Samɩyɛɛlɩ takayaɣ naalɛ ñɩŋga

12 Peeɖe Yehowa tiyi Naataanɩ+ Daviid cɔlɔ. Naataanɩ sʋʋ Daviid cɔlɔ+ nɛ eheyi-i se: «Abalaa nabɛyɛ 2 kaawɛ tɛtʋ natʋyʋ taa, kʋɖʋm kɛ ñɩm tʋ nɛ lɛlʋ ñɛkɛ kʋñɔndʋ. 2 Ñɩm tʋ kaawɛnɩ heŋ nɛ naŋ sakɩyɛ kpem;+ 3 ɛlɛ kʋñɔndʋ ñataawɛɛnɩ nabʋyʋ nɛ pɩtasɩnɩ heɣa halɩñɩŋga cikpelaɣ nakɛyɛ; ɛyabɩ-kɛ kɩyabʋ.+ Ɛcɔŋnaɣ kɔ-yɔɔ, nɛ ɛ nɛ ɛ-pɩyalaa pɔ-cɔlɔ kaawɛɛ nɛ kapaɣlɩ. Kɔtɔkaɣ tɔɔnaɣ ŋga ɛɛwɛnɩ pazɩ yɔ nɛ kɔñɔʋ ɛ-kɔpʋ taa nɛ koɖou ɛ-nɔkɔyʋʋ taa. Kapɩsɩ ɛzɩ ɛ-pɛlɛ yɔ. 4 Pʋwayɩ lɛ, ɛgɔm nɔɔyʋ kɔɔ ñɩm tʋ tɛ, ɛlɛ ɛtɩkpa ɛ-maɣmaɣ e-heŋ taa nɔɔyʋ yaa ɛ-naŋ taa nɔɔyʋ se ɛlabɩnɩ tɔɔnaɣ ɛgɔm weyi ɛkɔm ɛ-tɛ yɔ. Ɛlɛ kʋñɔndʋ heɣa ɛkpawa nɛ ɛlabɩnɩ tɔɔnaɣ ɛgɔm weyi ɛkɔm ɛ-tɛ yɔ.»+

5 Peeɖe Daviid kɔ pana siŋŋ nɛ abalʋ ɛnʋ, nɛ eheyi Naataanɩ se: «Yehowa ñɩtʋʋ nɛ ɛwɛɛ wezuu yɔ,+ abalʋ weyi ɛlabɩ mbʋ yɔ, ɛmʋnɩ sɩm! 6 Nɛ pɩwɛɛ se ɛhɛyɩ heɣa ŋga kɔ-yɔɔ tam 4,+ mbʋ pʋyɔɔ yɔ ɛlabɩ lakasɩ nzɩ nɛ ɛtɩwɩlɩ se ɛnaɣ ɛyaa pʋtɔdɩyɛ.»

7 Ðɩnɛ ɛlɛ Naataanɩ heyi Daviid se: «Ñɛkɛnɩ abalʋ ɛnʋ! Tɔm tʋnɛ Izrayɛɛlɩ tɛ Ɛsɔ Yehowa yɔɔdʋʋ: “Ma-maɣmaɣ matanɩ-ŋ num nɛ ŋpɩsɩ Izrayɛɛlɩ wiyaʋ,+ nɛ moholi-ŋ Sɔɔlɩ nesi tɛɛ.+ 8 Maasɔɔlɩ faaa nɛ mɛncɛlɩ-ŋ ña-tʋ ɖɩɣa+ nɛ mansɩɩ ña-tʋ halaa ñɔ-nɔkɔyʋʋ taa,+ nɛ mɛncɛlɩ-ŋ Izrayɛɛlɩ ɖɩɣa nɛ Yuuda ɖɩɣa.+ Nɛ ye pɩtɩɖɔɔ yɔ maasɔɔlɩ faaa se malabɩ-ŋ mbʋ pɩkpaɖɩ mbʋ yɔ.+ 9 Ɛbɛ yɔɔ ŋnim Yehowa tɔm nɛ ŋla mbʋ pɩfɛyɩ ɖeu yɔ ɛ-ɛsɩndaa? Ŋkʋ Hɛɛtɩ tʋ Uriya nɛ laɣɖɛ.+ Nɛ ŋtɩŋnɩ Amooni mba laɣɖɛ yɔɔ nɛ ŋkʋ-ɩ lɛ,+ ŋkpaɣ ɛ-halʋ nɛ ɛpɩsɩ ña-halʋ.+ 10 Lɛɛlɛɛyɔ lɛ, laɣɖɛ ɛɛkaɣ posinuu ña-ɖɩɣa kpa,+ mbʋ pʋyɔɔ yɔ ŋnimi-m nɛ ŋkpaɣ Hɛɛtɩ tʋ Uriya halʋ nɛ ɛpɩsɩ ña-halʋ.” 11 Tɔm tʋnɛ Yehowa yɔɔdʋʋ: “Na, mankaɣ yebu nɛ asɛyʋʋ lɩɩnɩ ña-maɣmaɣ ña-ɖɩɣa taa nɛ kɩkɔɔ ñɔ-yɔɔ;+ nɛ mankaɣ kpaɣʋ ña-halaa nɛ mɛncɛlɩ-wɛ abalʋ lɛlʋ* ña-maɣmaɣ ñɛ-ɛsɩndaa,+ nɛ ɛkaɣ sʋnʋʋ ña-halaa wɩsɩ taa kaɣlaa.*+ 12 Paa ŋlabɩ lakasɩ nzɩ mɛsaɣ tɛɛ yɔ,+ ma lɛ, mankaɣ pʋnɛ labʋ Izrayɛɛlɩ kpeekpe ɛsɩndaa, nɛ wɩsɩ taa kaɣlaa.”»*

