Filiipi mba
1 Ma Pɔɔlɩ nɛ Timootee, Krɩstʋ Yesu yomaa, ɖetiyiɣni takayaɣ kanɛ ɛyaa kiɖeɖema tɩŋa mba pa nɛ Krɩstʋ Yesu pɛwɛ nɔɔ kʋɖʋmaɣ nɛ pɛwɛɛ Filiipi+ yɔ, pɩkpɛndɩnɩ ɛgbɛyɛ yɔɔ cɔnɩyaa nɛ ɛgbɛyɛ taa tʋmlaɖaa:+
2 Tɛtɛ nɛ ihiɣ lootiye nɛ laŋhɛzɩyɛ nɖɩ ɖɩlɩnɩ ɖa-Caa Ɛsɔ nɛ Kɩbaɣlʋ Yesu Krɩstʋ pɔ-cɔlɔ yɔ.
3 Mɔntɔzʋʋ mɩ-yɔɔ lɛ, mɛnsɛɣ mɛ-Ɛsɔ paa ɛzɩmtaa se ɛlabaɣ lɛ 4 alɩwaatʋ ndʋ payɩ mentendiɣ Ɛsɔ mɩ-tɩŋa payɩ mɩ-yɔɔ yɔ. Mentendiɣ-i paa ɛzɩmtaa nɛ taa leleŋ,+ 5 ɛzɩma ɩɖʋ nesi tɔm kɩbandʋ* kpaɣnɩ kajalaɣ kɩyakʋ wiye nɛ pɩkɔɔ nɛ pɩtalɩ alɩwaatʋ tʋnɛ yɔ pɩ-yɔɔ. 6 Mbʋ pʋyɔɔ yɔ, man-taa tɛmnɩ tɔm tʋnɛ tɩ-maɣmaɣ se weyi ɛpaɣzɩ tʋmɩyɛ kɩbanɖɛ mɩ-taa yɔ, pɩɩtalɩɣ Krɩstʋ Yesu kɩyakʋ lɛ,+ ɛtɛm-ɖɩ.+ 7 Pɩmʋnaa se mamaɣzɩ mbʋ mɩ-tɩŋa mɩ-yɔɔ, mbʋ pʋyɔɔ yɔ ɩwɛ ma-laŋɩyɛ taa, mɩ mba ma nɛ mɩ ɖɩka lootiye man-salaka kpasɩ taa+ nɛ tɔm kɩbandʋ yɔɔ lʋbʋ nɛ ɛzɩma ɖiyeba se patɩlɩ-tʋ paɣtʋ ɛsɩndaa yɔ pɩ-taa yɔ.+
8 Mbʋ pʋyɔɔ yɔ, Ɛsɔ kɛ ma-aseɣɖe tʋ se me-liu wɛ pɩŋŋ se mana mɩ-tɩŋa, mbʋ pʋyɔɔ yɔ mɔnsɔɔlɩ-mɩ siŋŋ ɛzɩ Krɩstʋ Yesu sɔɔlʋʋ-mɩ yɔ. 9 Nɛ pʋnɛ pɩ-yɔɔ mɛwɛ tɩmʋʋ yɔɔ, se mɩ-sɔɔlɩm ɛpaɣlɩ siŋŋ nɛ pɩkɩlɩ,+ pɩ nɛ sɩmtʋ toovenim ñɩndʋ+ nɛ lɛɣtʋ siŋŋ;+ 10 se ɩpɩzɩ nɛ ɩtɩlɩ mbʋ pɩ-tɔm kɩlɩ cɛyʋʋ yɔ,+ se pɩsa nɛ ɩwɛɛ kele kele nɛ ɩtaala nɛ pituuli lalaa,+ pɩkɔɔ nɛ pɩtalɩ Krɩstʋ kɩyakʋ wiye; 11 nɛ ɖɔɖɔ se siɣsiɣ wɛtʋ piye esu mɩ-taa, nɖɩ pɩtɩŋnɩ Yesu Krɩstʋ yɔɔ nɛ ɖɩwɛɛ yɔ,+ se pɩɖʋ Ɛsɔ hɩɖɛ nɛ pɩsamɩ-ɩ.
