Kroniiki takayaɣ naalɛ ñɩŋga

18 Yozafaatɩ kaawɛnɩ ñɩm sakɩyɛ nɛ samtʋ siŋŋ,+ ɛlɛ ɛɖʋ nesi ɖɔkʋʋ ɛgbɛyɛ nɛ Ahaabɩ.+ 2 Nɛ pɩnzɩ nasɩyɩ wayɩ lɛ, ɛɖɛɛ nɛ etii Ahaabɩ cɔlɔ Samaarii,+ nɛ Ahaabɩ laa ɛ nɛ samaɣ ŋga kaawɛ ɛ-cɔlɔ yɔ heŋ nɛ naŋ sakɩyɛ. Nɛ eseɣti-i* se pakpa nɛ poyooni Ramɔɔtɩ-Galaadɩ.+ 3 Nɛ Izrayɛɛlɩ wiyaʋ Ahaabɩ pɔzɩ Yuuda wiyaʋ Yozafaatɩ se: «Ŋkaɣ-m tɩŋʋʋ nɛ ɖiwolo Ramɔɔtɩ-Galaadɩ?» Ecosi-i se: «Ma nɛ ŋ ɖɩkɛ ɛyʋ kʋɖʋm, nɛ man-samaɣ kɛ ña-samaɣ nɛ kakaɣ-ŋ ɖʋʋ nesi you taa.»

4 Ɛlɛ Yozafaatɩ heyi Izrayɛɛlɩ wiyaʋ se: «Mentendi-ŋ, calɩnɩ pɔzʋʋ Yehowa nɛ ŋna.»+ 5 Nɛ Izrayɛɛlɩ wiyaʋ kpeɣli nayaa, pɛkpɛndɩ ɛyaa 400, nɛ ɛpɔzɩ-wɛ se: «Pɩwɛɛ se ɖiwolo nɛ ɖiyooni Ramɔɔtɩ-Galaadɩ yaa mantaawolo?» Pocosi-i se: «Wolo, nɛ Ɛsɔ toovenim tʋ kaɣ-kʋ ɖʋzʋʋ wiyaʋ nesi tɛɛ.»

6 Nɛ Yozafaatɩ yɔɔdɩ se: «Yehowa tɛ nayʋ nɔɔyʋ fɛyɩ cɩnɛ yaa we?+ Yele nɛ ɖɩpɔzɩ ɛlɛ ɖɔɖɔ nɛ ɖɩna.»+ 7 Peeɖe Izrayɛɛlɩ wiyaʋ heyi Yozafaatɩ se: «Pɩkazɩ nɔɔyʋ ɖɔɖɔ,+ weyi ɛ-yɔɔ ɖɩpɩzɩɣ ɖɩtɩŋna nɛ ɖɩtɩlɩ Yehowa lɩmaɣza yɔ; ɛlɛ manpaɖɩɣ-ɩ, mbʋ pʋyɔɔ yɔ ɛɛyɔɔdʋʋ natʋ tɔm kɩbandʋ natʋyʋ mɔ-yɔɔ kaaʋ, ɛlɛ kɩdɛkɛdɩtʋ ɖeke paa ɛzɩmtaa.+ Ɛnʋ lɛ Imila pɩyalʋ Mikayiya.» Ɛlɛ, Yozafaatɩ cosi-i se: «Pɩtɩpɔzɩ se wiyaʋ ɛyɔɔdɩ mbʋ.»

8 Nɛ Izrayɛɛlɩ wiyaʋ yaa ɛ-ɖɩɣa taa kaɖɩka nakɛyɛ nɛ eheyi-kɛ se: «Kɔnɩ-m Imila pɩyalʋ Mikayiya lɛɛ lɛɛ.»+ 9 Izrayɛɛlɩ wiyaʋ nɛ Yuuda wiyaʋ Yozafaatɩ paasu awiya wondu, nɛ paa weyi ɛcaɣ e-kewiyaɣ kpelaɣ yɔɔ; paacaɣ tɔɔnaɣ ɖɩmaɖɛ kadaɣ taa, Samaarii tɛtʋ nɔnɔɔ taa, nɛ nayaa tɩŋa wɛɛ nɛ pɔyɔɔdʋʋ natʋ tɔm pɛ-ɛsɩndaa. 10 Nɛ Kenaana pɩyalʋ Zedekiya la ɛ-tɩ ñɩɣyʋʋ hɩŋ nɛ ɛyɔɔdɩ se: «Tɔm tʋnɛ Yehowa yɔɔdʋʋ: “Hɩŋ ɛnɛ ŋkaɣ yɔkɩnʋʋ* Siirii mba, pɩkɔɔ nɛ pɩtalɩ alɩwaatʋ ndʋ ŋɖɩzɩ-wɛ yɔ.”» 11 Nayaa lalaa kpeekpe wɛɛ nɛ pɔyɔɔdʋʋ natʋ tɔm kʋyʋmtʋ ndʋ nɛ pɔtɔŋ se: «Wolo Ramɔɔtɩ-Galaadɩ nɛ ŋkaɣ wabʋ;+ Yehowa kaɣ-kʋ ɖʋzʋʋ wiyaʋ nesi tɛɛ.»

