Yereemii

32 Tɔm ndʋ tɩlɩnɩ Yehowa cɔlɔ nɛ tɩtalɩ Yereemii, Yuuda wiyaʋ Zedekiya pɩnaɣ 10 ñɩŋga taa, pʋ-tɔbʋʋ se Nabukodonozɔɔrɩ*+ pɩnaɣ 18 ñɩŋga taa yɔ. 2 Alɩwaatʋ ndʋ tɩ-taa lɛ, Babilɔɔnɩ wiyaʋ sɔɔjanaa kaawɛɛ nɛ pɛñɛyɩɣ Yeruzalɛm, nɛ paakpa nayʋ Yereemii nɛ pasɩɩ-ɩ Feŋiyaa Kadaɣ+ taa Yuuda wiyaʋ ɖɩɣa taa nɛ paɖaŋ ɛ-yɔɔ se ɛtaaɖɛɛ ɖoli. 3 Mbʋ pʋyɔɔ yɔ Yuuda wiyaʋ Zedekiya kaakpa-ɩ nɛ ɛsɩɩ se paɖaŋ ɛ-yɔɔ nɛ ɛtaaɖɛɛ ɖoli,+ nɛ ɛyɔɔdɩ se: «Ɛbɛ yɔɔ ŋyɔɔdʋʋ natʋ tɔm mbʋ? Ŋtɔŋ se: “Tɔm tʋnɛ Yehowa yɔɔdʋʋ: ‘Mankaɣ ɖʋzʋʋ tɛtʋ tʋnɛ Babilɔɔnɩ wiyaʋ nesi tɛɛ, nɛ ɛkaɣ-tʋ mʋʋ,+ 4 nɛ Yuuda wiyaʋ Zedekiya ɛɛkaɣ lɩʋ Kalɩdee mba nesi tɛɛ, mbʋ pʋyɔɔ yɔ paa pɩɩlabɩ ɛzɩma yɔ pakaɣ-ɩ ɖʋzʋʋ Babilɔɔnɩ wiyaʋ nesi tɛɛ, nɛ ɛkaɣ-ɩ katʋʋ nɛ pana ɖama ɛsɩndaa nɛ ɛyɔɔdɩnɩ-ɩ.’”+ 5 “Ɛkaɣ kpaɣʋ Zedekiya nɛ ewoni Babilɔɔnɩ, nɛ ɛkaɣ wɛʋ peeɖe nɛ pɩkɔɔ nɛ pɩtalɩ alɩwaatʋ ndʋ mɛnkɛzɩɣ ma-lɩmaɣza nɛ ɛ-yɔɔ yɔ. Paa ɩwɛɛ nɛ iyouni Kalɩdee mba yɔ, ɩɩkaɣ wabʋ,”+ Yehowa yɔɔdʋʋna.»

6 Yereemii yɔɔdɩ se: «Yehowa tɔm talɩ-m se: 7 “Na, ña-caa ɖalʋ* Saalum pɩyalʋ Hanamɛɛlɩ kaɣ kɔm ñɔ-cɔlɔ nɛ ɛyɔɔdɩ se: ‘Ya ña-tɩ ma-hayɩm mbʋ pɩwɛ Anatɔɔtɩ+ yɔ, mbʋ pʋyɔɔ yɔ ñɛkɛnɩ weyi ɛwɛnɩ kajalaɣ waɖɛ se ɛɖaɣnɩ-pʋ yabʋ yɔ.’”»+

8 Man-caa ɖalʋ pɩyalʋ Hanamɛɛlɩ kɔɔ mɔn-cɔlɔ Feŋiyaa Kadaɣ taa, ɛzɩ Yehowa kaayɔɔdʋʋ yɔ, nɛ eheyi-m se: «Mentendi-ŋ, ya ma-hayɩm mbʋ pɩwɛ Anatɔɔtɩ, Bɛnjamɛɛ ɛjaɖɛ taa yɔ, mbʋ pʋyɔɔ yɔ ŋwɛnɩ waɖɛ se ŋkpaɣ-pʋ nɛ pɩpɩsɩ ña-pʋyʋ nɛ ñɛwɛnɩnɩ waɖɛ se ŋɖaɣnɩ-pʋ yabʋ. Yabɩ-pʋ ña-tɩ.» Peeɖe menɖiɣzinaa se tɔm ndʋ tɩlɩnɩ Yehowa cɔlɔ.

