Awiya takayaɣ kajalaɣ ñɩŋga
3 Salomɔɔ ɖʋ nesi ɖɔkʋʋ ɛgbɛyɛ nɛ Ejipiti wiyaʋ Farawɔɔ. Ɛkpaɣ Farawɔɔ pɛlɛ+ nɛ ɛpɩsɩ-ɩ ɛ-halʋ nɛ ɛkɔnɩ-ɩ Daviid Tɛtʋ+ taa nɛ pɩkɔɔ pɩsɩɩnɩ alɩwaatʋ ndʋ ɛtɛm maʋ ɛ-maɣmaɣ ɛ-ɖɩɣa,+ nɛ Yehowa ɖɩɣa,+ nɛ koloŋa ŋga kɔcɔ Yeruzalɛm nɛ kata yɔ.+ 2 Ɛlɛ samaɣ kaawɛɛ nɛ kalaɣ kɩlaŋ lona kʋkʋya taa,+ mbʋ pʋyɔɔ yɔ pɩkɔm nɛ pɩtalɩnɩ alɩwaatʋ ndʋ yɔ, pataatɩɩmatɩ ɖɩɣa ŋga keyeki nɛ Yehowa hɩɖɛ sɛɛ yɔ.*+ 3 Salomɔɔ kaawobi pɩ-yɔɔ nɛ ɛsɔɔlɩ Yehowa, mbʋ pʋyɔɔ yɔ ɛɖɔŋaɣ ɛ-caa Daviid paɣtʋ yɔɔ, paa mbʋ yɔ, ɛɛwɛɛ nɛ ɛlaɣ kɩlaŋ lona kʋkʋya taa nɛ eyeki nɛ kɩlaŋ ɛnɩ ɩ-ñɔsɩ kpaɣ.+
4 Wiyaʋ wolo Gabawɔɔ se ɛlaa kɩlaʋ peeɖe, mbʋ pʋyɔɔ yɔ peeɖe lone kʋkʋyɩyɛ nɖɩ ɖɩkpaɖaa yɔ* ɖɩɩwɛɛ.+ Salomɔɔ laa kɩlaŋ kɩñaɣzɩŋ 1 000 altaaru ŋgʋ kɩ-yɔɔ.+ 5 Nɛ Yehowa lɩɩ Salomɔɔ yɔɔ ɖoo taa ɖoziye naɖɩyɛ taa Gabawɔɔ, nɛ Ɛsɔ heyi-i se: «Pɔzɩ-m mbʋ ŋsɔɔlaa se maha-ŋ yɔ.»+ 6 Peeɖe Salomɔɔ yɔɔdaa se: «Ŋlɩzɩ sɔɔlɩm siɣsiɣ ñɩmbʋ sɔsɔm nɛ ŋwɩlɩ man-caa Daviid weyi ɛkɛ ña-lɩmɖʋyʋ yɔ, mbʋ pʋyɔɔ yɔ ɛɖɔm ñɛ-ɛsɩndaa nɛ toovenim wɛtʋ nɛ siɣsiɣ wɛtʋ nɛ laŋɩyɛ nɖɩ ɖɩtʋʋzaa yɔ. Ŋwobi pɩ-yɔɔ nɛ ŋwɩlɩɣ-ɩ ñɔ-sɔɔlɩm siɣsiɣ ñɩmbʋ sɔsɔm halɩ nɛ sɔnɔ, mbʋ pʋyɔɔ yɔ ŋha-ɩ pɩyalʋ nɔɔyʋ se ɛcaɣ e-kewiyaɣ kpelaɣ yɔɔ.+ 7 Nɛ lɛɛlɛɛyɔ, mɛ-Ɛsɔ Yehowa, ŋpɩsɩ ña-lɩmɖʋyʋ wiyaʋ man-caa Daviid lone taa, paa mɛnkɛ evebu* yem nɛ mɛnfɛyɩnɩ lɔŋsɩnɖɛ* yɔ.+ 8 Ña-lɩmɖʋyʋ wɛ ña-samaɣ ŋga ŋlɩzaa yɔ ka-taa,+ samaɣ ŋga kɔɖɔ sakɩyɛ nɛ paapɩzɩɣ nɛ pakalɩ-kɛ yaa patɩlɩ ka-ñʋʋ yɔ. 9 Pʋyɔɔ lɛ, ha ña-lɩmɖʋyʋ laŋɩyɛ nɖɩ ɖɩñaŋ yɔ nɛ ɛhʋʋnɩ ña-samaɣ tɔm,+ nɛ ɛɖʋ tʋkaɣ kɩbam nɛ kɩdɛkɛdɩm pɛ-hɛkʋ taa,+ mbʋ pʋyɔɔ yɔ apɩzɩɣ nɛ ɛhʋʋ ña-samaɣ kanɛ, ŋga kɔɖɔ sakɩyɛ* yɔ kɔ-tɔm?»
