Awiya takayaɣ kajalaɣ ñɩŋga
21 Pɩlabɩ mbʋ nɛ pɩtɛ lɛ, tɔm natʋyʋ la Yizreyɛɛlɩ tʋ Naabɔɔtɩ viiñi hayɩm nabʋyʋ yɔɔ; pɩɩwɛ Yizreyɛɛlɩ,+ Samaarii wiyaʋ Ahaabɩ ɖɩɣa cɔlɔ. 2 Ahaabɩ heyi Naabɔɔtɩ se: «Ha-m ñe-viiñi hayɩm nɛ manpɩsɩ-pʋ ɖozi kaɖaɣ, mbʋ pʋyɔɔ yɔ pɩñɔtɩnɩ man-ɖɩɣa. Nɛ mankaɣ-ŋ cɛlʋʋ viiñi hayɩm mbʋ pɩkpaɖɩ ɖeu yɔ pi-lone taa. Yaa ye ŋsɔɔlaa yɔ, mankaɣ-ŋ hɛyʋʋ pi-liidiye.» 3 Ɛlɛ Naabɔɔtɩ cosi Ahaabɩ se: «Yehowa ɛsɩndaa lɛ, pɩtɩmʋna se mankpaɣ mɔn-cɔzɔnaa ñɩm nɛ maha-ŋ.»+ 4 Nɛ Ahaabɩ pɩsɩ ɛ-ɖɩɣa, ɛ-taa fɛyɩ leleŋ nɛ ɛwɛɛ ɛsɩñɩŋɩyɛ taa mbʋ pʋyɔɔ yɔ Yizreyɛɛlɩ tʋ Naabɔɔtɩ heyi-i se: «Maakaɣ-ŋ cɛlʋʋ mɔn-cɔzɔnaa ñɩm.» Nɛ ɛhɩnɩ ɛ-kaɖʋ yɔɔ, ɛkɛzɩ ɛ-ɛsa nɛ koloŋa yɔɔ nɛ ekizi tɔɔnaɣ tɔɔʋ.
5 Ɛ-halʋ Yezaabɛɛlɩ+ sʋʋ ɛ-cɔlɔ nɛ ɛpɔzɩ-ɩ se: «Ɛbɛ yɔɔ ŋwɛ* laŋwɛɛkɩyɛ taa mbʋ nɛ ŋkiziɣ tɔɔnaɣ tɔɔʋ?» 6 Ɛlɛ cosi-i se: «Mbʋ pʋyɔɔ yɔ meheyi Yizreyɛɛlɩ tʋ Naabɔɔtɩ se: “Ha-m ñe-viiñi hayɩm nɛ mɛhɛyɩ-ŋ pi-lone taa liidiye. Yaa ye ŋsɔɔlaa yɔ, yele nɛ mɛncɛlɩ-ŋ pi-lone taa viiñi hayɩm lɛɛbʋ.” Ɛlɛ ecosi se: “Maakaɣ-ŋ cɛlʋʋ men-viiñi hayɩm.”» 7 Ɛ-halʋ Yezaabɛɛlɩ heyi-i se: «Pɩtɩkɛ ñɛkɛnɩ wiyaʋ nɛ ŋtɔkɩ kewiyitu Izrayɛɛlɩ taa? Kʋyɩ nɛ ŋtɔɔ nabʋyʋ, nɛ ŋyele nɛ ña-laŋɩyɛ taa wɛɛ leleŋ. Mankaɣ-ŋ cɛlʋʋ Yizreyɛɛlɩ tʋ Naabɔɔtɩ viiñi hayɩm.»