Ezekɩyɛɛlɩ
5 «Piyele nɛ ña yɔ, ɛyʋ pɩyalʋ, kpaɣ laɣɖɛ nɖɩ ɖɩwɛ lɔŋ yɔ nɛ ŋlabɩnɩ-ɖɩ tʋmɩyɛ ɛzɩ ñɔsɩ hʋnɖʋ hʋnʋʋ yɔ. Hʋ ña-ñʋʋ nɛ ña-tandaʋ nɛ pʋwayɩ lɛ, ŋkpaɣ kɩmaɣzɩŋ nɛ ŋmaɣzɩ ñɔsɩ nɛ ŋtayɩ-sɩ hɔɔlɩŋ ndɩ ndɩ. 2 Ŋkaɣ kpaɣʋ hɔɔlʋʋ 3 ñɩŋgʋ nɛ ŋñaɣzɩ-kʋ miŋ tɛtʋ taa alɩwaatʋ ndʋ kɩyakɩŋ weyi ŋñɛyɩɣnɩ-kʋ yɔ ɩtɛŋ yɔ.+ Pʋwayɩ lɛ ŋkpaɣ hɔɔlʋʋ 3 ñɩŋgʋ lɛɛkʋ nɛ ŋlom-kʋ laɣɖɛ tɛtʋ hɔɔlɩŋ tɩŋa taa,+ nɛ ŋkpaɣ hɔɔlʋʋ 3 ñɩŋgʋ ŋgʋ pɩkazaa yɔ nɛ ŋmɩzɩ-kʋ helim taa, nɛ mankaɣ kpɛʋ laɣɖɛ nɛ manɖʋ kɩ-wayɩ.+
3 «Pɩwɛɛ ɖɔɖɔ se ŋcozi ñɔsɩ nzɩ pazɩ nɛ ŋhɔkɩ-sɩ ño-toko taa. 4 Nɛ ŋcozi sɩ-taa nasɩyɩ nɛ ŋlɔ miŋ taa nɛ sɩñaɣ caɣ caɣ. Miŋ ɛnɩ ɩkaɣ yɛlʋʋ nɛ ɩtalɩ Izrayɛɛlɩ ɖɩɣa kpeekpe.+
5 «Tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Yeruzalɛm yɔ. Mansɩ-kʋ ajɛɛ hɛkʋ taa, nɛ ajɛɛ cɔɔ-kʋ nɛ ata. 6 Ɛlɛ kɩkaɖɩnɩ mɔn-tɔm hʋʋ paɣtʋ nɛ man-kpalɩtʋ, nɛ kɩlakɩ kañatʋ lakasɩ nɛ pɩkɩlɩ ajɛɛ nɛ ageeta wena acɔ-kʋ nɛ ata yɔ.+ Mbʋ pʋyɔɔ yɔ kɩ-taa mba lɔ mɔn-tɔm hʋʋ paɣtʋ, nɛ patɩɖɔ man-kpalɩtʋ yɔɔ.”
7 «Pʋyɔɔ lɛ, tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Ɩlabɩ lakasɩ kɩdɛkɛdɩsɩ nɛ pɩkɩlɩ ajɛɛ wena acɔ-mɩ nɛ ata yɔ, nɛ ɩtɩɖɔ man-kpalɩtʋ yɔɔ yaa ɩtɩña mɔn-tɔm hʋʋ paɣtʋ, ɛlɛ iyeba nɛ ɩtɩŋ ajɛɛ wena acɔ-mɩ nɛ ata yɔ a-tɔm hʋʋ paɣtʋ; pʋyɔɔ lɛ,+ 8 tɔm tʋnɛ Kɩbaɣlʋ Kɩlɩm Yehowa yɔɔdʋʋ: ‘Oo tɛtʋ, na, mankʋyʋʋ ñɔ-yɔɔ,+ nɛ ma-maɣmaɣ mankaɣ-ŋ tɔm hʋnʋʋ ajɛɛ ɛsɩndaa.+ 9 Mankaɣ-ŋ labʋ mbʋ mantɩlabɩtɩ wiɖiyi yɔ, nɛ maakaɣ tasʋʋ labʋ nabʋyʋ nɛ pɩnɩɣzɩnɩ-pʋ, ña-lakasɩ kɩdɛkɛdɩsɩ kpeekpe yɔɔ.+
