Kroniiki takayaɣ naalɛ ñɩŋga
16 Aazaa kewiyitu tɔɔʋ pɩnaɣ 36 ñɩŋga taa, Izrayɛɛlɩ wiyaʋ Baasa+ kpa Yuuda wayɩ nɛ ɛpaɣzɩ maʋ* Ramaa+ tɛtʋ se pɩsa nɛ nɔɔyʋ ɛtaapɩzɩ nɛ ɛlɩɩ yaa ɛsʋʋ Yuuda wiyaʋ Aazaa cɔlɔ.*+ 2 Peeɖe Aazaa lɩzɩ liidiye nɛ sika Yehowa ɖɩɣa ñɩm ɖɩzɩyɛ taa+ nɛ wiyaʋ ɖɩɣa taa nɛ etiyini Siirii wiyaʋ Bɛɛnɩ-Hadaadɩ,+ weyi ɛwɛ Damaasɩ yɔ, nɛ ɛyɔɔdɩ se: 3 «Ɛgbɛyɛ wɛ ma nɛ ŋ ɖɛ-hɛkʋ taa, nɛ man-caa nɛ ña-caa pɛ-hɛkʋ taa. Mentiyiɣni-ŋ liidiye nɛ sika. Kɔɔ nɛ ŋcɛ ɛgbɛyɛ nɖɩ ɖɩwɛ ña nɛ Izrayɛɛlɩ wiyaʋ Baasa mɩ-hɛkʋ taa yɔ, nɛ pɩsa nɛ ɛɖɛɛ nɛ eyebi-m.»
4 Bɛɛnɩ-Hadaadɩ welisini Wiyaʋ Aazaa nɛ etiyini ɛ-sɔɔjanaa ñʋndɩnaa Izrayɛɛlɩ tɛtʋ ndɩ ndɩ taa, nɛ pɔyɔkɩ Iyɔɔnɩ,+ Daanɩ,+ Abɛl-Mayim nɛ Naftalii+ tɛtʋ ndɩ ndɩ wondu ɖɩzɩyɛ lona kpeekpe. 5 Baasa nɩ-tʋ lɛ, ɛcaŋ eyele Ramaa maʋ* nɛ eyele ɛ-tʋmɩyɛ. 6 Nɛ Wiyaʋ Aazaa kpaɣ Yuuda kpeekpe, nɛ potuli pɛɛ nɛ kpoŋgbolonaa mba Baasa maɣaɣnɩ+ Ramaa+ yɔ, nɛ ɛkpaɣ-wɛ nɛ ɛmanɩ* Geba+ nɛ Mizpaa.+
7 Alɩwaatʋ ndʋ lɛ, Ananii weyi ɛnɩɣ natʋ taa yɔ+ ɛkɔɔ Yuuda wiyaʋ Aazaa cɔlɔ nɛ eheyi-i se: «Ŋta Siirii wiyaʋ liu nɛ ŋtɩtaa ñɛ-Ɛsɔ Yehowa liu; pʋyɔɔ lɛ, Siirii wiyaʋ sɔɔjanaa lɩ ñe-nesi tɛɛ.+ 8 Ɛzɩ Etiyoopii mba nɛ Liibii mba, pa nɛ kɛɛkɛɛnaa sakɩyɛ nɛ kpaŋnaŋ yɔɔ caɣyaa pataakɛ sɔɔjanaa mba pɔɖɔ pɩdɩɩfɛyɩ yɔ? Ɛlɛ ŋta Yehowa liu, pʋyɔɔ ɛɖʋzɩ-wɛ ñe-nesi tɛɛ.+ 9 Mbʋ pʋyɔɔ yɔ Yehowa ɛsa wɛɛ nɛ acɔʋ tɛtʋ kpeekpe yɔɔ+ se ɛwɩlɩ e-ɖoŋ nɛ pɩwazɩ mba pɛsɛɣ-ɩ nɛ pa-laŋɩyɛ pilim yɔ nɛ ɛsɩnɩ-wɛ.*+ Ŋlabɩ kɩmɛlɛndʋ lakasɩ tɔm tʋnɛ tɩ-taa; kpaɣnɩ lɛɛlɛɛyɔ nɛ pɩɖɛɛ lɛ, yoŋ kaɣ ñɔ-yɔɔ lɩʋ.»+
10 Ɛlɛ Aazaa hɔyɛ taa wɩɩnɩ weyi ɛnɩɣ natʋ taa yɔ nɛ ɛɖʋ-ɩ salaka,* mbʋ pʋyɔɔ yɔ ɛɛkɔ-ɩ nɛ pana siŋŋ tɔm ndʋ tɩ-yɔɔ. Nɛ Aazaa paɣzɩ ɛyaa lalaa wɩlʋʋ ñaŋ samaɣ taa alɩwaatʋ kʋɖʋmtʋ ndʋ tɩ-taa. 11 Nɛ Aazaa yɔɔ tɔm lɛ, kpaɣnɩ kiɖe tɛɛ nɛ piwolo tɩnaɣ yɔɔ, pama-tʋ Yuuda nɛ Izrayɛɛlɩ Awiya Takayaɣ taa.+
12 Aazaa kewiyitu tɔɔʋ pɩnaɣ 39 ñɩŋga taa, kʋdɔŋ nakʋyʋ kpa ɛ-nɩŋgbanzɩ nɛ pɩwɩɩ-ɩ siŋŋ; nɛ halɩ ɛ-kʋdɔŋ ŋgʋ kɩ-taa, ɛtɩpɩsɩnɩ Yehowa yɔɔ, ɛlɛ kɔyɛ laɖaa yɔɔ ɛpɩsɩnaa. 13 Pʋwayɩ lɛ, Aazaa sɩ;*+ ɛsɩbɩ e-kewiyitu tɔɔʋ pɩnaɣ 41 ñɩŋga taa. 14 Nɛ pepimi-i pɩlaʋ sɔsɔʋ ŋgʋ eehuyi ɛ-tɩ Daviid Tɛtʋ taa+ yɔ kɩ-taa, nɛ pahɩzɩ-ɩ sɩɖʋ taya wena a-yɔɔ paapɩyɩ balɩsam num sakɩyɛ nɛ ŋgee sɔzɩŋ num mbʋ pakpaɣ wondu ndɩ ndɩ nɛ pesidi nɛ palabɩna yɔ.+ Pɩtasɩ lɛ, pɔsɔbɩ miŋ sɔsɔŋ pɩdɩɩfɛyɩ e-pimtu wiye se paɖʋnɩ-ɩ hɩɖɛ.*