13 Peeɖe Daviid heyi Naataanɩ se: «Malabɩ kɩwɛɛkɩm Yehowa ɛsɩndaa.»+ Naataanɩ cosi Daviid se: «Yehowa ɖɔɖɔ kpeɣ-ŋ ña-kɩwɛɛkɩm.*+ Ŋŋkaɣ sɩbʋ.+ 14 Paa mbʋ yɔ, ɛzɩma ŋlabɩ kaañamtʋ siŋŋ Yehowa yɔɔ tɔm tʋnɛ tɩ-taa yɔ, pɩɣa ŋga palʋlɩ-ŋ yɔ pɩtʋʋ fɛyɩ se kakaɣ sɩbʋ.»

15 Pʋwayɩ lɛ, Naataanɩ kpe ɛ-ɖɩɣa.

Nɛ Yehowa la nɛ pɩɣa ŋga Uriya halʋ lʋlɩ Daviid yɔ kahɩnɩ kʋdɔŋ. 16 Daviid tendi Ɛsɔ abalɩbɩɣa ŋga kɔ-yɔɔ. Daviid paɣzɩ nɔɔ hɔkʋʋ siŋŋ, nɛ ɛsʋʋ ɖoo taa lɛ, tataa ɛhɩnɩɣ ɖoo pilim.+ 17 Nɛ ɛ-ɖɩɣa taa ɛzʋtʋyaa wolo nɛ pasɩŋ ɛ-yɔɔ nɛ pañaɣ pana se pakʋsɩ-ɩ tataa, ɛlɛ ekizi; nɛ ɛɛtasɩɣ kpɛndʋʋ pɔ-yɔɔ nɛ pɔtɔkɩ tɔɔnaɣ. 18 Kɩyakʋ 7 ñɩŋgʋ wiye lɛ pɩɣa ŋga kasɩ, ɛlɛ sɔɔndʋ kpaɣaɣ Daviid lɩmɖʋyaa se peheyi-i se pɩɣa sɩba. Pɔyɔɔdaɣ se: «Alɩwaatʋ ndʋ pɩɣa kaawɛnɩ kɛ-ɛsa yɔ ɖɩyɔɔdɩnɩ-ɩ, ɛlɛ etiwelisini-ɖʋ. Lɛɛlɛɛyɔ ɛzɩma ɖɩlakɩ nɛ ɖiheyi-i se pɩɣa sɩba? Ɛtaakɔɔ nɛ ɛla lakasɩ kɩdɛkɛdɩsɩ nasɩyɩ.»

