Ezekɩyɛɛlɩ
24 Yehowa tɔm tasɩ-m talʋʋ pɩnaɣ 9 ñɩŋga taa, fenaɣ 10 ñɩŋga taa, fenaɣ ŋga ka-kɩyakʋ 10 ñɩŋgʋ wiye se: 2 «Ɛyʋ pɩyalʋ, ma kɩyakʋ kʋnɛ* nɛ ŋsɩɩ, kɩyakʋ kʋnɛ kɩ-maɣmaɣ. Babilɔɔnɩ wiyaʋ paɣzɩ yonuu Yeruzalɛm kɩyakʋ kʋnɛ ki-wiye maɣmaɣ.+ 3 Nɛ ŋtuu eduuye naɖɩyɛ ɖɩɣa ŋga kaañaŋ yɔ kɔ-yɔɔ, nɛ ŋyɔɔdɩ kɔ-tɔm se:
«“Tɔm tʋnɛ Kɩbaɣlʋ Kɩlɩm Yehowa yɔɔdʋʋ:
‘Sɩɩ ɖeɣa;* sɩɩ-kɛ miŋ yɔɔ nɛ ŋɖʋ lɩm ka-taa.+
4 Ðʋ nandʋ colimasɩ* ka-taa,+ colimasɩ kɩbanzɩ tɩŋa,
Yuye nɛ hamʋʋ; ɖʋ mɔɔ wena akpaɖɩ ɖeu yɔ ka-taa nɛ pisu.
5 Kpa heŋ taa heu weyi ɛkɩlɩ ɖeu yɔ,+ nɛ ŋkaa ɖasɩ ɖeɣa tɛɛ nɛ pɩcɔɔ nɛ pɩta.
Tɩzɩ colimasɩ nɛ mɔɔ wena awɛ ka-taa yɔ.’”
6 «Pʋyɔɔ lɛ, tɔm tʋnɛ Kɩbaɣlʋ Kɩlɩm Yehowa yɔɔdʋʋ:
“Pɩtɔɔ tɛtʋ ndʋ tɩkpɛdɩɣ calɩm yɔ,+ ɖeɣa ŋga kalɩkɔdaɣ kpa-kɛ yɔ, ŋga patɩlɩzɩ ka-kalɩkɔdaɣ yɔ!
Lɩzɩ colimasɩ nzɩ sɩwɛ ka-taa yɔ kʋɖʋm kʋɖʋm+ nɛ sɩkɔɔ nɛ sɩtɛ; taalɔ piye sɩ-yɔɔ.
7 Mbʋ pʋyɔɔ yɔ tɩ-calɩm wɛ tɩ-taa;+ tɩpɩyɩ-pʋ kaaʋ ŋgʋ kɩ-yɔɔ fɛyɩ nabʋyʋ yɔ kɩ-yɔɔ.
Tɩtɩpɩyɩ-pʋ tataa se tihuuzi pɩ-yɔɔ puuyuu.+
8 Pɩsa nɛ menseɣti man-pana nɛ mankpa kɩmɩyɛ lɛ,
Meyebi tɩ-calɩm kaaʋ ŋgʋ kɩ-yɔɔ fɛyɩ nabʋyʋ nɛ kiɖeɣ miŋ yɔ kɩ-yɔɔ
Se pɩsa nɛ pataahuuzi pɩ-yɔɔ.”+
9 «Pʋyɔɔ lɛ, tɔm tʋnɛ Kɩbaɣlʋ Kɩlɩm Yehowa yɔɔdʋʋ:
“Pɩtɔɔ tɛtʋ ndʋ tɩkpɛdɩɣ calɩm yɔ!+
Mankaɣ kaʋ ɖasɩ nɛ pɩkpa huuye.
10 Kaa ɖasɩ nɛ ŋɖʋ miŋ,
Tɩzɩ nandʋ nɛ tɩpɩɩ camɩyɛ, pɩyɩ yom nɛ ŋyele nɛ mɔɔ ñaɣ pindimmm.
11 Sɩɩ ñɩɣyʋʋ kɩsɛɛmʋʋ ɖeɣa ŋga kpɛɖɛ mamala yɔɔ nɛ kasaa miŋ
Se pɩsa nɛ kɛsɛɛ cɩɩɩ.
Ka-azuluma kaɣ yoluu nɛ alɩɩ,+ nɛ miŋ kaɣ ñaɣʋ ka-kalɩkɔdaɣ.
12 Pɩkɔŋnɩ ɖɩwɩzɩyɛ nɛ pɩnɩɣ ɛyaa,
Mbʋ pʋyɔɔ yɔ kalɩkɔdaɣ sɔsɔɔ ɛɛkaɣ lɩʋ.+
Kpaɣ-kɛ nɛ ka-kalɩkɔdaɣ nɛ ŋlɔ miŋ taa!”
13 «“Ña-kʋzɔɔtʋ lakasɩ yebina nɛ ŋpɩsɩ azuluma tʋ.+ Mañaɣ pana se mala nɛ ŋpɩsɩ kele kele, ɛlɛ ña-azuluma tɩlɩɩ ñɔ-yɔɔ se ŋpɩsɩ kele kele. Ŋŋkaɣ wɛʋ kele kele nɛ pɩkɔɔ pɩsɩɩnɩ alɩwaatʋ ndʋ pana wena mɔnkɔnɩ-ŋ yɔ ahɛɣ yɔ.+ 14 Ma Yehowa, ma-maɣmaɣ mɔyɔɔdɩna. Pɩkaɣ labʋ mbʋ. Mankaɣ labʋ mbʋ nɛ maakpaɣ man-tɩ, pɩɩkaɣ-m cɛyʋʋ, maakaɣ kpiɖuu.+ Pakaɣ-ŋ tɔm hʋnʋʋ nɛ pɩla nɔɔ kʋɖʋmaɣ nɛ ña-nʋmɔŋ nɛ ña-lakasɩ,” Kɩbaɣlʋ Kɩlɩm Yehowa yɔɔdʋʋna.»