9 Nɛ maya man-caa ɖalʋ pɩyalʋ Hanamɛɛlɩ cɔlɔ hayɩm mbʋ pɩwɛ Anatɔɔtɩ yɔ. Mamaɣzɩ liidiye+ nɛ mɛncɛlɩ-ɩ, pɩkɛ siklinaa* 7 nɛ liidiye pɔɔyɩsɩ 10. 10 Nɛ mama pɩ-tɔm takayaɣ taa,+ menkpiyi-kɛ nɛ mantaaɖɩ-kɛ,* mañɩnɩ aseɣɖe tɩnaa,+ nɛ mamaɣzɩ liidiye kɩmaɣzɩŋ yɔɔ. 11 Mankpaɣ hayɩm yabʋ takayaɣ ŋga pataaɖɩ kɔ-yɔɔ ɛzɩ paɣtʋ nɛ ɖʋtʋ pɔzʋʋ yɔ, pɩkpɛndɩnɩ takayaɣ ŋga patɩtaaɖɩ kɔ-yɔɔ yɔ, 12 nɛ mɛncɛlɩ Maseyiya pɩyalʋ Neriya+ pɩyalʋ Baaruuki+ hayɩm yabʋ takayaɣ; mɛncɛlɩ-ɩ kɛ man-caa ɖalʋ pɩyalʋ Hanamɛɛlɩ, aseɣɖe tɩnaa mba pama tɔm hayɩm yabʋ takayaɣ taa yɔ, nɛ Yuuda ñɩma mba payɩ paacaɣ Feŋiyaa Kadaɣ+ taa yɔ pɛ-ɛsɩndaa.

13 Nɛ manɖʋ Baaruuki paɣtʋ pɛ-ɛsɩndaa se: 14 «Tɔm tʋnɛ yoyaa tɛ Yehowa, Izrayɛɛlɩ tɛ Ɛsɔ yɔɔdʋʋ: “Kpaɣ takayɩsɩ sɩnɛ, hayɩm yabʋ takayaɣ kanɛ, ŋga pataaɖɩ-kɛ yɔ nɛ takayaɣ lɛɛka ŋga patɩtaaɖɩ-kɛ yɔ, nɛ ŋɖʋ-sɩ peeɣa nakɛyɛ taa, se pɩsa nɛ sɩwɛɛ nɛ pileɖi.” 15 Mbʋ pʋyɔɔ yɔ tɔm tʋnɛ yoyaa tɛ Yehowa, Izrayɛɛlɩ tɛ Ɛsɔ yɔɔdʋʋ: “Pakaɣ tasʋʋ yabʋ ɖɩsɩ nɛ hayɩm nɛ viiñi* ɛjaɖɛ ɖɩnɛ ɖɩ-taa.”»+

16 Nɛ mɛntɛm cɛlʋʋ Neriya pɩyalʋ Baaruuki hayɩm yabʋ takayaɣ lɛ, mantɩmnɩ Yehowa se: 17 «Oo, Kɩbaɣlʋ Kɩlɩm Yehowa! Na! Ŋtɩŋnɩ ño-ɖoŋ sɔsɔŋ yɔɔ nɛ ñe-nesi nzɩ ŋsezaa yɔ sɩ-yɔɔ nɛ ŋla ɛsɔdaa nɛ tɛtʋ.+ Nabʋyʋ fɛyɩ se pɩ-labʋ kɩlɩ-ŋ kaɖɛ, 18 ña Weyi ŋwɩlɩɣ sɔɔlɩm siɣsiɣ ñɩmbʋ ɛyaa kudokiŋ, ɛlɛ ŋhɛyɩɣ caanaa kɩwɛɛkɩm pa-pɩyalaa* pa-wayɩ yɔ,+ Ɛsɔ toovenim tʋ, Ɛsɔ sɔsɔ nɛ ɖoŋ tʋ, ɛnʋ weyi payaɣ-ɩ se yoyaa tɛ Yehowa yɔ. 19 Ñɔ-lɔŋ tasʋʋ kɛ kɩbam siŋŋ* nɛ ña-lakasɩ paɣlaa,+ ña weyi ñɛ-ɛsa naɣ ɛyaa nʋmɔŋ tɩŋa+ se ŋha paa weyi mbʋ pɩmʋnɩ ɛ-nʋmɔŋ yɔ nɛ mbʋ pɩmʋnɩ mbʋ ɛlakɩ yɔ.+ 20 Ŋlabɩ yʋsasɩ nɛ maamaaci lakasɩ Ejipiti ɛjaɖɛ taa, pasɩm-sɩ halɩ nɛ sɔnɔ, nɛ pʋyɔɔ lɛ ŋlaba nɛ ña-hɩɖɛ sɛɛ* Izrayɛɛlɩ taa nɛ ɛyaa taa,+ ɛzɩ pɩwɛʋ sɔnɔ yɔ. 21 Nɛ ŋtɩŋnɩ yʋsasɩ, maamaaci lakasɩ, nesi ɖoŋ ñɩnzɩ, nesi nzɩ ŋsezaa yɔ, nɛ lakasɩ nzɩ sɩcaɣ sɔɔndʋ yɔ sɩ-yɔɔ nɛ ŋlɩzɩ ña-samaɣ Izrayɛɛlɩ Ejipiti ɛjaɖɛ taa.+

