Awiya takayaɣ kajalaɣ ñɩŋga
15 Nebatɩ pɩyalʋ, Wiyaʋ Yerobowam+ kewiyitu tɔɔʋ pɩnaɣ 18 ñɩŋga taa lɛ, Abiyam pɩsɩ Yuuda wiyaʋ.+ 2 Ɛtɔɔ kewiyitu Yeruzalɛm pɩnzɩ 3. Payaɣaɣ e-ɖoo se Maaka,+ Abisalɔm sayɩ. 3 Ewobi pɩ-yɔɔ nɛ ɛlakɩ kɩwɛɛkɩm mbʋ payɩ ɛ-caa kaalakaɣ pʋcɔ nɛ pɩtalɩɣnɩ-ɩ yɔ, nɛ ɛ-laŋɩyɛ taañɔɔnɩ ɛ-Ɛsɔ Yehowa kiya* ɛzɩ ɛ-cɔzɔ Daviid laŋɩyɛ yɔ. 4 Ɛlɛ Daviid yɔɔ lɛ,+ ɛ-Ɛsɔ Yehowa ha-ɩ kanɖʋ Yeruzalɛm taa,+ mbʋ pʋyɔɔ yɔ ɛlɩzɩ ɛ-pɩyalʋ se ɛkɛ wiyaʋ ɛ-wayɩ nɛ eyeba nɛ Yeruzalɛm wɛɛ. 5 Mbʋ pʋyɔɔ yɔ Daviid labɩ mbʋ pɩtʋʋzɩ Yehowa ɛsɩndaa yɔ, nɛ paɣtʋ ndʋ payɩ ɛlɛ ɖʋ-ɩ yɔ ɛtɩkɛɛnɩ tɩ-hɔɔlʋʋ e-wezuu kɩyakɩŋ kpeekpe taa, ye pɩtɩkɛ Hɛɛtɩ tʋ Uriya tɔm taa ɖeke yɔ.+ 6 Nɛ you kaawɛ Robowam nɛ Yerobowam pɛ-hɛkʋ taa e-wezuu caɣʋ alɩwaatʋ kpeekpe taa.+
7 Piyele nɛ Abiyam yɔɔ tɔm ndʋ pɩkazaa yɔ, mbʋ payɩ ɛlaba yɔ, patɩma pɩ-tɔm mbʋ pɩlakaɣ Yuuda awiya alɩwaatʋ taa yɔ pɩ-takayaɣ taa yaa we?+ You kaawɛ ɖɔɖɔ Abiyam nɛ Yerobowam pɛ-hɛkʋ taa.+ 8 Pʋwayɩ lɛ, Abiyam sɩ,* nɛ pepimi-i Daviid Tɛtʋ taa; nɛ ɛ-pɩyalʋ Aazaa+ pɩsɩ wiyaʋ e-lone taa.+
9 Izrayɛɛlɩ wiyaʋ Yerobowam pɩnaɣ 20 ñɩŋga taa lɛ, Aazaa paɣzɩ kewiyitu tɔɔʋ Yuuda. 10 Ɛtɔɔ kewiyitu Yeruzalɛm pɩnzɩ 41. E-neze hɩɖɛ lɛ Maaka,+ Abisalɔm sayɩ. 11 Aazaa labɩ mbʋ pɩtʋʋzɩ Yehowa ɛsɩndaa yɔ,+ ɛzɩ ɛ-cɔzɔ Daviid yɔ. 12 Ɛɖɔɔnɩ templo taa abalaa hayitu laɖaa ɛjaɖɛ taa+ nɛ ɛɖɩzɩ sɩʋ kpelisi nzɩ sɩwɛ kiniŋ yɔ* si-kpeekpe, nzɩ ɛ-cɔzɔnaa kaalaba yɔ.+ 13 Halɩ ɛmʋ wiyaʋ ɖoo* waɖɛ nɖɩ e-neze Maaka+ kaawɛna yɔ, mbʋ pʋyɔɔ yɔ ɛlɛ labɩ sɩʋ kpeliɣa ŋga kɛwɛ kʋzɔɔtʋ pɩdɩɩfɛyɩ yɔ se palabɩnɩ tʋmɩyɛ sizika kiɖeɖeɣa* sɛtʋ taa. Aazaa yɔkɩ ɛ-sɩʋ kpeliɣa kʋzɔɔtʋ ñɩŋga ŋga+ nɛ ɛñaɣzɩ-kɛ miŋ Kidrɔɔnɩ Fɛɛʋ+ taa. 14 Ɛlɛ patɩyɔkɩ lona kʋkʋya.+ Paa mbʋ yɔ, Aazaa laŋɩyɛ kaañɔnɩ Yehowa kpam e-wezuu* kpeekpe taa. 15 Nɛ ɛkɔnɩ wondu ndʋ ɛ nɛ ɛ-caa paapɩsɩ-tʋ kiɖeɖetu yɔ Yehowa ɖɩɣa taa: liidiye, sika nɛ wondu ndɩ ndɩ.+
