Ezekɩyɛɛlɩ

37 Yehowa nesi kaawɛ mɔ-yɔɔ, nɛ Yehowa kpaɣ-m nɛ e-fezuu nɛ etisi-m fɛɛʋ hɛkʋ taa,+ nɛ mɔɔ kaasu kɩ-taa. 2 Ɛlaba nɛ mɔnɖɔ a-taa nɛ mɔncɔɔ manta, nɛ mana se mɔɔ sakɩyɛ kaapɛɛtɩ fɛɛʋ taa yem pɛɛ pɛɛ, nɛ aawɩlɩ waɣwaɣ.+ 3 Ɛpɔzɩ-m se: «Ɛyʋ pɩyalʋ, mɔɔ anɛ apɩzɩɣ nɛ aɖaɣnɩ wɛʋ wezuu na?» Peeɖe moncosi-i se: «Kɩbaɣlʋ Kɩlɩm Yehowa, ñasɩmna.»+ 4 Ðɩnɛ ɛlɛ eheyi-m se: «Yɔɔdɩ natʋ tɔm mɔɔ anɛ a-yɔɔ nɛ ŋheyi-yɛ se: “Mɔɔ kɩwɩla mɩ, ɩnɩɩ Yehowa tɔm:

5 «“Tɔm tʋnɛ Kɩbaɣlʋ Kɩlɩm Yehowa heyiɣ mɔɔ anɛ: ‘Mankaɣ labʋ nɛ fezuu sʋʋ mɩ-taa nɛ ɩɖaɣnɩ wɛʋ wezuu.+ 6 Mankaɣ ɖʋʋ hola nɛ nandʋ mɩ-yɔɔ, nɛ mankaɣ huuzuu tɔnʋʋ mɩ-yɔɔ nɛ manɖʋ fezuu mɩ-taa, nɛ ɩkaɣ ɖaɣnʋʋ wɛʋ wezuu; nɛ toovenim taa lɛ ɩkaɣ tɩlʋʋ se ma lɛ Yehowa.’”»

7 Peeɖe mɔyɔɔdɩ natʋ tɔm ɛzɩ ɛɛɖʋʋ-m paɣtʋ yɔ. Mantɩɩyɔɔdɩ natʋ tɔm lɛ, kɔkɔɖɛ naɖɩyɛ la, mɔɔ tukaɣni ɖama nɛ pɩnɩɣ a-taŋ, nɛ apaɣzɩ kpɛndʋʋ, mɔɔyɛ lɛɛɖɛ nɛ lɛɛɖɛ. 8 Pʋwayɩ lɛ mana hola nɛ nandʋ kɔm a-yɔɔ, nɛ tɔnʋʋ huuzi a-yɔɔ. Ɛlɛ fezuu taatɩɩwɛtɩ a-taa.

9 Nɛ eheyi-m se: «Heyi natʋ tɔm helim. Ɛyʋ pɩyalʋ, yɔɔdɩ natʋ tɔm nɛ ŋheyi helim se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Oo helim,* lɩɩnɩ hɔɔlɩŋ* 4 taa nɛ ŋkɔɔ nɛ ŋfɛtɩ ɛyaa panɛ, mba paakʋ-wɛ yɔ pɔ-yɔɔ, nɛ paɖaɣnɩ wɛʋ wezuu.’”»

10 Nɛ mɔyɔɔdɩ natʋ tɔm ɛzɩ ɛɛɖʋʋ-m paɣtʋ yɔ, nɛ fezuu sʋʋ pa-taa, nɛ paɖaɣnɩ wɛʋ wezuu nɛ pakʋyɩ pasɩŋ pa-nɩŋgbanzɩ yɔɔ;+ yoyaa samaɣ sɔsɔɔ kpem paakɛnaa.

