Awiya takayaɣ kajalaɣ ñɩŋga
14 Alɩwaatʋ ndʋ tɩ-taa lɛ, Yerobowam pɩyalʋ Abiya hɩnɩ kʋdɔŋ. 2 Peeɖe Yerobowam heyi ɛ-halʋ se: «Mentendi-ŋ, kʋyɩ nɛ ŋlɛɣzɩ ñɛ-wɛtʋ nɛ pataatɩlɩ se ŋkɛ Yerobowam halʋ, nɛ ŋwolo Siiloo. Na! Nayʋ Ahiya wɛ peeɖe. Ɛnʋ kaaheyini-m se mankaɣ kɛʋ samaɣ kanɛ ke-wiyaʋ.+ 3 Kpɛndɩnɩ kpɔnɔnaa 10, kakayɩsɩ, kokoɖe nɖɩ ɖɩ-taa nɛ tʋŋ num yɔ, nɛ ŋwolo ɛ-cɔlɔ. Nɛ ɛkaɣ-ŋ heyuu mbʋ pɩkaɣ talʋʋ abalɩbɩɣa kanɛ yɔ.»
4 Yerobowam halʋ la ɛzɩ ɛ-walʋ yɔɔdʋʋ yɔ. Ɛkʋyɩ nɛ ewolo Siiloo+ nɛ ɛsʋʋ Ahiya ɖɩɣa taa. Ahiya ɛsa kaani yem, nɛ ɛtaapɩzɩɣ naʋ mbʋ pʋyɔɔ yɔ ɛkpadɩyaa.
5 Ɛlɛ Yehowa kaaheyi Ahiya se: «Yerobowam halʋ ɖiɣni kɔm se ɛpɔzɩ-ŋ tɔm pɩlɩɩnɩ ɛ-pɩyalʋ yɔɔ, mbʋ pʋyɔɔ yɔ pɩwɩɣ-ɩ. Mankaɣ-ŋ heyuu tɔm ndʋ pɩwɛɛ se ŋheyi-i yɔ.* Alɩwaatʋ ndʋ ɛtalɩɣ yɔ, ɛkaɣ labʋ se pataatɩlɩ-ɩ.»
6 Ahiya tɩɩnɩ ɛ-naataŋ taŋ alɩwaatʋ ndʋ ɛsʋwaɣ nɔnɔɔ taa yɔ lɛ, ɛyɔɔdɩ se: «Yerobowam halʋ, sʋʋ. Ɛbɛ yɔɔ ŋlakɩ se pataatɩlɩ-ŋ? Paɖʋ-m se meheyi-ŋ tɔm kɩdɛkɛdɩtʋ* natʋyʋ. 7 Wolo nɛ ŋheyi Yerobowam se: “Tɔm tʋnɛ Izrayɛɛlɩ tɛ Ɛsɔ Yehowa yɔɔdʋʋ: ‘Malɩzɩ-ŋ* ña-samaɣ hɛkʋ taa se meyele nɛ ŋpɩsɩ man-samaɣ Izrayɛɛlɩ ɖiyiyu.+ 8 Pʋwayɩ lɛ, mɛlɛɣ kewiyaɣ Daviid ɖɩɣa nesi tɛɛ nɛ mɛncɛlɩ-ŋ kɛ.+ Ɛlɛ ŋtɩpɩsɩ ɛzɩ ma-lɩmɖʋyʋ Daviid yɔ. Ɛɛɖɔkɩ man-paɣtʋ nɛ ɛtɩŋ ma-wayɩ nɛ ɛ-laŋɩyɛ pilim, nɛ ɛla mbʋ pɩtʋʋzaa yɔ pi-ɖeke mɛ-ɛsɩndaa.+ 9 Ɛlɛ ŋlabɩ lakasɩ kɩdɛkɛdɩsɩ nɛ pɩkpaɖɩ mba payɩ paalɛyɩ-ŋ wɛʋ yɔ, nɛ ŋlu ña-tɩ ɛsɔ lɛlʋ nɛ ñɩɣtʋ sɩʋ kpelisi* se ŋɖʋ-m ɖɩwɩzɩyɛ,+ nɛ ŋha-m siɣye.+ 10 Pʋyɔɔ lɛ, mankaɣ kɔnʋʋ asɛyʋʋ Yerobowam ɖɩɣa yɔɔ, nɛ mankaɣ ɖɩzʋʋ abalaa* tɩŋa Yerobowam tɛ, pɩkpɛndɩnɩ pɩlabɩmwaa nɛ ajamaa Izrayɛɛlɩ taa, nɛ mankaɣ hazʋʋ Yerobowam ɖɩɣa kpɩlɩŋgbɩlɩ,+ ɛzɩ pahazʋʋ pɩndʋ nɛ pɩkɔɔ pɩsɩɩnɩ alɩwaatʋ ndʋ tɩtɛm caɣ caɣ yɔ! 11 Weyi ɛkɛ Yerobowam tɛ ɛyʋ yɔ, ye ɛsɩbɩ tɛtʋ taa yɔ, hasɩ kaɣ-ɩ tɔɔʋ; nɛ weyi ɛsɩkɩ ñɩtʋ taa yɔ, ɛsɔdaa sumasɩ kaɣ-ɩ tɔɔʋ, mbʋ pʋyɔɔ yɔ Yehowa yɔɔdɩnɩ-tʋ.’”
