Tɔm Hʋyaa
7 Pʋwayɩ lɛ, Yerubaalɩ, pʋ-tɔbʋʋ se Gideyɔɔ,+ nɛ ɛyaa mba payɩ paawɛ ɛ-cɔlɔ yɔ pakʋyɩ tanaŋ tɛɛ cu nɛ pesiɣ pe-kizinzikiŋ Haroodɩ Hiɖe cɔlɔ; Madiyaŋ mba pɩlʋʋ ñaawɛ ɖenɖe Gideyɔɔ kaasiɣ e-kizinzikiŋ yɔ pi-hayo kiŋ, Mooree piyaɣ cɔlɔ fɛɛʋ taa. 2 Nɛ Yehowa heyi Gideyɔɔ se: «Ɛyaa mba pɛwɛ ñɔ-cɔlɔ yɔ, pakɩlɩ ɖɔʋ se manɖʋzɩ Madiyaŋ mba pe-nesi taa.+ Pɩtɩkɛ mbʋ yɔ, Izrayɛɛlɩ pɩzɩɣ nɛ kɩkpazɩ kɩ-tɩ nɛ kɩyɔɔdɩ se: “Ma-maɣmaɣ me-nesi yabɩnɩ ma-ñʋʋ.”+ 3 Lɛɛlɛɛyɔ lɛ, mentendi-ŋ, heyi samaɣ se: “Weyi sɔɔndʋ kpaɣ-ɩ nɛ eseliɣ yɔ, ɛpɩsɩ ɛ-ɖɩɣa taa.”»+ Mbʋ Gideyɔɔ takɩ-wɛ. Ðɩnɛ ɛlɛ, ɛyaa 22 000 pɩsɩ pa-ɖɩsɩ taa nɛ pɩkazɩ ɛyaa 10 000.
4 Paa mbʋ yɔ, Yehowa tasɩ heyuu Gideyɔɔ se: «Ɛyaa ɖaɣnɩ kɩlʋʋ ɖɔʋ. Tini-wɛ lɩm nɔɔ nɛ malabɩ-wɛ santaɖaʋ peeɖe. Ye meheyi-ŋ se: “Akele kaɣ-ŋ tɩŋʋʋ” yɔ, ɛnʋ kaɣnɩ-ŋ tɩŋʋʋ, ɛlɛ ye meheyi-ŋ se: “Akele ɛɛkaɣ-ŋ tɩŋʋʋ” yɔ, ɛɛkaɣ-ŋ tɩŋʋʋ.» 5 Nɛ etini ɛyaa lɩm nɔɔ.
Ðɩnɛ ɛlɛ, Yehowa heyi Gideyɔɔ se: «Kɛzɩnɩ hɔɔlʋʋ ɛyaa mba payɩ peɖiɣ lɩm nɛ pa-nzʋlʋma ɛzɩ haɣ ɖiɣu yɔ, nɛ ŋkɛzɩnɩ hɔɔlʋʋ mba poluŋuu pa-nʋmbɔla yɔɔ se pɔñɔɔ yɔ.» 6 Abalaa mba pakpazɩ pe-nesi pɔ-nɔɔ cɔlɔ nɛ peɖi lɩm yɔ, paakpɛndɩ 300. Mba pakazaa yɔ poluŋ pa-nʋmbɔla yɔɔ nɛ pɔñɔɔ.