15 Nɛ Yehowa tɔm tasɩ-m talʋʋ se: 16 «Ɛyʋ pɩyalʋ, mancaɣ kpaɣʋ weyi ŋsɔɔlɩ-ɩ siŋŋ yɔ ñɔ-cɔlɔ tuda.+ Pɩfɛyɩ se ŋcaɣ kʋñɔwiye;* nɛ pɩfɛyɩ ɖɔɖɔ se ŋwii yaa ŋtisi ɛsɩtɛɣlɩm. 17 Mɔlɩ tamɩyɛ, nɛ taala kʋñɔwiye caɣʋ sɔnzɩ nzɩ palakɩ sɩɖaa yɔɔ yɔ.+ Te ña-ñʋʋ kitemuu+ nɛ ŋlɛɛ ña-naataŋgbala.+ Pɩfɛyɩ se ŋhuuzi ñɔ-nɔɔ yɔɔ hʋndʋ yɔɔ,*+ nɛ taatɔɔ tɔɔnaɣ ŋga lalaa kɔŋnɩ-ŋ yɔ.»*+
18 Mɔyɔɔdɩnɩ samaɣ tanaŋ tɛɛ, nɛ ɖanaɣ yɔɔ lɛ ma-halʋ sɩ. Nɛ tɛʋ fem tanaŋ tɛɛ lɛ, mala ɛzɩ paaɖʋʋ-m paɣtʋ se mala yɔ. 19 Samaɣ wɛɛ nɛ kɔpɔzʋʋ-m se: «Mbʋ ŋwɛɛ nɛ ŋlakɩ mbʋ yɔ, ŋŋheyiɣ-ɖʋ ɛzɩma pitukuuni-ɖʋ yɔ?» 20 Moncosi-wɛ se: «Yehowa tɔm talɩ-m se: 21 “Heyi Izrayɛɛlɩ ɖɩɣa se: ‘Tɔm tʋnɛ Kɩbaɣlʋ Kɩlɩm Yehowa yɔɔdʋʋ: “Mancaɣ pisuu mon-kooka kiɖeɖeɣa,+ mɩ-tɩ kpazʋʋ sɔsɔm hiɖe, wonuu ŋgʋ ɩsɔɔlɩ-kʋ siŋŋ yɔ nɛ mbʋ pɩkɛdɩnɩ mɩ-laŋɩyɛ yɔ.* Mɩ-pɩyalaa nɛ mɩ-pɛlaa mba iyebini wayɩ yɔ, pakaɣ-wɛ kʋʋ nɛ laɣɖɛ.+ 22 Ðɩnɛ ɛlɛ pɩkaɣ pɔzʋʋ se ɩla ɖeyi ɖeyi ɛzɩ malabʋ yɔ. Ɩɩkaɣ huuzuu mɩ-nɔsɩ yɔɔ hʋndʋ yɔɔ, nɛ ɩɩkaɣ tɔɔʋ tɔɔnaɣ ŋga lalaa kɔŋnɩ-mɩ yɔ.+ 23 Mɩ-ñʋŋ kitemiŋ kaɣ wɛʋ mɩ-ñʋŋ taa nɛ mɩ-naataŋgbala wɛɛ mɩ-naataŋ tɛɛ. Ɩɩkaɣ caɣʋ kʋñɔwiye nɛ ɩɩkaɣ wiu ɖɔɖɔ. Ɛlɛ ɩkaɣ ɖazʋʋ mɩ-kɩdɛkɛdɩm taa,+ nɛ mɩ-taa paa weyi kaɣ mɔlʋʋ nɛ lɛlʋ yɔɔ kiŋ. 24 Ezekɩyɛɛlɩ pɩsɩ yʋsaɣ mɩ-ɛsɩndaa.+ Ɩkaɣ labʋ ɖeyi ɖeyi ɛzɩ ɛlabʋ yɔ. Pɩlakɩ mbʋ lɛ, ɩkaɣ tɩlʋʋ toovenim taa se ma lɛ Kɩbaɣlʋ Kɩlɩm Yehowa.”’”»
25 «Piyele nɛ ña yɔ, ɛyʋ pɩyalʋ, kɩyakʋ ŋgʋ mamʋʋ pɔ-cɔlɔ po-lone ɖoŋ ñɩnɖɛ, (wonuu kɩbaŋʋ ŋgʋ kɩhaɣ-wɛ taa leleŋ yɔ, wonuu ŋgʋ pɔsɔɔlɩ kɩ-tɔm siŋŋ yɔ, ŋgʋ kɩkɛdɩnɩ pa-laŋɩyɛ* yɔ) nɛ pa-pɩyalaa nɛ pɛ-pɛlaa yɔ,+ 26 weyi esewa nɛ ɛtʋlɩ yɔ ɛkaɣ-ŋ tʋ kɛdʋʋ.+ 27 Kɩyakʋ ŋgʋ ki-wiye, ŋkaɣ kuluu ñɔ-nɔɔ nɛ ŋyɔɔdɩnɩ weyi esewa nɛ ɛtʋlɩ yɔ, ŋŋkaɣ tasʋʋ sum tamɩyɛ.+ Ŋkaɣ pɩsʋʋ yʋsaɣ pɛ-ɛsɩndaa; nɛ toovenim taa lɛ, pakaɣ tɩlʋʋ se ma lɛ Yehowa.»