Ebree mba
3 Pʋyɔɔ lɛ, koobiya kiɖeɖema, mɩ mba paya-mɩ se ɩkpa ɛsɔdaa yɔ,+ ɩmaɣzɩ weyi ɖɩsɩmɩ-ɩ se ɛkɛ apostoloo nɛ cɔjɔ kɩlɩm yɔ ɛ-yɔɔ, pʋ-tɔbʋʋ se Yesu.+ 2 Ɛɛwɛ siɣsiɣ Ɛsɔ weyi ɛlɩzɩ-ɩ yɔ* ɛ-ɛsɩndaa,+ ɛzɩ Moyizi ɖɔɖɔ kaawɛʋ siɣsiɣ Ɛsɔ ɖɩɣa kpeekpe taa yɔ.+ 3 Mbʋ pʋyɔɔ yɔ pakpaɣ-ɩ* se ɛmʋnɩ samtʋ+ nɛ pɩkɩlɩ Moyizi, mbʋ pʋyɔɔ yɔ weyi ɛmaɣ ɖɩɣa yɔ, paɖʋʋ-ɩ hɩɖɛ nɛ pɩkɩlɩ ɖɩɣa maɣmaɣ. 4 Toovenim taa lɛ, paa ɖɩɣa ŋga lɛ nɔɔyʋ manɩ-kɛ, ɛlɛ weyi ɛma pɩtɩŋa payɩ yɔ, ɛnʋ lɛ Ɛsɔ. 5 Nɛ Moyizi kaakɛ lɩmɖʋyʋ siɣsiɣ tʋ Ɛsɔ ɖɩɣa kpeekpe taa, se pɩkɛnɩ aseɣɖe tɔm ndʋ pakaɣaɣ yɔɔdʋʋ pʋwayɩ yɔ, 6 ɛlɛ Krɩstʋ ñaakɛ pɩyalʋ siɣsiɣ tʋ+ weyi ɛkɛ Ɛsɔ ɖɩɣa yɔɔ cɔnɩyʋ yɔ. Ðɩkɛ Ɛ-ɖɩɣa,+ ye ɖɩɖɔkɩ kpam kaalɛyɩtʋ ndʋ ɖɩyɔɔdʋʋna yɔ nɛ lidaʋ ŋgʋ kɩ-yɔɔ ɖɩkʋndʋʋ yɔ nɛ pɩkɔɔ pɩtalɩ tɩnaɣ yɔɔ yɔ.
7 Pʋyɔɔ lɛ, ɛzɩ fezuu kiɖeɖeu yɔɔdʋʋ yɔ:+ «Sɔnɔ, ye iwelisiɣ ɛ-nɔɔ yɔ, 8 ɩtaala nɛ mɩ-laŋa sʋʋ kpɩzɩŋ ɛzɩ alɩwaatʋ ndʋ pokulusi man-pana siŋŋ yɔ, ɛzɩ kɩyakʋ ŋgʋ patakɩ-m kañɩmbusuu taa yɔ,+ 9 ɖenɖe mɩ-cɔzɔnaa maɣzɩ-m se pana nɛ patakɩ-m, paa paana man-tʋma pɩnzɩ 40 yɔ.+ 10 Mbʋ yebina nɛ kpaɖʋʋ ŋgʋ, kɩlɩ-m sɔŋ nɛ mɔyɔɔdɩ se: “Pɛkɛ ɛyaa mba pa-laŋa posuuni nʋmɔʋ kɩbaŋʋ tam yɔ, nɛ patɩkpɛlɩkɩ nɛ patɩlɩ ma-nʋmɔŋ.” 11 Pʋyɔɔ monɖuu man-pana taa se: “Paakaɣ sʋʋ mɛ-hɛzɩyɛ taa.”»+
12 Koobiya, ɩkpa mɩ-tɩ nɛ mɩ-taa nɔɔyʋ etaaposini Ɛsɔ ɛsadʋ se pɩtaakɛdɩ nɛ laŋɩyɛ kɩdɛkɛdɩyɛ nɖɩ ɖɩfɛyɩnɩ tisuu yɔ ɖɩñɔ ɛ-taa wiɖiyi;+ 13 ɛlɛ ɩwɛɛ ɖama ɖoŋ kpazʋʋ yɔɔ paa evemiye nɖɩ, alɩwaatʋ ndʋ payɩ papɩzɩɣ payaa se «sɔnɔ» yɔ,+ se ɖoŋ weyi kɩwɛɛkɩm wɛna se pipeɣzi ɛyaa yɔ, etaayele nɛ mɩ-taa nɔɔyʋ laŋɩyɛ sʋʋ kpɩzɩŋ. 14 Mbʋ pʋyɔɔ yɔ, toovenim taa lɛ, ye ɖɩɖɔkɩ lidaʋ ŋgʋ ɖɩɩwɛnɩ kiɖe tɛɛ yɔ kpam nɛ pɩkɔɔ pɩtalɩ tɩnaɣ yɔɔ yɔ, ɖɩnɛ ɛlɛ ɖɩpɩsɩɣ mba pa nɛ Krɩstʋ pakaɣ kaʋ mbʋ ɛwɛna yɔ.+ 15 Ɛzɩ pɔyɔɔdʋʋ yɔ: «Sɔnɔ, ye iwelisiɣ ɛ-nɔɔ yɔ, ɩtaala nɛ mɩ-laŋa sʋʋ kpɩzɩŋ ɛzɩ alɩwaatʋ ndʋ pokulusi man-pana siŋŋ yɔ.»+
16 Mbʋ pʋyɔɔ yɔ, mba nɩwa ɛlɛ pokulusi ɛ-pana siŋŋ? Toovenim taa lɛ, ɛzɩ pɩtɩkɛ mba payɩ Moyizi ɖiyi-wɛ nɛ palɩɩ Ejipiti yɔ?+ 17 Pɩtasɩ lɛ, mba lɩ Ɛsɔ sɔŋ pɩnzɩ 40?+ Ɛzɩ pɩtɩkɛ mba paalabɩ kɩwɛɛkɩm nɛ pasɩ* kañɩmbusuu taa yɔ?+ 18 Nɛ mba eeɖuunaa se paakaɣ sʋʋ ɛ-hɛzɩyɛ taa? Ɛzɩ pɩtɩkɛ mba paalabɩ kaañamtʋ lakasɩ yɔ? 19 Ye mbʋ, ɖɩnaɣ se pataapɩzɩɣ se pasʋʋ ɖɩ-taa, mbʋ pʋyɔɔ yɔ pataawɛɛnɩ tisuu.+