Kroniiki takayaɣ naalɛ ñɩŋga

35 Yoziyaasɩ labɩ Yehowa Paska+ Yeruzalɛm, nɛ pakʋ Paska kɩlaʋ kpɩna+ fenaɣ kajalaɣ ñɩŋga tɛ kɩyakʋ 14 ñɩŋgʋ wiye.+ 2 Ɛsɩ cɔjɔnaa pa-tʋma taa nɛ ɛkpazɩ-wɛ ɖoŋ se pala Yehowa ɖɩɣa taa tʋma wena paɖʋ-wɛ yɔ.+ 3 Nɛ eheyi Leevi mba, mba pɛkɛ Izrayɛɛlɩ tɩŋa wɩlɩyaa yɔ,+ mba paakɛ kiɖeɖema Yehowa yɔ se: «Ɩkpaɣ Aɖakaɣ kiɖeɖeɣa nɛ ɛsɩɩ-kɛ ɖɩɣa ŋga Izrayɛɛlɩ wiyaʋ Daviid pɩyalʋ Salomɔɔ kaamawa yɔ ka-taa;+ pɩtɩpɔzɩ se ɩtasɩ-kɛ hɔɔlʋʋ mɩ-hazasɩ yɔɔ.+ Lɛɛlɛɛyɔ lɛ, ɩɖʋ lɩm mɩ-Ɛsɔ Yehowa nɛ ɛ-samaɣ Izrayɛɛlɩ. 4 Nɛ ɩñɔɔzɩ mɩ-tɩ mɩ-caanaa ɖɩsɩ nɔsɩ taa, ɛzɩ ɩwɛʋ mi-tindima taa yɔ, nɛ ɩɖɔ tɔm ndʋ Izrayɛɛlɩ wiyaʋ Daviid nɛ ɛ-pɩyalʋ Salomɔɔ pamawa yɔ tɩ-yɔɔ.+ 5 Ɩsɩŋ lone kiɖeɖeye taa mi-tindima taa ɛzɩ ɩwɛʋ mɩ-caanaa ɖɩsɩ taa, mi-koobiya mba pɛkɛ samaɣ taa ñɩma mba pɩkazaa yɔ* pa-taa yɔ, paa tindimiye nɖɩ lɛ ɖɩwɛɛnɩ Leevi mba caanaa ɖɩɣa taa tindimiye naɖɩyɛ. 6 Ɩkʋ Paska kɩlaʋ kpɩna+ nɛ ɩpɩsɩ mɩ-tɩ kiɖeɖema nɛ ɩñɔɔzɩ mbʋ pɩpɔzʋʋ yɔ mi-koobiya nɛ pɩsa nɛ ɩɖɔ tɔm ndʋ Yehowa tɩŋnɩ Moyizi yɔɔ nɛ ɛyɔɔdɩ yɔ tɩ-yɔɔ.»

7 Yoziyaasɩ ha samaɣ kpɩna, heɣsi abalɩñɩnzɩ nɛ tuliŋ,* se palaanɩ Paska kɩlaʋ mba payɩ paawɛɛ yɔ pɔ-yɔɔ; kpɩna ana aakpɛndɩ 30 000, pɩtasɩnɩ naŋ 3 000. Wiyaʋ ñɩm maɣmaɣ taa paakpaɣ pɩtɩŋa payɩ mbʋ yɔ.+ 8 Ɛ-awumbiya labɩ ɖɔɖɔ sɔɔlɩm haɖɛ samaɣ, cɔjɔnaa nɛ Leevi mba. Hilikiya,+ Zakarii nɛ Yehiyɛɛlɩ, Ɛsɔ toovenim tʋ ɖɩɣa ɖiyiyaa cɛlɩ cɔjɔnaa Paska kɩlaʋ kpɩna 2 600 nɛ naŋ 300. 9 Konaniya nɛ e-koobiya Semayaa nɛ Netanɛɛlɩ, pa nɛ Hasabiya, Yeyiyɛɛlɩ nɛ Yozabaadɩ, mba pɛkɛ Leevi mba ñʋndɩnaa yɔ, paha Leevi mba Paska kɩlaʋ kpɩna 5 000 nɛ naŋ 500.