12 Lɛɛlɛɛyɔ lɛ, koobiya, mɔnsɔɔlaa se ɩtɩlɩ se mɛ-wɛtʋ kitaa nɛ tɩha waɖɛ se tɔm kɩbandʋ ewobini ɛsɩndaa, 13 nɛ piyeba nɛ Wiyaʋ yɔɔ Kandɩyaa tɩŋa nɛ mba pɩkazaa yɔ pa-tɩŋa patɩlɩ kaɣlaa+ se Krɩstʋ yɔɔ paɖʋ-m salaka kpasɩ.+ 14 Lɛɛlɛɛyɔ lɛ, man-salaka kpasɩ yeba nɛ koobiya sakɩyɛ mba pɛwɛ Kɩbaɣlʋ taa yɔ, pakpa ɖoŋ; nɛ pɛwɛɛ pɛtɛzɩɣ wɛʋ abalɩtʋ nɛ posusuu Ɛsɔ tɔm nɛ sɔɔndʋ ɛɛkpaɣ-wɛ.
15 Toovenim taa lɛ, ɛsɩsɛmɩyɛ nɛ ɖama pɛyɩnʋʋ yɔɔ nabɛyɛ ɖiɣni susuu Krɩstʋ tɔm; ɛlɛ lalaa lɛ, posusuu-tʋ nɛ lɩmaɣza kɩbana. 16 Sɔɔlɩm yɔɔ kɛdɛzaɣ ñɩma ɖiɣni susuu Krɩstʋ tɔm, mbʋ pʋyɔɔ yɔ panawa se palɩzɩ-m se malʋ tɔm kɩbandʋ yɔɔ;+ 17 ɛlɛ kajalaɣ ñɩma lɛ, posusuu-tʋ nɛ nɔɔhɔnɖɛ; pɩtɩkɛ lɩmaɣzɩyɛ kɩbanɖɛ yɔɔ posusuu-tʋ, mbʋ pʋyɔɔ yɔ pɛwɛɛ nɛ pañɩnɩɣ se paɖʋ-m kʋñɔŋ man-salaka kpasɩ taa. 18 Ɛbɛ lɩ pɩ-taa? Mbʋ pɩlɩ pɩ-taa yɔ mbʋ yɔ: Paa hɔɔlʋʋ ŋgʋ kɩ-taa lɛ, paa pɩtɩɩkɛ lɩmaɣza kɩdɛkɛda yaa lɩmaɣza kɩbana yɔɔ palakɩ mbʋ yɔ, peɖiɣni Krɩstʋ tɔm susuu, nɛ man-taa lakɩ leleŋ pɩ-yɔɔ. Toovenim taa lɛ, man-taa kaɣ wɛʋ nɛ pɩlakɩ leleŋ ɖɔɖɔ, 19 mbʋ pʋyɔɔ yɔ manawa se pɩkaɣ yebu nɛ mi-tenduu+ nɛ sɩnʋʋ mbʋ pɩlɩnɩ Yesu Krɩstʋ fezuu cɔlɔ yɔ+ pʋyɔɔ lɛ mehiɣ ñʋʋ yabʋ. 20 Pɩlabɩ nɔɔ kʋɖʋmaɣ nɛ mbʋ manɖaŋ kpam yɔ nɛ lidaʋ ŋgʋ mɛwɛna se fɛyɛ ɛɛkaɣ-m kpaʋ hɔɔlʋʋ nakʋyʋ taa yɔ. Ɛlɛ tɔm ndʋ mɔyɔɔdʋʋ kaalɛyɩtʋ yɔ tɩ-yɔɔ lɛ, pakaɣ tɩŋnʋʋ mon-tomnaɣ yɔɔ nɛ pasa Krɩstʋ lɛɛlɛɛyɔ, ɛzɩ patɩɩlakʋʋ tam yɔ, paa mɛwɛ wezuu yaa mansɩba yɔ.+
