔɔ kiŋ yɔ, sɩwɩlɩ,* nɛ ɛtaapɩzɩɣ se ɛpɩsɩnɩ-sɩ.+ 5 Nɛ Altaaru faɣ, nɛ tɔlɩma wena aawɛ kɩ-yɔɔ yɔ, amɩzɩ. Pɩɩkɛ yʋsaɣ* ŋga Ɛsɔ toovenim tʋ tɛ ɛyʋ kaahawa yɔ, ɛzɩ Yehowa kaaɖʋʋ-ɩ paɣtʋ yɔ.
6 Nɛ wiyaʋ heyi Ɛsɔ toovenim tʋ tɛ ɛyʋ se: «Mentendi-ŋ, tendi ñɛ-Ɛsɔ Yehowa se ɛna man-pʋtɔdɩyɛ,* nɛ ŋtɩmɩ mɔ-yɔɔ nɛ me-nesi pɩsɩ nɛ sɩwɛɛ ɛzɩ sɩɩwɛʋ yɔ.»+ Peeɖe Ɛsɔ toovenim tʋ tɛ ɛyʋ tendi Yehowa se ɛna wiyaʋ pʋtɔdɩyɛ, nɛ wiyaʋ nesi pɩsɩ nɛ sɩwɛɛ ɛzɩ sɩɩwɛʋ yɔ. 7 Pʋwayɩ lɛ, wiyaʋ heyi Ɛsɔ toovenim tʋ tɛ ɛyʋ se: «Kɔɔ nɛ ɖiwolo ɖɩɣa nɛ ŋtɔɔ tɔɔnaɣ, nɛ malabɩ-ŋ kʋjɔʋ nakʋyʋ.» 8 Ɛlɛ Ɛsɔ toovenim tʋ tɛ ɛyʋ heyi wiyaʋ se: «Paa ŋha-m ña-ɖɩɣa hɔɔlʋʋ yɔ, maakaɣ-ŋ tɩŋʋʋ se ɖiwolo nɛ mɔntɔɔ tɔɔnaɣ* yaa mɔñɔɔ lɩm lone ɖɩnɛ ɖɩ-taa. 9 Mbʋ pʋyɔɔ yɔ paɣtʋ tʋnɛ Yehowa ɖʋ-m: “Pɩtɩpɔzɩ se ŋtɔɔ tɔɔnaɣ yaa ŋñɔɔ lɩm, nɛ pɩtɩpɔzɩ se ŋtɩŋ nʋmɔʋ ŋgʋ ŋkɔmnaa yɔ nɛ ŋpɩsɩ.”» 10 Pʋyɔɔ ɛtɩŋ nʋmɔʋ lɛɛkʋ nɛ ɛɖɛɛ, nɛ nʋmɔʋ ŋgʋ ɛɛtɩŋaa nɛ ɛkɔɔ Betɛɛlɩ yɔ ɛtɩtɩŋ-kʋ se ɛpɩsɩ.
11 Nayʋ akpadɩyʋ nɔɔyʋ kaawɛ Betɛɛlɩ, nɛ ɛ-pɩyalaa wolo ɖɩɣa nɛ pɛkɛdɩ-ɩ mbʋ payɩ Ɛsɔ toovenim tʋ tɛ ɛyʋ labɩ Betɛɛlɩ kɩyakʋ ŋgʋ ki-wiye nɛ tɔm ndʋ eeheyi wiyaʋ yɔ. Pɛkɛdɩ pa-caa tɔm ndʋ lɛ, 12 pa-caa pɔzɩ-wɛ se: «Nʋmɔʋ ŋgʋ ɛtɩŋaa nɛ ɛɖɛɛ?» Nɛ ɛ-pɩyalaa wɩlɩ-ɩ nʋmɔʋ ŋgʋ Ɛsɔ toovenim tʋ tɛ ɛyʋ weyi ɛlɩnɩ Yuuda yɔ ɛtɩŋaa nɛ ɛɖɛɛ yɔ. 13 Nɛ eheyi ɛ-pɩyalaa se: «Ɩñɔɔzɩ-m kpaŋaɣ.» Peeɖe pɔñɔɔzɩ-ɩ kpaŋaɣ nɛ ɛcaɣ kɔ-yɔɔ nɛ ɛɖɛɛ.