10 Pɛtɛm pɩtɩŋa ñɔɔzʋʋ lɛ, cɔjɔnaa sɩŋ po-lona taa nɛ Leevi mba pe-tindima taa,+ ɛzɩ wiyaʋ kaaɖʋʋ paɣtʋ yɔ. 11 Pakʋ Paska kɩlaʋ kpɩna,+ nɛ cɔjɔnaa mɩzɩ calɩm mbʋ pamʋ Leevi mba cɔlɔ yɔ,+ alɩwaatʋ ndʋ Leevi mba ñaawɛɛ nɛ pelitiɣ kpɩna tɔna yɔ.+ 12 Pʋwayɩ lɛ, pɔñɔɔzɩ kɩlaŋ kɩñaɣzɩŋ se pɩsa nɛ patayɩ-ɩ samaɣ taa ñɩma mba pɩkazaa yɔ, mba pekpeɣli-wɛ pa-caanaa ɖɩsɩ tindima taa yɔ, se papɩzɩ nɛ pakpaɣ-ɩ nɛ palaa Yehowa kɩlaʋ ɛzɩ pamaʋ Moyizi takayaɣ taa yɔ; nɛ pala mbʋ ɖɔɖɔ naŋ. 13 Patɩzɩ* Paska kɩlaʋ kpɩna miŋ yɔɔ ɛzɩ sɔnzɩ pɔzʋʋ yɔ;+ nɛ patɩzɩ kɩlaŋ kiɖeɖeŋ ɖeɣbee taa, ñɩɣtʋ ɖeɣsi taa, nɛ kasɩɖɔɔlɩwaa taa; pʋwayɩ lɛ, powoni-i lɛɛ lɛɛ samaɣ taa ñɩma mba payɩ pɩkazaa yɔ. 14 Pʋbʋ wayɩ lɛ, patɩzɩ pa-maɣmaɣ pe-ɖeɖe nɛ cɔjɔnaa ɖeɖe, mbʋ pʋyɔɔ yɔ cɔjɔnaa, pʋ-tɔbʋʋ se Aarɔɔnɩ lʋlʋʋ taa mba, kaawɛɛ nɛ palaɣ kɩlaŋ kɩñaɣzɩŋ nɛ num nɛ pɩkɔɔ pɩtalɩ alɩwaatʋ ndʋ ɖoo paɣzɩ yuu yɔ. Mbʋ Leevi mba tɩzɩ pa-maɣmaɣ pe-ɖeɖe nɛ cɔjɔnaa ɖeɖe, pʋ-tɔbʋʋ se Aarɔɔnɩ lʋlʋʋ taa mba ɖeɖe.

15 Nɛ hendu teyaa, pʋ-tɔbʋʋ se Azaafʋ+ pɩyalaa kaawɛ po-lona taa ɛzɩ Daviid,+ Azaafʋ,+ Hemaanɩ, nɛ Yedutuunɩ,+ wiyaʋ tɛ ɛyʋ weyi ɛnaɣ natʋ yɔ paaɖʋʋ paɣtʋ yɔ; nɛ nɔnɔsɩ yɔɔ ɖaŋɩyaa kaawɛ nɔnɔsɩ ndɩ ndɩ yɔɔ.+ Pɩtaacɛyɩ se peyele pa-tʋmɩyɛ, mbʋ pʋyɔɔ yɔ po-koobiya Leevi mba tɩzaɣ-wɛ Paska tɔɔnaɣ. 16 Mbʋ pɔñɔɔzɩ Yehowa tʋma tɩŋa kɩyakʋ ŋgʋ ki-wiye se pɔtɔɔ Paska+ nɛ palaa kɩlaŋ kɩñaɣzɩŋ Yehowa altaaru yɔɔ ɛzɩ Wiyaʋ Yoziyaasɩ ɖʋʋ paɣtʋ yɔ.+

17 Izrayɛɛlɩ ñɩma mba paawɛ peeɖe yɔ, pɔtɔɔ Paska alɩwaatʋ ndʋ tɩ-taa nɛ Kpɔnɔ ŋgʋ kɩ-taa patɩɖʋ lɔlɔm yɔ kɩ-kazandʋ kɩyakɩŋ lʋbɛ.+ 18 Wiɖiyi patɩtɔɔtɩ Paska nakʋyʋ mbʋ ɛzɩ kʋnɛ yɔ Izrayɛɛlɩ taa, kpaɣnɩ nayʋ Samɩyɛɛlɩ alɩwaatʋ taa; nɛ Izrayɛɛlɩ awiya lɛɛna taa nɔɔyʋ taatɔɔ Paska nakʋyʋ ɛzɩ ŋgʋ Yoziyaasɩ,+ cɔjɔnaa, Leevi mba, Yuuda nɛ Izrayɛɛlɩ ñɩma mba paawɛ peeɖe yɔ pe-kpeekpe nɛ Yeruzalɛm taa mba pɔtɔwaa yɔ. 19 Pɔtɔɔ Paska ŋgʋ Yoziyaasɩ kewiyitu tɔɔʋ pɩnaɣ 18 ñɩŋga taa.