12 Nɛ weyi petiyaa se ewolo nɛ ɛyaa Mikayiya yɔ eheyi Mikayiya se: «Na! Nayaa tɩŋa yɔɔdʋʋ tɔm kɩbandʋ wiyaʋ yɔɔ, nɛ tɩkɛ kʋɖʋmtʋ. Mentendi-ŋ, yele nɛ ñɔ-tɔm wɛɛ ɛzɩ pa-ñɩndʋ yɔ,+ nɛ ŋyɔɔdɩ tɔm kɩbandʋ.»+ 13 Ɛlɛ Mikayiya heyi-i se: «Yehowa ñɩtʋʋ nɛ ɛwɛɛ wezuu yɔ, tɔm ndʋ mɛ-Ɛsɔ heyiɣ-m yɔ ndʋ mankaɣ yɔɔdʋʋ.»+ 14 Nɛ ewolo wiyaʋ cɔlɔ, nɛ wiyaʋ pɔzɩ-ɩ se: «Mikayiya, pɩwɛɛ se ɖiwolo nɛ ɖiyooni Ramɔɔtɩ-Galaadɩ, yaa mantaawolo?» Kpaagbaa mbʋ lɛ ecosi-i se: «Wolo, nɛ ŋkaɣ wabʋ; pakaɣ-wɛ ɖʋzʋʋ ñe-nesi tɛɛ.» 15 Peeɖe wiyaʋ heyi-i se: «Tam ɛzɩma pɩwɛɛ mɔnpɔzɩ-ŋ se ŋɖuu se toovenim tɔm ɖeke ŋheyiɣ-m Yehowa hɩɖɛ taa?» 16 Nɛ Mikayiya yɔɔdɩ se: «Manaɣ Izrayɛɛlɩ mba kpeekpe mɩzɩ pʋŋ yɔɔ, ɛzɩ heŋ weyi ɩfɛyɩnɩ ninɖiɣyu yɔ.+ Yehowa yɔɔdaa se: “Pɛfɛyɩnɩ ñʋʋdʋ. Paa weyi lɛ, ɛpɩsɩ ɛ-ɖɩɣa taa nɛ laŋhɛzɩyɛ.”»

17 Peeɖe Izrayɛɛlɩ wiyaʋ heyi Yozafaatɩ se: «Mantaaheyi-ŋ se: “Ɛɛkaɣ yɔɔdʋʋ natʋ tɔm kɩbandʋ natʋyʋ mɔ-yɔɔ, ɛlɛ kɩdɛkɛdɩtʋ ɖeke”?»+

18 Nɛ Mikayiya yɔɔdɩ se: «Pʋyɔɔ lɛ, nɩɩ Yehowa tɔm: Mana Yehowa caɣ e-kewiyaɣ kpelaɣ yɔɔ+ nɛ ɛsɔdaa yoyaa kpeekpe+ sɩŋ ɛ-nɩwaŋ yɔɔ nɛ ɛ-nɩmɩyɛ yɔɔ.+ 19 Nɛ Yehowa pɔzɩ se: “Akaɣ peɣzuu Izrayɛɛlɩ wiyaʋ Ahaabɩ, nɛ pɩsa nɛ ɛkpa nɛ ɛsɩ Ramɔɔtɩ-Galaadɩ?” Nɛ Ɛsɔ tiyiyu nɔɔyʋ yɔɔdʋʋ tʋnɛ lɛ, lɛlʋ ñɔyɔɔdʋʋ lɛɛtʋ. 20 Nɛ fezuu* nakʋyʋ+ lɩɩ nɛ kiwolo nɛ kɩsɩŋ Yehowa ɛsɩndaa nɛ kɩyɔɔdɩ se: “Mankaɣ-ɩ peɣzuu.” Yehowa pɔzɩ-kʋ se: “Ɛzɩma ŋkaɣ labʋ?” 21 Kicosi se: “Mankaɣ lɩʋ nɛ manpɩsɩ fezuu ŋgʋ kipeɣziɣ yɔ ɛ-nayaa tɩŋa nɔsɩ taa.” Peeɖe eheyi-kʋ se: “Ŋkaɣ-ɩ peɣzuu, nɛ halɩ ŋkaɣ wabʋ. Lɩɩ nɛ ŋla mbʋ.” 22 Nɛ lɛɛlɛɛyɔ lɛ, Yehowa ɖʋ fezuu ŋgʋ kipeɣziɣ yɔ ña-nayaa panɛ pɔ-nɔsɩ taa,+ ɛlɛ Yehowa ɖʋwa se asɛyʋʋ kaɣ-ŋ talʋʋ.»