11 Nɛ eheyi-m se: «Ɛyʋ pɩyalʋ, mɔɔ anɛ, akɛ Izrayɛɛlɩ ɖɩɣa kpeekpe.+ Pɔtɔŋ se: “Ðɔ-mɔɔ wɩlaa, nɛ ɖe-lidaʋ ɖʋ lɩm.+ Ðɔ-tɔm tɛm caɣ caɣ.” 12 Pʋyɔɔ lɛ, yɔɔdɩ natʋ tɔm nɛ ŋheyi-wɛ se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Man-samaɣ, mankaɣ kuluu mɩ-pɩlaŋ+ nɛ malɩzɩ-mɩ ɩ-taa nɛ mowoni-mɩ Izrayɛɛlɩ ɛjaɖɛ taa.+ 13 Nɛ toovenim taa lɛ ɩkaɣ tɩlʋʋ se ma lɛ Yehowa alɩwaatʋ ndʋ monkuluu mɩ-pɩlaŋ nɛ malɩzɩ-mɩ ɩ-taa yɔ, Oo man-samaɣ.’”+ 14 “Mankaɣ ɖʋʋ men-fezuu mɩ-taa nɛ ɩkaɣ ɖaɣnʋʋ wɛʋ wezuu,+ nɛ mankaɣ-mɩ caɣzʋʋ mɩ-ɛjaɖɛ taa; nɛ toovenim taa lɛ ɩkaɣ tɩlʋʋ se ma Yehowa, ma-maɣmaɣ mɔyɔɔdɩna, nɛ malaba ɛzɩ mɔyɔɔdʋʋ yɔ,” Yehowa yɔɔdʋʋna.»

15 Yehowa tɔm tasɩ-m talʋʋ se: 16 «Nɛ ña yɔ, ɛyʋ pɩyalʋ, kpaɣ ɖaʋ nakʋyʋ nɛ ŋma kɩ-yɔɔ se: “Yuuda nɛ Izrayɛɛlɩ ñɩma mba ɛ nɛ wɛ pɛwɛɛ yɔ* pa-ñɩŋgʋ.”+ Nɛ ŋkpaɣ ɖaʋ lɛɛkʋ nɛ ŋma kɩ-yɔɔ se: “Yosɛɛfʋ ñɩŋgʋ, Efrayim ɖaʋ, ɛ nɛ Izrayɛɛlɩ ɖɩɣa kpeekpe ŋga ɛ nɛ kɛ pɛwɛɛ yɔ* pa-ñɩŋgʋ.”+ 17 Pʋwayɩ lɛ, ŋñɔtɩ-ɩ nɛ ɖama nɛ ɩpɩsɩ ɖaʋ kʋɖʋmʋʋ ñe-nesi taa.+ 18 Alɩwaatʋ ndʋ ña-samaɣ* pɔzʋʋ-ŋ se: “Ŋŋlɩzɩɣ-ɖʋ pɩtɩŋa payɩ mbʋ yɔ pʋ-tɔbʋʋ na?” yɔ lɛ, 19 heyi-wɛ se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Mankaɣ kpaɣʋ Yosɛɛfʋ ɖaʋ, ŋgʋ kɩwɛ Efrayim nesi taa yɔ, nɛ Izrayɛɛlɩ cejewe wena ɛ nɛ yɛ pɛwɛɛ yɔ, nɛ mɛnkpɛndɩ-wɛ Yuuda ɖaʋ yɔɔ; nɛ mankaɣ labʋ nɛ ɩpɩsɩ ɖaʋ kʋɖʋmʋʋ,+ nɛ pakaɣ pɩsʋʋ kʋɖʋm me-nesi taa.’” 20 Ðaŋ weyi ɩ-yɔɔ ŋma tɔm yɔ, pɩwɛɛ se ɩwɛɛ ñe-nesi taa nɛ pana-ɩ.