12 «Lɛɛlɛɛyɔ kʋyɩ; kpe ñɛ-tɛ. Alɩwaatʋ ndʋ ŋfɛyɩɣ nɩŋgbaŋaɣ tɛtʋ taa yɔ, pɩɣa ŋga kakaɣ sɩbʋ. 13 Izrayɛɛlɩ kpeekpe kaɣ caɣʋ kʋñɔwiye kɔ-yɔɔ nɛ pepim-kɛ, mbʋ pʋyɔɔ yɔ Yerobowam hɔʋ taa lɛ, ke-ɖeke pakaɣ hɩzʋʋ pɩlaʋ taa, mbʋ pʋyɔɔ yɔ Yerobowam hɔʋ taa lɛ, ke-ɖeke ka-taa Izrayɛɛlɩ tɛ Ɛsɔ Yehowa na nabʋyʋ mbʋ pɩwɛ ɖeu yɔ. 14 Yehowa kaɣ lɩzʋʋ ɛ-tɩ wiyaʋ nɔɔyʋ se eɖiyi Izrayɛɛlɩ. Wiyaʋ ɛnʋ ɛkaɣ ɖɩzʋʋ Yerobowam ɖɩɣa+ kpaɣnɩ kɩyakʋ ŋgʋ nɛ pɩɖɛɛ, ɛɛɛ, halɩ kpaɣnɩ lɛɛlɛɛyɔ. 15 Yehowa kaɣ hɔm Izrayɛɛlɩ nɩŋgbaŋʋʋ, nɛ kɩkaɣ wɛʋ ɛzɩ kañɩŋgbayaɣ ŋga pɩcɔzʋʋ-kɛ lɩm taa yɔ, nɛ ɛkaɣ Izrayɛɛlɩ kpɛzʋʋ ɛjaɖɛ kɩbanɖɛ ɖɩnɛ ɖɩ-taa, nɖɩ ɛha pɔ-cɔzɔnaa yɔ,+ nɛ ɛkaɣ-wɛ mɩzʋʋ Pɔɔ* wayɩ,+ mbʋ pʋyɔɔ yɔ palabɩ pe-sizikasɩ kiɖeɖesi,*+ nɛ paɖʋ Yehowa ɖɩwɩzɩyɛ. 16 Nɛ ɛkaɣ lɔʋ Izrayɛɛlɩ, kɩwɛɛkɩm mbʋ Yerobowam laba yɔ nɛ mbʋ eyeba nɛ Izrayɛɛlɩ la yɔ pʋyɔɔ.»+
17 Peeɖe Yerobowam halʋ kʋyaa nɛ ɛkpaɣ ɛ-nʋmɔʋ nɛ ɛtalɩ Tiriza. Ɛtɩɩtalɩ ɖɩɣa nɔnɔɔ taa lɛ, abalɩbɩɣa ŋga kasɩ. 18 Nɛ pepim-kɛ, nɛ Izrayɛɛlɩ kpeekpe caɣ kʋñɔwiye kɔ-yɔɔ, ɛzɩ tɔm ndʋ Yehowa kaatɩŋnɩ ɛ-lɩmɖʋyʋ, nayʋ Ahiya yɔɔ nɛ ɛyɔɔdɩ yɔ.
