Yereemii
52 Zedekiya+ kaawɛnɩ pɩnzɩ 21 alɩwaatʋ ndʋ ɛpɩsɩ wiyaʋ yɔ, nɛ ɛtɔɔ kewiyitu pɩnzɩ 11 Yeruzalɛm. Payaɣaɣ e-ɖoo se Hamutalɩ,+ Libna tʋ Yereemii pɛlɛ. 2 Ewobi pɩ-yɔɔ nɛ ɛla mbʋ pɩfɛyɩ ɖeu Yehowa ɛsɩndaa yɔ, ɛzɩ mbʋ payɩ Yehoyakim kaalaba yɔ.+ 3 Yehowa pana yɔɔ pɩtɩŋa payɩ mbʋ yɔ pɩlabɩ Yeruzalɛm taa nɛ Yuuda taa, pɩkɔɔ nɛ pɩtalɩ alɩwaatʋ ndʋ ɛkʋsɩ-wɛ ɛ-ɛsɩndaa yɔ.+ Nɛ Zedekiya kaɖɩnɩ Babilɔɔnɩ wiyaʋ.+ 4 Zedekiya kewiyitu tɔɔʋ pɩnaɣ 9 ñɩŋga taa, fenaɣ 10 ñɩŋga taa, fenaɣ ŋga ka-kɩyakʋ 10 ñɩŋgʋ wiye, Babilɔɔnɩ wiyaʋ Nabukodonozɔɔrɩ* nɛ ɛ-sɔɔjanaa kpeekpe powobi Yeruzalɛm wayɩ. Pekpeɣlaa se poyooni-kʋ nɛ pama tɛtʋ ñɛyʋʋ koloŋa nɛ pɩcɔɔ-kʋ nɛ pɩta.+ 5 Nɛ pɛñɛyɩ tɛtʋ ndʋ nɛ pɩkɔɔ nɛ pɩtalɩ Wiyaʋ Zedekiya pɩnaɣ 11 ñɩŋga taa.
6 Fenaɣ 4 ñɩŋga taa, fenaɣ ŋga ka-kɩyakʋ 9 ñɩŋgʋ wiye,+ ñɔɔsɩ kaasa miŋ tɛtʋ ndʋ tɩ-taa, nɛ ɛjaɖɛ taa mba taatasɩ wɛnʋʋ tɔɔnaɣ.+ 7 Pɩtɛmnaa se patʋlɩ tɛtʋ koloŋa pɔʋ, nɛ sɔɔjanaa tɩŋa lɩɩnɩ ɖoo nɛ patɩŋnɩ nɔnɔɔ ŋga kɛwɛ kolonzi 2 hɛkʋ taa wiyaʋ kaɖaɣ cɔlɔ yɔ nɛ palɩɩ tɛtʋ taa nɛ pese; alɩwaatʋ ndʋ lɛ, Kalɩdee mba kaacɔ tɛtʋ nɛ pata; nɛ pakpaɣ Araba nʋmɔʋ nɛ pɛɖɛɛ.+ 8 Ɛlɛ Kalɩdee mba sɔɔjanaa ɖʋ wiyaʋ Zedekiya wayɩ, nɛ pɔkɔɔ nɛ pehiɣ-i+ Yeriikoo kañɩmbusuu kɛdɛɛnzɩ taa, nɛ ɛ-sɔɔjanaa tɩŋa mɩzɩ ɖama nɛ peyebi-i. 9 Nɛ pakpa wiyaʋ nɛ powoni-i Babilɔɔnɩ wiyaʋ cɔlɔ Ribla, Hamatɩ ɛjaɖɛ taa, nɛ ɛhʋʋnɩ-ɩ tɔm. 10 Nɛ Babilɔɔnɩ wiyaʋ kʋ Zedekiya pɩyalaa ɛlɛ ɛsɩndaa; nɛ ɛkʋ ɖɔɖɔ Yuuda awumbiya kpeekpe Ribla taa peeɖe. 11 Pʋwayɩ lɛ Babilɔɔnɩ wiyaʋ yʋlʋsɩ Zedekiya ɛsa,+ ɛhɔkɩ-ɩ nɛ ñɩɣyʋʋ kɩsɛɛmʋʋ kpasɩ, nɛ ewoni-i Babilɔɔnɩ. Nɛ ɛɖʋ-ɩ salaka nɛ ɛwɛɛ salaka taa peeɖe nɛ pɩkɔɔ pɩtalɩ ɛ-sɩm wiye.