21 «Pʋwayɩ lɛ, ŋheyi-wɛ se: “Tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Mankaɣ kpaɣʋ Izrayɛɛlɩ mba nɛ ajɛɛ wena a-taa powoba yɔ, nɛ mankaɣ-wɛ kpeɣluu nɛ hɔɔlɩŋ tɩŋa taa nɛ mowoni-wɛ pɛ-ɛjaɖɛ taa.+ 22 Mankaɣ labʋ nɛ papɩsɩ ɛjaɖɛ kʋɖʋmɖɩyɛ tɛtʋ taa,+ Izrayɛɛlɩ pʋŋ yɔɔ, nɛ wiyaʋ kʋɖʋm kaɣnɩ tɔɔʋ kewiyitu pa-tɩŋa pɔ-yɔɔ,+ nɛ paakaɣ tasʋʋ kɛʋ ajɛɛ naalɛ; paakaɣ tasʋʋ tayʋʋ ɖɔɖɔ nɛ papɩsɩ kewiyisi naalɛ.+ 23 Paakaɣ tasʋʋ pisuu pa-tɩ nɛ pa-sɩʋ kpelisi nzɩ sɩwɛ kiniŋ yɔ* nɛ pa-lakasɩ kɩdɛkɛdɩsɩ nɛ pa-kɩwɛɛkɩm kpeekpe.+ Mankaɣ-wɛ holuu pa-lakasɩ nzɩ sɩfɛyɩ siɣsiɣ yɔ sɩ-tɩŋa sɩ-taa, nzɩ sɩ-yɔɔ patɩŋnaa nɛ pala kɩwɛɛkɩm yɔ, nɛ mankaɣ-wɛ ñalʋʋ nɛ pɛwɛɛ kele kele. Pakaɣ kɛʋ man-samaɣ, nɛ ma-maɣmaɣ mankaɣ kɛʋ pɛ-Ɛsɔ.+

24 «“‘Ma-lɩmɖʋyʋ Daviid kaɣnɩ kɛʋ pe-wiyaʋ,+ nɛ pa-tɩŋa pakaɣ wɛnʋʋ ninɖiɣyu kʋɖʋm.+ Pakaɣ ɖɔm mɔn-tɔm hʋʋ paɣtʋ yɔɔ nɛ paña man-paɣtʋ camɩyɛ.+ 25 Pakaɣ caɣʋ ɛjaɖɛ nɖɩ maacɛlɩ ma-lɩmɖʋyʋ Yakɔɔb yɔ ɖɩ-taa, ɖenɖe mɩ-cɔzɔnaa kaacaɣaa yɔ,+ nɛ pakaɣ caɣʋ ɖɩ-taa tam,+ pa nɛ pe-piya* nɛ pa-sayɩnaa;+ nɛ ma-lɩmɖʋyʋ Daviid kaɣnɩ kɛʋ pa-ñʋʋdʋ* tam.+

26 «“‘Nɛ mankaɣ-wɛ ɖʋnʋʋ laŋhɛzɩyɛ ɛgbɛyɛ;+ ɖɩkaɣ kɛʋ tamtam ɛgbɛyɛ ma nɛ wɛ ɖɛ-hɛkʋ taa. Mankaɣ-wɛ kam nɛ pɛcɛyɩ camɩyɛ nɛ mala nɛ pɔɖɔɔ+ nɛ mansɩɩ mon-kooka kiɖeɖeɣa pɛ-hɛkʋ taa tam. 27 Men-kizinziku* kaɣ wɛʋ pɔ-cɔlɔ,* nɛ mankaɣ kɛʋ pɛ-Ɛsɔ, nɛ pakaɣ kɛʋ man-samaɣ.+ 28 Nɛ toovenim taa lɛ ajɛɛ kaɣ tɩlʋʋ se ma Yehowa, mɛwɛɛ nɛ manpɩsɩɣ Izrayɛɛlɩ kele kele alɩwaatʋ ndʋ mon-kooka kiɖeɖeɣa wɛɣ pɛ-hɛkʋ taa tam yɔ.’”»+