23 Nɛ Kenaana pɩyalʋ Zedekiya+ ñɔtɩ ɛ-tɩ nɛ ɛcɛ Mikayiya+ kadaŋa+ nɛ ɛpɔzɩ-ɩ se: «Ye mbʋ, Yehowa fezuu kʋyɩ mɔ-yɔɔ nɛ kɩkɔɔ kɩyɔɔdɩnɩ-ŋ? Nʋmɔʋ ŋgʋ kɩtɩŋnaa?»+ 24 Mikayiya cosi-i se: «Ŋkaɣ naʋ nʋmɔʋ ŋgʋ kɩtɩŋnaa yɔ kɩyakʋ ŋgʋ ŋkaɣ sʋʋ ɖooo pɩ-taa kuduyuu taa se ŋmɛlɩ yɔ.» 25 Peeɖe Izrayɛɛlɩ wiyaʋ yɔɔdaa se: «Ɩkpaɣ Mikayiya nɛ ɩɖʋzɩ-ɩ tɛtʋ ñʋʋdʋ Amɔɔnɩ nɛ wiyaʋ pɩyalʋ Yowaasɩ pe-nesi tɛɛ. 26 Iheyi-wɛ se: “Tɔm tʋnɛ wiyaʋ yɔɔdʋʋ: ‘Ɩɖʋ ɛyʋ ɛnɛ salaka taa+ nɛ ɩpasɩ kpɔnɔ nɛ lɩm mbʋ pɩwɛɛ se paha-ɩ yɔ pɩ-yɔɔ nɛ pɩkɔɔ pɩsɩɩnɩ alɩwaatʋ ndʋ manpɩsɩɣ mɔnkɔmnɩ laŋhɛzɩyɛ yɔ.’”» 27 Ɛlɛ Mikayiya heyi-i se: «Ye ŋpɩsaa nɛ ŋkɔmnɩ laŋhɛzɩyɛ yɔ, pʋbʋ Yehowa tɩyɔɔdɩnɩ-m.»+ Nɛ ɛsɔzɩ se: «Ɩyʋsɩ-tʋ, mɩ ɛyaa samasɩ tɩŋa.»

28 Nɛ Izrayɛɛlɩ wiyaʋ nɛ Yuuda wiyaʋ Yozafaatɩ pakpa Ramɔɔtɩ-Galaadɩ.+ 29 Nɛ Izrayɛɛlɩ wiyaʋ heyi Yozafaatɩ se: «Mankaɣ lɛɣzʋʋ mɛ-wɛtʋ se pataatɩlɩ-m nɛ mowolo you taa; ɛlɛ ña lɛ, pɩwɛɛ se ŋsuu ña-awiya wondu.» Mbʋ Izrayɛɛlɩ wiyaʋ lɛɣzɩ ɛ-wɛtʋ se pataatɩlɩ-ɩ, nɛ pasʋʋ you taa. 30 Siirii wiyaʋ kaaɖʋ paɣtʋ ɛ-kɛɛkɛɛnaa ñʋndɩnaa se: «Itaayooni nɔɔyʋ, paa ɛtɩɩkɛ cikpelu yaa sɔsɔ yɔ, ɛlɛ iyooni Izrayɛɛlɩ wiyaʋ ɖeke.» 31 Nɛ kɛɛkɛɛnaa ñʋndɩnaa tɩɩna Yozafaatɩ lɛ, pamaɣzɩ se: «Izrayɛɛlɩ wiyaʋ lɛ.» Peeɖe papɩsɩnɩ ɛ-yɔɔ se poyooni-i; nɛ Yozafaatɩ paɣzɩ kubusi mabʋ se pasɩnɩ-ɩ,+ nɛ Yehowa sɩnɩ-ɩ, nɛ Ɛsɔ caŋ ɛkɛzɩ-wɛ nɛ hɔɔlʋʋ nɛ pɛɖɛɛ ɛ-yɔɔ. 32 Kɛɛkɛɛnaa ñʋndɩnaa nawa se pɩtɩkɛ Izrayɛɛlɩ wiyaʋ lɛ, pacaŋ peyele ɛ-wayɩ ɖʋʋ.

33 Ɛlɛ nɔɔyʋ tɔ ɛ-tɔʋ yem* nɛ pɩyaɣ Izrayɛɛlɩ wiyaʋ, ɛ-ñɩɣyʋʋ toko ɖɩdanɖɛ naɖɩyɛ taa. Nɛ wiyaʋ heyi ɛ-kɛɛkɛɛ sayʋ se: «Kɛzɩ ña-tɩ nɛ ŋlɩzɩ-m you* taa, mbʋ pʋyɔɔ yɔ paɖʋ-m heŋ siŋŋ.»+ 34 You kaasa miŋ siŋŋ evemiye nɖɩ ɖɩ-tɩŋa, nɛ pɩpɔzɩ se pɔɖɔkɩ Izrayɛɛlɩ wiyaʋ nɛ ɛsɩŋ kɛɛkɛɛ taa nɛ ɛpa ɛsa nɛ Siirii mba nɛ ɖanaɣ kɔɔ nɛ kaɖanɩ; nɛ ɛsɩ wɩsɩ ɖʋʋ alɩwaatʋ taa.+