7 Nɛ Yehowa heyi Gideyɔɔ se: «Abalaa 300 mba peɖi lɩm yɔ, pɔ-yɔɔ mankaɣ tɩŋnʋʋ nɛ maya mɩ-ñʋʋ, nɛ mankaɣ ɖʋzʋʋ Madiyaŋ mba ñe-nesi taa.+ Ɛlɛ pɩwɛɛ se ɛyaa mba payɩ pakazaa yɔ, papɩsɩ pa-ɖɩsɩ taa.» 8 Mbʋ yebina nɛ abalaa 300 mba, pɛtɛm mʋʋ tɔɔnasɩ nɛ nɔndɔŋ lalaa cɔlɔ lɛ, Gideyɔɔ yele Izrayɛɛlɩ abalaa lalaa payɩ nɛ papɩsɩ pa-ɖɩsɩ taa, nɛ ɛkazɩ abalaa 300 mba pe-ɖeke. Madiyaŋ mba pɩlʋʋ kaawɛ fɛɛʋ taa, nɛ Gideyɔɔ pɩlʋʋ ñɛwɛɛ pa-ñʋʋ yɔɔ.+
9 Ðoo ana a-taa lɛ, Yehowa heyi-i se: «Kʋyɩ nɛ ŋwolo nɛ ŋyooni koyindu pɩlʋʋ, mbʋ pʋyɔɔ yɔ manɖʋzɩ-kʋ ñe-nesi taa.+ 10 Ɛlɛ ye sɔɔndʋ ɛkpaɣ-ŋ se ŋyooni-kʋ yɔ, ña nɛ ña-lɩmɖʋyʋ Pura itii pɩlʋʋ cɔlɔ. 11 Welisi tɔm ndʋ pɔyɔɔdʋʋ yɔ, nɛ pʋwayɩ lɛ ŋkaɣ hiɣu abalɩtʋ* nɛ ŋyooni-kʋ.» Ðɩnɛ ɛlɛ, ɛ nɛ ɛ-lɩmɖʋyʋ Pura petii nɛ powolo sɔɔjanaa pɩlʋʋ ŋgʋ kɩ-cɔlɔ kpam.
12 Madiyaŋ mba nɛ Amalɛɛkɩ mba nɛ Wɩsɩ Ðɩlɩyɛ taa mba kpeekpe+ kaasu fɛɛʋ taa ɛzɩ kudoloŋ yɔ, pa-aɖaaɖaanaa taawɛɛ kalʋʋ,+ paaɖɔ siŋŋ ɛzɩ teŋgu nɔɔ kañɩŋa pee yɔ. 13 Gideyɔɔ talaa lɛ, abalʋ nɔɔyʋ kaawɛɛ nɛ ɛkɛdɩɣ ɖoziye naɖɩyɛ ɛ-taabalʋ, nɛ ɛtɔŋ se: «Ðoziye nɖɩ monɖozaa yɔ nɖɩ yɔ: Kpɔnɔ* kulukulu nakʋyʋ kaawɛɛ nɛ kipilimiɣ Madiyaŋ mba pɩlʋʋ taa. Kɩtalɩ nɛ kiyooni kizinziku nakʋyʋ ɖoŋ kpem nɛ kʋkʋ tii nɛ kɩɖa.+ Ɛɛɛ, kɩpɩsɩ kizinziku kpɛlɩ nɛ kizinziku tɔlɩ.» 14 Nɛ ɛ-taabalʋ heyi-i se: «Yowaasɩ pɩyalʋ Gideyɔɔ, Izrayɛɛlɩ tʋ laɣɖɛ ɖeke pɩpɩzɩɣ nɛ pɩkɛ.+ Ɛsɔ ɖʋzɩ Madiyaŋ nɛ pɩlʋʋ kpeekpe e-nesi taa.»+
15 Gideyɔɔ ñɩtaa nɛ ɛnɩɩ ɖoziye nɖɩ ɛkɛdaa yɔ nɛ ɛnɩɩ ɖɔɖɔ ɖɩ-tɔbʋʋ lɛ,+ eluŋ nɛ ɛsɛɛ Ɛsɔ. Pʋwayɩ lɛ, ɛpɩsɩ Izrayɛɛlɩ pɩlʋʋ taa nɛ ɛyɔɔdɩ se: «Ɩkʋyɩ, mbʋ pʋyɔɔ yɔ Yehowa ɖʋzɩ Madiyaŋ mba pɩlʋʋ mi-nesi taa.» 16 Ðɩnɛ ɛlɛ, ɛtayɩ abalaa 300 mba tindima 3 taa nɛ ɛcɛlɩ pe-kpeekpe nɔndɔŋ+ nɛ peeɣsi sɔsɔsɩ nzɩ sɩ-taa nɛ miŋ koolonzi* yɔ. 17 Nɛ eheyi-wɛ se: «Ɩcɔnɩ-m nɛ ɩla ɖeyi ɖeyi ɛzɩ malakʋʋ yɔ. Mantalɩɣ pɩlʋʋ cɔlɔ kpam lɛ, pɩwɛɛ se mɩ ɖɔɖɔ ɩla ɛzɩ malakʋʋ yɔ. 18 Mayaɣ nɔndɔʋ, ma nɛ mba payɩ pɛwɛ mɔn-cɔlɔ yɔ lɛ, pɩwɛɛ se mɩ ɖɔɖɔ ɩyaa nɔndɔŋ nɛ pɩcɔɔ pɩlʋʋ nɛ pɩta nɛ ikoo se: “Yehowa nɛ Gideyɔɔ, mba tɩna!”»