20 Pɩtɩŋa payɩ mbʋ yɔ pʋwayɩ lɛ, alɩwaatʋ ndʋ Yoziyaasɩ kaañɔɔzɩ templo* yɔ, Ejipiti wiyaʋ Neko+ kpa se ɛla you Karkemisi, Efraatɩ cɔlɔ. Nɛ Yoziyaasɩ lɩɩ se eyooni-i.+ 21 Nɛ Neko tiyi ɛyaa ɛ-cɔlɔ nɛ ɛtɔ se: «Tɔm tʋnɛ tɩna-ŋ nɛ we, Oo Yuuda wiyaʋ? Pɩtɩkɛ ña-wayɩ mɔnkɔŋ sɔnɔ, ɛlɛ ɖɩɣa lɛɛka moyouna, nɛ Ɛsɔ yɔɔdʋʋ se pɩwɛɛ se mala lɛɛ lɛɛ. Pɩsa nɛ pɩya ña-ñʋʋ lɛ, yele Ɛsɔ weyi ɛwɛ mɔn-cɔlɔ yɔ kaɖɩnʋʋ, pɩtɩkɛ mbʋ yɔ ɛkaɣ-ŋ ɖɩzʋʋ.» 22 Paa mbʋ yɔ, Yoziyaasɩ tiyebi-i nɛ ɛpɩsɩ, ɛlɛ ɛlɛɣzɩ ɛ-wɛtʋ+ se pataatɩlɩ-ɩ se pɩsa nɛ eyooni-i nɛ etiwelisi Neko tɔm, ndʋ tɩɩlɩnɩ Ɛsɔ nɔɔ taa yɔ. Nɛ ewolo se ɛla you Megido Fɛɛʋ taa.+

23 Nɛ tɔŋ tɔyaa yaɣ Wiyaʋ Yoziyaasɩ ñɩmɩyɛ, nɛ wiyaʋ heyi ɛ-lɩmɖʋyaa se: «Ɩlɩzɩ-m cɩnɛ, mbʋ pʋyɔɔ yɔ paɖʋ-m heŋ siŋŋ.» 24 Nɛ ɛ-lɩmɖʋyaa lɩzɩ-ɩ kɛɛkɛɛ taa nɛ paɖʋ-ɩ e-you kɛɛkɛɛ 2 ñɩŋgʋ taa nɛ powoni-i Yeruzalɛm. Mbʋ pɩlaba nɛ ɛsɩ nɛ pepimi-i ɛ-cɔzɔnaa pɩlaʋ taa,+ nɛ Yuuda nɛ Yeruzalɛm kpeekpe pewii Yoziyaasɩ. 25 Nɛ Yereemii+ tee kʋñɔwiye hendu Yoziyaasɩ yɔɔ, nɛ hendu teyaa abalɩñɩma nɛ halɩñɩma+ kpeekpe pɛwɛɛ nɛ peteɣ Yoziyaasɩ yɔɔ kʋñɔwiye hendu ndɩ ndɩ halɩ nɛ sɔnɔ; nɛ pakpaɣ lɩmaɣzɩyɛ se pɩwɛɛ se peteɣ hendu ndʋ Izrayɛɛlɩ taa, nɛ pama-tʋ kʋñɔwiye hendu takayaɣ taa.

26 Piyele nɛ Yoziyaasɩ yɔɔ tɔm ndʋ pɩkazaa yɔ nɛ sɔɔlɩm siɣsiɣ ñɩmbʋ mbʋ ɛlɩzaa nɛ ɛwɩlɩ nɛ ɛña tɔm ndʋ pama Yehowa Paɣtʋ taa yɔ, 27 nɛ mbʋ ɛlaba, kpaɣnɩ kiɖe tɛɛ nɛ piwolo tɩnaɣ yɔɔ yɔ, pama pɩ-tɔm Izrayɛɛlɩ nɛ Yuuda Awiya Takayaɣ taa.+