12 Fenaɣ 5 ñɩŋga taa, fenaɣ ŋga ka-kɩyakʋ 10 ñɩŋgʋ wiye, pʋ-tɔbʋʋ se Babilɔɔnɩ wiyaʋ Nabukodonozɔɔrɩ* pɩnaɣ 19 ñɩŋga taa, wiyaʋ yɔɔ kandɩyaa ñʋʋdʋ Nebuzaradaanɩ, weyi ɛkɛ Babilɔɔnɩ wiyaʋ lɩmɖʋyʋ yɔ ewobi Yeruzalɛm.+ 13 Ɛñaɣzɩ miŋ Yehowa ɖɩɣa,+ wiyaʋ ɖɩɣa nɛ Yeruzalɛm ɖɩsɩ kpeekpe; ɛñaɣzɩ miŋ ɖɔɖɔ ɖɩsɩ sɔsɔsɩ tɩŋa. 14 Nɛ Kalɩdee mba sɔɔjanaa kpeekpe mba paawɛ wiyaʋ yɔɔ kandɩyaa ñʋʋdʋ cɔlɔ yɔ, pɔyɔkɩ kolonzi nzɩ sɩɩcɔ Yeruzalɛm nɛ sɩta yɔ nɛ pɛpɛɖɩ.+
15 Wiyaʋ yɔɔ kandɩyaa ñʋʋdʋ Nebuzaradaanɩ kpaɣ ajamaa taa nabɛyɛ nɛ ɛyaa mba pɩɩkazɩ tɛtʋ taa yɔ nɛ ɛkɛzɩ-wɛ tɛtʋ. Ɛkpaɣ ɖɔɖɔ mba pesewa nɛ powolo Babilɔɔnɩ wiyaʋ cɔlɔ yɔ, pɩkpɛndɩnɩ mba pɩkazɩ nesi tɛɛ tʋmlaɖaa mba pɛwɛ niye yɔ pa-taa yɔ.+ 16 Ɛlɛ wiyaʋ yɔɔ kandɩyaa ñʋʋdʋ Nebuzaradaanɩ kazɩ ɛjaɖɛ taa ɛyaa mba kʋñɔndʋtʋ kɩlɩnaa yɔ pa-taa nabɛyɛ se pɛkɛ viiñi hayɩyaa nɛ kɩjɛyʋʋ tʋma laɖaa.+
17 Nɛ Kalɩdee mba yɔkɩ Yehowa ɖɩɣa taa ñɩɣyʋʋ kɩsɛɛmʋʋ tilima+ yʋbɩlɛɛɛ, nɛ Yehowa ɖɩɣa taa kɛɛkɛɛnaa+ nɛ ñɩɣyʋʋ kɩsɛɛmʋʋ Teŋgu+ yʋbɩlɛɛɛ, nɛ pakpaɣ ñɩɣyʋʋ kɩsɛɛmʋʋ kpeekpe nɛ pɛɖɛnɩ Babilɔɔnɩ.+ 18 Pakpaɣ ɖɔɖɔ tɔkasɩ, pɛɛlɩnaa, wondu ndʋ paɖɩzɩɣnɩ miŋ yɔ, ñanzɩ kulam ñɩnzɩ,+ kɔpʋnaa+ nɛ ñɩɣyʋʋ kɩsɛɛmʋʋ wondu ndʋ payɩ palakɩnɩ tʋmɩyɛ templo taa yɔ. 19 Wiyaʋ yɔɔ kandɩyaa ñʋʋdʋ kpaɣ ñanzɩ sɔsɔsɩ,+ miŋ ñanzɩ, ñanzɩ kulam ñɩnzɩ, tɔkasɩ, kanɖʋnaa ɖɩzɩyɛ,+ kɔpʋnaa, nɛ ñanzɩ kulam ñɩnzɩ nzɩ palabɩnɩ sika kɩbaŋa nɛ liidiye nɖɩ ɖɩwɛ camɩyɛ yɔ.+ 20 Piyele nɛ tilima ana a-naalɛ, Teŋgu, naŋ abalɩñɩŋ 12+ weyi palabɩnɩ ñɩɣyʋʋ kɩsɛɛmʋʋ nɛ patɩnɩ Teŋgu ɩ-yɔɔ yɔ, nɛ kɛɛkɛɛnaa mba Wiyaʋ Salomɔɔ kaaluba nɛ ɛsɩɩ Yehowa ɖɩɣa taa yɔ, patɩpɩzɩ nɛ pamaɣzɩ ñɩɣyʋʋ kɩsɛɛmʋʋ ŋgʋ pakpaɣaa nɛ polubini wondu ndʋ tɩ-tɩŋa yɔ ki-yuŋ.