22 «Pʋwayɩ lɛ, ŋcɛlɩ-wɛ ɛjaɖɛ ɖɩnɛ, nɖɩ ŋŋɖuwaa se ŋcɛlɩɣ pɔ-cɔzɔnaa yɔ,+ ɛjaɖɛ nɖɩ ɖɩ-taa naalɩm nɛ tʋŋ num pikpeŋ yem yɔ.+ 23 Nɛ pasʋʋ nɛ pamʋ-ɖɩ nɛ ɖɩpɩsɩ pa-pʋyʋ, ɛlɛ patɩña ñɔ-nɔɔ taa tɔm yaa patɩɖɔ ña-paɣtʋ yɔɔ. Patɩla mbʋ ŋɖʋ-wɛ paɣtʋ se pala yɔ pɩ-taa nabʋyʋ, nɛ pʋyɔɔ lɛ ŋyele nɛ asɛyʋʋ kʋnɛ kɩ-tɩŋa kɩtalɩ-wɛ.+ 24 Ɩna! Ɛyaa siɣ you wondu nɛ pɩcɔɔ tɛtʋ nɛ pɩta se pamʋ-tʋ;+ nɛ laɣɖɛ yɔɔ,+ ñɔɔsɩ yɔɔ, nɛ kɩzɩkʋ* yɔɔ lɛ,+ pɩtʋʋ fɛyɩ se tɛtʋ kaɣ tɔlʋʋ Kalɩdee ñɩma mba pɛwɛɛ nɛ poyouni-tʋ yɔ pe-nesi tɛɛ; tɔm ndʋ ŋyɔɔdaa yɔ tɩ-tɩŋa tɩlaba, ɛzɩ ŋnaɣʋ lɛɛlɛɛyɔ yɔ. 25 Ɛlɛ hayɩ Kɩbaɣlʋ Kɩlɩm Yehowa, ŋheyi-m se: “Kpaɣ liidiye nɛ ŋya ña-tɩ hayɩm nɛ ŋñɩnɩ aseɣɖe tɩnaa;” ŋgʋ paa pɩɩlabɩ ɛzɩma yɔ pakaɣ tɛtʋ ɖʋzʋʋ Kalɩdee mba nesi tɛɛ.»

26 Peeɖe Yehowa tɔm talɩ Yereemii se: 27 «Na! Mɛkɛnɩ Yehowa, ɛyaa kpeekpe* tɛ Ɛsɔ. Nabʋyʋ wɛɛ se pɩ-labʋ kɩlɩ-m kaɖɛ yaa we? 28 Pʋyɔɔ lɛ tɔm tʋnɛ Yehowa yɔɔdʋʋ: “Na! Menɖiɣni ɖʋzʋʋ tɛtʋ tʋnɛ Kalɩdee mba nɛ Babilɔɔnɩ wiyaʋ Nabukodonozɔɔrɩ* nesi tɛɛ, nɛ ɛkaɣ-tʋ mʋʋ.+ 29 Nɛ Kalɩdee ñɩma mba peɖiɣni yonuu tɛtʋ tʋnɛ yɔ, pakaɣ kɔm nɛ pasʋʋ tɩ-taa nɛ pɔsɔbɩ-tʋ miŋ nɛ pañaɣzɩ-tʋ,+ pɩkpɛndɩnɩ ɖɩsɩ nzɩ sɩ-ñʋŋ taa samaɣ laɣ kɩlaŋ Baalɩ nɛ peliziɣ kilizasɩ ɛsɔnaa lalaa se paɖʋ-m ɖɩwɩzɩyɛ yɔ.”+