19 Nɛ Yerobowam yɔɔ tɔm ndʋ pɩkazaa yɔ, ɛzɩma ɛlabɩ you+ nɛ ɛzɩma ɛtɔɔ kewiyitu yɔ, pama pɩ-tɔm mbʋ pɩlakaɣ Izrayɛɛlɩ awiya alɩwaatʋ taa yɔ pɩ-takayaɣ taa. 20 Nɛ pɩnzɩ* nzɩ Yerobowam tɔɔ kewiyitu yɔ sɩkpɛndɩ pɩnzɩ 22, pʋwayɩ lɛ ɛsɩ;*+ nɛ ɛ-pɩyalʋ Naadaabʋ pɩsɩ wiyaʋ e-lone taa.+
21 Alɩwaatʋ ndʋ tɩ-taa lɛ, Salomɔɔ pɩyalʋ Robowam kaapɩsɩ wiyaʋ Yuuda. Robowam kaawɛnɩ pɩnzɩ 41 alɩwaatʋ ndʋ ɛpɩsɩ wiyaʋ yɔ, nɛ ɛtɔɔ kewiyitu pɩnzɩ 17 Yeruzalɛm, tɛtʋ ndʋ Yehowa kaalɩzɩ+ Izrayɛɛlɩ cejewe kpeekpe taa se ɛ-hɩɖɛ ɛwɛɛ peeɖe yɔ.+ Payaɣaɣ Robowam ɖoo se Amooni tʋ+ Naama. 22 Nɛ Yuuda lakaɣ mbʋ pɩfɛyɩ ɖeu yɔ Yehowa ɛsɩndaa,+ nɛ kɩwɛɛkɩm mbʋ palaba yɔ piyeba nɛ paɖʋ-ɩ ɖɩwɩzɩyɛ nɛ pɩkɩlɩ ɛzɩ pɔ-cɔzɔnaa kaalabʋ yɔ.+ 23 Mba ɖɔɖɔ powobi pɩ-yɔɔ nɛ pamaɣ pa-tɩ lona kʋkʋya, tilima kiɖeɖena, nɛ sizikasɩ kiɖeɖesi*+ paa piyaɣ kʋkʋyaɣ ŋga lɛ kɔ-yɔɔ+ nɛ tɩŋ weyi payɩ ɩwɛ hatʋ camɩyɛ yɔ ɩ-tɛɛ.+ 24 Templo taa abalaa hayitu laɖaa nabɛyɛ kaawɛ ɖɔɖɔ ɛjaɖɛ taa.+ Palakaɣ lakasɩ kɩdɛkɛdɩsɩ kpeekpe nzɩ ajɛɛ wena Yehowa kaaɖɔɔnɩ Izrayɛɛlɩ mba ɛsɩndaa yɔ alakaɣ yɔ.
25 Wiyaʋ Robowam kewiyitu tɔɔʋ pɩnaɣ 5 ñɩŋga taa, Ejipiti wiyaʋ Sisaakɩ+ kpawa nɛ eyooni Yeruzalɛm.+ 26 Ɛkpaɣ Yehowa ɖɩɣa taa ñɩm nɛ wiyaʋ ɖɩɣa taa ñɩm.+ Ɛkpaɣ pɩtɩŋa, pɩkpɛndɩnɩ sika kpayɩŋ weyi Salomɔɔ kaalaba yɔ ɩ-tɩŋa.+ 27 Peeɖe Wiyaʋ Robowam labɩ ñɩɣyʋʋ kɩsɛɛmʋʋ kpayɩŋ se ɛlɛɣzɩ i-lone taa, nɛ ɛɖʋzɩ-ɩ kandɩyaa* ñʋndɩnaa mba paɖaŋaɣ wiyaʋ ɖɩɣa nɔnɔɔ yɔɔ yɔ pe-nesi tɛɛ. 28 Alɩwaatʋ ndʋ payɩ wiyaʋ kɔŋaɣ Yehowa ɖɩɣa taa yɔ, kandɩyaa kpakaɣ kpayɩŋ ɛnɩ, nɛ pʋwayɩ lɛ papɩsaɣnɩ-ɩ kuduyuu ŋgʋ kɩ-tɛɛ paasɩ-ɩ nɛ paɖaŋ ɩ-yɔɔ yɔ.
29 Nɛ Robowam yɔɔ tɔm ndʋ pɩkazaa yɔ, mbʋ payɩ ɛlaba yɔ, patɩma pɩ-tɔm mbʋ pɩlakaɣ Yuuda awiya alɩwaatʋ taa yɔ pɩ-takayaɣ taa yaa we?+ 30 You kaawɛ Robowam nɛ Yerobowam pɛ-hɛkʋ taa paa ɛzɩmtaa.+ 31 Pʋwayɩ lɛ, Robowam sɩ* nɛ pepimi-i ɛ-cɔzɔnaa cɔlɔ Daviid Tɛtʋ taa.+ Payaɣaɣ e-ɖoo se Amooni tʋ+ Naama. Nɛ ɛ-pɩyalʋ Abiyam*+ pɩsɩ wiyaʋ e-lone taa.