14 Ɛtɩŋ Ɛsɔ toovenim tʋ tɛ ɛyʋ ɛnʋ ɛ-wayɩ nɛ ɛna-ɩ ɛcaɣ tɩʋ sɔsɔʋ nakʋyʋ tɛɛ. Nɛ ɛpɔzɩ-ɩ se: «Ñɛkɛnɩ Ɛsɔ toovenim tʋ tɛ ɛyʋ weyi ɛlɩnɩ Yuuda yɔ?»+ Ɛlɛ cosi-i se: «Ɛɛɛ, ma lɛ.» 15 Eheyi-i se: «Kɔɔ nɛ ma nɛ ŋ ɖiwolo ɖɩɣa nɛ ŋtɔɔ tɔɔnaɣ.» 16 Ɛlɛ eheyi-i se: «Maapɩzɩɣ mantɩŋɩ-ŋ nɛ ɖɩpɩsɩ yaa mentisi ña-yatʋ, nɛ maapɩzɩɣ ɖɔɖɔ nɛ ma nɛ ŋ ɖɩtɔɔ tɔɔnaɣ yaa ɖɩñɔɔ lɩm lone ɖɩnɛ ɖɩ-taa. 17 Mbʋ pʋyɔɔ yɔ Yehowa heyi-m se: “Pɩtɩpɔzɩ se ŋtɔɔ tɔɔnaɣ yaa ŋñɔɔ lɩm peeɖe. Pɩtɩpɔzɩ se ŋtɩŋ nʋmɔʋ ŋgʋ ŋkɔmnaa yɔ nɛ ŋpɩsɩ.”» 18 Ðɩnɛ ɛlɛ, eheyi-i se: «Ma ɖɔɖɔ mɛnkɛ nayʋ ɛzɩ ña yɔ, nɛ Ɛsɔ tiyiyu nɔɔyʋ heyi-m Yehowa tɔm tʋnɛ: “Ña nɛ ɩ ɩpɩsɩ ña-ɖɩɣa nɛ ɛtɔɔ tɔɔnaɣ nɛ ɛñɔɔ lɩm.”» (Ɛcɛtaɣ-ɩ kɩcɛtʋ.) 19 Peeɖe ɛtɩŋɩ-ɩ nɛ papɩsɩ se ɛtɔɔ tɔɔnaɣ nɛ ɛñɔɔ lɩm ɛlɛ ɖɩɣa taa.
20 Paacaɣ taabɩlɩ yɔɔ lɛ, Yehowa tɔm talɩ nayʋ weyi ɛɛkpaɣ-ɩ nɛ ɛpɩsɩna yɔ, 21 nɛ ɛma kubuka nɛ eheyi Ɛsɔ toovenim tʋ tɛ ɛyʋ weyi ɛlɩnɩ Yuuda yɔ se: «Tɔm tʋnɛ Yehowa yɔɔdʋʋ: “Ŋkaɖɩnɩ tɔm ndʋ Yehowa heyi-ŋ yɔ, nɛ ŋtɩña paɣtʋ ndʋ ñɛ-Ɛsɔ Yehowa ɖʋ-ŋ yɔ, 22 ɛlɛ ŋpɩsɩ se ŋtɔɔ tɔɔnaɣ nɛ ŋñɔɔ lɩm lone nɖɩ ɖɩ-taa paaheyi-ŋ se: ‘Taatɔɔ tɔɔnaɣ yaa taañɔɔ lɩm’ yɔ, pʋyɔɔ lɛ ño-tomnaɣ ɛɛkaɣ tibu ñɔ-cɔzɔnaa pɩlaʋ taa.”»+
23 Ɛsɔ toovenim tʋ tɛ ɛyʋ tɛm tɔɔʋ tɔɔnaɣ nɛ ɛñɔɔ lɩm lɛ, nayʋ akpadɩyʋ ɛnʋ ɛñɔɔzɩ kpaŋaɣ nayʋ weyi ɛɛpɩsɩnɩ-ɩ yɔ. 24 Nɛ ɛlɛ kpaɣ ɛ-nʋmɔʋ, ɛlɛ mʋʋzʋʋ nakʋyʋ katɩ-ɩ nʋmɔʋ taa nɛ kɩkʋ-ɩ.+ E-tomnaɣ wɛɛ nʋmɔʋ taa, nɛ kpaŋaɣ sɩŋ kɔ-cɔlɔ; mʋʋzʋʋ ɖɔɖɔ kaasɩŋ tomnaɣ ŋga kɔ-cɔlɔ. 25 Ɛyaa nabɛyɛ ɖɔŋaɣ nʋmɔʋ ŋgʋ kɩ-taa nɛ pana tomnaɣ ŋga nʋmɔʋ taa nɛ mʋʋzʋʋ sɩŋ kɔ-cɔlɔ. Powolo tɛtʋ ndʋ tɩ-taa nayʋ akpadɩyʋ ɛnʋ ɛɛwɛɛ yɔ nɛ pɛkɛdɩ pɩ-tɔm.