30 «“Mbʋ pʋyɔɔ yɔ mbʋ pɩfɛyɩ ɖeu yɔ pi-ɖeke Izrayɛɛlɩ mba nɛ Yuuda mba palabɩ mɛ-ɛsɩndaa, kpaɣnɩ pe-evebitu taa;+ Izrayɛɛlɩ mba wɛɛ nɛ patɩŋɩɣnɩ pe-nesi tɛɛ tʋma yɔɔ nɛ paɖʋʋ-m ɖɩwɩzɩyɛ,” Yehowa yɔɔdʋʋna. 31 “Mbʋ pʋyɔɔ yɔ tɛtʋ tʋnɛ, kpaɣnɩ kɩyakʋ ŋgʋ pama-tʋ nɛ pɩkɔɔ pɩtalɩ sɔnɔ kɩyakʋ kʋnɛ yɔ, pana nɛ ɖɩwɩzɩyɛ ɖeke tɩwɛɛ nɛ tɩɖʋʋ-m,+ nɛ pʋyɔɔ lɛ, pɩpɔzʋʋ se mankʋsɩ-tʋ mɛ-ɛsɩndaa,+ 32 kɩdɛkɛdɩm mbʋ payɩ Izrayɛɛlɩ mba nɛ Yuuda mba laba se paɖʋ-m ɖɩwɩzɩyɛ yɔ pɩ-yɔɔ—pa-maɣmaɣ, pa-awiya,+ pa-awumbiya,+ pɔ-cɔjɔnaa, pa-nayaa,+ nɛ Yuuda mba nɛ Yeruzalɛm taa mba. 33 Pɛwɛɛ nɛ pahaɣ-m siɣye nɛ paahaɣ-m pɛ-ɛsɩndaa;+ paa maañaɣ pana se mawɩlɩ-wɛ tɔm nɛ mɛlɛlɩɣ tam sakɩyɛ yɔ,* pa-taa nɔɔyʋ tiwelisi se ɛmʋ lɔŋ sɩɣzʋʋ.+ 34 Nɛ pasɩ pa-sɩʋ kpelisi nzɩ sɩwɛ kiniŋ yɔ ɖɩɣa ŋga kɔ-yɔɔ wɛ ma-hɩɖɛ yɔ ka-taa se pepisi-kɛ.+ 35 Pɩtasɩ lɛ, pama Baalɩ lona kʋkʋya Tofɛɛtɩ ŋgʋ kɩwɛ Hinɔɔm Pɩyalʋ Fɛɛʋ*+ taa yɔ kɩ-taa, se pɩsa nɛ pañaɣzɩ pa-pɩyalaa nɛ pɛ-pɛlaa miŋ Molɛɛkɩ,+ pɩkɛ mbʋ mantaapɔzɩ-wɛ se pala yɔ,+ nɛ halɩ pɩtaatɩɩkpaʋ ma-laŋɩyɛ taa wiɖiyi* se mɔnpɔzɩ-wɛ se pala kʋzɔɔtʋ lakasɩ nzɩ, nɛ piyele nɛ Yuuda la kɩwɛɛkɩm.”

