Tɔm Hʋyaa
4 Ɛlɛ Ewuudi sɩba lɛ, Izrayɛɛlɩ mba ɖaɣnɩ labʋ mbʋ pɩfɛyɩ ɖeu yɔ Yehowa ɛsɩndaa.+ 2 Pʋyɔɔ Yehowa ɖʋzɩ-wɛ* Kanaŋ wiyaʋ Yabiini nesi taa,+ ɛtɔkaɣ kewiyitu Hazɔɔrɩ. Sisera kaakɛnɩ ɛ-sɔɔjanaa ñʋʋdʋ, nɛ ɛlɛ kaawɛ ajɛɛ tɛ Harosɛɛtɩ*+ taa. 3 Nɛ Izrayɛɛlɩ mba ma kubusi nɛ Yehowa cɔlɔ kiŋ,+ mbʋ pʋyɔɔ yɔ Yabiini kaawɛnɩ* ñɩɣtʋ you kɛɛkɛɛnaa*+ 900, nɛ ɛɛnazɩ Izrayɛɛlɩ mba siŋŋ+ pɩnzɩ 20.
4 Nayʋ halɩñɩnʋ Debora,+ Lapidɔɔtɩ halʋ hʋwaɣnɩ Izrayɛɛlɩ tɔm alɩwaatʋ ndʋ tɩ-taa. 5 Ɛcakaɣ Debora paʋ tɛɛ Ramaa+ nɛ Betɛɛlɩ+ pɛ-hɛkʋ taa, Efrayim pʋŋ egeetiye taa; nɛ Izrayɛɛlɩ mba kpaɣaɣ ɛ-cɔlɔ nɛ ɛhʋʋ-wɛ tɔm. 6 Etiyi nɛ payaa Abinowaam pɩyalʋ Baaraakɩ+ nɛ ɛlɛ lɩɩnɩ Kedɛɛsɩ-Naftalii+ nɛ ɛkɔɔ, nɛ eheyi-i se: «Paɣtʋ tʋnɛ Izrayɛɛlɩ tɛ Ɛsɔ Yehowa ɖʋ-ŋ: “Wolo nɛ ŋkpa* Taabɔɔrɩ Pʋʋ, kpɛndɩnɩ Naftalii nɛ Zebulɔɔnɩ pa-taa abalaa 10 000. 7 Mankaɣ-ŋ kɔnʋʋ Yabiini sɔɔjanaa ñʋʋdʋ Sisera Kisoŋ pɔɔ*+ nɔɔ, ɛ nɛ e-you kɛɛkɛɛnaa nɛ ɛ-sɔɔjanaa, nɛ mankaɣ-ɩ ɖʋzʋʋ ñe-nesi taa.”»+
8 Ðɩnɛ ɛlɛ, Baaraakɩ heyi-i se: «Ye ŋsɩɣ-m kɔyɔ, mankaɣ wobu; ɛlɛ ye ŋŋsɩɣ-m kɔyɔ, maakaɣ wobu.» 9 Nɛ ɛlɛ cosi-i se: «Mankaɣ-ŋ sɩʋ nɛ ɖiwolo. Ɛlɛ you ŋgʋ ŋwoki labʋ yɔ, kɩɩkaɣ-ŋ kɔnʋʋ samtʋ, mbʋ pʋyɔɔ yɔ halʋ nɔɔyʋ nesi taa Yehowa kaɣ ɖʋzʋʋ Sisera.»+ Ðɩnɛ ɛlɛ, Debora kʋyɩ, nɛ ɛ nɛ Baaraakɩ pɛɖɛɛ Kedɛɛsɩ.+ 10 Baaraakɩ yaa Zebulɔɔnɩ mba nɛ Naftalii mba+ se powolo Kedɛɛsɩ, nɛ abalaa 10 000 tɩŋ ɛ-wayɩ. Debora ɖɔɖɔ tɩŋɩ-ɩ nɛ pakpa.
11 Keni tʋ Hebɛɛrɩ kaaposi ɛ-tɩ nɛ Keni mba+ lalaa, Moyizi ɛtɩ Hobaabɩ+ lʋlʋʋ taa mba, nɛ eesiɣ e-kizinziku tɩʋ sɔsɔʋ cɔlɔ Zaananim, Kedɛɛsɩ cɔlɔ.