10 Mbʋ Salomɔɔ pɔzaa yɔ pɩkɛdɩnɩ Yehowa.+ 11 Nɛ Ɛsɔ heyi-i se: «Ɛzɩma ŋpɔzɩ mbʋ na, nɛ ŋtɩpɔzɩ wezuu kɩɖaɣlʋʋ* yaa ñɩm yaa ño-koyindinaa sɩm,* ɛlɛ ŋpɔzɩ tɔm taa nɩʋ lɛɣtʋ se ŋhʋʋnɩ tɔm yɔ pʋyɔɔ lɛ,+ 12 mankaɣ labʋ mbʋ ŋpɔzaa yɔ.+ Mankaɣ-ŋ haʋ laŋɩyɛ nɖɩ ɖɩwɛnɩ lɔŋsɩnɖɛ nɛ ɖɩnɩɣ tɔm taa yɔ,+ nɛ piyele nɛ ɛzɩma nɔɔyʋ taawɛɛ ɛzɩ ña yɔ pʋcɔ nɛ pɩtalɩɣnɩ-ŋ yɔ, ña-wayɩ lɛ nɔɔyʋ ɛɛkaɣ wɛʋ ɛzɩ ña yɔ.+ 13 Pɩtasɩ lɛ, mbʋ ŋtɩpɔzɩ yɔ mankaɣ-ŋ pʋ haʋ,+ ñɩm nɛ samtʋ,+ nɛ wiyaʋ nɔɔyʋ ɛɛkaɣ wɛʋ ɛzɩ ña yɔ ñe-wezuu caɣʋ alɩwaatʋ taa.*+ 14 Nɛ ye ŋɖɔŋ ma-nʋmɔŋ taa nɛ ŋɖɔkʋʋ man-kpalɩtʋ nɛ man-paɣtʋ, ɛzɩ ña-caa Daviid kaaɖɔm yɔ,+ mankaɣ-ŋ haʋ ɖɔɖɔ wezuu kɩɖaɣlʋʋ.»*+
15 Salomɔɔ fema lɛ, eɖiɣzina se pɩkɛ ɖoziye na. Nɛ ewolo Yeruzalɛm nɛ ɛsɩŋ Yehowa ɛgbɛyɛ ɖʋʋ aɖakaɣ ɛsɩndaa nɛ ɛlaa kɩlaŋ kɩñaɣzɩŋ nɛ laŋhɛzɩyɛ kɩlaŋ+ nɛ ɛla kazandʋ ɛ-lɩmɖʋyaa tɩŋa.
16 Alɩwaatʋ ndʋ tɩ-taa lɛ, halaa hayitu laɖaa 2 kɔɔ wiyaʋ cɔlɔ nɛ pasɩŋ ɛ-ɛsɩndaa. 17 Halʋ kajalaɣ ñɩnʋ yɔɔdɩ se: «Mentendi-ŋ, man-kɩbaɣlʋ, ma nɛ halʋ ɛnɛ ɖɩwɛ ɖɩɣa kʋɖʋmaɣ taa, nɛ malʋlɩ pɩɣa alɩwaatʋ ndʋ yɔ, ɛɛwɛ ɖɩɣa taa. 18 Malʋlaa nɛ pɩtalɩ kɩyakʋ tozo ñɩŋgʋ wiye lɛ, halʋ ɛnɛ ɖɔɖɔ ɛlʋlɩ. Ðɩɩwɛ ɖoli kʋɖʋm, ɖa-naalɛ ɖe-ɖeke; nɔɔyʋ taawɛɛ ɖɩɣa taa nɛ pɩtasɩnɩ-ɖʋ. 19 Ðoo taa lɛ, halʋ ɛnɛ ɛ-pɩyalʋ sɩ, mbʋ pʋyɔɔ yɔ ɛhɩnɩ ɛ-yɔɔ. 20 Nɛ ɛkʋyɩ ɖoo hɛkʋ taa nɛ ɛkpaɣ man-pɩyalʋ mɔn-cɔlɔ, alɩwaatʋ ndʋ monɖowaɣ yɔ, nɛ ɛhɩzɩ-ɩ ɛ-nɔkɔyʋʋ taa, nɛ ɛhɩzɩ ɛ-pɩyalʋ weyi