21 Piyele nɛ tilima yɔ, paa tilimiye nɖɩ lɛ, ɖɩ-kʋkʋyɩŋ kaakɛ nuŋgolonzi* 18, nɛ pɩɩpɔzɩ nimiye nɖɩ ɖɩ-ɖaɣlɩkɩŋ kɛ nuŋgolonzi 12 yɔ pʋcɔ nɛ pamaɣzɩ paa tilimiye nɖɩ lɛ nɛ pɩcɔɔ pɩta;+ ɖi-kikiŋ kaakɛ niwee 4 walanzɩ,* nɛ ɖɩ-taa kaawɛ pɔʋ. 22 Nɛ hokuu ŋgʋ kɩwɛ ɖɩ-yɔɔ yɔ palabɩ-kʋ nɛ ñɩɣyʋʋ kɩsɛɛmʋʋ; nɛ hokuu ŋgʋ kɩ-kʋkʋyɩŋ kaakɛ nuŋgolonzi 5;+ nɛ ñɩɣyʋʋ kɩsɛɛmʋʋ palabɩnɩ giriyaazɩ nɛ girenaadɩ pee wena aacɔ hokuu ŋgʋ nɛ ata yɔ. Tilimiye 2 ñɩnɖɛ nɛ ɖɩ-tɛ girenaadɩ pee kaawɛ ɖɔɖɔ mbʋ ɖeyi ɖeyi. 23 Girenaadɩ pee 96 kaawɛ hʋyɩŋ yɔɔ; girenaadɩ pee wena aacɔ giriyaazɩ nɛ ata yɔ a-tɩŋa akpɛndɩ 100.+
24 Wiyaʋ yɔɔ kandɩyaa ñʋʋdʋ kpaɣ ɖɔɖɔ cɔjɔ sɔsɔ Seraya,+ cɔjɔ 2 ñɩnʋ Sofonii,+ nɛ nɔnɔsɩ yɔɔ ɖaŋɩyaa mba pa-naadozo.+ 25 Nɛ ɛkpaɣ tɛtʋ ndʋ tɩ-taa wiyaʋ ɖɩɣa taa kaɖɩka kʋɖʋmaɣ, ŋga kaakɛ sɔɔjanaa ñʋʋdʋ yɔ, ɛyaa 7 mba palɩ pɔ-yɔɔ tɛtʋ taa nɛ paakɩlɩ ñɔtɩnʋʋ wiyaʋ yɔ, nɛ sɔɔjanaa ñʋʋdʋ tɛ takayaɣ taa mayʋ, weyi ɛmʋʋ ɛjaɖɛ taa ɛyaa sɔɔjatʋ tʋmɩyɛ yɔ, nɛ samaɣ taa abalaa 60 mba palɩ pɔ-yɔɔ tɛtʋ taa yɔ. 26 Wiyaʋ yɔɔ kandɩyaa ñʋʋdʋ Nebuzaradaanɩ kpaɣ-wɛ nɛ ewoni-wɛ Babilɔɔnɩ wiyaʋ cɔlɔ Ribla. 27 Babilɔɔnɩ wiyaʋ kʋ-wɛ Ribla,+ Hamatɩ ɛjaɖɛ taa. Mbʋ pɩlaba nɛ pakpaɣ Yuuda mba pɛ-ɛjaɖɛ taa nɛ pɛkɛzɩ-wɛ tɛtʋ.+
28 Ɛyaa panɛ Nabukodonozɔɔrɩ* kpaɣaa nɛ ɛkɛzɩ tɛtʋ: pɩnaɣ 7 ñɩŋga taa lɛ, Yuuda mba 3 023.+
29 Nabukodonozɔɔrɩ* pɩnaɣ 18 ñɩŋga taa lɛ,+ pakpaɣ ɛyaa 832 nɛ Yeruzalɛm nɛ pɛɖɛna.
30 Nabukodonozɔɔrɩ* pɩnaɣ 23 ñɩŋga taa lɛ, wiyaʋ yɔɔ kandɩyaa ñʋʋdʋ Nebuzaradaanɩ kpaɣ Yuuda mba nɛ ɛkɛzɩ-wɛ tɛtʋ. Pɛkpɛndɩ ɛyaa* 745.+
Ɛyaa* mba pɛkɛzɩ-wɛ tɛtʋ yɔ, pa-tɩŋa pɛkpɛndɩ 4 600.
31 Nɛ Yuuda wiyaʋ Yehoyakin+ tɛtʋ kɛzʋʋ pɩnaɣ 37 ñɩŋga taa, fenaɣ 12 ñɩŋga taa, fenaɣ ŋga ka-kɩyakʋ 25 ñɩŋgʋ wiye, Babilɔɔnɩ wiyaʋ Evil-Meroodaakɩ holi Yuuda wiyaʋ Yehoyakin* nɛ ɛlɩzɩ-ɩ salaka taa; pɩnaɣ ŋga ka-taa Evil-Meroodaakɩ pɩsɩ wiyaʋ.+ 32 Ɛyɔɔdɩnɩ-ɩ nɛ nɔɔ kɩbaŋa nɛ ɛɖʋ-ɩ hɩɖɛ nɛ pɩkɩlɩ awiya lɛɛna wena aawɛ ɛ-cɔlɔ Babilɔɔnɩ yɔ.* 33 Nɛ Yehoyakin hɔzɩ ɛ-salaka wondu, nɛ ɛtɔkɩ tɔɔnaɣ Evil-Meroodaakɩ taabɩlɩ yɔɔ ɖoŋ ɖoŋ e-wezuu kɩyakɩŋ kpeekpe. 34 Babilɔɔnɩ wiyaʋ haɣaɣ-ɩ tɔɔnaɣ ŋga pɩpɔzʋʋ-ɩ yɔ paa kɩyakʋ ŋgʋ, e-wezuu kɩyakɩŋ kpeekpe, pɩkɔɔ nɛ pɩtalɩ ɛ-sɩm kɩyakʋ wiye.