Filiipi mba
3 Kɛdɛzaɣ ɖeɖe lɛ, koobiya, ɩwɛɛ mɛyʋʋ yɔɔ Kɩbaɣlʋ taa.+ Pɩɩcɛyɩɣ-m se mama-mɩ tɔm kʋɖʋmtʋ ndʋ, nɛ mɩ-yɔɔ kandɩyʋʋ yɔɔ malakɩ mbʋ.
2 Ɩkpa mɩ-tɩ nɛ hasɩ; ɩkpa mɩ-tɩ nɛ mba palakɩ lalaa kɩdɛkɛdɩm yɔ; ɩkpa mɩ-tɩ nɛ mba paɖʋʋ tomnaɣ heŋ yɔ.+ 3 Mbʋ pʋyɔɔ yɔ ɖɛkɛnɩ mba pɛpɛlɩ-wɛ toovenim taa yɔ,+ ɖa mba ɖɩtɩŋɩɣnɩ Ɛsɔ fezuu yɔɔ nɛ ɖɩlakɩ tʋmɩyɛ kiɖeɖeye nɛ ɖɩkʋndʋʋ Krɩstʋ Yesu taa+ nɛ ɖɩɩɖʋʋ ɖe-lidaʋ tomnaɣ yɔɔ, 4 paa mɛwɛnɩ mbʋ pɩ-yɔɔ pɩwɛɛ se mantaa tomnaɣ liu nɛ pɩkɩlɩ paa anɩ yɔ.
Ye nɔɔyʋ ɛmaɣzɩɣ se ɛwɛnɩ mbʋ pɩ-yɔɔ pɩwɛɛ se ɛtaa tomnaɣ liu yɔ, mɛwɛnɩ-pʋ nɛ pɩkɩlɩ: 5 pɛpɛlɩ-m kɩyakʋ 8 ñɩŋgʋ wiye,+ mɛnkɛ Izrayɛɛlɩ ɛjaɖɛ taa tʋ, Bɛnjamɛɛ cejewiye taa tʋ, Ebree tʋ, nɛ Ebree mba lʋlɩnɩ-m;+ paɣtʋ hɔɔlʋʋ taa lɛ, mɛnkɛ Farɩsɩ tʋ;+ 6 kpekpeka wɛʋ hɔɔlʋʋ taa lɛ, manazaɣ ɛgbɛyɛ;+ siɣsiɣ wɛtʋ ndʋ tɩlɩnɩ paɣtʋ taa yɔ tɩ-hɔɔlʋʋ taa lɛ, mɛnkɛ weyi ɛwɩlaa se ɛfɛyɩnɩ kɩwɛɛkɩtʋ natʋyʋ yɔ. 7 Paa mbʋ yɔ, mbʋ pɩɩkɛ-m kɛzɛɣa yɔ, Krɩstʋ yɔɔ lɛ mankpaɣ-pʋ ɛzɩ mbʋ pileba yɔ.*+ 8 Halɩ mankpakɩɣ ɖɔɖɔ pɩtɩŋa payɩ ɛzɩ mbʋ pileba yɔ man-Kɩbaɣlʋ Krɩstʋ Yesu yɔɔ sɩmtʋ ndʋ tɩwɛ ñɩm siŋŋ yɔ tɩ-yɔɔ. Ɛ-yɔɔ lɛ, mentisaa se melesi pɩtɩŋa payɩ nɛ mankpaɣ-pʋ ɛzɩ mbʋ pɔlɔ huɖe yɔɔ yɔ, se pɩsa nɛ mehiɣ Krɩstʋ 9 nɛ pana-m se ma nɛ ɩ ɖɩwɛ nɔɔ kʋɖʋmaɣ, pɩtɩkɛ ma-maɣmaɣ men-siɣsiɣ wɛtʋ ndʋ tɩlɩnɩ Paɣtʋ taa yɔ tɩ-yɔɔ; ɛlɛ siɣsiɣ wɛtʋ ndʋ tɩlɩnɩ Krɩstʋ yɔɔ+ tisuu taa yɔ tɩ-yɔɔ,+ siɣsiɣ wɛtʋ ndʋ tɩlɩnɩ Ɛsɔ cɔlɔ nɛ tisuu kɛnɩ ti-tigiɖe yɔ.+ 10 Man-kaɖʋwa lɛ se mantɩlɩ-ɩ nɛ mantɩlɩ ɖɔɖɔ e-femtu ɖoŋ+ nɛ mɔntɔɔ kʋñɔmɩŋ weyi ɛtɔwaa yɔ,+ nɛ mentisi nɛ mansɩ sɩm mbʋ pɩnɩɣzɩnɩ ɛ-sɩm yɔ,+ 11 se mana se ye pɩsaŋ yɔ, manpɩzɩ nɛ mehiɣ sɩɖaa femtu ndʋ pacalɩɣna yɔ.+
