Ezekɩyɛɛlɩ
28 Yehowa tɔm tasɩ-m talʋʋ se: 2 «Ɛyʋ pɩyalʋ, heyi Tiirɩ ñʋʋdʋ se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ:
‘Ña-laŋɩyɛ kpazɩɣ ɖɩ-tɩ,+ nɛ pʋyɔɔ lɛ ŋyɔɔdʋʋ se: “Mɛnkɛ ɛsɔ nɔɔyʋ.
Mancaɣ ɛsɔ nɔɔyʋ kewiyaɣ kpelaɣ yɔɔ teŋgu hɛkʋ taa.”+
Ɛlɛ paa ŋmaɣzɩɣ ña-laŋɩyɛ taa se ŋkɛ ɛsɔ nɔɔyʋ yɔ,
Ɛyʋ yem ŋkɛnaa, ŋtɩkɛ ɛsɔ nɔɔyʋ.
3 Na! Ŋkpaɖɩ Danɩyɛɛlɩ lɔŋ.+
Mɛsaɣ tɛɛ tɔm natʋyʋ fɛyɩ se ŋŋsɩŋ-tʋ.
4 Ŋtɩŋnɩ ñɔ-lɔŋsɩnɖɛ nɛ ñɛ-lɛɣtʋ yɔɔ nɛ ŋpɩsɩ ñɩm tʋ,
Nɛ ŋtiyele kpazʋʋ huuye sika nɛ liidiye ña-ñɩm ɖɩzɩyɛ taa.+
5 Ŋwɛ niye tadɩyɛ labʋ taa, nɛ pʋyɔɔ lɛ ŋhiɣ ñɩm sakɩyɛ,+
Nɛ ña-ñɩm yɔɔ lɛ, ña-laŋɩyɛ kpazɩɣ ɖɩ-tɩ.’”
6 «“Pʋyɔɔ lɛ, tɔm tʋnɛ Kɩbaɣlʋ Kɩlɩm Yehowa yɔɔdʋʋ:
‘Ŋmaɣzɩɣ ña-laŋɩyɛ taa se ŋkɛ ɛsɔ nɔɔyʋ, pʋyɔɔ lɛ,
7 Mɔnkɔŋnɩ agɔma ña-wayɩ, mɔnkɔŋnɩ ɛjaɖɛ nɖɩ ɖɩkɩlɩ kañatʋ ajɛɛ taa yɔ ña-wayɩ,+
Nɛ pakaɣ kpɛʋ pa-laɣla wondu kajʋka ñɩndʋ ndʋ payɩ ñɔ-lɔŋsɩnɖɛ kɔnɩ-ŋ yɔ tɩ-yɔɔ
Nɛ pepisi ñe-keɖeɣa sɔsɔɔ.+
9 Ɛzɩ ŋkaɣ tasʋʋ yɔɔdʋʋ weyi ɛkʋʋ-ŋ yɔ ɛ-ɛsɩndaa se: “Mɛnkɛ ɛsɔ nɔɔyʋ”?
Ɛyʋ yem ŋkaɣ kɛʋ mba pepisiɣ-ŋ yɔ pe-nesi taa, ɛlɛ pɩtɩkɛ ɛsɔ nɔɔyʋ ŋkaɣ kɛʋ.’”
10 “Kɩdɩbɛlɩŋ sɩm ŋkaɣ sɩbʋ agɔma nesi taa,
Mbʋ pʋyɔɔ yɔ ma-maɣmaɣ mɔyɔɔdɩna,” Kɩbaɣlʋ Kɩlɩm Yehowa yɔɔdʋʋna.»
11 Nɛ Yehowa tɔm tasɩ-m talʋʋ se: 12 «Ɛyʋ pɩyalʋ, tee kʋñɔwiye hendu Tiirɩ wiyaʋ yɔɔ nɛ ŋheyi-i se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ:
13 Ŋŋwɛ Edɛɛnɩ, Ɛsɔ kaɖaɣ taa.
Paacanɩ-ŋ nɛ ñɩɣlɩm pɛɛ kpeekpe
—Rubii, toopaazɩ nɛ yaasɩpɩ; krizooliitɩ, onikisi nɛ yaadɩ; saafiirɩ, turikuwaazɩ+ nɛ emeroodi;
Nɛ sika palabɩnɩ pɔŋ weyi ɩ-taa pasʋzʋʋ-yɛ yɔ.
Pɔñɔɔzɩ-yɛ kɩyakʋ ŋgʋ palɩzɩ-ŋ yɔ.
14 Maalɩzɩ-ŋ se ŋkɛ kerebim patam num weyi ɛkandɩyɩɣ yɔ.
Ŋŋwɛ Ɛsɔ pʋʋ kiɖeɖeu yɔɔ,+ nɛ ŋcɔwaɣ pɛɛ miŋ ñɩna hɛkʋ taa.
15 Kpaɣnɩ kɩyakʋ ŋgʋ palɩzɩ-ŋ yɔ, kɩwɛɛkɩtʋ natʋyʋ taawɛɛ ñɔ-ɖɔnɛ taa
Pɩkɔɔ nɛ pɩtalɩ alɩwaatʋ ndʋ pana mbʋ pɩfɛyɩ siɣsiɣ yɔ ña-taa yɔ.+
Pʋyɔɔ lɛ, mankaɣ-ŋ ɖɔɔnʋʋ Ɛsɔ pʋʋ yɔɔ ɛzɩ weyi pepisi-i yɔ, nɛ manɖɩzɩ-ŋ,+
Mankaɣ-ŋ ɖɔɔnʋʋ miŋ pɛɛ taa, Oo ña kerebim weyi ɛkandɩyɩɣ yɔ.
