Apostoloowaa Tʋma Labʋ
28 Ðɩlɩ kidiiliŋ yɔɔ nɛ alaafɩya nɛ pɩtɛ lɛ, ɖɩnɩɩ se payaɣ lɩm hɛkʋ taa tɛtʋ ndʋ se Malɩtɩ.+ 2 Nɛ tɛtʋ taa ñɩma* labɩ-ɖʋ camɩyɛ lakasɩ nzɩ sɩ-wayɩ fɛyɩ yɔ. Popuzi miŋ se ɖihoyi nɛ pamʋ ɖa-tɩŋa camɩyɛ mbʋ pʋyɔɔ yɔ tɛʋ kaawɛɛ nɛ kɩnɩɣ nɛ nikaɣ kaawɛɛ ɖɔɖɔ. 3 Ɛlɛ Pɔɔlɩ kpaɣ ɖasɩ ñʋʋ nakʋyʋ nɛ ɛɖʋ miŋ taa lɛ, cakpada nɔɔyʋ lɩɩnɩ kɩ-taa nɛ ɛmɩlɩtɩnɩ e-nesi, mbʋ pʋyɔɔ yɔ miŋ hohou kpa-ɩ. 4 Tɛtʋ taa mba na kpɩnɛ sɔtʋ ñɩnɖɛ nɖɩ ɖisusi Pɔɔlɩ nesi yɔɔ lɛ, papaɣzɩ ɖama yɔɔdɩnʋʋ nɛ pɔtɔŋ se: «Pɩtʋʋ fɛyɩ se abalʋ ɛnɛ ɛkɛ ɛyaa kʋyʋ, nɛ paa ɛlɩ teŋgu taa nɛ alaafɩya yɔ, Tɔm Hʋyʋ Siɣsiɣ Tʋ* tɩha-ɩ nʋmɔʋ se ɛtasɩ caɣʋ wezuu.» 5 Ɛlɛ ɛmɩsɩ cakpada ɛnʋ nɛ ɛtɔlɩ miŋ taa, nɛ ɛnʋ lɛ ɛtɩnɩɩ siziŋ nɩɩyɩ. 6 Ɛlɛ paaɖaŋaa se ehuu yaa ɛtɔlʋʋ kpaagbaa nɛ ɛsɩ. Paɖaŋ alɩwaatʋ sakɩyɛ nɛ pana se kɩdɛkɛdɩm nabʋyʋ tɩtalɩ-ɩ lɛ, pɛlɛɣzɩ pa-lɩmaɣza nɛ papaɣzɩ yɔɔdʋʋ se ɛkɛ ɛsɔ nɔɔyʋ.
7 Nɛ tɛtʋ natʋyʋ kaawɛ lone nɖɩ ɖɩ-cɔlɔ, lɩm hɛkʋ taa tɛtʋ ndʋ tɩ-taa ɛyʋ sɔsɔ weyi payaɣ se Pubiliyuusi yɔ, ɛnʋ tɩnɩ-tʋ; nɛ ɛmʋ-ɖʋ nɛ ɖɩcaɣ ɛ-tɛ kɩyakɩŋ naadozo. 8 Nɛ pɩkɔɔ pɩla se Pubiliyuusi caa kaasa miŋ nɛ anɩza kaakpa-ɩ nɛ ɛhɩnɩ kaɖʋ yɔɔ, nɛ Pɔɔlɩ sʋʋ ɛ-cɔlɔ nɛ ɛtɩmɩ, nɛ ɛtɩnɩ e-nesi ɛ-yɔɔ, nɛ ɛwaa ɛ-kʋdɔŋ.+ 9 Pɩlabɩ mbʋ lɛ, ɛyaa mba pɩkazɩ lɩm hɛkʋ taa tɛtʋ ndʋ tɩ-taa nɛ pɛkɛ kʋdɔndɩnaa yɔ, papaɣzɩ ɖɔɖɔ kɔm Pɔɔlɩ cɔlɔ nɛ ɛwaa pa-kʋdɔmɩŋ.+ 10 Paɖʋ-ɖʋ hɩɖɛ ɖɔɖɔ nɛ kʋjɔŋ sakɩyɛ, nɛ ɖɩkʋyaɣ lɛ, paha-ɖʋ mbʋ payɩ pɩpɔzʋʋ-ɖʋ yɔ.