ɛsɩba yɔ mɔ-nɔkɔyʋʋ taa. 21 Mankʋyɩ tanaŋ tɛɛ se maha man-pɩyalʋ hɩɖɛ lɛ, mana se ɛsɩba. Peeɖe mewili-i camɩyɛ tanaŋ ŋgʋ kɩ-tɛɛ nɛ mana se ɛtɩkɛ man-pɩyalʋ weyi maalʋlaa yɔ.» 22 Ɛlɛ halʋ lɛlʋ yɔɔdɩ se: «Aayɩ, man-pɩyalʋ lɛ weyi ɛwɛnɩ ɛ-ɛsa yɔ, nɛ ña-pɩyalʋ lɛ weyi ɛsɩba yɔ!» Ɛlɛ halʋ kajalaɣ ñɩnʋ wɛɛ nɛ ɛyɔɔdʋʋ se: «Aayɩ, ña-pɩyalʋ lɛ weyi ɛsɩba yɔ, nɛ man-pɩyalʋ lɛ weyi ɛwɛnɩ ɛ-ɛsa yɔ.» Mbʋ pɛwɛɛ nɛ pɔhɔŋ tɔm wiyaʋ ɛsɩndaa.
23 Ðɩnɛ ɛlɛ, wiyaʋ yɔɔdɩ se: «Ɛnɛ ɛyɔɔdʋʋ se: “Man-pɩyalʋ lɛ weyi ɛwɛnɩ ɛ-ɛsa yɔ, nɛ ña-pɩyalʋ lɛ weyi ɛsɩba yɔ!” Nɛ lɛlʋ ñɔyɔɔdʋʋ se: “Aayɩ, ña-pɩyalʋ lɛ weyi ɛsɩba yɔ, nɛ man-pɩyalʋ lɛ weyi ɛwɛnɩ ɛ-ɛsa yɔ!”» 24 Wiyaʋ yɔɔdɩ se: «Ɩkɔnɩ-m laɣɖɛ.» Nɛ pɔkɔnɩ wiyaʋ laɣɖɛ. 25 Nɛ wiyaʋ yɔɔdɩ se: «Ɩsɛtɩ pɩɣa ŋga kɛwɛnɩ kɛ-ɛsa yɔ nabʋlɛ, nɛ ɩcɛlɩ hɔɔlʋʋ kʋɖʋmʋʋ halʋ lɛlʋ nɛ hɔɔlʋʋ lɛɛkʋ halʋ lɛlʋ.» 26 Kpaagbaa mbʋ lɛ, halʋ weyi ɛ-pɩyalʋ kaawɛnɩ ɛ-ɛsa yɔ etendi wiyaʋ, mbʋ pʋyɔɔ yɔ sɔɔlɩm mbʋ ɛɛwɛnɩ ɛ-pɩyalʋ yɔɔ yɔ piseɣti-i. Ɛyɔɔdaa se: «Mentendi-ŋ, man-kɩbaɣlʋ! Ɩcɛlɩ-ɩ pɩɣa ŋga kɛwɛnɩ kɛ-ɛsa yɔ! Ɩtaakʋ-kɛ!» Ɛlɛ halʋ lɛlʋ ñɛwɛɛ nɛ ɛyɔɔdʋʋ se: «Kaakaɣ kɛʋ ma-ñɩŋga nɛ kaakaɣ kɛʋ ɖɔɖɔ ña-ñɩŋga! Pɛsɛtɩ-kɛ nabʋlɛ!» 27 Ðɩnɛ ɛlɛ, wiyaʋ cosi se: «Ɩcɛlɩ pɩɣa ŋga kɛwɛnɩ kɛ-ɛsa yɔ halʋ kajalaɣ ñɩnʋ! Ɩtaakʋ-kɛ, mbʋ pʋyɔɔ yɔ ɛnʋ kɛnɩ ko-ɖoo.»
28 Nɛ Izrayɛɛlɩ kpeekpe nɩɩ ɛzɩma wiyaʋ hʋ tɔm ndʋ yɔ, nɛ wiyaʋ tɔm ɖɩɣzɩ-wɛ,*+ mbʋ pʋyɔɔ yɔ panawa se ɛwɛnɩ Ɛsɔ lɔŋsɩnɖɛ se ɛhʋʋ tɔm siɣsiɣ.+