26 Nayʋ weyi ɛɛkpaɣ-ɩ nʋmɔʋ taa nɛ ɛpɩsɩnɩ-ɩ yɔ, ɛnɩ tɔm ndʋ lɛ, ɛcaŋ ɛyɔɔdɩ se: «Ɛsɔ toovenim tʋ tɛ ɛyʋ lɛ, weyi ɛkaɖɩnɩ tɔm ndʋ Yehowa heyi-i yɔ;+ pʋyɔɔ Yehowa ɖʋzɩ-ɩ mʋʋzʋʋ cɩkpaŋ tɛɛ, se kɩcɩyɩ-ɩ nɛ kɩkʋ-ɩ ɛzɩ Yehowa kaaheyuu-i yɔ.»+ 27 Nɛ eheyi ɛ-pɩyalaa se: «Ɩñɔɔzɩ-m kpaŋaɣ.» Peeɖe pɔñɔɔzɩ-ɩ kɛ. 28 Nɛ ɛkpaɣ nʋmɔʋ nɛ ɛɖɛɛ nɛ ewolo ɛna tomnaɣ ŋga nʋmɔʋ taa; kpaŋaɣ nɛ mʋʋzʋʋ paasɩŋ kɔ-cɔlɔ. Mʋʋzʋʋ tɩtɔɔ tomnaɣ ŋga nɛ kɩtɩcɩyɩ ɖɔɖɔ kpaŋaɣ. 29 Nayʋ ɛnʋ ɛkʋsɩ Ɛsɔ toovenim tʋ tɛ ɛyʋ tomnaɣ nɛ ɛsɩɩ-kɛ kpaŋaɣ yɔɔ, nɛ ɛpɩsɩnɩ-ɩ ɛ-maɣmaɣ ɛ-tɛtʋ taa se ewii-i nɛ epimi-i. 30 Nɛ ɛhɩzɩ tomnaɣ ŋga ɛ-maɣmaɣ ɛ-pɩlaʋ taa, nɛ pɛwɛɛ nɛ pewiɣ-i nɛ pɔtɔŋ se: «Hayɩ mon-koobu!» 31 Epimi-i nɛ ɛtɛ lɛ, eheyi ɛ-pɩyalaa se: «Alɩwaatʋ ndʋ mansɩkɩ yɔ, pɩwɛɛ se ipimi-m lone nɖɩ ɖɩ-taa pepim Ɛsɔ toovenim tʋ tɛ ɛyʋ yɔ. Ɩsɩɩ mɔ-mɔɔ ɛ-mɔɔ cɔlɔ.+ 32 Tɔm ndʋ ɛmabɩ kubuka nɛ ɛyɔɔdɩ ɛzɩ Yehowa ɖʋʋ-ɩ paɣtʋ pɩlɩɩnɩ Betɛɛlɩ altaaru yɔɔ nɛ lona kʋkʋya+ taa ɛsɔ sɛtʋ ɖɩsɩ tɩŋa yɔɔ Samaarii tɛtʋ ndɩ ndɩ taa yɔ, pɩtʋʋ fɛyɩ se tɩkaɣ labʋ.»+
33 Halɩ pɩlabɩ mbʋ nɛ pɩtɛ lɛ, Yerobowam tiyele ɛ-nʋmɔʋ kɩdɛkɛdʋʋ, ɛlɛ ewobi pɩ-yɔɔ nɛ ɛlɩzɩɣ samaɣ taa ɛyaa se pɛkɛ lona kʋkʋya taa cɔjɔnaa.+ Weyi e-liu kaawɛɛ se ɛkɛ cɔjɔ yɔ, ɛkpaɣaɣ-ɩ cɔjɔ* nɛ ɛtɔŋ se: «Ɛnʋ ɖɔɖɔ ɛkɛ lona kʋkʋya taa cɔjɔnaa taa nɔɔyʋ.»+ 34 Yerobowam+ ɖɩɣa taa mba kɩwɛɛkɩm mbʋ, piyeba nɛ paɖɩzɩ-wɛ nɛ pamʋʋzɩ-wɛ tɛtʋ yɔɔ.+