Kroniiki takayaɣ kajalaɣ ñɩŋga
15 Nɛ Daviid wolo pɩ-yɔɔ nɛ ɛmaɣ ɛ-tɩ ɖɩsɩ Daviid Tɛtʋ taa, nɛ ɛñɔɔzɩ lone Ɛsɔ toovenim tʋ Aɖakaɣ nɛ esiɣ-kɛ kizinziku.+ 2 Ðɩnɛ ɛlɛ Daviid yɔɔdaa se: «Pɩtɩpɔzɩ se nɔɔyʋ ɛkpaɣ Ɛsɔ toovenim tʋ Aɖakaɣ nɛ pɩtasɩnɩ Leevi mba, mbʋ pʋyɔɔ yɔ mba Yehowa lɩzaa se pakpakɩɣ Yehowa Aɖakaɣ nɛ paɖʋʋ-ɩ lɩm tam.»+ 3 Nɛ Daviid kpeɣli Izrayɛɛlɩ samaɣ kpeekpe Yeruzalɛm se pakpaɣ Yehowa Aɖakaɣ nɛ pakpanɩ lone nɖɩ ɛɛñɔɔzaa se pasɩɩ-kɛ yɔ ɖɩ-taa.+
4 Daviid kpeɣli Aarɔɔnɩ lʋlʋʋ taa mba+ nɛ Leevi mba:+ 5 Kehaatɩ mba taa lɛ, ñʋʋdʋ Uriyɛɛlɩ nɛ e-koobiya 120; 6 Merarii mba taa lɛ, ñʋʋdʋ Asaya+ nɛ e-koobiya 220; 7 Gɛrɩsɔɔm mba taa lɛ, ñʋʋdʋ Yowɛɛlɩ+ nɛ e-koobiya 130; 8 Elizafaanɩ+ lʋlʋʋ taa mba taa lɛ, ñʋʋdʋ Semayaa nɛ e-koobiya 200; 9 Ebrɔŋ lʋlʋʋ taa mba taa lɛ, ñʋʋdʋ Eliyɛɛlɩ nɛ e-koobiya 80; 10 Uziyɛɛlɩ+ lʋlʋʋ taa mba taa lɛ, ñʋʋdʋ Aminadaabɩ nɛ e-koobiya 112. 11 Pɩtasɩ lɛ, Daviid ya cɔjɔnaa Sadɔɔkɩ+ nɛ Abiyaataarɩ+ nɛ Leevi mba Uriyɛɛlɩ, Asaya, Yowɛɛlɩ, Semayaa, Eliyɛɛlɩ nɛ Aminadaabɩ, 12 nɛ eheyi-wɛ se: «Ɩkɛ Leevi mba caanaa ɖɩsɩ ñʋndɩnaa. Ɩpɩsɩ mɩ-tɩ kiɖeɖema, mɩ nɛ mi-koobiya, nɛ ɩkpaɣ Izrayɛɛlɩ tɛ Ɛsɔ Yehowa Aɖakaɣ nɛ ɩkpanɩ lone nɖɩ mɔñɔɔzaa se pasɩɩ-kɛ yɔ ɖɩ-taa. 13 Pɩtɩkɛ mɩkpaɣnɩ-kɛ kajalaɣ taa,+ mbʋ yebina nɛ ɖɛ-Ɛsɔ Yehowa kɔ-ɖʋ nɛ pana,+ mbʋ pʋyɔɔ yɔ ɖɩtaañɩnɩ nɛ ɖɩna nʋmɔʋ kɩbaŋʋ ŋgʋ kɩ-yɔɔ pɩɩwɛɛ se ɖɩtɩŋna nɛ ɖɩkpaɣ-kɛ yɔ.»+ 14 Nɛ cɔjɔnaa nɛ Leevi mba pɩsɩ pa-tɩ kiɖeɖema se pakpaɣ Izrayɛɛlɩ tɛ Ɛsɔ Yehowa Aɖakaɣ nɛ pakpana.