11 Fenasɩ 3 wayɩ lɛ, ɖɩsʋʋ mɛlɛ nakʋyʋ, ŋgʋ kɩ-yɔɔ palɩzɩ «Zeesi Pɩyalaa» kɩlɛmɩŋ yɔ. Mɛlɛ ŋgʋ, kɩɩlɩnɩ Alɛkɩsandrii nɛ kɩsɩŋ lɩm hɛkʋ taa tɛtʋ ndʋ tɩ-taa nikaɣ alɩwaatʋ taa. 12 Ðɩtalɩ Siraakuusi mɛlɛnaa ɖɩzɩŋɩyɛ lɛ, ɖɩcaɣ peeɖe kɩyakɩŋ naadozo; 13 ɖɩkʋyɩnɩ peeɖe lɛ, ɖɩtalɩ Regiyɔm. Tɛʋ fema lɛ, hadɛ kiŋ helim paɣzɩ mabʋ nɛ ɖɩtalɩ Putewolii kɩyakʋ 2 ñɩŋgʋ wiye. 14 Ðɩmaɣnɩ koobiya peeɖe nɛ petendi-ɖʋ se ɖɩcaɣ pɔ-cɔlɔ kɩyakɩŋ 7; nɛ pʋwayɩ lɛ ɖɩkpaɣ Roma nʋmɔʋ. 15 Roma koobiya nɩ ɖa-taŋ lɛ, palɩɩnɩ ɖooo Apiyuusi Kɩyakʋ taa* nɛ ɖenɖe payaɣ se Agɔma Ðɩsɩ Naadozo yɔ se pakatɩ-ɖʋ. Pɔɔlɩ losi-wɛ lɛ, ɛsɛɛ Ɛsɔ se ɛlabaɣ lɛ nɛ ɛkpa ɖoŋ.+ 16 Nɛ ɖɩtalɩ Roma lɛ, paha Pɔɔlɩ nʋmɔʋ se ɛcaɣnɩ nɖeke ɛ nɛ sɔɔja weyi ɛɖaŋɩɣ ɛ-yɔɔ yɔ.
17 Ɛlɛ kɩyakɩŋ 3 wayɩ lɛ, ɛyaa Yuuda mba sɔsaa nɛ pekpeɣli. Pekpeɣlaa lɛ, eheyi-wɛ se: «Koobiya, paa mantɩla nabʋyʋ nɛ pɩkaɖɩnɩ ɛyaa samaɣ yaa ɖɔ-cɔzɔnaa sɔnzɩ yɔ,+ pakpa-m ɖooo Yeruzalɛm nɛ paɖʋzɩ-m Roma mba nesi tɛɛ ɛzɩ salaka tʋ yɔ.+ 18 Nɛ paba tazɩ tɔm taa lɛ,+ pɔsɔɔlɩ se peyebi-m mbʋ pʋyɔɔ yɔ mantɩla nabʋyʋ mbʋ piyeki se pakʋ-m yɔ.+ 19 Ɛlɛ Yuuda mba kizaa lɛ, mɔnpɔzɩ se Sezaarɩ ɛɖaɣnɩ mɔn-tɔm hʋʋ;+ ɛlɛ pɩtɩkɛ se mɛwɛnɩ natʋyʋ se mankʋyɩnɩ mɛ-ɛjaɖɛ yɔɔ. 20 Lɩmaɣzɩyɛ nɖɩ ɖɩ-yɔɔ mɔnpɔzaa se mana-mɩ nɛ mɔyɔɔdɩnɩ-mɩ; mbʋ pʋyɔɔ yɔ lidaʋ ŋgʋ Izrayɛɛlɩ wɛna yɔ, kɩ-yɔɔ paɖɩ-m kpasɩ sɩnɛ.»+ 21 Peheyi-i se: «Ðɩtɩmʋ ñɔ-yɔɔ takayɩsɩ nasɩyɩ nɛ Yuudee; nɛ pɩtasɩ lɛ, koobiya mba palɩnɩ peeɖe yɔ, pa-taa nɔɔyʋ tɩkɛdɩ-ɖʋ yaa tiheyi-ɖʋ ñɔ-yɔɔ tɔm kɩdɛkɛdɩtʋ natʋyʋ. 22 Ɛlɛ ɖɩmaɣzɩɣ se pɩmʋnaa se ɖiwelisini-ŋ nɛ ɖɩtɩlɩ ña-lɩmaɣza; mbʋ pʋyɔɔ yɔ toovenim taa lɛ, kɩjaʋ yɔɔ ɛgbɛyɛ nɖɩ,+ ɖɩsɩm mbʋ se pɔyɔɔdʋʋ ɖɩ-yɔɔ tɔm kɩdɛkɛdɩtʋ paa le.»+