16 You kaawɛ Aazaa nɛ Izrayɛɛlɩ wiyaʋ Baasa+ pɛ-hɛkʋ taa tam. 17 Nɛ Izrayɛɛlɩ wiyaʋ Baasa kpa Yuuda wayɩ nɛ ɛpaɣzɩ maʋ* Ramaa+ tɛtʋ se pɩsa nɛ nɔɔyʋ ɛtaapɩzɩ nɛ ɛlɩɩ yaa ɛsʋʋ Yuuda wiyaʋ Aazaa cɔlɔ.*+ 18 Peeɖe Aazaa kpaɣ liidiye kpeekpe nɛ sika ŋga pɩɩkazɩ Yehowa ɖɩɣa ñɩm ɖɩzɩyɛ taa yɔ nɛ wiyaʋ ɖɩɣa ñɩm ɖɩzɩyɛ taa yɔ nɛ ɛɖʋzɩ ɛ-lɩmɖʋyaa nesi tɛɛ. Nɛ Wiyaʋ Aazaa tiyi-wɛ Heziyɔɔnɩ pɩyalʋ Tabirimɔɔnɩ pɩyalʋ Siirii wiyaʋ+ Bɛɛnɩ-Hadaadɩ, weyi ɛwɛ Damaasɩ yɔ ɛ-cɔlɔ, nɛ ɛyɔɔdɩ se: 19 «Ɛgbɛyɛ wɛ ma nɛ ŋ ɖɛ-hɛkʋ taa, nɛ man-caa nɛ ña-caa pɛ-hɛkʋ taa. Mentiyiɣni-ŋ liidiye nɛ sika se malabɩnɩ-ŋ kʋjɔʋ. Kɔɔ nɛ ŋcɛ ɛgbɛyɛ nɖɩ ɖɩwɛ ña nɛ Izrayɛɛlɩ wiyaʋ Baasa mɩ-hɛkʋ taa yɔ, nɛ pɩsa nɛ ɛɖɛɛ nɛ eyebi-m.» 20 Bɛɛnɩ-Hadaadɩ welisini Wiyaʋ Aazaa nɛ etiyini ɛ-sɔɔjanaa ñʋndɩnaa Izrayɛɛlɩ tɛtʋ ndɩ ndɩ taa, nɛ pɔyɔkɩ Iyɔɔnɩ,+ Daanɩ,+ Abɛl-Bɛtɩ-Maaka, Kinerɛtɩ kpeekpe nɛ Naftalii ɛjaɖɛ kpeekpe. 21 Baasa nɩ-tʋ lɛ, ɛcaŋ eyele Ramaa maʋ* nɛ ɛpɩsɩ ɛcaɣ Tiriza.+ 22 Nɛ Wiyaʋ Aazaa yaa Yuuda kpeekpe—pɩtɩkazɩ nɔɔyʋ—nɛ potuli pɛɛ nɛ kpoŋgbolonaa mba Baasa maɣaɣnɩ Ramaa yɔ, nɛ Wiyaʋ Aazaa kpaɣ-wɛ nɛ ɛmanɩ* Geba,+ Bɛnjamɛɛ taa, nɛ Mizpaa.+
23 Piyele nɛ Aazaa yɔɔ tɔm ndʋ pɩkazaa yɔ, e-ɖoŋ kpeekpe nɛ mbʋ payɩ ɛlaba yɔ nɛ tɛtʋ ndɩ ndɩ ndʋ ɛmawa* yɔ, patɩma pɩ-tɔm mbʋ pɩlakaɣ Yuuda awiya alɩwaatʋ taa yɔ pɩ-takayaɣ taa yaa we? Ɛlɛ ɛkɔm nɛ ɛkpadɩyɩ lɛ, nɩŋgbanzɩ kʋdɔŋ nakʋyʋ cɛyɩ-ɩ.+ 24 Pʋwayɩ lɛ, Aazaa sɩ,* nɛ pepimi-i ɛ-cɔzɔnaa cɔlɔ ɛ-cɔzɔ Daviid Tɛtʋ taa; nɛ ɛ-pɩyalʋ Yozafaatɩ+ pɩsɩ wiyaʋ e-lone taa.