+ 8 Nɛ ɛma takayɩsɩ Ahaabɩ hɩɖɛ taa nɛ ɛkpaɣ ɛlɛ niye ñɩɣʋ kokooye* nɛ ɛtaaɖɩnɩ-sɩ+ nɛ etiyini-sɩ Naabɔɔtɩ tɛtʋ taa ɛzʋtʋyaa+ nɛ ɛyaa mba pañaŋ-wɛ yɔ. 9 Ɛma takayɩsɩ nzɩ sɩ-taa se: «Isusi se pɔhɔkɩ nɔɔ, nɛ ɩcaɣzɩ Naabɔɔtɩ samaɣ ɛsɩndaa. 10 Nɛ iyele nɛ ɛyaa 2 mba paawazɩɣ pʋyʋ yɔ pacaɣ ɛ-ɛsɩndaa nɛ palɩzɩ ɛ-yɔɔ cɛtɩm aseɣɖe+ nɛ pɔyɔɔdɩ se: “Ŋlɔ nɔɔ kɩdɛkɛdaɣ Ɛsɔ nɛ wiyaʋ pɔ-yɔɔ!”+ Pʋwayɩ lɛ, ɩlɩnɩ-ɩ nɛ ɩyaɣ-ɩ pɛɛ nɛ ɛsɩ.»+
11 Nɛ ɛ-tɛtʋ taa ɛyaa, ɛzʋtʋyaa nɛ ɛyaa mba pañaŋ-wɛ nɛ pɛwɛ ɛ-tɛtʋ taa yɔ, pala ɖeyi ɖeyi ɛzɩ tɔm ndʋ Yezaabɛɛlɩ kaama takayɩsɩ taa nɛ etiyini-wɛ yɔ tɩyɔɔdʋʋ yɔ. 12 Posusi se pɔhɔkɩ nɔɔ, nɛ pacaɣzɩ Naabɔɔtɩ samaɣ ɛsɩndaa. 13 Pʋwayɩ lɛ, ɛyaa 2 mba paawazɩɣ pʋyʋ yɔ pasʋʋ nɛ pacaɣ ɛ-ɛsɩndaa nɛ papaɣzɩ Naabɔɔtɩ yɔɔ lɩzʋʋ cɛtɩm aseɣɖe samaɣ ɛsɩndaa nɛ pɔyɔɔdʋʋ se: «Naabɔɔtɩ lɔ nɔɔ kɩdɛkɛdaɣ Ɛsɔ nɛ wiyaʋ pɔ-yɔɔ!»+ Pʋwayɩ lɛ, powoni-i tɛtʋ kamaɣ yɔɔ nɛ payaɣ-ɩ pɛɛ nɛ ɛsɩ.+ 14 Nɛ petiyi se peheyi Yezaabɛɛlɩ se: «Payaɣ Naabɔɔtɩ pɛɛ nɛ ɛsɩ.»+
15 Yezaabɛɛlɩ tɩɩnɩwa se payaɣ Naabɔɔtɩ pɛɛ nɛ ɛsɩ lɛ, eheyi Ahaabɩ se: «Kʋyɩ nɛ ŋmʋ Yizreyɛɛlɩ tʋ Naabɔɔtɩ viiñi hayɩm nɛ pɩpɩsɩ ña-pʋyʋ,+ mbʋ ekizaa se ɛɛcɛlɩɣ-ŋ nɛ ŋhɛyɩ-ɩ liidiye yɔ; mbʋ pʋyɔɔ yɔ Naabɔɔtɩ tɩtasɩ wɛʋ wezuu. Ɛsɩba.» 16 Ahaabɩ tɩɩnɩwa se Naabɔɔtɩ sɩba lɛ, ɛkʋyɩ se etii Yizreyɛɛlɩ tʋ Naabɔɔtɩ viiñi hayɩm taa nɛ ɛmʋ-pʋ nɛ pɩpɩsɩ ɛ-pʋyʋ.