21 Mbʋ pʋyɔɔ yɔ mɔ-hɔɔlʋʋ taa lɛ, ye mancakɩ wezuu yɔ, Krɩstʋ yɔɔ mancakɩ-kʋ;+ nɛ ye mansɩkɩ yɔ, pɩkɛnɩ kɛzɛɣa.+ 22 Nɛ ye pɩwɛɛ se mowolo pɩ-yɔɔ nɛ mancaɣ wezuu tomnaɣ taa yɔ, pɩkɛnɩ piye nɖɩ man-tʋmɩyɛ lʋlaa yɔ; paa mbʋ yɔ, mbʋ pɩwɛɛ se malɩzɩ yɔ, maayeki se nɔɔyʋ ɛtɩlɩ-pʋ. 23 Pɩwɛ-m kaɖɛ se malɩzɩ wondu tʋnɛ tɩ-naalɛ tɩ-hɛkʋ taa, mbʋ pʋyɔɔ yɔ me-liu wɛɛ se poholi-m nɛ mɛwɛɛ Krɩstʋ cɔlɔ,+ nɛ toovenim taa lɛ, mbʋ kɩlɩnɩ ɖeu.+ 24 Ɛlɛ mɛ-ɛsɩndaa lɛ, pɩcɛyaa se mancaɣ tomnaɣ taa mɩ-yɔɔ nɛ pɩkɩlɩ. 25 Ye mbʋ, ɛzɩma man-taa tɛmnɩ-tʋ yɔ, manawa se mankaɣ caɣʋ nɛ mɛwɛɛ mɩ-tɩŋa mɩ-cɔlɔ nɛ ɩpɩzɩ nɛ iwobini ɛsɩndaa nɛ ɩwɛɛ taa leleŋ taa tisuu taa, 26 se pɩsa nɛ mɔ-yɔɔ lɛ, mɩ-laŋhʋlʋmɩyɛ paɣlɩ Krɩstʋ Yesu taa nɛ pɩkɩlɩ, alɩwaatʋ ndʋ mantasɩɣ wɛʋ mɩ-cɔlɔ yɔ.
27 Mbʋ pi-ɖeke mañɩnɩɣ yɔ lɛ se, ɩɖɔ ɖɔnɛ nɖɩ ɖɩmʋnɩ* Krɩstʋ yɔɔ tɔm kɩbandʋ yɔ,+ se pɩsa nɛ paa mɔnkɔm nɛ mana-mɩ yaa mɛnfɛyɩ mɩ-cɔlɔ yɔ, manpɩzɩ nɛ manɩɩ se ɩɖɔkɩ kpam fezuu kʋɖʋmʋʋ taa, nɔɔ kʋɖʋmaɣ taa,*+ nɛ ɩkpɛndaa nɛ ɩlʋkɩ tisuu mbʋ ɩwɛnɩ tɔm kɩbandʋ yɔɔ yɔ pɩ-yɔɔ; 28 nɛ sɔɔndʋ ɛtaakpa-mɩ nɛ mi-koyindinaa hɔɔlʋʋ nakʋyʋ taa. Mbʋ wɩlɩɣnɩ ɖeyi ɖeyi se paɖɩzɩɣ-wɛ,+ ɛlɛ mɩ lɛ ihikiɣ ñʋʋ yabʋ;+ nɛ Ɛsɔ cɔlɔ pɩlɩnaa. 29 Mbʋ pʋyɔɔ yɔ paha-mɩ waɖɛ Krɩstʋ yɔɔ, patɩha-mɩ ɖɩ se ɩwɛɛnɩ tisuu ɛ-yɔɔ yem, ɛlɛ paha-mɩ ɖɩ se ɩtɔɔ kʋñɔŋ ɛ-yɔɔ ɖɔɖɔ.+ 30 Mbʋ pʋyɔɔ yɔ ɩwɛɛ nɛ ɩlʋkɩ lʋbɩyɛ kʋɖʋmɖɩyɛ nɖɩ ɩɩna malʋkaɣ yɔ,+ nɖɩ ɩnɩɣ lɛɛlɛɛyɔ se menɖiɣni-ɖɩ lʋbʋ halɩ nɛ sɔnɔ yɔ.