19 Gideyɔɔ nɛ abalaa 100 mba paawɛ ɛ-cɔlɔ yɔ, patalɩ pɩlʋʋ cɔlɔ kpam ɖoo hɛkʋ taa feŋuu alɩwaatʋ* ɖɩbazɩyɛ, feŋiyaa kaawobi po-lona taa nɛ pitileɖi lɛ. Payaa nɔndɔŋ+ nɛ pɔyɔkɩ peeɣsi sɔsɔsɩ nzɩ sɩɩwɛ pe-nesi taa yɔ.+ 20 Nɛ tindima 3 ana ayaa nɔndɔŋ nɛ ayɔkɩ peeɣsi sɔsɔsɩ nzɩ. Paaɖɔkɩ miŋ koolonzi pa-nɩmɩyɛ taa nɛ payaa nɔndɔŋ nɛ pe-nesi kɩbanzɩ nɛ pokoo se: «Yehowa nɛ Gideyɔɔ pa-laɣɖɛ!» 21 Pɩlakaɣ mbʋ lɛ, paa abalʋ weyi ɛɛsɩŋ e-ɖeɖe nɛ pɔcɔɔ pɩlʋʋ nɛ pata, nɛ sɔɔjanaa tɩŋa se nɛ pɛɖɛɛ, pamakaɣ kubusi ɖɛʋ yɔɔ.+ 22 Ɛyaa 300 mba, paawɛ nɔndɔŋ yaʋ yɔɔ, nɛ Yehowa yele nɛ paa weyi ɛkɛzɩ ɛ-laɣɖɛ nɛ lɛlʋ yɔɔ koyindu pɩlʋʋ kpeekpe taa;+ nɛ sɔɔjanaa se nɛ patalɩ ɖooo Bɛtɩ-Sita, nɛ patalɩ ɖɔɖɔ Zerera, nɛ powolo patalɩ ɖooo Abɛl-Mehola+ kamaɣ yɔɔ, Tabaatɩ cɔlɔ.
23 Nɛ payaa Izrayɛɛlɩ abalaa mba pɛwɛ Naftalii, Asɛɛrɩ nɛ Manaasee kpeekpe+ taa yɔ nɛ paɖʋ Madiyaŋ mba wayɩ. 24 Gideyɔɔ tiyi ɛyaa se peheyi Efrayim pʋŋ egeetiye kpeekpe taa mba se: «Itii nɛ iyooni Madiyaŋ mba nɛ ɩɖaŋ pɔsɩ ɖɩdɛzɩyɛ taa nɛ piwolo pɩtalɩ Bɛtɩ-Bara nɛ Yɔɔrdaŋ.» Nɛ Efrayim abalaa kpeekpe kpeɣli nɛ paɖaŋ pɔsɩ ɖɩdɛzɩyɛ taa nɛ piwolo pɩtalɩ Bɛtɩ-Bara nɛ Yɔɔrdaŋ. 25 Pakpa ɖɔɖɔ Madiyaŋ mba awumbiya 2, Orɛɛbʋ nɛ Zeyɛɛbʋ; pakʋ Orɛɛbʋ Orɛɛbʋ+ kaaʋ yɔɔ, nɛ pakʋ Zeyɛɛbʋ Zeyɛɛbʋ viiñi ɖɩfɛyɩyɛ. Paawɛ Madiyaŋ mba ɖɔɔnʋʋ yɔɔ,+ nɛ pɔkɔnɩ Orɛɛbʋ nɛ Zeyɛɛbʋ pa-ñʋŋ Gideyɔɔ, Yɔɔrdaŋ egeetiye taa.