Ozee
1 Yehowa tɔm talɩ Beeri pɩyalʋ Ozee,* Yuuda awiya+ Uziya,+ Yotam,+ Ahaazɩ+ nɛ Ezekiyaasɩ+ pa-alɩwaatʋ taa, nɛ Izrayɛɛlɩ wiyaʋ Yerobowam,+ Yowaasɩ+ pɩyalʋ alɩwaatʋ taa. 2 Alɩwaatʋ ndʋ Yehowa paɣzɩ tɩŋnʋʋ Ozee yɔɔ nɛ ɛyɔɔdʋʋnɩ samaɣ yɔ, Yehowa heyi Ozee se: «Wolo, kpaɣ halʋ hayitu laɖʋ* nɛ ɛlʋlɩ-ŋ hayitu piya,* mbʋ pʋyɔɔ yɔ hayitu* yɔɔ lɛ, ɛjaɖɛ posi ɖɩ-tɩ kiya nɛ Yehowa nɛ ɖɩɩtasɩɣ-ɩ tɩŋʋʋ.»+
3 Nɛ ewolo nɛ ɛkpaɣ Dibilayim pɛlɛ Gomɛɛrɩ, nɛ ɛlɛ haɣ hoɣa nɛ ɛlʋlɩ-ɩ abalɩbɩɣa.
4 Nɛ Yehowa heyi-i se: «Yaa-kɛ se Yizreyɛɛlɩ,* mbʋ pʋyɔɔ yɔ pɩkazɩ pazɩ mankaɣ pɔzʋʋ akɔnta Yehu+ ɖɩɣa, Yizreyɛɛlɩ calɩm kpɛdʋʋ lakasɩ yɔɔ, nɛ mankaɣ yebu nɛ Izrayɛɛlɩ ɖɩɣa kewiyitu tɔɔʋ sɩɩ tɩnaɣ.+ 5 Kɩyakʋ ŋgʋ ki-wiye, mankaɣ pɛlʋʋ Izrayɛɛlɩ tɔʋ Yizreyɛɛlɩ Fɛɛʋ taa.»
6 Halʋ ɖaɣnɩ haɣʋ hoɣa nɛ ɛlʋlɩ halɩbɩɣa. Nɛ Ɛsɔ heyi Ozee se: «Yaa-kɛ se Lo-Ruhama,* mbʋ pʋyɔɔ yɔ maatasɩɣ naʋ Izrayɛɛlɩ ɖɩɣa pʋtɔdɩyɛ;+ paa pɩɩla ɛzɩma yɔ mankaɣ-wɛ ɖɔɔnʋʋ.+ 7 Ɛlɛ mankaɣ naʋ Yuuda ɖɩɣa pʋtɔdɩyɛ,+ nɛ ma Yehowa, pɛ-Ɛsɔ, makaɣnɩ yabʋ pa-ñʋʋ;+ maakaɣ tɩŋnʋʋ tɔʋ yaa laɣɖɛ yaa you yaa kpaŋnaŋ, yaa kpaŋnaŋ yɔɔ caɣyaa yɔɔ nɛ maya pa-ñʋʋ.»+
8 Ɛcɛbɩ Lo-Ruhama hɩɖɛ lɛ, ɛhaɣ hoɣa nɛ ɛlʋlɩ abalɩbɩɣa. 9 Nɛ Ɛsɔ tɔ se: «Yaa-kɛ se Lo-Amii,* mbʋ pʋyɔɔ yɔ ɩtɩkɛ man-samaɣ, nɛ maakaɣ kɛʋ mɩ-Ɛsɔ.
10 «Nɛ Izrayɛɛlɩ samaɣ* kaɣ ɖɔʋ ɛzɩ teŋgu nɔɔ kañɩŋa pee yɔ, wena paapɩzɩɣ nɛ pamaɣzɩ yaa pakalɩ yɔ.+ Nɛ lone nɖɩ ɖɩ-taa maaheyi-wɛ se: “Ɩtɩkɛ man-samaɣ”+ yɔ, ɖɩ-taa mankaɣ-wɛ heyuu se: “Ɩkɛ Ɛsɔ ɛsadʋ pɩyalaa.”+ 11 Nɛ Yuuda samaɣ nɛ Izrayɛɛlɩ samaɣ pakaɣ kpɛndʋʋ nɛ pɛwɛɛ nɔɔ kʋɖʋmaɣ taa,+ nɛ pakaɣ pa-tɩ lɩzʋʋ ñʋʋdʋ kʋɖʋm nɛ palɩɩ ɛjaɖɛ taa, mbʋ pʋyɔɔ yɔ Yizreyɛɛlɩ+ kɩyakʋ kaɣ kɛʋ kɩyakʋ sɔsɔʋ.