25 Yerobowam pɩyalʋ Naadaabʋ+ pɩsɩ wiyaʋ Izrayɛɛlɩ yɔɔ Yuuda wiyaʋ Aazaa pɩnaɣ naalɛ ñɩŋga taa, nɛ ɛtɔɔ kewiyitu pɩnzɩ naalɛ. 26 Ewobi pɩ-yɔɔ nɛ ɛlakɩ mbʋ pɩfɛyɩ ɖeu Yehowa ɛsɩndaa yɔ nɛ ɛɖɔ ɛ-caa nʋmɔʋ taa+ nɛ ɛ-kɩwɛɛkɩm mbʋ eyeba nɛ Izrayɛɛlɩ la yɔ pɩ-taa.+ 27 Isakaarɩ ɖɩɣa taa tʋ Ahiya pɩyalʋ Baasa lɩɩ Naadaabʋ wayɩ, nɛ Baasa kʋ-ɩ Filistii mba tɛ Gibetɔɔnɩ+ taa. Pɩɩkɛ alɩwaatʋ ndʋ Naadaabʋ nɛ Izrayɛɛlɩ kpeekpe pɛñɛyaɣ Gibetɔɔnɩ yɔ. 28 Nɛ Baasa kʋ-ɩ Yuuda wiyaʋ Aazaa pɩnaɣ 3 ñɩŋga taa nɛ ɛpɩsɩ wiyaʋ e-lone taa. 29 Nɛ ɛtɩɩpɩsɩ wiyaʋ lɛ, ɛkʋ Yerobowam ɖɩɣa taa ñɩma kpeekpe. Ɛtɩkazɩ Yerobowam tɛ ɛyʋ nɔɔyʋ nɛ ɛ-ɛsa;* eyeba nɛ paɖɩzɩ-wɛ ɛzɩ Yehowa kaatɩŋnʋʋ ɛ-lɩmɖʋyʋ Siiloo tʋ Ahiya yɔɔ nɛ ɛyɔɔdɩ yɔ.+ 30 Kɩwɛɛkɩm mbʋ payɩ Yerobowam laba nɛ mbʋ eyeba nɛ Izrayɛɛlɩ la nɛ ɛzɩma ɛɖʋ Izrayɛɛlɩ tɛ Ɛsɔ Yehowa ɖɩwɩzɩyɛ siŋŋ yɔ, mbʋ yebina nɛ pɩla mbʋ. 31 Piyele nɛ Naadaabʋ yɔɔ tɔm ndʋ pɩkazaa yɔ, mbʋ payɩ ɛlaba yɔ, patɩma pɩ-tɔm mbʋ pɩlakaɣ Izrayɛɛlɩ awiya alɩwaatʋ taa yɔ pɩ-takayaɣ taa yaa we? 32 Nɛ You kaawɛ Aazaa nɛ Izrayɛɛlɩ wiyaʋ Baasa pɛ-hɛkʋ taa tam.+
33 Yuuda wiyaʋ Aazaa pɩnaɣ 3 ñɩŋga taa lɛ, Ahiya pɩyalʋ Baasa pɩsɩ wiyaʋ Tiriza taa se eɖiyi Izrayɛɛlɩ kpeekpe; ɛtɔɔ kewiyitu pɩnzɩ 24.+ 34 Ɛlɛ ewobi pɩ-yɔɔ nɛ ɛlakɩ mbʋ pɩfɛyɩ ɖeu Yehowa ɛsɩndaa yɔ,+ nɛ ɛɖɔ Yerobowam nʋmɔʋ taa nɛ ɛ-kɩwɛɛkɩm mbʋ eyeba nɛ Izrayɛɛlɩ la yɔ pɩ-taa.+