23 Ðɩnɛ ɛlɛ pa nɛ ɩ panɩɩnɩ ɖama nɛ paɖʋ kɩyakʋ se pakatɩ-ɩ, nɛ pɔkɔɔ ɛ-cɔlɔ sakɩyɛ ɖenɖe ɛsʋʋ yɔ. Nɛ kpaɣnɩ tanaŋ tɛɛ nɛ piwolo ɖanaɣ lɛ, ɛlɩzɩ-wɛ aseɣɖe Ɛsɔ Kewiyaɣ yɔɔ tete se pɩsa nɛ ɛlɩzɩ-wɛ tɔm tɔbʋʋ, nɛ ɛtɩŋnɩ Moyizi Paɣtʋ+ nɛ Nayaa yɔɔ+ nɛ ɛwɩlɩɣ-wɛ se petisi Yesu yɔɔ.+ 24 Nabɛyɛ paɣzɩ tisuu tɔm ndʋ ɛyɔɔdaɣ yɔ tɩ-yɔɔ; lalaa ñetitisi. 25 Nɛ patɩnɩɩnɩ ɖama nɛ pʋyɔɔ lɛ, papaɣzɩ ɖɛʋ; nɛ Pɔɔlɩ yɔɔdɩ tɔm kʋɖʋmtʋ tʋnɛ:
«Fezuu kiɖeɖeu kaawɛnɩ toovenim se kɩtɩŋnɩ nayʋ Izaayii yɔɔ nɛ kiheyi mɩ-cɔzɔnaa tɔm tʋnɛ: 26 “Wolo samaɣ kanɛ kɔ-cɔlɔ nɛ ŋtɔ se: ‘Toovenim taa lɛ, ɩkaɣ welisuu, ɛlɛ ɩɩkaɣ pʋ-tɔbʋʋ nɩʋ kaaʋ; nɛ toovenim taa lɛ, ɩkaɣ cɔnʋʋ, ɛlɛ ɩɩkaɣ naʋ kaaʋ.+ 27 Mbʋ pʋyɔɔ yɔ, samaɣ kanɛ ka-laŋɩyɛ sʋ kpɩzɩŋ, kanɩnɩ ka-nɩŋgbaaŋ, ɛlɛ katiwelisi; kohuuzi kɛ-ɛsa se kataananɩ kɛ-ɛsa kaaʋ nɛ kataanɩɩnɩ ka-nɩŋgbaaŋ nɛ ka-laŋɩyɛ ɛtaanɩɩ tɔm tɔbʋʋ nɛ kapɩsɩnɩ mɔ-yɔɔ nɛ mawaa-kɛ.’”+ 28 Pʋyɔɔ lɛ, pɩwɛɛ se ɩtɩlɩ se ñʋʋ yabʋ pʋnɛ, mdʋ pɩlɩnɩ Ɛsɔ cɔlɔ yɔ, petiyini-pʋ ajɛɛ;+ pɩtʋʋ fɛyɩ se akaɣ-pʋ welisuu.»+ 29 *——
30 Nɛ ɛcaɣ peeɖe pɩnzɩ 2 pilim, ɖɩɣa ŋga ɛ-maɣmaɣ ɛlabɩ haya yɔ ka-taa,+ nɛ ɛmʋʋ mba payɩ pɔkɔŋaɣ ɛ-cɔlɔ yɔ camɩyɛ; 31 nɛ esusuu-wɛ Ɛsɔ Kewiyaɣ tɔm nɛ ɛwɩlɩɣ Kɩbaɣlʋ Yesu Krɩstʋ yɔɔ tɔm kaalɛyɩtʋ* siŋŋ,+ nɛ nabʋyʋ tɩɖɩɣ-ɩ nʋmɔʋ.