12 Peheyi Sisera se Abinowaam pɩyalʋ Baaraakɩ kpa Taabɔɔrɩ Pʋʋ taa.+ 13 Kpaagbaa mbʋ lɛ, Sisera kpeɣli e-you kɛɛkɛɛnaa kpeekpe (ñɩɣtʋ you kɛɛkɛɛnaa* 900) nɛ ɛ-sɔɔjanaa mba payɩ paawɛ ɛ-cɔlɔ yɔ nɛ pakʋyɩnɩ ajɛɛ tɛ Harosɛɛtɩ nɛ powolo Kisoŋ pɔɔ*+ nɔɔ. 14 Peeɖe Debora heyi Baaraakɩ se: «Kʋyɩ, mbʋ pʋyɔɔ yɔ sɔnɔ Yehowa kaɣ ɖʋzʋʋ Sisera ñe-nesi taa. Yehowa kaɣ ɖɛʋ ñɔ-nɔɔ.» Nɛ Baaraakɩ lɩɩnɩ Taabɔɔrɩ Pʋʋ yɔɔ nɛ etii, abalaa 10 000 tɩŋaɣ ɛ-wayɩ. 15 Nɛ Yehowa yele nɛ pisidi+ Sisera nɛ e-you kɛɛkɛɛnaa kpeekpe nɛ ɛ-sɔɔjanaa kpeekpe Baaraakɩ laɣɖɛ ɛsɩndaa. Pɩtɛmnaa se Sisera tibini ɛ-kɛɛkɛɛ yɔɔ nɛ ɛkpaɣ seya. 16 Nɛ Baaraakɩ ɖʋ you kɛɛkɛɛnaa nɛ sɔɔjanaa wayɩ nɛ piwolo pɩtalɩ ɖooo ajɛɛ tɛ Harosɛɛtɩ. Mbʋ pakʋ Sisera sɔɔjanaa kpeekpe nɛ laɣɖɛ; pɩtɩkazɩ pa-taa kʋɖʋm maɣmaɣ.+
17 Ɛlɛ Sisera kpaɣ seya nɛ ɛtalɩ Keni tʋ Hebɛɛrɩ+ halʋ Yayɛɛlɩ+ kizinziku cɔlɔ, mbʋ pʋyɔɔ yɔ laŋhɛzɩyɛ kaawɛ Hazɔɔrɩ wiyaʋ Yabiini+ nɛ Keni tʋ Hebɛɛrɩ ɖɩɣa pɛ-hɛkʋ taa. 18 Ðɩnɛ ɛlɛ, Yayɛɛlɩ lɩɩ nɛ ɛkatɩ Sisera nɛ eheyi-i se: «Sʋʋ, man-kɩbaɣlʋ, sʋʋ pɩ-taa cɩnɛ. Sɔɔndʋ ɛtaakpa-ŋ.» Nɛ ɛsʋʋ Yayɛɛlɩ kizinziku tɛɛ, nɛ ɛlɛ kpaɣ kuntu nɛ ehu-i. 19 Nɛ eheyi Yayɛɛlɩ se: «Mentendi-ŋ, ha-m lɩm pazɩ nɛ mɔñɔɔ, mbʋ pʋyɔɔ yɔ lɔkɔtʋ ɖɛ-m.» Nɛ Yayɛɛlɩ kuli tɔnɛ kokoɖe nɖɩ ɖɩ-taa wɛ naalɩm yɔ nɛ ɛha-ɩ nɛ ɛñɔɔ,+ pʋwayɩ lɛ, ɛɖaɣnɩ-ɩ huu kuntu. 20 Sisera heyi-i se: «Sɩŋ kizinziku nɔnɔɔ taa, nɛ ye nɔɔyʋ ɛkɔma nɛ ɛpɔzɩ-ŋ se: “Abalʋ nɔɔyʋ wɛ cɩnɛ?” lɛ, ŋcosi-i se: “Aayɩ!”»
21 Ɛlɛ Hebɛɛrɩ halʋ Yayɛɛlɩ kpaɣ kizinziku kaŋgamaɣ nakɛyɛ nɛ hama nakʋyʋ e-nesi taa. Pɩɩnɩ Sisera siŋŋ, nɛ eɖowaɣ ɖom cukaŋ ñɩmbʋ nabʋyʋ lɛ, Yayɛɛlɩ ñɔtɩnɩ-ɩ ɖaaa nɛ ɛka ɛ-nakpaaʋ* kaŋgamaɣ nɛ pɩlɩɩnɩ nakpaaʋ lɛɛkʋ nɛ ɛkamɩ-ɩ nɛ tɛtʋ, nɛ ɛlɛ sɩ.+
22 Baaraakɩ ɖʋ Sisera wayɩ nɛ ɛtalɩ peeɖe, nɛ Yayɛɛlɩ lɩɩ nɛ ɛkatɩ-ɩ nɛ eheyi-i se: «Kɔɔ nɛ mawɩlɩ-ŋ abalʋ weyi ŋwɛɛ nɛ ŋñɩnɩɣ yɔ.» Nɛ ɛtɩŋɩ-ɩ nɛ pasʋʋ nɛ ɛna Sisera tataa, ɛsɩba, paakam ɛ-nakpaaʋ kizinziku kaŋgamaɣ nɛ pɩlɩɩnɩ nakpaaʋ lɛɛkʋ.
23 Mbʋ Ɛsɔ luzi Kanaŋ wiyaʋ Yabiini Izrayɛɛlɩ mba ɛsɩndaa puwiye.+ 24 Izrayɛɛlɩ mba nesi kpaɣaɣ ɖoŋ kpaʋ yɔɔ nɛ poyouni Kanaŋ+ wiyaʋ Yabiini, nɛ pɩkɔɔ pɩsɩɩnɩ alɩwaatʋ ndʋ pakʋ Kanaŋ wiyaʋ Yabiini yɔ.+