17 Ñe-keɖeɣa yɔɔ lɛ,+ ña-laŋɩyɛ kpazɩ ɖɩ-tɩ.
Ñe-keɖeɣa sɔsɔɔ yɔɔ lɛ,+ ŋwɛɛkɩ ñɔ-lɔŋsɩnɖɛ.
Mankaɣ-ŋ lɔʋ tataa.+
Mankaɣ labʋ nɛ ŋpɩsɩ mbʋ awiya cɔŋna yɔ.
18 Ñɛ-wɛɛ ɖɔʋ sɔsɔm nɛ ño-mulum tadɩyɛ yɔɔ lɛ, ŋpisi ño-kookasɩ kiɖeɖesi.
Mankaɣ labʋ nɛ miŋ mʋ ñɛ-hɛkʋ taa, nɛ ɩkaɣ-ŋ ñaɣʋ.+
Mankaɣ labʋ nɛ ŋpɩsɩ tɔlɩma tɛtʋ yɔɔ, mba payɩ pɔcɔŋnɩ-ŋ yɔ pɛ-ɛsɩndaa.
19 Mba payɩ paasɩmɩ-ŋ samasɩ taa yɔ, pakaɣ-ŋ cɔnʋʋ nɛ pɩɖɩɣzɩ-wɛ.+
Ñɛ-tɛm kaɣ kɔm tuda nɛ pɩkaɣ wɛʋ sɔɔndʋ,
Nɛ ŋŋkaɣ tasʋʋ wɛʋ wiɖiyi kpa.’”»+
20 Nɛ Yehowa tɔm tasɩ-m talʋʋ se: 21 «Ɛyʋ pɩyalʋ, kɛzɩ ñɛ-ɛsa nɛ Siidɔɔ yɔɔ,+ nɛ ŋyɔɔdɩ mbʋ pɩkaɣ-kʋ talʋʋ yɔ pɩ-natʋ tɔm. 22 Pɩwɛɛ se ŋyɔɔdɩ se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ:
‘Oo Siidɔɔ, na, mankʋyʋʋ ñɔ-yɔɔ; nɛ pɩkaɣ-m kɔnʋʋ samtʋ ñɛ-hɛkʋ taa;
Nɛ toovenim taa lɛ ɛyaa kaɣ tɩlʋʋ se ma lɛ Yehowa, alɩwaatʋ ndʋ mahʋʋnɩ-kʋ tɔm nɛ manpɩsɩ man-tɩ kiɖeɖeu kɩ-taa yɔ.
23 Mankaɣ tiyinuu kɩzɩkʋ kɩ-taa, nɛ calɩm kaɣ kpem kɩ-habɛɛ yɔɔ.
Mba pakʋ-wɛ yɔ, pakaɣ tɔlʋʋ kɩ-hɛkʋ taa alɩwaatʋ ndʋ laɣɖɛ kɔŋ kɩ-wayɩ nɛ hɔɔlɩŋ tɩŋa taa yɔ;
Nɛ toovenim taa lɛ pakaɣ tɩlʋʋ se ma lɛ Yehowa.+
24 «“‘Ðɩnɛ ɛlɛ sɔɔ ñɩtʋ ndʋ tɩkɔŋnɩ kaɖɛ yɔ nɛ sɔɔ wena awɩɣ yɔ, aakaɣ tasʋʋ cɔʋ Izrayɛɛlɩ ɖɩɣa nɛ ata;+ mba peniŋ-kɛ yɔ, paakaɣ-kɛ tasʋʋ cɔʋ nɛ pata; nɛ toovenim taa lɛ ɛyaa kaɣ tɩlʋʋ se ma lɛ Kɩbaɣlʋ Kɩlɩm Yehowa.’”
25 «“Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Alɩwaatʋ ndʋ malɩzɩɣ Izrayɛɛlɩ mba samasɩ nzɩ sɩ-taa paamɩzaa yɔ+ nɛ manɖaɣnɩ-wɛ kpeɣluu yɔ, mankaɣ pɩsʋʋ kiɖeɖeu pɛ-hɛkʋ taa, ajɛɛ ɛsɩndaa.+ Nɛ pakaɣ caɣʋ pɛ-tɛtʋ ndʋ maacɛlɩ ma-lɩmɖʋyʋ Yakɔɔb yɔ tɩ-yɔɔ.+ 26 Pakaɣ caɣʋ tɩ-yɔɔ pɛɛyɛ taa+ nɛ pama ɖɩsɩ nɛ pɔsɔ viiñi tɩŋ;+ pakaɣ caɣʋ pɛɛyɛ taa alɩwaatʋ ndʋ mahʋʋnɩ tɔm mba payɩ pɔcɔ-wɛ nɛ pata nɛ peniŋ-wɛ yɔ;+ nɛ toovenim taa lɛ pakaɣ tɩlʋʋ se ma lɛ pɛ-Ɛsɔ Yehowa.’”»