10 «“‘Pʋyɔɔ lɛ caanaa mba pɛwɛ mɩ-hɛkʋ taa yɔ pakaɣ tɔɔʋ pe-piya,+ nɛ piya kaɣ tɔɔʋ sɩ-caanaa, nɛ mankaɣ-mɩ tɔm hʋnʋʋ nɛ mamɩzɩ mɩ-taa mba payɩ pɩkazaa yɔ hɔɔlɩŋ tɩŋa taa.’”*+
11 «“Pʋyɔɔ lɛ, mañɩtʋʋ nɛ mɛwɛɛ wezuu yɔ,” Kɩbaɣlʋ Kɩlɩm Yehowa yɔɔdʋʋna, “ɛzɩma ŋtɩŋnɩ ña-sɩʋ kpelisi nzɩ sɩwɛ kiniŋ yɔ sɩ-yɔɔ nɛ ña-lakasɩ kɩdɛkɛdɩsɩ kpeekpe yɔɔ+ nɛ ŋpisi mon-kooka kiɖeɖeɣa yɔ pʋyɔɔ lɛ, mankaɣ-ŋ lɔʋ* ɖɔɖɔ. Pɩɩkaɣ-m labʋ pʋtɔdɩyɛ,* nɛ maakaɣ ñe-siziŋ nɩʋ.+ 12 Ñɔ-hɔɔlʋʋ 3 ñɩŋgʋ kaɣ sɩbɩnʋʋ kɩzɩkʋ* yaa ñɔɔsɩ kaɣ yebu nɛ kɩɖɩ ña-taa. Pakaɣ kʋʋ nɛ laɣɖɛ hɔɔlʋʋ 3 ñɩŋgʋ lɛɛkʋ ñɔ-cɔlɔ kpɛɛɛ.+ Nɛ mankaɣ mɩzʋʋ hɔɔlʋʋ 3 ñɩŋgʋ ŋgʋ pɩkazaa yɔ hɔɔlɩŋ tɩŋa taa,* nɛ mankaɣ kpɛʋ laɣɖɛ nɛ manɖʋ kɩ-wayɩ.+ 13 Ðɩnɛ ɛlɛ man-pana kaɣ sɩʋ tɩnaɣ, nɛ ɖɩwɩzɩyɛ nɖɩ maawɛnɩ pɔ-yɔɔ yɔ ɖɩkaɣ hɛʋ, nɛ man-taa kaɣ hɛʋ.+ Nɛ toovenim taa lɛ pakaɣ tɩlʋʋ se ma Yehowa mɔyɔɔdɩna nɛ mañɩɣ niye se pɔñɔɔnɩ men-ɖeke koŋ,+ mɛntɛŋ pɩyʋʋ man-pana pɔ-yɔɔ lɛ.
14 «“Mankaɣ yebu nɛ ŋpɩsɩ njɛyɛ nɛ fɛyɛ pʋyʋ* ajɛɛ wena acɔ-ŋ nɛ ata yɔ a-hɛkʋ taa nɛ mba payɩ patɩŋɩɣnɩ ñɔ-cɔlɔ nɛ pɛɖɛɣ yɔ pɛ-ɛsɩndaa.+ 15 Ŋkaɣ pɩsʋʋ fɛyɛ pʋyʋ nɛ mbʋ peniŋ yɔ,+ kɩɖaʋ ŋgʋ papakɩnɩ lalaa yɔ nɛ sɔɔndʋ pʋyʋ ajɛɛ wena acɔ-ŋ nɛ ata yɔ a-ɛsɩndaa, alɩwaatʋ ndʋ mahʋʋnɩ-ŋ tɔm nɛ pana, ɖɩwɩzɩyɛ nɛ nɩŋgbaŋʋʋ hɔm sɔsɔm yɔ. Ma Yehowa mɔyɔɔdɩna.
16 «“Mankaɣ tiyuu pa-wayɩ ñɔɔsɩ tɔʋ ñɩma wena akɔŋnɩ sɩm yɔ nɛ aɖɩzɩ-wɛ. Tɔʋ ñɩma wena mentiyiɣ yɔ akaɣ-mɩ ɖɩzʋʋ.+ Mankaɣ yebu se ɩtaatasɩ wɛnʋʋ tɔɔnaɣ*+ nɛ pʋyɔɔ lɛ ñɔɔsɩ kaɣ kpaʋ ɖoŋ pɩdɩɩfɛyɩ. 17 Mankaɣ tiyuu mɩ-wayɩ ñɔɔsɩ nɛ tɛtɛgbɩna wena awɛ patʋ yɔ,+ nɛ akaɣ kʋʋ ñe-piya. Kɩzɩkʋ nɛ calɩm kpɛdʋʋ kaɣ-ŋ kɩlʋʋ, nɛ mankaɣ kɔnʋʋ laɣɖɛ ña-wayɩ.+ Ma Yehowa mɔyɔɔdɩna.”»