Kroniiki takayaɣ naalɛ ñɩŋga
17 Nɛ ɛ-pɩyalʋ Yozafaatɩ+ pɩsɩ wiyaʋ e-lone taa, nɛ ɛkpazɩ e-kewiyitu ɖoŋ Izrayɛɛlɩ yɔɔ. 2 Ɛsɩ sɔɔjanaa Yuuda tɛtʋ ɖoŋ ñɩndʋ ndɩ ndɩ tɩŋa taa nɛ ɛsɩɩ sɔɔjanaa tindima Yuuda ɛjaɖɛ taa nɛ Efrayim tɛtʋ ndɩ ndɩ ndʋ ɛ-caa Aazaa kaamʋwa yɔ tɩ-taa.+ 3 Yehowa kaawɛ Yozafaatɩ cɔlɔ mbʋ pʋyɔɔ yɔ ɛɛɖɔm nʋmɔŋ weyi ɩ-taa ɛ-cɔzɔ Daviid kaaɖɔm caanaʋ taa yɔ ɩ-taa+ nɛ ɛtɩñɩnɩ Baalɩwaa. 4 Mbʋ pʋyɔɔ yɔ ɛñɩnɩ ɛ-caa tɛ Ɛsɔ+ nɛ ɛɖɔ ɛ-paɣtʋ yɔɔ nɛ ɛtɩla Izrayɛɛlɩ lakasɩ.+ 5 Yehowa yele nɛ kewiyaɣ ka camɩyɛ e-nesi taa;+ nɛ Yuuda kpeekpe wolo pɩ-yɔɔ nɛ kɩlakɩ Yozafaatɩ kʋjɔŋ, nɛ ɛwɛɛnɩ ñɩm sakɩyɛ nɛ samtʋ siŋŋ.+ 6 Ɛkɔɔ nɛ ɛwɛɛ abalɩtʋ Yehowa nʋmɔŋ tɩŋʋʋ taa,* nɛ halɩ ɛɖɩzɩ lona kʋkʋya+ nɛ sizikasɩ kiɖeɖesi*+ Yuuda taa.
7 E-kewiyitu tɔɔʋ pɩnaɣ 3 ñɩŋga taa, etiyaa nɛ payaa ɛ-awumbiya, Bɛɛnɩ-Ayiili, Abɩdɩyasɩ, Zakarii, Netanɛɛlɩ, nɛ Mikayiya, se pawɩlɩ tɔm Yuuda tɛtʋ ndɩ ndɩ taa. 8 Leevi mba kaawɛ pɔ-cɔlɔ; mba yɔ: Semayaa, Netaniya, Zebaadiya, Asayɛlɩ, Semiramɔɔtɩ, Yehonataanɩ, Adoniya, Toobiya, nɛ Tob-Adoniya, pɩkpɛndɩnɩ cɔjɔnaa Eliisama nɛ Yehoram.+ 9 Papaɣzɩ tɔm wɩlʋʋ Yuuda taa, paakpɛndɩnɩ Yehowa Paɣtʋ takayaɣ,+ nɛ pɔcɔɔ Yuuda tɛtʋ ndɩ ndɩ kpeekpe taa nɛ pawɩlɩɣ tɔm ɛyaa samaɣ taa.
10 Nɛ Yehowa yele nɛ sɔɔndʋ sɔsɔtʋ kpa ajɛɛ wena acɔ Yuuda nɛ ata yɔ a-kewiyisi tɩŋa, nɛ atiyooni Yozafaatɩ. 11 Nɛ Filistii mba kɔnɩ Yozafaatɩ kʋjɔŋ nɛ liidiye nɛ pɩkɛ lambuu. Arabii mba kpaɣ pa-kpɩna taa ɛyaŋ 7 700 nɛ tuliŋ 7 700 nɛ pɔkɔnɩ-ɩ.
12 Yozafaatɩ wɛɛ nɛ ɛkpaɣ ɖoŋ nɛ pɩkɩlɩɣ,+ nɛ ewolo pɩ-yɔɔ nɛ ɛmaɣ lona ɖoŋ ñɩna+ nɛ tɛtʋ ndɩ ndɩ ndʋ tɩ-taa pasɩɣ wondu yɔ+ Yuuda taa. 13 Ɛlabɩ tʋma sɔsɔna Yuuda tɛtʋ ndɩ ndɩ taa, nɛ ɛɛwɛnɩ sɔɔjanaa, sɔdɩŋ ɖoŋ tɩnaa Yeruzalɛm taa. 14 Paakpeɣli-wɛ tindima tindima ɛzɩ pɛwɛʋ pa-caanaa ɖɩsɩ taa yɔ: Yuuda taa lɛ, kudokiŋ ñʋndɩnaa kaawɛɛ, Adɩnaa lɛ ñʋʋdʋ, nɛ sɔdɩŋ ɖoŋ tɩnaa 300 000 kaawɛ ɛ-cɔlɔ.+ 15 Nɛ ɛ-tɛɛ lɛ ñʋʋdʋ Yehohanaanɩ, nɛ ɛyaa 280 000 kaawɛ ɛlɛ cɔlɔ. 16 Nɛ Zikiri pɩyalʋ Amasiya ɖɔɖɔ kaawɛ ɛ-tɛɛ; ɛnʋ kaahanɩ ɛ-tɩ faaa se ɛla Yehowa tʋmɩyɛ, nɛ sɔdɩŋ ɖoŋ tɩnaa 200 000 kaawɛ ɛ-cɔlɔ. 17 Nɛ Bɛnjamɛɛ+ taa lɛ, Eliyada, ɛɛkɛ sɔdʋʋ ɖoŋ tʋ, nɛ ɛyaa 200 000 kaawɛ ɛ-cɔlɔ, paawɛnɩ tɔŋ nɛ kpayɩŋ.+ 18 Nɛ Yehozabaadɩ kaawɛ ɛ-tɛɛ, nɛ ɛyaa 180 000 kaawɛ ɛlɛ cɔlɔ, paawɛnɩ you wondu se pala you. 19 Mba ɖʋwaɣnɩ wiyaʋ lɩm nɛ pɩtasɩnɩ mba wiyaʋ kaasɩ tɛtʋ ɖoŋ ñɩndʋ ndɩ ndɩ taa Yuuda kpeekpe taa yɔ.+