15 Nɛ Leevi mba hɔɔlɩ Ɛsɔ toovenim tʋ Aɖakaɣ pa-hazasɩ yɔɔ nɛ ɖaŋ,+ ɛzɩ Moyizi kaaɖʋʋ paɣtʋ yɔ, ɛzɩ Yehowa pɔzʋʋ yɔ. 16 Nɛ Daviid heyi Leevi mba ñʋndɩnaa se palɩzɩ po-koobiya hendu teyaa nɛ petee hendu nɛ taa leleŋ nɛ minziiki wondu: Cɩmʋʋ wondu ndʋ tɩ-yɔɔ wɛ nimasɩ yɔ, cɩmɩŋ+ nɛ ŋgbamɛɛ.+
17 Nɛ Leevi mba lɩzɩ Yowɛɛlɩ pɩyalʋ Hemaanɩ,+ nɛ e-koobiya taa lɛ, Berekiya pɩyalʋ Azaafʋ,+ nɛ po-koobiya Merarii mba taa lɛ, Kusayiya pɩyalʋ Etaanɩ.+ 18 Po-koobiya tindimiye 2 ñɩnɖɛ+ taa ñɩma mba paawɛɛ nɛ pɩtasɩnɩ-wɛ yɔ, mba yɔ: Zakarii, Bɛɛnɩ, Yaaziyɛɛlɩ, Semiramɔɔtɩ, Yehiyɛɛlɩ, Uuni, Eliyaabɩ, Benayaa, Maaseyiya, Matitiya, Elifilewuu, nɛ nɔnɔɔ yɔɔ ɖaŋɩyaa Mikineyiya, Obɛɛdɩ-Edom nɛ Yeyiyɛɛlɩ. 19 Hendu teyaa Hemaanɩ,+ Azaafʋ+ nɛ Etaanɩ pɩwɛɛ se pama ñɩɣyʋʋ kɩsɛɛmʋʋ ŋgbamɛɛ;+ 20 nɛ Zakarii, Aziyɛɛlɩ, Semiramɔɔtɩ, Yehiyɛɛlɩ, Uuni, Eliyaabɩ, Maaseyiya nɛ Benayaa pamakaɣ cɩmʋʋ wondu ndʋ tɩ-yɔɔ wɛ nimasɩ nɛ ti-wiu mʋnɩ Alamɔɔtɩ*+ yɔ; 21 nɛ Matitiya,+ Elifilewuu, Mikineyiya, Obɛɛdɩ-Edom, Yeyiyɛɛlɩ nɛ Azaziya pamakaɣ cɩmɩŋ weyi i-wiu mʋnɩ Seminiti*+ yɔ, se peɖiyi hendu. 22 Leevi mba ñʋʋdʋ Kenaniya+ cɔŋnaɣnɩ wondu kpaɣʋ yɔɔ, mbʋ pʋyɔɔ yɔ ɛɛkɛ weyi ɛwɛ niye yɔ, 23 nɛ Berekiya nɛ Ɛlɩkaana paakɛ ɖɩɣa ŋga ka-taa Aɖakaɣ kaawɛɛ yɔ kɔ-nɔnɔɔ yɔɔ ɖaŋɩyaa. 24 Cɔjɔnaa Sebaniya, Yosafaatɩ, Netanɛɛlɩ, Amasayi, Zakarii, Benayaa nɛ Eliyeezɛɛrɩ, pahʋlaɣ aganda ɖoŋ Ɛsɔ toovenim tʋ Aɖakaɣ ɛsɩndaa,+ nɛ Obɛɛdɩ-Edom nɛ Yeyiya paakɛ ɖɔɖɔ ɖɩɣa ŋga ka-taa Aɖakaɣ kaawɛɛ yɔ kɔ-nɔnɔɔ yɔɔ ɖaŋɩyaa.
25 Nɛ Daviid nɛ Izrayɛɛlɩ ɛzʋtʋyaa nɛ kudokiŋ ñʋndɩnaa paawɛɛ nɛ pɔɖɔŋ nɛ patɩŋɩɣ-wɛ se pakpaɣ Yehowa ɛgbɛyɛ ɖʋʋ aɖakaɣ Obɛɛdɩ-Edom ɖɩɣa taa+ nɛ pakpanɩ-kɛ nɛ amɛya.+ 26 Ɛsɔ toovenim tʋ sɩnɩ Leevi ñɩma mba paahɔɔlɩ Yehowa ɛgbɛyɛ ɖʋʋ aɖakaɣ lɛ, palaa naŋ* abalɩñɩŋ 7 nɛ ɛyaŋ 7.+ 27 Daviid kaasu toko kɩtɩnʋʋ ŋgʋ kɩfɛyɩnɩ nɩŋgbɛɛnzɩ yɔ, ŋgʋ palabɩnɩ pɩsaŋ kɩbaŋ yɔ, nɛ Leevi ñɩma mba paahɔɔlɩ Aɖakaɣ yɔ pa-tɩŋa, hendu teyaa, nɛ wondu kpaɣʋ nɛ hendu teyaa ñʋʋdʋ Kenaniya paasu wondu ndʋ ɖɔɖɔ; Daviid kaasu ɖɔɖɔ efoodɩ ŋgʋ palabɩnɩ pɩsaʋ fɛlɛ fɛlɛ ñɩŋgʋ yɔ.+ 28 Izrayɛɛlɩ mba kpeekpe kaawɛɛ nɛ pakpaɣnɩ Yehowa ɛgbɛyɛ ɖʋʋ aɖakaɣ nɛ taa leleŋ kubusi,+ nɛ nɔndɔʋ hʋlʋʋ, nɛ aganda,+ nɛ ŋgbamɛɛ, nɛ pamakɩ ɖoŋ cɩmʋʋ wondu ndʋ tɩ-yɔɔ wɛ nimasɩ yɔ nɛ cɩmɩŋ.+
29 Ɛlɛ Yehowa ɛgbɛyɛ ɖʋʋ aɖakaɣ talɩ Daviid Tɛtʋ taa lɛ,+ Sɔɔlɩ pɛlɛ Miikaalɩ+ cɔnɩnɩ mondoɖebɔʋ nɛ ɛna Wiyaʋ Daviid wɛɛ ɛpaɣ nɛ ɛmaɣ yem nɛ ɛmɛyɩɣ; nɛ ɛpaɣzɩ-ɩ nim ɛ-laŋɩyɛ taa.+