36 «Pʋyɔɔ lɛ, tɔm tʋnɛ Izrayɛɛlɩ tɛ Ɛsɔ Yehowa yɔɔdʋʋ tɛtʋ tʋnɛ tɩ-yɔɔ, ndʋ ɩwɛɛ nɛ ɩyɔɔdʋʋ se pakaɣ tɩŋnʋʋ laɣɖɛ, ñɔɔsɩ nɛ kɩzɩkʋ yɔɔ nɛ paɖʋzɩ-tʋ Babilɔɔnɩ wiyaʋ nesi tɛɛ yɔ: 37 “Ɩna! Mankaɣ-wɛ kpeɣluu nɛ ajɛɛ wena a-taa payɩ maamɩzɩ-wɛ nɛ pana nɛ ɖɩwɩzɩyɛ nɛ hɔpɩsɩyɛ sɔsɔɖɛ yɔ,+ nɛ mankaɣ-wɛ pɩsɩnʋʋ lone ɖɩnɛ ɖɩ-taa nɛ meyele nɛ pɛwɛɛ pɛɛyɛ taa.+ 38 Nɛ pakaɣ kɛʋ man-samaɣ, nɛ mankaɣ kɛʋ pɛ-Ɛsɔ.+ 39 Nɛ mankaɣ-wɛ haʋ laŋɩyɛ kʋɖʋmɖɩyɛ+ nɛ mawɩlɩ-wɛ nʋmɔʋ kʋɖʋmʋʋ se pɩsa nɛ peseɣ-m sɔɔndʋ paa ɛzɩmtaa, nɛ piɖeni pa-maɣmaɣ nɛ piɖeni pe-piya pa-wayɩ.+ 40 Nɛ mankaɣ-wɛ ɖʋnʋʋ tamtam ɛgbɛyɛ,+ se maakaɣ-wɛ yebu labʋ kɩbandʋ;+ nɛ mankaɣ ɖʋʋ mɔn-sɔɔndʋ seu pa-laŋa taa, se pɩsa nɛ pataaha-m siɣye.+ 41 Mankaɣ mɛyʋʋ amɛya pɔ-yɔɔ se malabɩ-wɛ kɩbandʋ+ nɛ mankaɣ-wɛ kam nɛ pɛcɛyɩ camɩyɛ ɛjaɖɛ ɖɩnɛ ɖɩ-taa,+ malakɩ mbʋ nɛ ma-laŋɩyɛ pilim nɛ man-kalɩzaɣ* pilim.”»

42 «Mbʋ pʋyɔɔ yɔ tɔm tʋnɛ Yehowa yɔɔdʋʋ: “Ɛzɩ maakɔnʋʋ samaɣ kanɛ kɔ-yɔɔ asɛyʋʋ sɔsɔʋ kʋnɛ kɩ-tɩŋa yɔ, mbʋ ɖɔɖɔ mankaɣ kɔnʋʋ pɔ-yɔɔ kɩbandʋ lakasɩ* nzɩ payɩ sɩ-tɔm menɖiɣni-wɛ heyuu se mankaɣ-wɛ labʋ yɔ.+ 43 Nɛ pakaɣ ɖaɣnʋʋ yabʋ hayɩm ɛjaɖɛ ɖɩnɛ ɖɩ-taa,+ paa ɩwɛɛ nɛ ɩyɔɔdʋʋ se: ‘Pɩkɛ ɛjaɖɛ nɖɩ peyebi-ɖɩ nɛ ɛyʋ nɛ kpɩnɛ pɛfɛyɩ ɖɩ-taa yɔ, nɛ paɖʋzɩ-ɖɩ Kalɩdee mba nesi tɛɛ’ yɔ.”

44 «“Pakaɣ hayɩm yabʋ nɛ liidiye, pakaɣ maʋ hayɩm yabʋ takayɩsɩ nɛ pataaɖɩ-sɩ, nɛ pakaɣ ñɩnʋʋ aseɣɖe tɩnaa Bɛnjamɛɛ ɛjaɖɛ taa,+ ageeta wena acɔ Yeruzalɛm nɛ ata yɔ a-taa, Yuuda tɛtʋ ndɩ ndɩ taa,+ pʋŋ egeetiye tɛtʋ ndɩ ndɩ taa, tɛtʋ ndɩ ndɩ ndʋ tɩwɛ pɩ-tɛɛ ɛjaɖɛ taa yɔ tɩ-taa+ nɛ hadɛ kiŋ tɛtʋ ndɩ ndɩ taa, mbʋ pʋyɔɔ yɔ mankaɣ pɩsɩnʋʋ po-yomaa,”+ Yehowa yɔɔdʋʋna.»