12 Pɩtɩwɩlɩ se mɛntɛm kɩhɛyʋʋ mʋʋ yaa pɛtɛm yebu nɛ mantalɩ pilim, ɛlɛ mɛwɛɛ nɛ mañakɩ pana+ se mana se ma ɖɔɖɔ manpɩzɩɣ nɛ mehiɣ mbʋ pɩ-yɔɔ Krɩstʋ Yesu lɩzɩ* ma ɖɔɖɔ yɔ yaa we.+ 13 Koobiya, maamaɣzɩɣ se ma-maɣmaɣ mɛntɛm-kʋ hiɣu; ɛlɛ tɔm kʋɖʋmtʋ man-taa tɛmnaa: Mɔnsɔʋ mbʋ pɩwɛnɩ wayɩ yɔ pɩ-yɔɔ+ nɛ manpaŋ ɛsa nɛ mbʋ pɩwɛnɩ ɛsɩndaa yɔ,+ 14 nɛ mɛwɛɛ nɛ mañakɩ pana se mantalɩ kaɖʋwa ŋga kɛkɛ kɩhɛyʋʋ yɔ,+ kɩhɛyʋʋ ŋgʋ lɛ yatʋ ndʋ Ɛsɔ tɩŋnɩ Krɩstʋ Yesu yɔɔ nɛ ɛya-m nɛ ɛsɔdaa kiŋ yɔ.+ 15 Pʋyɔɔ lɛ, ɖa-taa mba papɩwa yɔ,+ pɛwɛɛnɩ maɣzɩm mbʋ; nɛ ye hɔɔlʋʋ nakʋyʋ taa, ɩwɛnɩ maɣzɩm mbʋ pɩwɛ ndɩ yɔ, Ɛsɔ kaɣ kuluu maɣzɩm mbʋ ɖɩyɔɔdɩ pɩ-tɔm nɛ pɩɖɛɛ yɔ pɩ-yɔɔ nɛ ɛwɩlɩ-mɩ. 16 Paa pɩtɩɩkɛ suwe yɔ, paa ɖitiiwobini ɛsɩndaa ɛzɩma yɔ, iyele nɛ ɖiwolo pɩ-yɔɔ nɛ ɖɩɖɔ ɖɔnɛ nɖɩ ɖɩtʋʋzaa yɔ nʋmɔʋ kʋɖʋmʋʋ ŋgʋ kɩ-taa.
17 Koobiya, mɩ-tɩŋa ɩmaɣzɩnɩ-m,+ nɛ mɩ-ɛsa wɛɛ mba pɔɖɔŋ ɖɔnɛ nɖɩ ɖɩlabɩ nɔɔ kʋɖʋmaɣ nɛ kɩɖaʋ ŋgʋ ɖɩha-mɩ yɔ pɔ-yɔɔ. 18 Mbʋ pʋyɔɔ yɔ, ɛyaa mba pɔɖɔŋ ɛzɩ Krɩstʋ nazɩm sizika* koyindinaa yɔ pɔɖɔwa; mantɩɩyɔɔdʋʋ pɔ-tɔm ɖoŋ ɖoŋ, ɛlɛ lɛɛlɛɛyɔ lɛ mɔyɔɔdʋʋ pɔ-tɔm nɛ ɛsɩtɛɣlɩm. 19 Pɩtɛŋnɩ-wɛ nɛ ɖɩzʋʋ, nɛ po-lotu kɛnɩ pɛ-ɛsɔ, nɛ toovenim taa lɛ pa-samtʋ kɛnɩ pɛ-fɛyɛ, nɛ pakaŋ pa-maɣzɩm tɛtʋ yɔɔ wondu yɔɔ.+ 20 Ɛlɛ ɖɛ-tɛ lɛ+ ɛsɔdaa,*+ nɛ ɖɩɖaŋ ñʋʋ yaɖʋ weyi ɛlɩnɩ peeɖe yɔ kpam, Kɩbaɣlʋ Yesu Krɩstʋ,+ 21 weyi ɛkaɣ tɩŋnʋʋ e-ɖoŋ sɔsɔŋ weyi iyeki se ɛpɩzɩ nɛ eluzi pɩtɩŋa payɩ ɛ-maɣmaɣ ɛ-tɛɛ yɔ+ ɩ-yɔɔ nɛ ɛlɛɣzɩ ɖo-tomnaɣ ŋga kɛwɛnɩ ɛjandʋ yɔ nɛ kɛwɛɛ ɛzɩ* e-tomnaɣ ŋga kañɩlɩsɩɣ yɔ.+