Kroniiki takayaɣ naalɛ ñɩŋga
11 Robowam talɩ Yeruzalɛm lɛ, ɛcaŋ ekpeɣli Yuuda ɖɩɣa nɛ Bɛnjamɛɛ,+ pɛkpɛndɩ sɔɔjanaa 180 000 mba pafalɩsɩ-wɛ yɔ,* se poyooni Izrayɛɛlɩ nɛ papɩsɩnɩ kewiyaɣ nɛ pɛcɛlɩ Robowam.+ 2 Peeɖe lɛ, Yehowa tɔm talɩ Ɛsɔ toovenim tʋ tɛ ɛyʋ Semayaa+ se: 3 «Heyi Salomɔɔ pɩyalʋ Yuuda wiyaʋ Robowam nɛ Izrayɛɛlɩ kpeekpe Yuuda nɛ Bɛnjamɛɛ taa se: 4 “Tɔm tʋnɛ Yehowa yɔɔdʋʋ: ‘Pɩtɩpɔzɩ se ɩkpa nɛ iyooni mi-koobiya. Mɩ-taa paa weyi lɛ, ɛpɩsɩ ɛ-ɖɩɣa taa, mbʋ pʋyɔɔ yɔ meyebina se pɩla mbʋ.’”»+ Nɛ paña Yehowa nɔɔ taa tɔm nɛ papɩsɩ, nɛ patiwolo se poyooni Yerobowam.
5 Robowam caɣ Yeruzalɛm nɛ ɛma tɛtʋ ɖoŋ ñɩndʋ ndɩ ndɩ Yuuda. 6 Mbʋ ɛma* Bɛtɩlɛhɛm,+ Etam, Tekowa,+ 7 Bɛtɩ-Zur, Soko,+ Adulam,+ 8 Gaatɩ,+ Maresaa, Ziifʋ,+ 9 Adorayim, Lakisi,+ Azeka,+ 10 Zora, Ayalɔɔnɩ+ nɛ Ebrɔŋ,+ tɛtʋ ɖoŋ ñɩndʋ ndɩ ndɩ ndʋ tɩwɛ Yuuda nɛ Bɛnjamɛɛ yɔ. 11 Pɩtasɩ lɛ, ɛɖaɣnɩ cɛyɩsʋʋ lona ɖoŋ ñɩna nɛ ɛsɩɩ a-taa ñʋndɩnaa nɛ ewoni tɔɔnaɣ nɛ num nɛ vɛɛ a-taa, 12 nɛ ewoni tɛtʋ ndɩ ndɩ ndʋ tɩ-tɩŋa tɩ-taa kpayɩŋ sɔsɔŋ nɛ kɩgbɛzɛmɩŋ; ɛcɛyɩsɩ-tʋ pɩdɩɩfɛyɩ. Nɛ Yuuda nɛ Bɛnjamɛɛ pɛwɛɛ e-nesi tɛɛ.
13 Nɛ cɔjɔnaa nɛ Leevi ñɩma mba paawɛ Izrayɛɛlɩ kpeekpe taa yɔ pɛwɛɛ ɛ-hɔɔlʋʋ yɔɔ, palɩnɩ pa-ageeta kpeekpe taa nɛ pɔkɔɔ ɛ-cɔlɔ. 14 Leevi mba yele po-lona wena a-taa kpɩna tɔkɩ ñɩtʋ yɔ nɛ pa-ñɩm+ nɛ pɔkɔɔ Yuuda nɛ Yeruzalɛm, mbʋ pʋyɔɔ yɔ Yerobowam nɛ ɛ-pɩyalaa pɔɖɔɔnɩ-wɛ se pataatasɩ labʋ Yehowa cɔjɔtʋ tʋmɩyɛ.+ 15 Nɛ Yerobowam lɩzɩ ɛ-tɩ ɛyaa nabɛyɛ se pɛkɛ lona kʋkʋya nɛ aleewaa mba panɩɣzɩnɩ pʋŋ yɔ*+ nɛ newee wena ɛɛlaba yɔ+ pɔ-cɔjɔnaa.+ 16 Nɛ Izrayɛɛlɩ cejewe kpeekpe taa ñɩma mba paaɖʋ pa-laŋa taa se pañɩnɩɣ Izrayɛɛlɩ tɛ Ɛsɔ Yehowa yɔ, patɩŋ cɔjɔnaa nɛ Leevi mba nɛ powolo Yeruzalɛm se palaa kɩlaʋ pɔ-cɔzɔnaa tɛ Ɛsɔ Yehowa.+ 17 Pakpaɣ pɩnzɩ 3 nɛ pakpazɩnɩ ɖoŋ Yuuda kewiyitu nɛ paɖʋ nesi Salomɔɔ pɩyalʋ Robowam, mbʋ pʋyɔɔ yɔ pɔɖɔm Daviid nɛ Salomɔɔ pa-nʋmɔʋ taa pɩnzɩ 3.
18 Nɛ Robowam kpaɣ Daviid pɩyalʋ Yerimɔɔtɩ pɛlɛ Mahalaatɩ. Mahalaatɩ ɖoo lɛ Yesee pɩyalʋ Eliyaabɩ+ pɛlɛ Abihayɩlɩ. 19 Alɩwaatʋ natʋyʋ wayɩ lɛ, ɛlʋlɩ-ɩ abalɩbiya: Yewuusi, Semariya nɛ Zaham. 20 Mahalaatɩ wayɩ lɛ, ɛkpaɣ Absalɔm+ sayɩ Maaka. Alɩwaatʋ natʋyʋ wayɩ lɛ, ɛlɛ lʋlɩ-ɩ Abiya,+ Ataayi, Ziza nɛ Selomitɩ. 21 Robowam kaasɔɔlɩ Absalɔm sayɩ Maaka nɛ pɩkɩlɩ ɛ-halaa lalaa tɩŋa nɛ ɛ-halaa cikpema tɩŋa,+ mbʋ pʋyɔɔ yɔ ɛɛkpaɣ halaa 18 nɛ halaa cikpema 60, nɛ ɛlʋlɩ abalɩbiya 28 nɛ halɩbiya 60. 22 Nɛ Robowam lɩzɩ Maaka pɩyalʋ Abiya nɛ ɛkɛ ñʋʋdʋ nɛ ɖiyiyu e-koobiya hɛkʋ taa, mbʋ pʋyɔɔ yɔ ɛñɩnaɣ se ɛsɩɩ-ɩ wiyaʋ. 23 Ɛlɛ ɛla lɛɣtʋ nɛ etiyi* ɛ-pɩyalaa taa nabɛyɛ Yuuda nɛ Bɛnjamɛɛ ageeta kpeekpe taa, tɛtʋ ɖoŋ ñɩndʋ ndɩ ndɩ kpeekpe taa,+ nɛ ɛha-wɛ tɔɔnasɩ sakɩyɛ nɛ ɛñɩnɩ-wɛ halaa sakɩyɛ.