19 Alɩwaatʋ ndʋ Daviid nawa se ɛ-lɩmɖʋyaa wɛɛ nɛ pɛwɛɛtɩɣ ɖama tɔm lɛ, ɛnɩɩ pɩ-taa se pɩɣa ŋga kasɩba. Daviid pɔzɩ ɛ-lɩmɖʋyaa se: «Pɩɣa ŋga kasɩba?» Paba cosi-i se: «Ɛɛɛ, kasɩba.» 20 Daviid kʋyɩ tataa. Ɛsɔ lɩm, ɛtaa ɛ-yɔɔ num,+ ɛlɛɣzɩ e-wondu kususutu, nɛ ɛsʋʋ Yehowa ɖɩɣa taa+ nɛ eluŋ nɛ ɛpa ɛ-ɛsa nɛ tɛtʋ. Pʋwayɩ lɛ, ewolo ɛ-maɣmaɣ ɛ-ɖɩɣa* taa nɛ ɛpɔzɩ se pɔkɔnɩ-ɩ tɔɔnaɣ, nɛ pɔkɔnɩ-ɩ kɛ nɛ ɛtɔɔ. 21 Ɛ-lɩmɖʋyaa pɔzɩ-ɩ se: «Ɛbɛ yɔɔ ŋlabɩ mbʋ? Alɩwaatʋ ndʋ pɩɣa kaawɛnɩ kɛ-ɛsa lɛ, ŋhɔkɩ nɔɔ nɛ ŋwɛɛ wiu yɔɔ; ɛlɛ pɩɣa tɩɩsɩba lɛ, ŋcaŋ ŋkʋyɩ nɛ ŋtɔɔ tɔɔnaɣ.» 22 Ecosi se: «Alɩwaatʋ ndʋ pɩɣa kaawɛnɩ kɛ-ɛsa lɛ, mɔhɔkɩ nɔɔ+ nɛ mɛwɛɛ wiu yɔɔ mbʋ pʋyɔɔ yɔ mamaɣzaɣ se: “Asɩma? Pɩtɩla yɔ, Yehowa kaɣ naʋ man-pʋtɔdɩyɛ nɛ eyele nɛ pɩɣa wɛɛ wezuu.”+ 23 Lɛɛlɛɛyɔ pɩɣa tɛm sɩbʋ, ɛbɛ yɔɔ pɩwɛɛ se mɔhɔkɩ nɔɔ? Manpɩzɩɣ nɛ manɖaɣnɩ-kɛ pɩsɩnʋʋ na?+ Makaɣnɩ kɔ-cɔlɔ wobu pɩlaʋ taa,+ ɛlɛ kaakaɣ pɩsʋʋ mɔn-cɔlɔ.»+

24 Nɛ Daviid hɛzɩ ɛ-halʋ Bat-Seeba+ laŋɩyɛ. Ewolo ɛ-cɔlɔ nɛ ɛ nɛ ɩ pasʋʋ. Pʋwayɩ lɛ, Bat-Seeba lʋlɩ-ɩ abalɩbɩɣa, nɛ Daviid yaa-kɛ se Salomɔɔ.*+ Nɛ Yehowa sɔɔlɩ-kɛ,+ 25 nɛ etiyi nayʋ Naataanɩ+ se ɛyaa-kɛ se Yedidiya,* mbʋ pʋyɔɔ yɔ Yehowa sɔɔlɩ-kɛ.

26 Yowaabʋ wolo pɩ-yɔɔ nɛ eyouni Amooni mba+ tɛ Raba,+ nɛ ɛmʋ kewiyaɣ tɛtʋ.+ 27 Nɛ Yowaabʋ tiyi ɛyaa Daviid cɔlɔ se powolo nɛ peheyi-i se: «Moyoni Raba,+ nɛ mamʋ lɩm tɛtʋ.* 28 Lɛɛlɛɛyɔ lɛ, kpeɣli sɔɔjanaa mba pakazaa yɔ nɛ ŋwolo tɛtʋ ndʋ tɩ-wayɩ nɛ ŋmʋ-tʋ. Pɩtɩkɛ mbʋ yɔ, makaɣnɩ tɛtʋ ndʋ mʋʋ, nɛ samtʋ kaɣ pɩsɩnʋʋ mɔ-yɔɔ.»*

29 Peeɖe Daviid kpeɣli sɔɔjanaa tɩŋa, nɛ ewolo Raba wayɩ nɛ eyooni-kʋ nɛ ɛmʋ-kʋ. 30 Nɛ ekuli Malɩkam awiya hulaɣ ɛlɛ ñʋʋ taa. Ko-yuŋ kɛ sika talaŋ kʋɖʋmʋʋ,* pacanɩ-kɛ nɛ ñɩɣlɩm pɛɛ, nɛ papam-kɛ Daviid ñʋʋ taa. Ɛkpaɣ ɖɔɖɔ wondu sakɩyɛ+ tɛtʋ ndʋ tɩ-taa.+ 31 Nɛ ɛlɩzɩ ɛyaa mba paawɛ tɩ-taa yɔ nɛ ɛpɩsɩ-wɛ pɛɛ saɣyaa, mba palakɩnɩ tʋmɩyɛ ñɩɣyʋʋ wondu ndʋ tɩwɛ lɔŋ yɔ nɛ mba palakɩnɩ tʋmɩyɛ ñɩɣyʋʋ laɖa yɔ, nɛ mba palɩzɩɣ filikinaa yɔ. Mbʋ ɛlabɩ Amooni mba tɛtʋ tɩŋa. Pʋwayɩ lɛ, Daviid nɛ ɛ-sɔɔjanaa kpeekpe papɩsɩ Yeruzalɛm.