17 Ɛlɛ Yehowa tɔm talɩ Tisibii tʋ Eliya+ se: 18 «Kʋyɩ, tii nɛ ŋkatɩ Izrayɛɛlɩ wiyaʋ Ahaabɩ weyi ɛwɛ Samaarii+ yɔ. Ɛwɛ Naabɔɔtɩ viiñi hayɩm taa, ewobi peeɖe se ɛmʋ-pʋ nɛ pɩpɩsɩ ɛ-pʋyʋ. 19 Pɩwɛɛ se ŋheyi-i se: “Tɔm tʋnɛ Yehowa yɔɔdʋʋ: ‘Ŋkʋ ɛyʋ+ nɛ ŋmʋ ɖɔɖɔ ɛ-ñɩm na?’”+ Pʋwayɩ lɛ, ŋheyi-i se: “Tɔm tʋnɛ Yehowa yɔɔdʋʋ: ‘Lone nɖɩ ɖɩ-taa hasɩ nezi Naabɔɔtɩ calɩm yɔ, ɖɩ-taa ɖɔɖɔ hasɩ kaɣ nezuu ña-maɣmaɣ ña-calɩm.’”»+
20 Ahaabɩ heyi Eliya se: «Oo mon-koyindu, ye mbʋ ŋlɩ mɔ-yɔɔ!»+ Ɛlɛ cosi-i se: «Malɩ ñɔ-yɔɔ. “Mbʋ pʋyɔɔ yɔ ŋtɛm ña-taa* se ŋlakɩ mbʋ pɩfɛyɩ ɖeu Yehowa ɛsɩndaa yɔ.+ 21 Na, menɖiɣni kɔnʋʋ asɛyʋʋ ñɔ-yɔɔ, nɛ mankaɣ hazʋʋ ña-wayɩ kpɩlɩŋgbɩlɩ nɛ mankaɣ ɖɩzʋʋ Ahaabɩ hɔʋ taa abalaa* tɩŋa,+ pɩkpɛndɩnɩ pɩlabɩmwaa nɛ ajamaa Izrayɛɛlɩ taa.+ 22 Nɛ mankaɣ yebu nɛ ña-ɖɩɣa wɛɛ ɛzɩ Nebatɩ pɩyalʋ Yerobowam ɖɩɣa+ nɛ Ahiya pɩyalʋ Baasa ɖɩɣa yɔ,+ mbʋ pʋyɔɔ yɔ ŋkʋsɩ man-pana nɛ ŋyele nɛ Izrayɛɛlɩ la kɩwɛɛkɩm.” 23 Piyele nɛ Yezaabɛɛlɩ lɛ, Yehowa yɔɔdaa se: “Hasɩ kaɣ tɔɔʋ Yezaabɛɛlɩ caɣ caɣ Yizreyɛɛlɩ kotoŋa taa.+ 24 Weyi ɛkɛ Ahaabɩ tɛ ɛyʋ yɔ, ye ɛsɩbɩ tɛtʋ taa yɔ, hasɩ kaɣ-ɩ tɔɔʋ caɣ caɣ; nɛ weyi ɛsɩkɩ ñɩtʋ taa yɔ, ɛsɔdaa sumasɩ kaɣ-ɩ tɔɔʋ caɣ caɣ.+ 25 Toovenim lɛ, nɔɔyʋ taawɛɛ kpa ɛzɩ Ahaabɩ yɔ,+ weyi ɛtɛm ɛ-taa* se ɛlakɩ mbʋ pɩfɛyɩ ɖeu Yehowa ɛsɩndaa yɔ, weyi eyeba nɛ ɛ-halʋ Yezaabɛɛlɩ+ wɛɛnɩ ɖoŋ ɛ-yɔɔ yɔ. 26 Ɛlabɩ mbʋ pɩfɛyɩ ɖeu kpem yɔ nɛ ɛtɩŋ sɩʋ kpelisi nzɩ sɩwɛ kiniŋ yɔ,* ɛzɩ Amoori mba tɩŋa kaalabʋ yɔ, mba Yehowa ɖɔɔnɩ-wɛ Izrayɛɛlɩ mba ɛsɩndaa yɔ.”»+
27 Ahaabɩ tɩɩnɩ tɔm ndʋ lɛ, ɛcɩyɩ e-tokonaa nɛ esuu fɔlɔtɔnaa e-tomnaɣ yɔɔ; nɛ ɛpaɣzɩ nɔɔ hɔkʋʋ nɛ ɛwɛɛ ɛhɩnɩɣ fɔlɔtɔnaa taa nɛ ɛɖɔŋnɩ laŋwɛɛkɩyɛ. 28 Nɛ Yehowa tɔm talɩ Tisibii tʋ Eliya se: 29 «Ŋna ɛzɩma mɔ-yɔɔ lɛ Ahaabɩ luzi ɛ-tɩ yɔ?+ Eluzi ɛ-tɩ mɛ-ɛsɩndaa nɛ pʋyɔɔ lɛ, maakaɣ kɔnʋʋ asɛyʋʋ e-wezuu caɣʋ alɩwaatʋ taa. Mankaɣ ɛ-ɖɩɣa yɔɔ kɔnʋʋ asɛyʋʋ ɛ-pɩyalʋ alɩwaatʋ taa.»+